¹

Въ лѣ́то седмо́є іиу́а воцари́ся Іоа́съ, и четы́редесять лѣ́тъ ца́рствова во Ієрусали́мѣ. И́мя же ма́тере єго́ Саві́а от вирсаве́и.

¹

Въ лѣ́то седмо́е і҆иꙋ́а воцари́сѧ і҆ѡа́съ, и҆ четы́редесѧть лѣ́тъ ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ саві́а ѿ вирсаве́и.

²

И сотвори́ Іоа́съ пра́воє предъ Го́сподемъ во вся́ дни́, въ ня́же просвѣти́ єго́ Іода́й ієре́й:

²

И҆ сотворѝ і҆ѡа́съ пра́вое пред̾ гдⷭ҇емъ во всѧ̑ дни̑, въ нѧ́же просвѣтѝ є҆го̀ і҆ѡда́й і҆ере́й:

³

оба́че высо́кихъ не преста́виша, и та́мо єще́ лю́діє жря́ху и кадя́ху на высо́кихъ.

³

ѻ҆ба́че высо́кихъ не преста́виша, и҆ та́мѡ є҆щѐ лю́дїе жрѧ́хꙋ и҆ кадѧ́хꙋ на высо́кихъ.

⁴

И рече́ Іоа́съ къ жерце́мъ: все́ сребро́ святы́хъ вноси́моє въ до́мъ Госпо́день, сребро́ оцѣне́нія, му́жъ сребро́ взя́вый оцѣне́нія, все́ сребро́, є́же а́ще взы́детъ на се́рдце му́жа внести́ въ до́мъ Госпо́день,

⁴

И҆ речѐ і҆ѡа́съ къ жерцє́мъ: всѐ сребро̀ ст҃ы́хъ вноси́мое въ до́мъ гдⷭ҇ень, сребро̀ ѡ҆цѣне́нїѧ, мꙋ́жъ сребро̀ взѧ́вый ѡ҆цѣне́нїѧ, всѐ сребро̀, є҆́же а҆́ще взы́детъ на се́рдце мꙋ́жа внестѝ въ до́мъ гдⷭ҇ень,

⁵

да во́змутъ себѣ́ жерцы́, му́жъ от прода́нія своєго́, и ті́и да укрѣпя́тъ веде́къ до́му во всѣ́хъ, идѣ́же а́ще обря́щется веде́къ.

⁵

да во́змꙋтъ себѣ̀ жерцы̀, мꙋ́жъ ѿ прода́нїѧ своегѡ̀, и҆ ті́и да оу҆крѣпѧ́тъ веде́къ до́мꙋ во всѣ́хъ, и҆дѣ́же а҆́ще ѡ҆брѧ́щетсѧ веде́къ.

⁶

И бы́сть въ два́десять тре́тіє лѣ́то царя́ Іоа́са, не укрѣпи́ша жерцы́ веде́ка хра́ма:

⁶

И҆ бы́сть въ два́десѧть тре́тїе лѣ́то царѧ̀ і҆ѡа́са, не оу҆крѣпи́ша жерцы̀ веде́ка хра́ма:

⁷

и призва́ ца́рь Іоа́съ Іода́я жерца́ и жерцы́, и рече́ къ ни́мъ: что́ я́ко не укрѣпи́сте веде́ка хра́ма? и ны́нѣ не пріима́йте сребра́ от прода́жей ва́шихъ, я́ко на веде́къ хра́ма да́сте є́.

⁷

и҆ призва̀ ца́рь і҆ѡа́съ і҆ѡда́ѧ жерца̀ и҆ жерцы̀, и҆ речѐ къ ни̑мъ: что̀ ꙗ҆́кѡ не оу҆крѣпи́сте веде́ка хра́ма; и҆ нн҃ѣ не прїима́йте сребра̀ ѿ прода́жей ва́шихъ, ꙗ҆́кѡ на веде́къ хра́ма да́сте є҆̀.

⁸

И совѣща́шася жерцы́ не пріима́ти сребра́ от люді́й и не укрѣпля́ти веде́ка хра́ма.

⁸

И҆ совѣща́шасѧ жерцы̀ не прїима́ти сребра̀ ѿ люді́й и҆ не оу҆крѣплѧ́ти веде́ка хра́ма.

⁹

И взя́ Іода́й жре́цъ ківо́тъ єди́нъ, и сотвори́ въ не́мъ сква́жню, и положи́ єго́ при олтари́ одесну́ю входя́щихъ муже́й въ до́мъ Госпо́день: и влага́ху та́мо жерцы́ храня́щіи две́рь все́ сребро́ приноси́моє въ до́мъ Госпо́день.

