Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
Въ лѣ́то два́десять тре́тіє Іоа́са сы́на Охозі́ина царя́ Іу́дина ца́рствова Іоаха́зъ сы́нъ іиу́євъ надъ Ізра́илемъ въ самарі́и седмьна́десять лѣ́тъ,
1
Въ лѣ́то два́десѧть тре́тїе і҆ѡа́са сы́на ѻ҆хозі́ина царѧ̀ і҆ꙋ́дина ца́рствова і҆ѡаха́зъ сы́нъ і҆иꙋ́евъ над̾ і҆и҃лемъ въ самарі́и седмьна́десѧть лѣ́тъ,
2
и сотвори́ лука́воє предъ очи́ма Госпо́днима, и и́де вслѣ́дъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля и не оста́ся зло́бы тоя́.
2
и҆ сотворѝ лꙋка́вое пред̾ ѻ҆чи́ма гдⷭ҇нима, и҆ и҆́де в̾слѣ́дъ грѣхѡ́въ і҆еровоа́ма сы́на нава́това, и҆́же въ грѣ́хъ введѐ і҆и҃лѧ и҆ не ѡ҆ста́сѧ ѕло́бы тоѧ̀.
3
И разгнѣ́вася Госпо́дь гнѣ́вомъ на Ізра́иля, и вдаде́ и́хъ въ ру́цѣ азаи́лу царю́ Си́рску и въ ру́цѣ сы́на Аде́ра, сы́на азаи́лева, во вся́ дни́.
3
И҆ разгнѣ́васѧ гдⷭ҇ь гнѣ́вомъ на і҆и҃лѧ, и҆ вдадѐ и҆̀хъ въ рꙋ́цѣ а҆заи́лꙋ царю̀ сѵ́рскꙋ и҆ въ рꙋ́цѣ сы́на а҆де́ра, сы́на а҆заи́лева, во всѧ̑ дни̑.
4
И помоли́ся Іоаха́зъ лицу́ Госпо́дню, и услы́ша єго́ Госпо́дь, я́ко ви́дѣ ско́рбь Ізра́илеву, поне́же оскорби́ и́хъ ца́рь Си́рскій.
4
И҆ помоли́сѧ і҆ѡаха́зъ лицꙋ̀ гдⷭ҇ню, и҆ оу҆слы́ша є҆го̀ гдⷭ҇ь, ꙗ҆́кѡ ви́дѣ ско́рбь і҆и҃левꙋ, поне́же ѡ҆скорбѝ и҆̀хъ ца́рь сѵ́рскїй.
5
И даде́ Госпо́дь спасе́ніє Ізра́илю, и избы́ша от руку́ Си́рску: и всели́шася сы́нове Ізра́илевы въ селе́нія своя́ я́коже и вчера́ и тре́тіяго дне́:
5
И҆ дадѐ гдⷭ҇ь спⷭ҇нїе і҆и҃лю, и҆ и҆збы́ша ѿ рꙋкꙋ̀ сѵ́рскꙋ: и҆ всели́шасѧ и҆ сы́нове і҆и҃лєвы въ селє́нїѧ своѧ̑ ꙗ҆́коже и҆ вчера̀ и҆ тре́тїѧгѡ днѐ:
6
оба́че не отступи́ша от грѣхо́въ до́му ієровоа́ма сы́на нава́това, и́же въ грѣ́хъ введе́ Ізра́иля, въ не́мъ ходя́ху: и дубра́ва стоя́ше въ самарі́и.
6
ѻ҆ба́че не ѿстꙋпи́ша ѿ грѣхѡ́въ до́мꙋ і҆еровоа́ма сы́на нава́това, и҆́же и҆ въ грѣ́хъ введѐ і҆и҃лѧ, въ не́мъ ходѧ́хꙋ: и҆ дꙋбра́ва стоѧ́ше въ самарі́и.
7
я́ко не оста́шася Іоаха́зу лю́діє, но то́кмо пятьдеся́тъ ко́нникъ, и де́сять колесни́цъ, и де́сять ты́сящъ пѣшце́въ, я́ко изгуби́лъ и́хъ ца́рь Си́рскій, и положи́ я́ я́ко пра́хъ на попра́ніє.
