Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
Въ лѣ́то седмо́є іиу́а воцари́ся Іоа́съ, и четы́редесять лѣ́тъ ца́рствова во Ієрусали́мѣ. И́мя же ма́тере єго́ Саві́а от вирсаве́и.
2
И сотвори́ Іоа́съ пра́воє предъ Го́сподемъ во вся́ дни́, въ ня́же просвѣти́ єго́ Іода́й ієре́й:
3
оба́че высо́кихъ не преста́виша, и та́мо єще́ лю́діє жря́ху и кадя́ху на высо́кихъ.
4
И рече́ Іоа́съ къ жерце́мъ: все́ сребро́ святы́хъ вноси́моє въ до́мъ Госпо́день, сребро́ оцѣне́нія, му́жъ сребро́ взя́вый оцѣне́нія, все́ сребро́, є́же а́ще взы́детъ на се́рдце му́жа внести́ въ до́мъ Госпо́день,
5
да во́змутъ себѣ́ жерцы́, му́жъ от прода́нія своєго́, и ті́и да укрѣпя́тъ веде́къ до́му во всѣ́хъ, идѣ́же а́ще обря́щется веде́къ.
6
И бы́сть въ два́десять тре́тіє лѣ́то царя́ Іоа́са, не укрѣпи́ша жерцы́ веде́ка хра́ма:
7
и призва́ ца́рь Іоа́съ Іода́я жерца́ и жерцы́, и рече́ къ ни́мъ: что́ я́ко не укрѣпи́сте веде́ка хра́ма? и ны́нѣ не пріима́йте сребра́ от прода́жей ва́шихъ, я́ко на веде́къ хра́ма да́сте є́.
8
И совѣща́шася жерцы́ не пріима́ти сребра́ от люді́й и не укрѣпля́ти веде́ка хра́ма.
9
И взя́ Іода́й жре́цъ ківо́тъ єди́нъ, и сотвори́ въ не́мъ сква́жню, и положи́ єго́ при олтари́ одесну́ю входя́щихъ муже́й въ до́мъ Госпо́день: и влага́ху та́мо жерцы́ храня́щіи две́рь все́ сребро́ приноси́моє въ до́мъ Госпо́день.
10
И бы́сть єгда́ уви́дѣша, я́ко мно́го сребра́ въ ковче́зѣ, и взы́де пи́счій царе́въ, и жре́цъ вели́кій, и сребросе́чцы и откры́ша, и сочто́ша сребро́ обрѣ́тшеєся въ дому́ Госпо́дни:
11
и да́ша сребро́ угото́ванноє въ ру́цѣ творя́щихъ дѣла́ на сосу́ды до́му Госпо́дня: и разда́ша древодѣ́лемъ и дѣ́лателемъ зи́ждущымъ въ дому́ Госпо́дни,
12
и стѣнодѣ́лателемъ, и худо́жникомъ, и сѣку́щымъ ка́менія на купле́ніє древе́съ, и ка́менія те́санаго на строє́ніє веде́ка до́му Госпо́дня, на вся́ єли́ка иждиве́на бы́ша на утвержде́ніє хра́ма.
13
Оба́че не твори́шася хра́му Госпо́дню две́ри сре́бряны, гво́здіє, фіа́лы и трубы́, ни вси́ сосу́ды зла́ты, и сосу́ды сре́бряны от сребра́ принесе́ннаго въ до́мъ Госпо́день:
14
поне́же творя́щымъ дѣла́ даде́ся сіє́, и утверди́ша тѣ́мъ до́мъ Госпо́день.
15
И не сочита́ху муже́й, и́мже дая́ху сребро́ въ ру́ки, дая́ти творя́щымъ дѣла́, зане́ вѣ́рно творя́ху.
16
Сребро́ за грѣхи́ и сребро́ за преступле́ніє, єли́ко внесе́но бы́сть въ до́мъ Госпо́день, жерце́мъ бы́сть.
17
Тогда́ взы́де азаи́лъ ца́рь Си́рскій и воєва́ на ге́ѳъ, и взя́ єго́ азаи́лъ и разби́ єго́: и обрати́ азаи́лъ лице́ своє́ взы́ти на Ієрусали́мъ.
18
И взя́ Іоа́съ ца́рь Іу́динъ вся́ свята́я, єли́ка освяти́ Іосафа́тъ и Іора́мъ и Охозі́а, отцы́ єго́ и ца́ріє Іу́дины, и свята́я єго́, и все́ зла́то обрѣ́тшеєся въ сокро́вищихъ до́му Госпо́дня и до́му царе́ва, и посла́ азаи́лу царю́ Си́рску, и отъи́де от Ієрусали́ма.
19
И про́чая слове́съ Іоа́совыхъ, и вся́ єли́ка сотвори́, не се́ ли, сія́ пи́сана въ кни́зѣ слове́съ дні́й царе́й Іу́диныхъ?
20
И воста́ша о́троцы єго́, и совѣща́ша вся́къ совѣ́тъ, и уби́ша Іоа́са въ до́мѣ малло́ни, и́же въ саа́лѣ.
21
И Ієзеха́ръ сы́нъ Іємуа́ѳовъ, и Ієзеву́ѳъ сы́нъ соми́ровъ, раби́ єго́ уби́ша єго́, и у́мре, и погребо́ша єго́ со отцы́ єго́ во гра́дѣ даві́довѣ. И воцари́ся Амессі́а сы́нъ єго́ вмѣ́сто єго́.