⁹

И҆ взѧ̀ і҆ѡда́й жре́цъ кївѡ́тъ є҆ди́нъ, и҆ сотворѝ въ не́мъ сква́жню, и҆ положѝ є҆го̀ при ѻ҆лтарѝ ѡ҆деснꙋ́ю входѧ́щихъ мꙋже́й въ до́мъ гдⷭ҇ень: и҆ влага́хꙋ та́мѡ жерцы̀ хранѧ́щїи две́рь всѐ сребро̀ приноси́мое въ до́мъ гдⷭ҇ень.

¹⁰

И бы́сть єгда́ уви́дѣша, я́ко мно́го сребра́ въ ковче́зѣ, и взы́де пи́счій царе́въ, и жре́цъ вели́кій, и сребросе́чцы и откры́ша, и сочто́ша сребро́ обрѣ́тшеєся въ дому́ Госпо́дни:

¹⁰

И҆ бы́сть є҆гда̀ оу҆ви́дѣша, ꙗ҆́кѡ мно́гѡ сребра̀ въ ковче́зѣ, и҆ взы́де пи́счїй царе́въ, и҆ жре́цъ вели́кїй, и҆ сребросе́чцы и҆ ѿкры́ша, и҆ сочто́ша сребро̀ ѡ҆брѣ́тшеесѧ въ домꙋ̀ гдⷭ҇ни:

¹¹

и да́ша сребро́ угото́ванноє въ ру́цѣ творя́щихъ дѣла́ на сосу́ды до́му Госпо́дня: и разда́ша древодѣ́лемъ и дѣ́лателемъ зи́ждущымъ въ дому́ Госпо́дни,

¹¹

и҆ да́ша сребро̀ оу҆гото́ванное въ рꙋ́цѣ творѧ́щихъ дѣла̀ на сосꙋ́ды до́мꙋ гдⷭ҇нѧ: и҆ разда́ша древодѣ́лємъ и҆ дѣ́лателємъ зи́ждꙋщымъ въ домꙋ̀ гдⷭ҇ни,

¹²

и стѣнодѣ́лателемъ, и худо́жникомъ, и сѣку́щымъ ка́менія на купле́ніє древе́съ, и ка́менія те́санаго на строє́ніє веде́ка до́му Госпо́дня, на вся́ єли́ка иждиве́на бы́ша на утвержде́ніє хра́ма.

¹²

и҆ стѣнодѣ́лателємъ, и҆ хꙋдо́жникѡмъ, и҆ сѣкꙋ́щымъ ка́мєнїѧ на кꙋпле́нїе древе́съ, и҆ ка́менїѧ те́санагѡ на строе́нїе веде́ка до́мꙋ гдⷭ҇нѧ, на всѧ̑ є҆ли̑ка и҆ждивє́на бы́ша на оу҆твержде́нїе хра́ма.

¹³

Оба́че не твори́шася хра́му Госпо́дню две́ри сре́бряны, гво́здіє, фіа́лы и трубы́, ни вси́ сосу́ды зла́ты, и сосу́ды сре́бряны от сребра́ принесе́ннаго въ до́мъ Госпо́день:

¹³

Ѻ҆ба́че не твори́шасѧ хра́мꙋ гдⷭ҇ню двє́ри срє́брѧны, гво́здїе, фїа́лы и҆ трꙋбы̑, ни всѝ сосꙋ́ды зла̑ты, и҆ сосꙋ́ды срє́брѧны ѿ сребра̀ принесе́ннагѡ въ до́мъ гдⷭ҇ень:

¹⁴

поне́же творя́щымъ дѣла́ даде́ся сіє́, и утверди́ша тѣ́мъ до́мъ Госпо́день.

¹⁴

поне́же творѧ́щымъ дѣла̀ даде́сѧ сїѐ, и҆ оу҆тверди́ша тѣ́мъ до́мъ гдⷭ҇ень.

¹⁵

И не сочита́ху муже́й, и́мже дая́ху сребро́ въ ру́ки, дая́ти творя́щымъ дѣла́, зане́ вѣ́рно творя́ху.

¹⁵

И҆ не сочита́хꙋ мꙋже́й, и҆̀мже даѧ́хꙋ сребро̀ въ рꙋ́ки, даѧ́ти творѧ́щымъ дѣла̀, занѐ вѣ́рнѡ творѧ́хꙋ.

