Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
Въ лѣ́то седмоєна́десять факе́а сы́на ромелі́ина, воцари́ся Аха́зъ сы́нъ Іоаѳа́ма царя́ Іу́дина:
2
сы́нъ два́десяти лѣ́тъ бѣ́ Аха́зъ, єгда́ нача́ ца́рствовати, и шестьна́десять лѣ́тъ ца́рствова во Ієрусали́мѣ, и не сотвори́ пра́воє предъ очи́ма Го́спода Бо́га своєго́ вѣ́рно, я́коже даві́дъ оте́цъ єго́,
3
и ходи́ въ пути́ ієровоа́ма сы́на нава́това царя́ Ізра́илева, ксему́ и сы́на своєго́ преведе́ сквозѣ́ о́гнь по ме́рзостемъ язы́ковъ, и́хже отъя́тъ Госпо́дь от лица́ сыно́въ Ізра́илевыхъ:
4
и жря́ше и кадя́ше на высо́кихъ и на холмѣ́хъ и подъ вся́кимъ дре́вомъ ча́стымъ.
5
Тогда́ взы́де раассо́нъ ца́рь Си́рскъ и факе́й сы́нъ ромелі́инъ ца́рь Ізра́илевъ во Ієрусали́мъ на бра́нь, и воєва́ста на Аха́за, и не можа́ста [єму́] одолѣ́ти.
6
Во вре́мя о́но возврати́ раассо́нъ ца́рь Си́рскій Єла́ѳъ сирі́и и изгна́ Іуде́євъ изъ Єла́ѳа, и Ідуме́є пріидо́ша во Єла́ѳъ и всели́шася та́мо да́же до дне́ сего́.
7
И посла́ Аха́зъ послы́ къ Ѳелгаѳфелласа́ру царю́ Ассирі́йску, глаго́ля: ра́бъ тво́й и сы́нъ тво́й а́зъ є́смь, взы́ди и отими́ мя́ от руки́ царя́ Си́рска и от руки́ царя́ Ізра́илева, воста́вшихъ на мя́.
8
И взя́ Аха́зъ зла́то и сребро́ обрѣ́тшеєся въ сокро́вищихъ до́му Госпо́дня и въ сокро́вищихъ до́му царе́ва, и посла́ царю́ Ассирі́йску да́ры.
9
И послу́ша єго́ ца́рь Ассирі́йскій: и взы́де ца́рь Ассирі́йскій въ Дама́скъ, и взя́ єго́, и пресели́ єго́, и раассо́на царя́ уби́.
10
И и́де ца́рь Аха́зъ на срѣ́теніє Ѳелгаѳфелласа́ру царю́ Ассирі́йску въ Дама́скъ, и ви́дѣ же́ртвенникъ въ дама́сцѣ: и посла́ ца́рь Аха́зъ ко урі́и ієре́ю подо́біє же́ртвенника, и начерта́ніє, и все́ творе́ніє єго́.
11
И созда́ урі́а ієре́й же́ртвенникъ по всѣ́мъ, єли́ка посла́ ца́рь Аха́зъ от Дама́ска.
12
И пріи́де ца́рь Аха́зъ изъ Дама́ска и ви́дѣ же́ртвенникъ, и взы́де на него́,
13
и покади́ всесожже́ніє своє́ и же́ртву свою́ и возлія́ніє своє́, и пролія́ кро́вь ми́рныхъ на же́ртвенникъ,
14
олта́рь же мѣ́дяный, и́же предъ Го́сподемъ, принесе́ от лица́ до́му Госпо́дня, и от среды́ же́ртвенника и от среды́ до́му Госпо́дня: и поста́ви єго́ о єди́ну страну́ же́ртвенника къ сѣ́веру.
15
И заповѣ́да ца́рь Аха́зъ урі́и ієре́ю, глаго́ля: на же́ртвенницѣ вели́цѣмъ приноша́яй всесожже́нія у́тренняя, и же́ртву вече́рнюю, и всесожже́нія царе́ва, и же́ртву єго́, и всесожже́нія всѣ́хъ люді́й, и же́ртву и́хъ, и возлія́нія и́хъ, и вся́ку кро́вь всесожже́нія, и вся́ку кро́вь же́ртвенную изліє́ши на не́мъ: олта́рь не мѣ́дянъ да бу́детъ мнѣ́ на у́тро.
16
И сотвори́ урі́а ієре́й по всѣ́мъ, єли́ка заповѣ́да єму́ ца́рь Аха́зъ.
17
И изсѣче́ Аха́зъ ца́рь споє́нія подста́вовъ, и пренесе́ от ни́хъ умыва́лницу, и мо́ре низложи́ от воло́въ мѣ́дяныхъ, и́же бѣ́ша подъ ни́мъ, и положи́ є́ на подста́вѣ ка́меннѣмъ:
18
и основа́ніє сѣда́лища созда́но въ дому́ Госпо́дни, и вхо́дъ царе́въ внѣ́шній обрати́ въ до́мъ Госпо́день, от лица́ царя́ Ассирі́йска.
19
И про́чая слове́съ Аха́зовыхъ, єли́ка сотвори́, не сія́ ли напи́сана въ кни́зѣ слове́съ дні́й царе́й Іу́диныхъ:
20
И у́спе Аха́зъ со отцы́ свои́ми, и погребе́нъ бы́сть со отцы́ свои́ми во гра́дѣ даві́довѣ. И воцари́ся єзекі́а сы́нъ єго́ вмѣ́сто єго́.