7
ꙗ҆́кѡ не ѡ҆ста́шасѧ і҆ѡаха́зꙋ лю́дїе, но то́кмѡ пѧтьдесѧ́тъ кѡ́нникъ, и҆ де́сѧть колесни́цъ, и҆ де́сѧть ты́сѧщъ пѣшцє́въ, ꙗ҆́кѡ и҆згꙋби́лъ и҆̀хъ ца́рь сѵ́рскїй, и҆ положѝ ѧ҆̀ ꙗ҆́кѡ пра́хъ на попра́нїе.
8
И про́чая слове́съ Іоаха́зовыхъ, и вся́ єли́ка сотвори́, и си́лы єго́, не сія́ ли пи́сана въ кни́зѣ слове́съ дні́й царе́й Ізра́илевыхъ?
8
И҆ прѡ́чаѧ слове́съ і҆ѡаха́зовыхъ, и҆ всѧ̑ є҆ли̑ка сотворѝ, и҆ си̑лы є҆гѡ̀, не сїѧ̑ ли пи̑сана въ кни́зѣ слове́съ дні́й царе́й і҆и҃левыхъ;
9
И у́спе Іоаха́зъ со отцы́ свои́ми, и погребо́ша єго́ въ самарі́и: и воцари́ся Іоа́съ сы́нъ єго́ вмѣ́сто єго́.
9
И҆ оу҆́спе і҆ѡаха́зъ со ѻ҆тцы̑ свои́ми, и҆ погребо́ша є҆го̀ въ самарі́и: и҆ воцари́сѧ і҆ѡа́съ сы́нъ є҆гѡ̀ вмѣ́стѡ є҆гѡ̀.
10
Въ лѣ́то три́десять седмо́є Іоа́са царя́ Іу́дина ца́рствова Іоа́съ сы́нъ Іоаха́зовъ надъ Ізра́илемъ въ самарі́и шестьна́десять лѣ́тъ,
10
Въ лѣ́то три́десѧть седмо́е і҆ѡа́са царѧ̀ і҆ꙋ́дина ца́рствова і҆ѡа́съ сы́нъ і҆ѡаха́зовъ над̾ і҆и҃лемъ въ самарі́и шестьна́десѧть лѣ́тъ,
11
и сотвори́ лука́воє предъ очи́ма Госпо́днима: не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля, въ то́мъ хожда́ше.
11
и҆ сотворѝ лꙋка́вое пред̾ ѻ҆чи́ма гдⷭ҇нима: и҆ ѿстꙋпѝ ѿ всѣ́хъ грѣхѡ́въ і҆еровоа́ма сы́на нава́това, и҆́же въ грѣ́хъ введѐ і҆и҃лѧ, въ то́мъ хожда́ше.
12
И про́чая слове́съ Іоа́совыхъ и вся́ єли́ка сотвори́, и си́лы єго́, я́же сотвори́ со Амессі́ємъ царе́мъ Іу́динымъ, не сія́ ли пи́сана въ кни́зѣ слове́съ дні́й царе́й Ізра́илевыхъ?
12
И҆ прѡ́чаѧ слове́съ і҆ѡа́совыхъ и҆ всѧ̑ є҆ли̑ка сотворѝ, и҆ си̑лы є҆гѡ̀, ꙗ҆̀же сотворѝ со а҆мессі́емъ царе́мъ і҆ꙋ́динымъ, не сїѧ̑ ли пи̑сана въ кни́зѣ слове́съ дні́й царе́й і҆и҃левыхъ;
13
И у́спе Іоа́съ со отцы́ свои́ми, ієровоа́мъ же сѣ́де на престо́лѣ єго́: и погребе́нъ бы́сть Іоа́съ въ самарі́и съ царми́ Ізра́илевыми.
