¹

И бы́сть въ лѣ́то тре́тіє осі́и сы́на илы́ царя́ Ізра́илева, воцари́ся єзекі́а сы́нъ Аха́за царя́ Іу́дина:

¹

И҆ бы́сть въ лѣ́то тре́тїе ѡ҆сі́и сы́на и҆лы̀ царѧ̀ і҆и҃лева, воцари́сѧ є҆зекі́а сы́нъ а҆ха́за царѧ̀ і҆ꙋ́дина:

²

сы́нъ два́десяти пяти́ лѣ́тъ бѣ́ єгда́ нача́ ца́рствовати, и два́десять де́вять лѣ́ть ца́рствова во Ієрусали́мѣ. И́мя же ма́тере єго́ Аву́ѳа дщи́ Заха́ріина.

²

сы́нъ два́десѧти пѧтѝ лѣ́тъ бѣ̀ є҆гда̀ нача̀ ца́рствовати, и҆ два́десѧть де́вѧть лѣ́ть ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ а҆вꙋ́ѳа дщѝ заха́рїина.

³

И сотвори́ пра́воє предъ очи́ма Госпо́днима, по всѣ́мъ єли́ка сотвори́ оте́цъ єго́ даві́дъ:

³

И҆ сотворѝ пра́вое пред̾ ѻ҆чи́ма гдⷭ҇нима, по всѣ̑мъ є҆ли̑ка сотворѝ ѻ҆те́цъ є҆гѡ̀ даві́дъ:

⁴

то́й разруши́ высо́кая, и сокруши́ вся́ ка́пища, и искорени́ дубра́вы и змію́ мѣ́дяную, ю́же сотвори́ Моисе́й, я́ко и до дні́й тѣ́хъ сы́нове Ізра́илевы бѣ́ху кадя́ще є́й: и назва́ и́мя є́й неєста́нъ.

⁴

то́й разрꙋшѝ высѡ́каѧ, и҆ сокрꙋшѝ всѧ̑ ка̑пища, и҆ и҆скоренѝ дꙋбра̑вы и҆ ѕмїю̀ мѣ́дѧнꙋю, ю҆́же сотворѝ мѡѷсе́й, ꙗ҆́кѡ и҆ до дні́й тѣ́хъ сы́нове і҆и҃лєвы бѣ́хꙋ кадѧ́ще є҆́й: и҆ назва̀ и҆́мѧ є҆́й нееста́нъ.

⁵

На Го́спода Бо́га Ізра́илева упова́, и но не́мъ не бы́сть подо́бенъ єму́ въ царе́хъ Іу́диныхъ и въ бы́вшихъ пре́жде єго́:

⁵

На гдⷭ҇а бг҃а і҆и҃лева оу҆пова̀, и҆ но не́мъ не бы́сть подо́бенъ є҆мꙋ̀ въ царе́хъ і҆ꙋ́диныхъ и҆ въ бы́вшихъ пре́жде є҆го̀:

⁶

и прилѣпи́ся Го́сподеви, не отступи́ от него́, и сохрани́ за́повѣди єго́, єли́ки заповѣ́да Моисе́й:

⁶

и҆ прилѣпи́сѧ гдⷭ҇еви, не ѿстꙋпѝ ѿ негѡ̀, и҆ сохранѝ за́пѡвѣди є҆гѡ̀, є҆ли̑ки заповѣ́да мѡѷсе́й:

⁷

и бѣ́ Госпо́дь съ ни́мъ, и во всѣ́хъ, я́же творя́ше, смы́сляше. И сопроти́вися царю́ Ассирі́йскому и не порабо́та єму́:

⁷

и҆ бѣ̀ гдⷭ҇ь съ ни́мъ, и҆ во всѣ́хъ, ꙗ҆̀же творѧ́ше, смы́слѧше. И҆ сопроти́висѧ царю̀ а҆ссѷрі́йскомꙋ и҆ не порабо́та є҆мꙋ̀:

⁸

то́й побѣди́ иноплеме́нники да́же до Га́зы и до предѣ́лъ єя́, от столпа́ стрегу́щихъ и да́же до гра́да тве́рда.