¹⁶

Сребро́ за грѣхи́ и сребро́ за преступле́ніє, єли́ко внесе́но бы́сть въ до́мъ Госпо́день, жерце́мъ бы́сть.

¹⁶

Сребро̀ за грѣхѝ и҆ сребро̀ за престꙋпле́нїе, є҆ли́ко внесе́но бы́сть въ до́мъ гдⷭ҇ень, жерцє́мъ бы́сть.

¹⁷

Тогда́ взы́де азаи́лъ ца́рь Си́рскій и воєва́ на ге́ѳъ, и взя́ єго́ азаи́лъ и разби́ єго́: и обрати́ азаи́лъ лице́ своє́ взы́ти на Ієрусали́мъ.

¹⁷

Тогда̀ взы́де а҆заи́лъ ца́рь сѵ́рскїй и҆ воева̀ на ге́ѳъ, и҆ взѧ̀ є҆го̀ а҆заи́лъ и҆ разбѝ є҆го̀: и҆ ѡ҆братѝ а҆заи́лъ лицѐ своѐ взы́ти на і҆ерⷭ҇ли́мъ.

¹⁸

И взя́ Іоа́съ ца́рь Іу́динъ вся́ свята́я, єли́ка освяти́ Іосафа́тъ и Іора́мъ и Охозі́а, отцы́ єго́ и ца́ріє Іу́дины, и свята́я єго́, и все́ зла́то обрѣ́тшеєся въ сокро́вищихъ до́му Госпо́дня и до́му царе́ва, и посла́ азаи́лу царю́ Си́рску, и отъи́де от Ієрусали́ма.

¹⁸

И҆ взѧ̀ і҆ѡа́съ ца́рь і҆ꙋ́динъ всѧ̑ ст҃а̑ѧ, є҆ли̑ка ѡ҆свѧтѝ і҆ѡсафа́тъ и҆ і҆ѡра́мъ и҆ ѻ҆хозі́а, ѻ҆тцы̀ є҆гѡ̀ и҆ ца́рїе і҆ꙋ̑дины, и҆ ст҃а̑ѧ є҆гѡ̀, и҆ всѐ зла́то ѡ҆брѣ́тшеесѧ въ сокро́вищихъ до́мꙋ гдⷭ҇нѧ и҆ до́мꙋ царе́ва, и҆ посла̀ а҆заи́лꙋ царю̀ сѵ́рскꙋ, и҆ ѿи́де ѿ і҆ерⷭ҇ли́ма.

¹⁹

И про́чая слове́съ Іоа́совыхъ, и вся́ єли́ка сотвори́, не се́ ли, сія́ пи́сана въ кни́зѣ слове́съ дні́й царе́й Іу́диныхъ?

¹⁹

И҆ прѡ́чаѧ слове́съ і҆ѡа́совыхъ, и҆ всѧ̑ є҆ли̑ка сотворѝ, не сѐ ли, сїѧ̑ пи̑сана въ кни́зѣ слове́съ дні́й царе́й і҆ꙋ́диныхъ;

²⁰

И воста́ша о́троцы єго́, и совѣща́ша вся́къ совѣ́тъ, и уби́ша Іоа́са въ до́мѣ малло́ни, и́же въ саа́лѣ.

²⁰

И҆ воста́ша ѻ҆́троцы є҆гѡ̀, и҆ совѣща́ша всѧ́къ совѣ́тъ, и҆ оу҆би́ша і҆ѡа́са въ до́мѣ маллѡ́ни, и҆́же въ саа́лѣ.

²¹

И Ієзеха́ръ сы́нъ Іємуа́ѳовъ, и Ієзеву́ѳъ сы́нъ соми́ровъ, раби́ єго́ уби́ша єго́, и у́мре, и погребо́ша єго́ со отцы́ єго́ во гра́дѣ даві́довѣ. И воцари́ся Амессі́а сы́нъ єго́ вмѣ́сто єго́.

²¹

И҆ і҆езеха́ръ сы́нъ і҆емꙋа́ѳовъ, и҆ і҆езевꙋ́ѳъ сы́нъ сѡми́ровъ, рабѝ є҆гѡ̀ оу҆би́ша є҆го̀, и҆ оу҆́мре, и҆ погребо́ша є҆го̀ со ѻ҆тцы̑ є҆гѡ̀ во гра́дѣ даві́довѣ. И҆ воцари́сѧ а҆мессі́а сы́нъ є҆гѡ̀ вмѣ́стѡ є҆гѡ̀.