13
И҆ оу҆́спе і҆ѡа́съ со ѻ҆тцы̑ свои́ми, і҆еровоа́мъ же сѣ́де на престо́лѣ є҆гѡ̀: и҆ погребе́нъ бы́сть і҆ѡа́съ въ самарі́и съ цармѝ і҆и҃левыми.
14
И Єліссе́й разболѣ́ся болѣ́знію своє́ю, от нея́же у́мре. И пріи́де къ нему́ Іоа́съ ца́рь Ізра́илевъ, и пла́кася надъ лице́мъ єго́, и рече́: о́тче, о́тче, колесни́ца Ізра́илева и ко́ни єго́.
14
И҆ є҆лїссе́й разболѣ́сѧ болѣ́знїю свое́ю, ѿ неѧ́же оу҆́мре. И҆ прїи́де къ немꙋ̀ і҆ѡа́съ ца́рь і҆и҃левъ, и҆ пла́касѧ над̾ лице́мъ є҆гѡ̀, и҆ речѐ: ѻ҆́тче, ѻ҆́тче, колесни́ца і҆и҃лева и҆ ко́ни є҆гѡ̀.
15
И рече́ єму́ Єліссе́й возми́ лу́къ и стрѣ́лы. И взя́ къ себѣ́ лу́къ и стрѣ́лы.
15
И҆ речѐ є҆мꙋ̀ є҆лїссе́й возмѝ лꙋ́къ и҆ стрѣ́лы. И҆ взѧ̀ къ себѣ̀ лꙋ́къ и҆ стрѣ́лы.
16
И рече́ царю́: возложи́ ру́ку свою́ на лу́къ. И возложи́ Іоа́съ ру́ку свою́ на лу́къ, и Єліссе́й возложи́ ру́ки своя́ на ру́ки царе́вы,
16
И҆ речѐ царю̀: возложѝ рꙋ́кꙋ свою̀ на лꙋ́къ. И҆ возложѝ і҆ѡа́съ рꙋ́кꙋ свою̀ на лꙋ́къ, и҆ є҆лїссе́й возложѝ рꙋ́ки своѧ̑ на рꙋ́ки царє́вы,
17
и рече́: отве́рзи окно́ є́же на восто́къ. И отве́рзе. И рече́ Єліссе́й: стрѣли́. И стрѣли́ [ца́рь]. И рече́ Єліссе́й: стрѣла́ спасе́нія Госпо́дня и стрѣла́ спасе́нія на сирі́ю, и побѣди́ши сирі́ю во Афе́кѣ да́же до сконча́нія.
17
и҆ речѐ: ѿве́рзи ѻ҆кно̀ є҆́же на восто́къ. И҆ ѿве́рзе. И҆ речѐ є҆лїссе́й: стрѣлѝ. И҆ стрѣлѝ (ца́рь). И҆ речѐ є҆лїссе́й: стрѣла̀ спⷭ҇нїѧ гдⷭ҇нѧ и҆ стрѣла̀ спасе́нїѧ на сѷрі́ю, и҆ побѣди́ши сѷрі́ю во а҆фе́кѣ да́же до сконча́нїѧ.
18
И рече́ єму́ Єліссе́й: возми́ лу́къ. И взя́. И рече́ царю́ Ізра́илеву: уда́ри на зе́млю. И уда́ри ца́рь три́жды, и ста́.
18
И҆ речѐ є҆мꙋ̀ є҆лїссе́й: возмѝ лꙋ́къ. И҆ взѧ̀. И҆ речѐ царю̀ і҆и҃левꙋ: оу҆да́ри на зе́млю. И҆ оу҆да́ри ца́рь три́жды, и҆ ста̀.
19
И оскорбѣ́ человѣ́къ Бо́жій о не́мъ и рече́: а́ще бы уда́рилъ єси́ пяти́щи или́ шести́щи, тогда́ бы єси́ порази́лъ сирі́ю до сконча́нія, ны́нѣ же побѣди́ши сирі́ю три́жды.