⁸

то́й побѣдѝ и҆ноплеме́нники да́же до га́зы и҆ до предѣ́лъ є҆ѧ̀, ѿ столпа̀ стрегꙋ́щихъ и҆ да́же и҆ гра́да тве́рда.

⁹

И бы́сть въ лѣ́то четве́ртоє царя́ єзекі́и, сіє́ же лѣ́то седмо́є осі́и, сы́ну илы́, царю́ Ізра́илеву, взы́де Саламанасса́ръ ца́рь Ассирі́йскъ на самарі́ю и обсѣ́де ю́,

⁹

И҆ бы́сть въ лѣ́то четве́ртое царѧ̀ є҆зекі́и, сїе́ же лѣ́то седмо́е ѡ҆сі́и, сы́нꙋ и҆лы̀, царю̀ і҆и҃левꙋ, взы́де саламанасса́ръ ца́рь а҆ссѷрі́йскъ на самарі́ю и҆ ѡ҆бсѣ́де ю҆̀,

¹⁰

и взя́ ю́ при концы́ тріє́хъ лѣ́тъ, въ шесто́є лѣ́то єзекі́єво, сіє́ лѣ́то девя́тоє осі́и царя́ Ізра́илева, и плѣне́на бы́сть самарі́а.

¹⁰

и҆ взѧ̀ ю҆̀ при концы̀ трїе́хъ лѣ́тъ, въ шесто́е лѣ́то є҆зекі́ево, сїѐ лѣ́то девѧ́тое ѡ҆сі́и царѧ̀ і҆и҃лева, и҆ плѣне́на бы́сть самарі́а.

¹¹

И преведе́ ца́рь Ассирі́йскій самаря́ны во Ассирі́ю, и посади́ я́ на ала́и и на Аво́рѣ, рѣка́хъ гоза́нскихъ, и въ предѣ́лѣхъ ми́дскихъ:

¹¹

И҆ преведѐ ца́рь а҆ссѷрі́йскїй самарѧ́ны во а҆ссѷрі́ю, и҆ посадѝ ѧ҆̀ на а҆ла́и и҆ на а҆вѡ́рѣ, рѣка́хъ гѡза́нскихъ, и҆ въ предѣ́лѣхъ ми́дскихъ:

¹²

поне́же не послу́шаша гла́са Го́спода Бо́га своєго́ и преступи́ша завѣ́тъ єго́, вся́ єли́ка заповѣ́да Моисе́й ра́бъ Госпо́день, и не послу́шаша, и не сотвори́ша.

¹²

поне́же не послꙋ́шаша гла́са гдⷭ҇а бг҃а своегѡ̀ и҆ престꙋпи́ша завѣ́тъ є҆гѡ̀, всѧ̑ є҆ли̑ка заповѣ́да мѡѷсе́й ра́бъ гдⷭ҇ень, и҆ не послꙋ́шаша, и҆ не сотвори́ша.

¹³

И въ четвертоєна́десять лѣ́то царя́ єзекі́и, взы́де сеннахирі́мъ ца́рь Ассирі́йскій на гра́ды Іу́дины тве́рдыя и взя́тъ я́.

¹³

И҆ въ четвертоена́десѧть лѣ́то царѧ̀ є҆зекі́и, взы́де сеннахирі́мъ ца́рь а҆ссѷрі́йскїй на гра́ды і҆ꙋ́дины твє́рдыѧ и҆ взѧ́тъ ѧ҆̀.

¹⁴

И посла́ єзекі́а ца́рь Іу́динъ послы́ къ царю́ Ассирі́йску въ лахі́съ, глаго́ля: согрѣши́хъ, возврати́ся от мене́: є́же а́ще возложи́ши на мя́, то́ понесу́. И возложи́ ца́рь Ассирі́йскій на єзекі́ю царя́ Іу́дина три́ста тала́нтъ сребра́ и три́десять тала́нтовъ зла́та.

