¹

И во осмоєна́десять лѣ́то ца́рства ієровоа́ма сы́на нава́това, воцари́ся Аві́а сы́нъ ровоа́мль надъ Іу́дою,

¹

И҆ во ѻ҆смоена́десѧть лѣ́то ца́рства і҆еровоа́ма сы́на нава́това, воцари́сѧ а҆ві́а сы́нъ ровоа́мль над̾ і҆ꙋ́дою,

²

и три́ лѣ́та ца́рствова во Ієрусали́мѣ. И́мя же ма́тере єго́ мааха́, дщи́ Авессало́мля.

²

и҆ трѝ лѣ̑та ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ мааха̀, дщѝ а҆вессалѡ́млѧ.

³

И хожда́ше во всѣ́хъ грѣсѣ́хъ отца́ своєго́, я́же сотвори́ предъ ни́мъ, и не бѣ́ се́рдце єго́ соверше́но съ Го́сподемъ Бо́гомъ єго́, я́коже се́рдце даві́да отца́ єго́:

³

И҆ хожда́ше во всѣ́хъ грѣсѣ́хъ ѻ҆тца̀ своегѡ̀, ꙗ҆̀же сотворѝ пред̾ ни́мъ, и҆ не бѣ̀ се́рдце є҆гѡ̀ соверше́но съ гдⷭ҇емъ бг҃омъ є҆гѡ̀, ꙗ҆́коже се́рдце даві́да ѻ҆тца̀ є҆гѡ̀:

⁴

я́ко даві́да ра́ди оста́ви єму́ Госпо́дь Бо́гъ єго́ оста́нокъ во Ієрусали́мѣ, да возста́витъ по не́мъ ча́да єго́ и утверди́тъ Ієрусали́мъ,

⁴

ꙗ҆́кѡ даві́да ра́ди ѡ҆ста́ви є҆мꙋ̀ гдⷭ҇ь бг҃ъ є҆гѡ̀ ѡ҆ста́нокъ во і҆ерⷭ҇ли́мѣ, да возста́витъ по не́мъ ча̑да є҆гѡ̀ и҆ оу҆тверди́тъ і҆ерⷭ҇ли́мъ,

⁵

поне́же сотвори́ даві́дъ пра́воє предъ Го́сподемъ и не уклони́ся от всѣ́хъ, я́же заповѣ́да єму́ вся́ дни́ живота́ єго́, кромѣ́ сло́ва урі́и Хетте́анина.

⁵

поне́же сотворѝ даві́дъ пра́вое пред̾ гдⷭ҇емъ и҆ не оу҆клони́сѧ ѿ всѣ́хъ, ꙗ҆̀же заповѣ́да є҆мꙋ̀ всѧ̑ дни̑ живота̀ є҆гѡ̀, кромѣ̀ сло́ва оу҆рі́и хетте́анина.

⁶

И бра́нь бѣ́ между́ ровоа́момъ и между́ ієровоа́момъ во вся́ дни́ живота́ и́хъ.

⁶

И҆ бра́нь бѣ̀ междꙋ̀ ровоа́момъ и҆ междꙋ̀ і҆еровоа́момъ во всѧ̑ дни̑ живота̀ и҆́хъ.

⁷

И про́чая слове́съ Аві́иныхъ, и вся́ я́же сотвори́, не се́ ли, сія́ напи́сана въ кни́зѣ сло́въ дні́й царе́й Іу́диныхъ? И бра́нь бѣ́ между́ Аві́єю и между́ ієровоа́момъ.

⁷

И҆ прѡ́чаѧ слове́съ а҆ві́иныхъ, и҆ всѧ̑ ꙗ҆̀же сотворѝ, не се́ ли, сїѧ̑ напи̑сана въ кни́зѣ сло́въ дні́й царе́й і҆ꙋ́диныхъ; И҆ бра́нь бѣ̀ междꙋ̀ а҆ві́ею и҆ междꙋ̀ і҆еровоа́момъ.

⁸

И у́спе Аві́а со отцы́ свои́ми въ двадеся́тоє лѣ́то ієровоа́ма, и погребо́ша єго́ со отцы́ єго́ во гра́дѣ даві́довѣ. И воцари́ся а́са сы́нъ єго́ вмѣ́сто єго́.

