Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
И бы́сть по глаго́лѣхъ си́хъ, и віногра́дъ єди́нъ бѣ́ у навуѳе́а Ієзраилі́тянина при гумнѣ́ Ахаа́ва царя́ самарі́йска.
2
И рече́ Ахаа́въ къ навуѳе́ю, глаго́ля: да́ждь ми́ віногра́дъ тво́й, и бу́детъ ми́ во вертогра́дъ зе́лій, я́ко бли́зъ є́сть се́й до́му моєго́, и да́мъ ти́ вмѣ́сто сего́ віногра́дъ и́нъ до́бръ па́че сего́: а́ще же уго́дно предъ тобо́ю, да́мъ ти́ сребро́ измѣ́ну віногра́да сего́, и бу́детъ ми́ во вертогра́дъ зе́лій.
3
И рече́ навуѳе́й ко Ахаа́ву: да не бу́детъ мнѣ́ от Го́спода Бо́га моєго́ да́ти наслѣ́діє оте́цъ мои́хъ тебѣ́.
4
И пріи́де Ахаа́въ въ до́мъ сво́й смуще́нъ и оскорбле́нъ о словеси́, є́же глаго́ла къ нему́ навуѳе́й Ієзраилі́тянинъ, и рече́: не да́мъ тебѣ́ наслѣ́дія оте́цъ мои́хъ. И бы́сть ду́хъ Ахаа́вль смуще́нъ, и у́спе на одрѣ́ своє́мъ и покры́ лице́ своє́ и не яде́ хлѣ́ба.
5
И вни́де Ієзаве́ль жена́ єго́ къ нему́ и рече́ къ нему́: что́ ду́хъ тво́й є́сть смуще́нъ, и не я́си ты́ хлѣ́ба?
6
И рече́ къ не́й [ахаа́въ]: я́ко глаго́лахъ навуѳе́ю Ієзраилі́тянину глаго́ля: да́ждь ми́ віногра́дъ тво́й за сребро́: и а́ще хо́щеши, да́мъ ти́ віногра́дъ и́нъ вмѣ́сто єго́: и рече́: не да́мъ ти́ наслѣ́дія оте́цъ мои́хъ.
7
И рече́ къ нему́ Ієзаве́ль жена́ єго́: ты́ ли ны́нѣ твори́ши та́ко, царю́ Ізра́илевъ? воста́ни и я́ждь хлѣ́бъ и молча́ бу́ди, а́зъ же да́мъ ти́ віногра́дъ навуѳе́а Ієзраилі́тянина.
8
И написа́ кни́гу на и́мя Ахаа́вле, и запеча́та ю́ печа́тію єго́, и посла́ кни́гу къ старѣ́йшинамъ и свобо́днымъ живу́щымъ съ навуѳе́ємъ.
9
И пи́сано бя́ше въ кни́зѣ та́ко: пости́теся посто́мъ и посади́те навуѳе́а и въ нача́лѣ люді́й:
10
и посади́те два́ му́жа сы́ны законопресту́пныхъ проти́ву єму́, и да засвидѣ́телствуютъ о не́мъ, глаго́люще, я́ко [не] благослови́ Бо́га и царя́: и да изведу́тъ єго́ и побію́тъ ка́меніємъ, и да у́мретъ.
11
И сотвори́ша та́ко му́жіє гра́да єго́ старѣ́йшіи и свобо́дніи живу́щіи во гра́дѣ єго́, я́коже посла́ къ ни́мъ Ієзаве́ль, и я́коже пи́сано бя́ше въ кни́гахъ, я́же посла́ къ ни́мъ:
12
и нареко́ша по́стъ, и посади́ша навуѳе́а въ нача́лѣ люді́й,
13
и пріидо́ста два́ му́жа сы́нове законопресту́пныхъ и сѣдо́ста проти́ву єго́, и засвидѣ́телствоваша на него́ му́жіє отсту́пницы навуѳе́овы предъ людьми́, глаго́люще: се́й [не] благослови́ Бо́га и царя́. И изведо́ша єго́ во́нъ изъ гра́да и поби́ша єго́ ка́меніємъ, и у́мре.
14
И посла́ша ко Ієзаве́ли, глаго́люще: ка́меніємъ побіє́нъ бы́сть навуѳе́й и у́мре.