¹⁴

И҆ посла̀ є҆зекі́а ца́рь і҆ꙋ́динъ послы̀ къ царю̀ а҆ссѷрі́йскꙋ въ лахі́съ, глаго́лѧ: согрѣши́хъ, возврати́сѧ ѿ менє̀: є҆́же а҆́ще возложи́ши на мѧ̀, то̀ понесꙋ̀. И҆ возложѝ ца́рь а҆ссѷрі́йскїй на є҆зекі́ю царѧ̀ і҆ꙋ́дина три́ста тала́нтъ сребра̀ и҆ три́десѧть тала́нтѡвъ зла́та.

¹⁵

И даде́ єзекі́а все́ сребро́ обрѣ́тшеєся въ дому́ Госпо́дни и въ сокро́вищихъ до́му царе́ва.

¹⁵

И҆ дадѐ є҆зекі́а всѐ сребро̀ ѡ҆брѣ́тшеесѧ въ домꙋ̀ гдⷭ҇ни и҆ въ сокро́вищихъ до́мꙋ царе́ва.

¹⁶

Во вре́мя о́но ссѣче́ єзекі́а ца́рь Іу́динъ две́ри хра́ма Госпо́дня и утверже́нія, я́же позлати́ єзекі́а ца́рь Іу́динъ, и даде́ и́хъ царю́ Ассирі́йску.

¹⁶

Во вре́мѧ ѻ҆́но ссѣчѐ є҆зекі́а ца́рь і҆ꙋ́динъ двє́ри хра́ма гдⷭ҇нѧ и҆ оу҆твержє́нїѧ, ꙗ҆̀же позлатѝ є҆зекі́а ца́рь і҆ꙋ́динъ, и҆ дадѐ и҆̀хъ царю̀ а҆ссѷрі́йскꙋ.

¹⁷

И посла́ ца́рь Ассирі́йскъ Ѳарѳа́на и равоса́иа и рапса́ка от лахі́са на Ієрусали́мъ къ царю́ єзекі́и съ си́лою тя́жкою зѣло́. И взыдо́ша, и пріидо́ша ко Ієрусали́му, и ста́ша у водоте́чи купѣ́ли вы́шнія, я́же є́сть на пути́ села́ бѣли́лнаго,

¹⁷

И҆ посла̀ ца́рь а҆ссѷрі́йскъ ѳарѳа́на и҆ равоса́иа и҆ раѱа́ка ѿ лахі́са на і҆ерⷭ҇ли́мъ къ царю̀ є҆зекі́и съ си́лою тѧ́жкою ѕѣлѡ̀. И҆ взыдо́ша, и҆ прїидо́ша ко і҆ерⷭ҇ли́мꙋ, и҆ ста́ша оу҆ водоте́чи кꙋпѣ́ли вы́шнїѧ, ꙗ҆́же є҆́сть на пꙋтѝ села̀ бѣли́лнагѡ,

¹⁸

и возопи́ша ко єзекі́и. И изы́де къ ни́мъ Єліакі́мъ сы́нъ хелкі́євъ строи́тель, и сомна́съ книго́чій, и Іоа́съ сы́нъ Сафа́товъ воспомина́тель.

¹⁸

и҆ возопи́ша ко є҆зекі́и. И҆ и҆зы́де къ ни̑мъ є҆лїакі́мъ сы́нъ хелкі́евъ строи́тель, и҆ сѡмна́съ книго́чїй, и҆ і҆ѡа́съ сы́нъ сафа́товъ воспомина́тель.

¹⁹

И рече́ къ ни́мъ рапса́къ: рцы́те ны́нѣ ко єзекі́и: си́це глаго́летъ ца́рь вели́кій, ца́рь Ассирі́йскій: что́ упова́ніє сіє́, на не́же упова́єши?

¹⁹

И҆ речѐ къ ни̑мъ раѱа́къ: рцы́те нн҃ѣ ко є҆зекі́и: си́це глаго́летъ ца́рь вели́кїй, ца́рь а҆ссѷрі́йскїй: что̀ оу҆пова́нїе сїѐ, на не́же оу҆пова́еши;

²⁰

ре́клъ єси́: то́кмо словеса́ усте́нъ, совѣ́тъ и си́ла на бра́нь: ны́нѣ у́бо на кого́ надѣ́яся отве́рглъ єси́ мене́?