⁸

И҆ оу҆́спе а҆ві́а со ѻ҆тцы̑ свои́ми въ двадесѧ́тое лѣ́то і҆еровоа́ма, и҆ погребо́ша є҆го̀ со ѻ҆тцы̑ є҆гѡ̀ во гра́дѣ даві́довѣ. И҆ воцари́сѧ а҆́са сы́нъ є҆гѡ̀ вмѣ́стѡ є҆гѡ̀.

⁹

И въ лѣ́то двадеся́тоє ієровоа́ма царя́ Ізра́илева, ца́рствоваше а́са надъ Іу́дою,

⁹

И҆ въ лѣ́то двадесѧ́тое і҆еровоа́ма царѧ̀ і҆и҃лева, ца́рствоваше а҆́са над̾ і҆ꙋ́дою,

¹⁰

и четы́редесять и єди́но лѣ́то ца́рствова во Ієрусали́мѣ. И́мя же ма́тере єго́ Ана́, дщи́ Авессало́мля.

¹⁰

и҆ четы́редесѧть и҆ є҆ди́но лѣ́то ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ а҆на̀, дщѝ а҆вессалѡ́млѧ.

¹¹

И сотвори́ а́са пра́воє предъ Го́сподемъ, я́коже даві́дъ оте́цъ єго́,

¹¹

И҆ сотворѝ а҆́са пра́вое пред̾ гдⷭ҇емъ, ꙗ҆́коже даві́дъ ѻ҆те́цъ є҆гѡ̀,

¹²

и отъя́ скве́рная от земли́, и искорени́ вся́ изва́янная, я́же сотвори́ша отцы́ єго́,

¹²

и҆ ѿѧ̀ сквє́рнаѧ ѿ землѝ, и҆ и҆скоренѝ всѧ̑ и҆зва̑ѧннаѧ, ꙗ҆̀же сотвори́ша ѻ҆тцы̀ є҆гѡ̀,

¹³

и Ану́ ма́терь свою́ отста́ви є́же не владѣ́ти є́й, поне́же сотвори́ со́нмище въ дубра́вѣ своє́й: и изсѣче́ а́са га́й єя́ и сожже́ огне́мъ въ пото́цѣ ке́дрстѣмъ:

¹³

и҆ а҆нꙋ̀ ма́терь свою̀ ѿста́ви є҆́же не владѣ́ти є҆́й, поне́же сотворѝ со́нмище въ дꙋбра́вѣ свое́й: и҆ и҆зсѣчѐ а҆́са га́й є҆ѧ̀ и҆ сожжѐ ѻ҆гне́мъ въ пото́цѣ ке́дрстѣмъ:

¹⁴

высо́кихъ же не искорени́, оба́че се́рдце а́сы бѣ́ соверше́нно предъ Го́сподемъ во вся́ дни́ єго́:

¹⁴

высо́кихъ же не и҆скоренѝ, ѻ҆ба́че се́рдце а҆́сы бѣ̀ соверше́нно пред̾ гдⷭ҇емъ во всѧ̑ дни̑ є҆гѡ̀:

¹⁵

и внесе́ столпы́ отца́ своєго́, и столпы́ своя́ внесе́ во хра́мъ Госпо́день сре́бряны и зла́ты, и сосу́ды.

¹⁵

и҆ внесѐ столпы̀ ѻ҆тца̀ своегѡ̀, и҆ столпы̀ своѧ̑ внесѐ во хра́мъ гдⷭ҇ень срє́брѧны и҆ зла̑ты, и҆ сосꙋ́ды.

¹⁶

И бра́нь бѣ́ между́ а́сою и между́ Ваа́сомъ царе́мъ Ізра́илевымъ во вся́ дни́ и́хъ.

¹⁶

И҆ бра́нь бѣ̀ междꙋ̀ а҆́сою и҆ междꙋ̀ ваа́сомъ царе́мъ і҆и҃левымъ во всѧ̑ дни̑ и҆́хъ.

