¹

И рече́ даві́дъ въ се́рдцы своє́мъ, глаго́ля: ны́нѣ впаду́ въ де́нь єди́нъ въ ру́ки Сау́ли, и не бу́детъ ми́ бла́го, а́ще не спасу́ся въ земли́ иноплеме́нничи, и преста́нетъ Сау́лъ иска́ти мене́ во вся́комъ предѣ́лѣ Ізра́илевѣ, и спасу́ся изъ руки́ єго́.

²

И воста́ даві́дъ и ше́сть со́тъ муже́й и́же съ ни́мъ, и и́де ко агху́су сы́ну Амма́хову царю́ ге́ѳску.

³

И пребы́сть даві́дъ у агху́са въ ге́ѳѣ, са́мъ и му́жіє єго́ вси́ и до́мъ єго́, и даві́дъ и о́бѣ жены́ єго́, Ахінаа́мъ Ієзраилі́тыня и Авіге́а жена́ Нава́ла карми́лскаго.

⁴

И возвѣсти́ша Сау́лу, я́ко отбѣже́ даві́дъ въ ге́ѳъ, и не приложи́ ктому́ [сау́лъ] иска́ти єго́.

⁵

И рече́ даві́дъ ко агху́су: а́ще обрѣ́те ра́бъ тво́й благода́ть предъ очи́ма твои́ма, да да́си ми́ мѣ́сто во єди́нѣмъ от градо́въ и́же на селѣ́, и ся́ду та́мо: и вску́ю сѣди́тъ ра́бъ тво́й во гра́дѣ ца́рственнѣмъ съ тобо́ю?

⁶

И даде́ єму́ агху́съ въ де́нь то́й секела́гъ: сего́ ра́ди бы́сть царю́ Іуде́йску секела́гъ до дне́шняго дне́.

⁷

И бы́сть число́ дні́й, въ ня́же сѣдя́ше даві́дъ на селѣ́ иноплеме́нничи, четы́ри ме́сяцы.

⁸

И восхожда́ше даві́дъ и му́жіє єго́ и напада́ху на вся́каго гессе́ра и на Амаликі́та, и се́, земля́ населя́шеся от ламсу́ра и до земли́ Єги́петскія:

⁹

и поража́ше даві́дъ зе́млю, и не оставля́ше въ живы́хъ му́жеска по́лу и же́нска: и взима́ху стада́, и бу́йволицы и осля́та, и велблю́ды и ри́зы, и возвраща́ющеся прихожда́ху ко агху́су.

¹⁰

И рече́ агху́съ къ даві́ду: на кого́ нападо́сте ны́нѣ? И рече́ даві́дъ ко агху́су: къ ю́гу Іуде́и и къ ю́гу Ієсмеги́ и къ ю́гу Кенезі́а:

¹¹

и му́жеска по́лу и же́нска не оставля́хъ въ живы́хъ є́же вводи́ти въ ге́ѳъ, глаго́ля: да не возвѣстя́тъ въ ге́ѳѣ на на́съ, глаго́люще: сія́ твори́тъ даві́дъ. И сіє́ оправда́ніє єго́ во вся́ дни́, въ ня́же сѣдя́ше даві́дъ на селѣ́ иноплеме́нничи.

¹²

И увѣ́рися даві́дъ агху́су зѣло́, глаго́ля: омерзѣ́ніємъ омерзѣ́ въ лю́дехъ свои́хъ во Ізра́или, и бу́детъ ми́ ра́бъ во вѣ́ки.