¹

Ста́рцы и́же въ ва́съ молю́, я́ко ста́рецъ сы́й и свидѣ́тель Христо́вымъ страсте́мъ, и́же и хотя́щей сла́вѣ яви́тися о́бщникъ:

²

паси́те є́же въ ва́съ ста́до Бо́жіє, посѣща́юще не ну́ждею, но во́лею и по Бо́зѣ, ниже́ непра́ведными прибы́тки, но усе́рдно,

³

ни я́ко облада́юще при́чту, но о́брази быва́йте ста́ду:

⁴

и я́вльшуся пастыренача́лнику, пріи́мете неувяда́ємый сла́вы вѣне́цъ.

⁵

Та́коже ю́ніи повини́теся ста́рцемъ: вси́ же дру́гъ дру́гу повину́ющеся, смиреному́дріє стяжи́те, зане́ Бо́гъ го́рдымъ проти́вится, смире́ннымъ же дає́тъ благода́ть.

⁶

(Зач. 63) Смири́теся у́бо подъ крѣ́пкую ру́ку Бо́жію, да вы́ вознесе́тъ во вре́мя:

⁷

всю́ печа́ль ва́шу возве́ргше На́нь, я́ко То́й пече́тся о ва́съ.

⁸

Трезви́теся, бо́дрствуйте, зане́ супоста́тъ ва́шъ діа́волъ, я́ко ле́въ ры́кая, хо́дитъ, искі́й кого́ поглоти́ти:

⁹

єму́же проти́витеся тве́рди вѣ́рою, вѣ́дуще, я́ко тѣ́же стра́сти случа́ются ва́шему бра́тству, є́же въ мі́рѣ.

¹⁰

Бо́гъ же вся́кія благода́ти, призва́вый ва́съ въ вѣ́чную Свою́ сла́ву о Христѣ́ Іису́сѣ, ма́ло пострада́вшыя, То́й да соверши́тъ вы́, да утверди́тъ, да укрѣпи́тъ, да оснує́тъ.

¹¹

Тому́ сла́ва и держа́ва во вѣ́ки вѣко́въ. Ами́нь.

¹²

Сілуа́номъ ва́мъ вѣ́рнымъ бра́томъ, я́ко непщу́ю, вма́лѣ написа́хъ, моля́ и засвидѣ́телствуя се́й бы́ти и́стиннѣй благода́ти Бо́жієй, въ не́йже стоите́.

¹³

Цѣлу́єтъ вы́ я́же въ Вавило́нѣ соизбра́нная, и Ма́рко сы́нъ мо́й.

¹⁴

Цѣлу́йте дру́гъ дру́га лобза́ніємъ любве́. Ми́ръ ва́мъ всѣ́мъ о Христѣ́ Іису́сѣ. Ами́нь.