Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
И посла́ хіра́мъ ца́рь ти́рскій о́троки своя́ къ Соломо́ну: услы́ша бо, я́ко пома́заша єго́ на ца́рство вмѣ́сто даві́да отца́ єго́, я́ко любя́ше хіра́мъ даві́да во вся́ дни́.
2
И посла́ Соломо́нъ къ хіра́му, глаго́ля:
3
ты́ вѣ́си отца́ моєго́ даві́да, я́ко не возмо́же созда́ти до́му и́мени Го́спода Бо́га моєго́, от лица́ проти́вныхъ, окружи́вшихъ єго́, до́ндеже даде́ я́ Госпо́дь подъ стопы́ но́гъ єго́:
4
и ны́нѣ упоко́и Госпо́дь Бо́гъ мо́й мнѣ́ о́крестъ, нѣ́сть навѣ́тника, ниже́ сопроти́вника лука́ваго:
5
и се́, а́зъ глаго́лю созда́ти до́мъ и́мени Го́спода Бо́га моєго́, я́коже глаго́ла Госпо́дь Бо́гъ къ даві́ду отцу́ моєму́, глаго́ля: сы́нъ тво́й, єго́же да́мъ вмѣ́сто тебе́ на престо́лъ тво́й, то́й сози́ждетъ до́мъ и́мени моєму́:
6
и ны́нѣ заповѣ́ждь, да насѣку́тъ ми́ дре́въ от Ліва́на, и се́, раби́ мои́ съ рабы́ твои́ми, и мзду́ трудо́въ твои́хъ да́мъ ти́ по всему́ єли́ка рече́ши, поне́же ты́ вѣ́си, я́ко нѣ́сть на́мъ вѣ́дущаго древа́ сѣщи́, я́коже Сідо́няне.
7
И бы́сть єгда́ услы́ша хіра́мъ словеса́ Соломо́ня, возра́довася зѣло́ и рече́: благослове́нъ Бо́гъ дне́сь, и́же даде́ даві́ду сы́на разу́мна надъ людьми́ си́ми мно́гими.
8
И посла́ хіра́мъ къ Соломо́ну, глаго́ля: слы́шахъ о всѣ́хъ, и́хже ра́ди посла́лъ єси́ ко мнѣ́: а́зъ сотворю́ все́ хотѣ́ніє твоє́ о древа́хъ ке́дровыхъ и пе́вговыхъ:
9
слуги́ мои́ изнесу́тъ я́ от Ліва́на къ мо́рю, и а́зъ положу́ я́ въ складе́нія на мѣ́сто, идѣ́же возвѣсти́ши мнѣ́, и довезу́ я́ та́мо: и ты́ во́змеши, и сотвори́ши хотѣ́ніє моє́, є́же да́ти хлѣ́бы до́му моєму́.
10
И бѣ́ хіра́мъ дая́ Соломо́ну ке́дры и пе́вги и всю́ во́лю єго́.
11
И даде́ Соломо́нъ хіра́му два́десять ты́сящъ мѣ́ръ пшени́цы, и пи́щу до́му єго́, и два́десять ты́сящъ мѣ́ръ єле́а чи́стаго: по сему́ дава́ше Соломо́нъ хіра́му на вся́ко лѣ́то.
12
И Госпо́дь даде́ Соломо́ну прему́дрость, я́коже глаго́ла єму́. И бѣ́ ми́ръ между́ хіра́момъ и между́ Соломо́номъ, и положи́ша завѣ́тъ между́ собо́ю.
13
И взя́ ца́рь да́нь от всего́ Ізра́иля, и бѣ́ да́нь три́десять ты́сящъ муже́й.
14
И посла́ я́ въ Ліва́нъ, де́сять ты́сящъ на ме́сяцъ въ премѣ́ну: ме́сяцъ бы́ша въ Ліва́нѣ и два́ ме́сяца въ дому́ своє́мъ: и бя́ше Адоніра́мъ надъ да́нію.
15
И бя́ше Соломо́ну се́дмьдесятъ ты́сящъ нося́щихъ бремена́ и о́смьдесятъ ты́сящъ сѣку́щихъ ка́меніє въ горѣ́,
16
кромѣ́ старѣ́йшинъ приста́вленыхъ надъ дѣла́ми Соломо́ними, три́ ты́сящы и ше́сть со́тъ приста́вникъ дѣ́лающихъ дѣла́.
17
И заповѣ́да ца́рь, и взя́ша ка́меніє вели́коє, ка́меніє честно́є на основа́ніє хра́ма, и ка́меніє нете́саноє.
18
И истеса́ша сы́нове Соломо́ни и сы́нове хіра́мли и каменосѣ́чцы Гева́лстіи: и изгото́виша ка́менія и древа́ въ три́ лѣ́та.