¹⁷

И взы́де Ваа́са ца́рь Ізра́илевъ на Іу́ду и созда́ ра́му, я́ко не бы́ти на исхожде́ніє и вхожде́ніє а́сѣ царю́ Іу́дину.

¹⁷

И҆ взы́де ваа́са ца́рь і҆и҃левъ на і҆ꙋ́дꙋ и҆ созда̀ ра́мꙋ, ꙗ҆́кѡ не бы́ти на и҆схожде́нїе и҆ вхожде́нїе а҆́сѣ царю̀ і҆ꙋ́динꙋ.

¹⁸

И взя́ а́са все́ сребро́ и зла́то обрѣ́тшеєся въ сокро́вищахъ до́му Госпо́дня и въ сокро́вищахъ до́му царе́ва и даде́ я́ въ ру́цѣ о́трокъ свои́хъ: и посла́ и́хъ ца́рь а́са ко сы́ну Аде́рову сы́ну тавере́ма во рамма́нъ, ко сы́ну азаи́ла, царя́ Си́рскаго, живу́щаго въ дама́сцѣ, глаго́ля:

¹⁸

И҆ взѧ̀ а҆́са всѐ сребро̀ и҆ зла́то ѡ҆брѣ́тшеесѧ въ сокро́вищахъ до́мꙋ гдⷭ҇нѧ и҆ въ сокро́вищахъ до́мꙋ царе́ва и҆ дадѐ ѧ҆̀ въ рꙋ́цѣ ѻ҆́трѡкъ свои́хъ: и҆ посла̀ и҆̀хъ ца́рь а҆́са ко сы́нꙋ а҆де́ровꙋ сы́нꙋ тавере́ма во рамма́нъ, ко сы́нꙋ а҆заи́ла, царѧ̀ сѵ́рскагѡ, живꙋ́щагѡ въ дама́сцѣ, глаго́лѧ:

¹⁹

положи́ завѣ́тъ между́ мно́ю и тобо́ю, и между́ отце́мъ мои́мъ и отце́мъ твои́мъ: се́, посла́хъ ти́ да́ры, сребро́ и зла́то: пріиди́, разруши́ завѣ́тъ тво́й, и́же со Ваа́сою царе́мъ Ізра́илевымъ, да отъи́детъ от мене́.

¹⁹

положѝ завѣ́тъ междꙋ̀ мно́ю и҆ тобо́ю, и҆ междꙋ̀ ѻ҆тце́мъ мои́мъ и҆ ѻ҆тце́мъ твои́мъ: сѐ, посла́хъ тѝ да́ры, сребро̀ и҆ зла́то: прїидѝ, разрꙋшѝ завѣ́тъ тво́й, и҆́же со ваа́сою царе́мъ і҆и҃левымъ, да ѿи́детъ ѿ менє̀.

²⁰

И послу́ша сы́нъ Аде́ровъ царя́ а́сы, и посла́ воєво́ды си́лъ свои́хъ на гра́ды Ізра́илевы, и порази́ша Аі́на и Да́на, и Аве́ля, до́му маахі́ина, и ве́сь хеннере́ѳъ, да́же до всея́ земли́ Нефѳалі́мли.

²⁰

И҆ послꙋ́ша сы́нъ а҆де́ровъ царѧ̀ а҆́сы, и҆ посла̀ воевѡ́ды си́лъ свои́хъ на гра́ды і҆и҃лєвы, и҆ порази́ша а҆і́на и҆ да́на, и҆ а҆ве́лѧ, до́мꙋ маахі́ина, и҆ ве́сь хеннере́ѳъ, да́же до всеѧ̀ землѝ нефѳалі́мли.

²¹

И бы́сть я́ко услы́ша Ваа́са, и оста́ви созида́ти ра́му, и возврати́ся во Ѳе́рсу.

²¹

И҆ бы́сть ꙗ҆́кѡ оу҆слы́ша ваа́са, и҆ ѡ҆ста́ви созида́ти ра́мꙋ, и҆ возврати́сѧ во ѳе́рсꙋ.

²²

Ца́рь же а́са заповѣ́да всему́ Іу́дѣ во єнакі́мѣ, и взя́ша ка́меніє изъ ра́мы и древа́ єя́, и́миже основа́ Ваа́са, и созда́ въ ни́хъ ца́рь а́са вся́къ хо́лмъ Веніамі́нь и стра́жбища.