²⁰

ре́клъ є҆сѝ: то́кмѡ словеса̀ оу҆сте́нъ, совѣ́тъ и҆ си́ла на бра́нь: нн҃ѣ оу҆̀бо на кого̀ надѣ́ждꙋ ѿве́рглъ є҆сѝ менѐ;

²¹

ны́нѣ се́, надѣ́єшися ты́ на же́злъ тро́стяный сло́мленый се́й, на Єги́петъ ли? на́ньже а́ще опре́тся му́жъ, вни́детъ въ ру́ку єго́ и пронзе́тъ ю́: та́ко фарао́нъ ца́рь Єги́петскій всѣ́мъ надѣ́ющымся на́нь:

²¹

нн҃ѣ съ, надѣ́ешисѧ ты̀ на же́злъ тро́стѧный сло́мленый се́й, на є҆гѵ́петъ ли; на́ньже а҆́ще ѡ҆пре́тсѧ мꙋ́жъ, вни́детъ въ рꙋ́кꙋ є҆гѡ̀ и҆ пронзе́тъ ю҆̀: та́кѡ фараѡ́нъ ца́рь є҆гѵ́петскїй всѣ̑мъ надѣ́ющымсѧ на́нь:

²²

и а́ще мнѣ́ рече́те: на Го́спода Бо́га надѣ́ємся: не то́й ли се́й, єго́же и отста́ви єзекі́а высо́кая єго́ и же́ртвенники єго́, и рече́ Іу́дѣ и Ієрусали́му: покло́нитеся предъ же́ртвенникомъ си́мъ во Ієрусали́мѣ?

²²

и҆ а҆́ще мнѣ̀ рече́те: на гдⷭ҇а бг҃а надѣ́емсѧ: не то́й ли се́й, є҆гѡ́же и҆ ѿста́ви є҆зекі́а высѡ́каѧ є҆гѡ̀ и҆ же́ртвенники є҆гѡ̀, и҆ речѐ і҆ꙋ́дѣ и҆ і҆ерⷭ҇ли́мꙋ: покло́нитесѧ пред̾ же́ртвенникомъ си́мъ во і҆ерⷭ҇ли́мѣ;

²³

и ны́нѣ соєдини́теся съ господи́номъ мои́мъ царе́мъ Ассирі́йскимъ, и да́мъ тебѣ́ двѣ́ ты́сящы ко́ней, а́ще мо́жеши имѣ́ти вса́дники на ня́:

²³

и҆ нн҃ѣ соедини́тесѧ съ господи́номъ мои́мъ царе́мъ а҆ссѷрі́йскимъ, и҆ да́мъ тебѣ̀ двѣ̀ ты́сѧщы ко́ней, а҆́ще мо́жеши и҆мѣ́ти вса́дники на нѧ̀:

²⁴

и ка́ко отврати́ши лице́ топа́рха єди́наго от рабо́въ господи́на моєго́ малѣ́йшихъ, и упова́лъ єси́ са́мъ на Єги́петъ, на колесни́цы и ко́ни?

²⁴

и҆ ка́кѡ ѿврати́ши лицѐ топа́рха є҆ди́нагѡ ѿ рабѡ́въ господи́на моегѡ̀ малѣ́йшихъ, и҆ оу҆пова́лъ є҆сѝ са́мъ на є҆гѵ́петъ, на колєсни́цы и҆ ко́ни;

²⁵

и ны́нѣ у́бо єда́ безъ Го́спода взыдо́хомъ на мѣ́сто сіє́, є́же потреби́ти и рече́ бо Госпо́дь ко мнѣ́: взы́ди на зе́млю сію́ и потреби́ ю́.

²⁵

и҆ нн҃ѣ оу҆̀бо є҆да̀ без̾ гдⷭ҇а взыдо́хомъ на мѣ́сто сїѐ, є҆́же потреби́ти и҆ речѐ бо гдⷭ҇ь ко мнѣ̀: взы́ди на зе́млю сїю̀ и҆ потребѝ ю҆̀.

