Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
Въ лѣ́то два́десять седмо́є ієровоа́ма царя́ Ізра́илева воцари́ся Азарі́а сы́нъ Амессі́и царя́ Іу́дина:
2
сы́нъ шести́надесяти лѣ́тъ бѣ́, єгда́ нача́ ца́рствовати, и пятьдеся́тъ два́ лѣ́та ца́рствова во Ієрусали́мѣ. И́мя же ма́тере єго́ Ієхелі́а от Ієрусали́ма.
3
И сотвори́ пра́воє предъ очи́ма Госпо́днима по всему́, єли́ка сотвори́ оте́цъ єго́ Амессі́а,
4
оба́че высо́кихъ не разори́: єще́ лю́діє жря́ху и кадя́ху на высо́кихъ.
5
И косну́ся Госпо́дь царя́, и бы́сть прокаже́нъ до дне́ сме́рти своєя́: и ца́рствова въ дому́ апфусо́ѳъ. И Іоаѳа́мъ сы́нъ царе́въ бѣ́ надъ до́момъ судя́ лю́демъ земли́ тоя́.
6
И про́чая слове́съ азарі́и, и вся́ єли́ка сотвори́, не́ сія́ ли напи́сана въ кни́зѣ слове́съ дні́й царе́й Іу́диныхъ?
7
И у́спе Азарі́а со отцы́ свои́ми, и погребо́ша єго́ со отцы́ єго́ во гра́дѣ даві́довѣ. И воцари́ся Іоаѳа́мъ сы́нъ єго́ вмѣ́сто єго́.
8
Въ лѣ́то три́десять осмо́є азарі́и царя́ Іу́дина ца́рствова Заха́ріа сы́нъ ієровоа́мль надъ Ізра́илемъ въ самарі́и ше́сть ме́сяцъ.
9
и сотвори́ лука́воє предъ очи́ма Госпо́днима, я́коже сотвори́ша отцы́ єго́, не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.
10
И воста́ста на́нь Селлу́мъ сы́нъ Іаві́совъ и кевлаа́мъ, и порази́ста єго́, и умертви́ста єго́: и воцари́ся Селлу́мъ вмѣ́сто єго́.
11
И про́чая слове́съ Заха́рієвыхъ, се́, су́ть напи́сана въ кни́зѣ слове́съ дні́й царе́й Ізра́илевыхъ.
12
сіє́ сло́во Госпо́дне, є́же глаго́ла ко іиу́ю, рекі́й: сы́нове четве́ртіи ся́дутъ тебѣ́ на престо́лѣ Ізра́илевѣ. И бы́сть та́ко.
13
И Селлу́мъ сы́нъ Іаві́совъ воцари́ся во Ізра́или: и въ лѣ́то три́десять девя́тоє азарі́и царя́ Іу́дина, ца́рствова Селлу́мъ ме́сяцъ дні́й въ самарі́и.
14
И взы́де Манаи́мъ сы́нъ гадді́инъ от Ѳерсі́лы, и пріи́де въ самарі́ю, и уби́ Селлу́ма сы́на Іаві́сова въ самарі́и, и умертви́ єго́, и воцари́ся вмѣ́сто єго́.
15
И про́чая слове́съ Селлу́мовыхъ, и совѣща́ніє єго́, и́мже совѣща́ся, се́, су́ть пи́сана въ кни́зѣ слове́съ дні́й царе́й Ізра́илевыхъ.
16
Тогда́ порази́ Манаи́мъ и Ѳе́рсу, и вся́, я́же въ не́й, и предѣ́лы єя́ от Ѳе́рсы, поне́же не отверзо́ша єму́, и разби́ ю́ и всѣ́хъ, и́же въ не́й, и иму́щихъ во чре́вѣ разсѣче́.
17
Въ лѣ́то три́десять девя́тоє азарі́и царя́ Іу́дина, ца́рствова Манаи́мъ сы́нъ гадді́инъ надъ Ізра́илемъ де́сять лѣ́тъ въ самарі́и,
18
и сотвори́ лука́воє предъ очи́ма Госпо́днима, [во вся́ дни́ своя́] не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.
19
Во дни́ єго́ взы́де Фу́ла ца́рь Ассирі́йскій на зе́млю [Ізра́илеву], и Манаи́мъ даде́ Фу́лѣ ты́сящу тала́нтъ сребра́, да бу́детъ рука́ єго́ съ ни́мъ, [є́же укрѣпи́ти ца́рство въ руку́ єго́].