²²

Ца́рь же а҆́са заповѣ́да всемꙋ̀ і҆ꙋ́дѣ во є҆накі́мѣ, и҆ взѧ́ша ка́менїе и҆з̾ ра́мы и҆ древа̀ є҆ѧ̀, и҆́миже ѡ҆снова̀ ваа́са, и҆ созда̀ въ ни́хъ ца́рь а҆́са всѧ́къ хо́лмъ венїамі́нь и҆ стра̑жбища.

²³

Про́чая же слове́съ а́синыхъ, и вся́ си́ла єго́, и вся́ я́же сотвори́, и гра́ды я́же созда́, не се́ ли, сія́ пи́сана су́ть въ кни́зѣ слове́съ дні́й царе́й Іу́диныхъ? Оба́че во вре́мя ста́рости своєя́ нача́тъ болѣ́ти нога́ма свои́ма:

²³

Прѡ́чаѧ же слове́съ а҆́синыхъ, и҆ всѧ̑ си́ла є҆гѡ̀, и҆ всѧ̑ ꙗ҆̀же сотворѝ, и҆ гра́ды ꙗ҆̀же созда̀, не се́ ли, сїѧ̑ пи̑сана сꙋ́ть въ кни́зѣ слове́съ дні́й царе́й і҆ꙋ́диныхъ; Ѻ҆ба́че во вре́мѧ ста́рости своеѧ̀ нача́тъ болѣ́ти нога́ма свои́ма:

²⁴

и у́спе а́са со отцы́ свои́ми, и погребе́нъ бы́сть во гра́дѣ даві́да отца́ своєго́. И воцари́ся Іосафа́тъ сы́нъ єго́ вмѣ́сто єго́.

²⁴

и҆ оу҆́спе а҆́са со ѻ҆тцы̑ свои́ми, и҆ погребе́нъ бы́сть во гра́дѣ даві́да ѻ҆тца̀ своегѡ̀. И҆ воцари́сѧ і҆ѡсафа́тъ сы́нъ є҆гѡ̀ вмѣ́стѡ є҆гѡ̀.

²⁵

Нава́тъ же сы́нъ ієровоа́мль нача́ ца́рствовати надъ Ізра́илемъ во второ́є лѣ́то а́сы царя́ Іу́дина, и ца́рствова надъ Ізра́илемъ два́ лѣ́та,

²⁵

Нава́тъ же сы́нъ і҆еровоа́мль нача̀ ца́рствовати над̾ і҆и҃лемъ во второ́е лѣ́то а҆́сы царѧ̀ і҆ꙋ́дина, и҆ ца́рствова над̾ і҆и҃лемъ два̀ лѣ̑та,

²⁶

и сотвори́ лука́воє предъ Го́сподемъ, и хожда́ше путе́мъ отца́ своєго́ и во грѣсѣ́хъ єго́, и́миже согрѣши́ти сотвори́ Ізра́илю.

²⁶

и҆ сотворѝ лꙋка́вое пред̾ гдⷭ҇емъ, и҆ хожда́ше пꙋте́мъ ѻ҆тца̀ своегѡ̀ и҆ во грѣсѣ́хъ є҆гѡ̀, и҆́миже согрѣши́ти сотворѝ і҆и҃лю.

²⁷

И обсѣ́де єго́ Ваа́са сы́нъ Ахі́инъ въ дому́ велаа́на сы́на Ахі́ина, и уби́ єго́ во гаваѳо́нѣ иноплеме́нничи: нава́тъ же и ве́сь Ізра́иль обсѣдо́ша гаваѳо́нъ.

²⁷

И҆ ѡ҆бсѣ́де є҆го̀ ваа́са сы́нъ а҆хі́инъ въ домꙋ̀ велаа́на сы́на а҆хі́ина, и҆ оу҆бѝ є҆го̀ во гаваѳѡ́нѣ и҆ноплеме́нничи: нава́тъ же и҆ ве́сь і҆и҃ль ѡ҆бсѣдо́ша гаваѳѡ́нъ.