15
И бы́сть єгда́ услы́ша Ієзаве́ль глаго́лющихъ, я́ко побіє́нъ навуѳе́й и у́мре, и рече́ Ієзаве́ль ко Ахаа́ву: воста́ни, наслѣ́дуй віногра́дъ навуѳе́а Ієзраилі́тянина, и́же не взя́ у тебе́ сребра́, и уже́ нѣ́сть навуѳе́й жи́въ, но у́мре.
16
И бы́сть єгда́ услы́ша Ахаа́въ, я́ко убіє́нъ бы́сть навуѳе́й Ієзраилі́тянинъ, и раздра́ ри́зы своя́ и облече́ся во вре́тище. И бы́сть по си́хъ, и воста́ и сни́де Ахаа́въ въ віногра́дъ навуѳе́а Ієзраилі́тянина наслѣ́дити єго́.
17
И рече́ Госпо́дь ко иліи́ Ѳесві́тянину, глаго́ля:
18
воста́ни и сни́ди на срѣ́теніє Ахаа́ву царю́ Ізра́илеву, и́же въ самарі́и, се́ бо, се́й въ віногра́дѣ навуѳе́євѣ, я́ко сни́де та́мо наслѣ́дити єго́:
19
и рече́ши єму́, глаго́ля: си́це глаго́летъ Госпо́дь: поне́же ты́ уби́лъ єси́ [навуѳе́а] и прія́лъ єси́ въ наслѣ́діє [віногра́дъ єго́], сего́ ра́ди та́ко глаго́летъ Госпо́дь: на мѣ́стѣ, идѣ́же полиза́ша свиніи́ и пси́ кро́вь єго́, та́мо поли́жутъ и кро́вь твою́, и блудни́цы измы́ются въ кро́ви твоє́й.
20
И рече́ Ахаа́въ ко иліи́: обрѣ́лъ ли єси́ мя́, вра́же мо́й? И рече́ иліа́: обрѣто́хъ: поне́же ты́ всу́є про́данъ єси́ сотвори́ти лука́воє предъ Го́сподемъ, во є́же разгнѣ́вати єго́:
21
си́це глаго́летъ Госпо́дь: се́, а́зъ наведу́ на тя́ зла́я и попалю́ за́дняя твоя́, и искореню́ Ахаа́вля моча́щагося къ стѣнѣ́, и содержи́мыя и оста́вшихся во Ізра́или:
22
и преда́мъ до́мъ тво́й я́коже до́мъ ієровоа́ма сы́на нава́това, и я́коже до́мъ Ваа́сы сы́на Ахі́ина, о прогнѣ́ваніихъ, и́миже прогнѣ́валъ мя́ єси́, и грѣ́шити сотвори́лъ єси́ Ізра́иля.
23
И ко Ієзаве́ли рече́ Госпо́дь, глаго́ля: пси́ снѣдя́тъ ю́ въ предгра́діи Ієзрає́ля:
24
уме́ршаго Ахаа́вля во гра́дѣ снѣдя́тъ пси́, и уме́ршаго єго́ на по́ли снѣдя́тъ пти́цы небе́сныя:
25
и въ суєтѣ́ ты́ єси́, Ахаа́ве, и́же про́данъ бы́сть сотвори́ти лука́воє предъ Го́сподемъ, я́ко преврати́ єго́ Ієзаве́ль жена́ єго́.
26
И омерзи́ся зѣло́, є́же ходи́ти вслѣ́дъ ме́рзостей, я́же сотвори́ Аморре́й, єго́же истреби́ Госпо́дь от лица́ сыно́въ Ізра́илевыхъ.
27
И бы́сть єгда́ услы́ша Ахаа́въ словеса́ сія́, умили́ся от лица́ Госпо́дня, и идя́ше пла́чася, и раздра́ ри́зы своя́, и препоя́сася вре́тищемъ по тѣ́лу своєму́ и пости́ся: и бѣ́ облече́нъ во вре́тище от дне́, въ о́ньже уби́ навуѳе́а Ієзраилі́тянина, и хожда́ше ско́рбенъ.
28
И бы́сть глаго́лъ Госпо́день руко́ю раба́ єго́ иліи́ о Ахаа́вѣ,
29
и рече́ Госпо́дь: ви́дѣлъ ли єси́, я́ко умили́ся Ахаа́въ от лица́ моєго́? сего́ ра́ди не наведу́ зла́ во дне́хъ єго́: но во дне́хъ сы́на єго́ наведу́ зло́ на до́мъ єго́.