20
И возложи́ Манаи́мъ да́нь на Ізра́иля, на всѣ́хъ си́льныхъ, да́ти царю́ Ассирі́йску пятьдеся́тъ Сі́кль сребра́ му́жу коєму́ждо: и возврати́ся ца́рь Ассирі́йскъ, и не ста́ та́мо въ земли́.
21
И про́чая слове́съ Манаи́мовыхъ, и вся́ єли́ка сотвори́, не се́ ли, сія́ напи́сана въ кни́зѣ слове́съ дні́й царе́й Ізра́илевыхъ?
22
И у́спе Манаи́мъ со отцы́ свои́ми, и воцари́ся факі́а сы́нъ єго́ вмѣ́сто єго́.
23
Въ лѣ́то пятьдеся́тоє азарі́и царя́ Іу́дина, ца́рствова факі́а сы́нъ Манаи́мль надъ Ізра́илемъ въ самарі́и лѣ́та два́,
24
и сотвори́ лука́воє предъ очи́ма Госпо́днима, не отступи́ от грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.
25
И воста́ на него́ факе́й сы́нъ ромелі́инъ, тріста́тъ єго́, и уби́ єго́ въ самарі́и бли́зъ до́му царе́ва, со Арго́вомъ и со Арі́ємъ, и съ ни́мъ [бя́ху] пятьдеся́тъ муже́й от Галааді́товъ, и умертви́ єго́, и воцари́ся вмѣ́сто єго́.
26
И про́чая слове́съ факі́євыхъ, и вся́ єли́ка сотвори́ се́, су́ть, пи́сана въ кни́зѣ слове́съ дні́й царе́й Ізра́илевыхъ.
27
Въ лѣ́то пятьдеся́тъ второ́є азарі́и царя́ Іу́дина, ца́рствова факе́й сы́нъ ромелі́инъ надъ Ізра́илемъ въ самарі́и два́десять лѣ́тъ,
28
и сотвори́ лука́воє предъ очи́ма Госпо́днима, не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.
29
Во дни́ факе́а царя́ Ізра́илева пріи́де Ѳелгаѳфелласа́ръ ца́рь Ассирі́йскій, и взя́ Аі́нъ и Авелвеѳмааха́, и Ао́ха и Кене́зу, и Асо́ра и Галаа́дъ и Галіле́ю, всю́ зе́млю Нефѳалі́млю, и приведе́ я́ ко Ассирі́аномъ.
30
И воста́ осі́а сы́нъ илы́ на факе́а сы́на ромелі́ина, и порази́ єго́, и умертви́ єго́, и воцари́ся вмѣ́сто єго́ въ два́десятоє лѣ́то Іоаѳа́ма сы́на азарі́ина.
31
И про́чая слове́съ факе́євыхъ, и вся́ єли́ка сотвори́, се́, сія́ напи́сана въ кни́зѣ слове́съ дні́й царе́й Ізра́илевыхъ.
32
Въ лѣ́то второ́є факе́а сы́на ромелі́ина царя́ Ізра́илева воцари́ся Іоаѳа́мъ, сы́нъ азарі́и царя́ Іу́дина:
33
сы́нъ два́десяти пяти́ лѣ́тъ бѣ́, єгда́ нача́ ца́рствовати, и шестьна́десять лѣ́тъ ца́рствова во Ієрусали́мѣ. И́мя же ма́тере єго́ ієруса́ дщи́ садо́кова.
34
И сотвори́ пра́воє предъ очи́ма Госпо́днима, по всему́ єли́ка сотвори́ оте́цъ єго́ Азарі́а,
35
оба́че высо́кихъ не разори́: єще́ лю́діє жря́ху и кадя́ху на высо́кихъ. То́й созда́ две́ри хра́му Госпо́дню вы́шнія.
36
И про́чая слове́съ Іоаѳа́мовыхъ, и вся́ єли́ка сотвори́, не сія́ ли напи́сана въ кни́зѣ слове́съ дні́й царе́й Іу́диныхъ?
37
Во дни́ о́ны нача́тъ Госпо́дь посыла́ти на Іу́ду раассо́на царя́ Си́рска и факе́а сы́на ромелі́ина.
38
И у́спе Іоаѳа́мъ со отцы́ свои́ми, и погребе́нъ бы́сть со отцы́ свои́ми во гра́дѣ даві́да отца́ своєго́. И воцари́ся Аха́зъ сы́нъ єго́ вмѣ́сто єго́.