²⁸

И умертви́ єго́ Ваа́са въ лѣ́то тре́тіє а́сы царя́ Іу́дина, и воцари́ся вмѣ́сто єго́.

²⁸

И҆ оу҆мертвѝ є҆го̀ ваа́са въ лѣ́то тре́тїе а҆́сы царѧ̀ і҆ꙋ́дина, и҆ воцари́сѧ вмѣ́стѡ є҆гѡ̀.

²⁹

И бы́сть єгда́ воцари́ся, изби́ ве́сь до́мъ ієровоа́мль и не оста́ви ничто́же от всего́ дыха́нія ієровоа́мля, до́ндеже искорени́ и́хъ по глаго́лу Госпо́дню, єго́же глаго́ла руко́ю раба́ своєго́ Ахі́и Силоні́тскаго,

²⁹

И҆ бы́сть є҆гда̀ воцари́сѧ, и҆збѝ ве́сь до́мъ і҆еровоа́мль и҆ не ѡ҆ста́ви ничто́же ѿ всегѡ̀ дыха́нїѧ і҆еровоа́млѧ, до́ндеже и҆скоренѝ и҆̀хъ по гл҃ꙋ гдⷭ҇ню, є҆го́же гл҃а рꙋко́ю раба̀ своегѡ̀ а҆хі́и силѡні́тскагѡ,

³⁰

грѣ́хъ ра́ди ієровоа́млихъ, и́же согрѣши́, и́же введе́ во грѣ́хъ Ізра́иля, и въ прогнѣ́ваніи єго́, и́мже прогнѣ́ва Го́спода Бо́га Ізра́илева.

³⁰

грѣ̑хъ ра́ди і҆еровоа́млихъ, и҆́же согрѣшѝ, и҆́же введѐ во грѣ́хъ і҆и҃лѧ, и҆ въ прогнѣ́ванїи є҆гѡ̀, и҆́мже прогнѣ́ва гдⷭ҇а бг҃а і҆и҃лева.

³¹

И про́чая словеса́ нава́та, и вся́ я́же сотвори́, не се́ ли, сія́ пи́сана су́ть въ кни́зѣ слове́съ дні́й царе́й Ізра́илевыхъ?

³¹

И҆ прѡ́чаѧ словеса̀ нава́та, и҆ всѧ̑ ꙗ҆̀же сотворѝ, не се́ ли, сїѧ̑ пи̑сана сꙋ́ть въ кни́зѣ слове́съ дні́й царе́й і҆и҃левыхъ;

³²

И бя́ше бра́нь между́ а́сою [царе́мъ Іу́динымъ] и Ваа́сою царе́мъ Ізра́илевымъ во вся́ дни́ и́хъ.

³²

И҆ бѧ́ше бра́нь междꙋ̀ а҆́сою (царе́мъ і҆ꙋ́динымъ) и҆ ваа́сою царе́мъ і҆и҃левымъ во всѧ̑ дни̑ и҆́хъ.

³³

И въ тре́тіє лѣ́то а́сы царя́ Іу́дина ца́рствова Ваа́са сы́нъ Ахі́инъ надъ всѣ́мъ Ізра́илемъ во Ѳе́рсѣ два́десять и четы́ре лѣ́та,

³³

И҆ въ тре́тїе лѣ́то а҆́сы царѧ̀ і҆ꙋ́дина ца́рствова ваа́са сы́нъ а҆хі́инъ над̾ всѣ́мъ і҆и҃лемъ во ѳе́рсѣ два́десѧть и҆ четы́ре лѣ̑та,

³⁴

и сотвори́ лука́воє предъ Го́сподемъ, и и́де путе́мъ ієровоа́ма сы́на нава́това, и во грѣсѣ́хъ єго́, и́миже въ согрѣше́ніє приведе́ Ізра́иля.

³⁴

и҆ сотворѝ лꙋка́вое пред̾ гдⷭ҇емъ, и҆ и҆́де пꙋте́мъ і҆еровоа́ма сы́на нава́това, и҆ во грѣсѣ́хъ є҆гѡ̀, и҆́миже въ согрѣше́нїе приведѐ і҆и҃лѧ.