19
И҆ ѡ҆скорбѣ̀ человѣ́къ бж҃їй ѡ҆ не́мъ и҆ речѐ: а҆́ще бы оу҆да́рилъ є҆сѝ пѧти́щи и҆лѝ шести́щи, тогда́ бы є҆сѝ порази́лъ сѷрі́ю до сконча́нїѧ, нн҃ѣ же побѣди́ши сѷрі́ю три́жды.
20
И у́мре Єліссе́й, и погребо́ша єго́. Во́ини же Моа́вли пріидо́ша въ зе́млю настава́ющу лѣ́ту тому́.
20
И҆ оу҆́мре є҆лїссе́й, и҆ погребо́ша є҆го̀. Во́ини же мѡа́вли прїидо́ша въ зе́млю настава́ющꙋ лѣ́тꙋ томꙋ̀.
21
И бы́сть и́мъ погреба́ющимъ му́жа, и се́, ви́дѣша во́иновъ, и поверго́ша му́жа во гро́бѣ Єліссе́овѣ: [и впаде́ тѣ́ло человѣ́ка ме́ртва,] и прикосну́ся косте́мъ Єліссе́овымъ, и оживе́ и воста́ на но́ги своя́.
21
И҆ бы́сть и҆̀мъ погреба́ющимъ мꙋ́жа, и҆ сѐ, ви́дѣша во́инѡвъ, и҆ поверго́ша мꙋ́жа во гро́бѣ є҆лїссе́овѣ: (и҆ впадѐ тѣ́ло человѣ́ка ме́ртва,) и҆ прикоснꙋ́сѧ косте́мъ є҆лїссе́ѡвымъ, и҆ ѡ҆живѐ и҆ воста̀ на но́ги своѧ̑.
22
Азаи́лъ же оскорбля́ше Ізра́иля во вся́ дни́ Іоаха́зовы.
22
А҆заи́лъ же ѡ҆скорблѧ́ше і҆и҃лѧ во всѧ̑ дни̑ і҆ѡаха́зѡвы.
23
И поми́лова я́ Госпо́дь, и уще́дри я́, и призрѣ́ на ня́ завѣ́та ра́ди своєго́, и́же со Авраа́момъ и Ісаа́комъ и Іа́ковомъ, и не восхотѣ́ Госпо́дь потреби́ти и́хъ, ниже́ отве́рже и́хъ от лица́ своєго́.
23
И҆ поми́лова и҆ гдⷭ҇ь, и҆ оу҆ще́дри ѧ҆̀, и҆ призрѣ̀ на нѧ̀ завѣ́та ра́ди своегѡ̀, и҆́же со а҆враа́момъ и҆ і҆саа́комъ и҆ і҆а́кѡвомъ, и҆ не восхотѣ̀ гдⷭ҇ь потреби́ти и҆́хъ, нижѐ ѿве́рже и҆́хъ ѿ лица̀ своегѡ̀.
24
И у́мре азаи́лъ ца́рь Си́рскій, и воцари́ся Аде́ръ сы́нъ єго́ вмѣ́сто єго́.
24
И҆ оу҆́мре а҆заи́лъ ца́рь сѵ́рскїй, и҆ воцари́сѧ а҆де́ръ сы́нъ є҆гѡ̀ вмѣ́стѡ є҆гѡ̀.
25
И возврати́ся Іоа́съ сы́нъ Іоаха́зовъ, и взя́ гра́ды от руки́ Аде́ра сы́на азаи́лева, и́хже взя́ от руку́ Іоаха́за отца́ єго́ въ бра́ни: три́жды побѣди́ єго́ Іоа́съ, и возврати́ гра́ды Ізра́илевы.
25
И҆ возврати́сѧ і҆ѡа́съ сы́нъ і҆ѡаха́зовъ, и҆ взѧ̀ гра́ды ѿ рꙋкѝ а҆де́ра сы́на а҆заи́лева, и҆̀хже взѧ̀ ѿ рꙋкꙋ̀ і҆ѡаха́за ѻ҆тца̀ є҆гѡ̀ въ бра́ни: три́жды побѣдѝ є҆го̀ і҆ѡа́съ, и҆ возвратѝ гра́ды і҆и҃лєвы.