²⁶

И рече́ Єліакі́мъ сы́нъ хелкі́инъ и сомна́съ и Іоа́съ ко рапса́ку: глаго́ли ны́нѣ ко отроко́мъ твои́мъ Си́рски, я́ко слы́шимъ мы́, а не глаго́ли къ на́мъ Іуде́йски, и почто́ глаго́леши во у́шы люді́й, и́же на стѣнѣ́?

²⁶

И҆ речѐ є҆лїакі́мъ сы́нъ хелкі́инъ и҆ сѡмна́съ и҆ і҆ѡа́съ ко раѱа́кꙋ: глаго́ли нн҃ѣ ко ѻ҆трокѡ́мъ твои̑мъ сѵ́рски, ꙗ҆́кѡ слы́шимъ мы̀, а҆ не глаго́ли къ на́мъ і҆ꙋде́йски, и҆ почто̀ глаго́леши во оу҆́шы люді́й, и҆̀же на стѣнѣ̀;

²⁷

И рече́ къ ни́мъ рапса́къ: єда́ къ господи́ну твоєму́ и къ тебѣ́ посла́ мя господи́нъ мо́й глаго́лати словеса́ сія́? не къ муже́мъ ли сѣдя́щымъ на стѣнѣ́, є́же я́сти и́мъ гно́й сво́й и пи́ти и́мъ се́чь свою́ съ ва́ми вку́пѣ?

²⁷

И҆ речѐ къ ни̑мъ раѱа́къ: є҆да̀ къ господи́нꙋ твоемꙋ̀ и҆ къ тебѣ̀ посла́ мѧ господи́нъ мо́й глаго́лати словеса̀ сїѧ̑; не къ мꙋжє́мъ ли сѣдѧ́щымъ на стѣнѣ̀, є҆́же ꙗ҆́сти и҆̀мъ гно́й сво́й и҆ пи́ти и҆̀мъ се́чь свою̀ съ ва́ми вкꙋ́пѣ;

²⁸

И ста́ рапса́къ, и возопи́ гла́сомъ вели́кимъ Іуде́йски, и глаго́ла, и рече́: слы́шите словеса́ вели́каго царя́ Ассирі́йска:

²⁸

И҆ ста̀ раѱа́къ, и҆ возопѝ гла́сомъ вели́кимъ і҆ꙋде́йски, и҆ глаго́ла, и҆ речѐ: слы́шите словеса̀ вели́кагѡ царѧ̀ а҆ссѷрі́йска:

²⁹

си́це глаго́летъ ца́рь: да не возно́ситъ ва́съ ца́рь єзекі́а словесы́, поне́же не возмо́жетъ ва́съ изъя́ти изъ руки́ моєя́:

²⁹

си́це глаго́летъ ца́рь: да не возно́ситъ ва́съ ца́рь є҆зекі́а словесы̀, поне́же не возмо́жетъ ва́съ и҆з̾ѧ́ти и҆з̾ рꙋкѝ моеѧ̀:

³⁰

и да не обнаде́живаєтъ ва́съ єзекі́а Го́сподемъ, глаго́ля: изъима́я и́зметъ вы́ Госпо́дь, и не и́мать преда́тися гра́дъ се́й въ руцѣ́ царя́ Ассирі́йска:

³⁰

и҆ да не ѡ҆бнаде́живаетъ ва́съ є҆зекі́а гдⷭ҇емъ, глаго́лѧ: и҆з̾има́ѧ и҆́зметъ вы̀ гдⷭ҇ь, и҆ не и҆́мать преда́тисѧ гра́дъ се́й въ рꙋцѣ̀ царѧ̀ а҆ссѷрі́йска:

³¹

не послу́шайте єзекі́и, я́ко си́це глаго́летъ ца́рь Ассирі́йскій: сотвори́те со мно́ю благослове́ніє и изыди́те ко мнѣ́, и да піє́тъ му́жъ от віногра́да своєго́, и му́жъ вку́ситъ от смо́квей свои́хъ, и да піє́тъ во́ду от ро́ва своєго́,

³¹

не послꙋ́шайте є҆зекі́и, ꙗ҆́кѡ си́це глаго́летъ ца́рь а҆ссѷрі́йскїй: сотвори́те со мно́ю благослове́нїе и҆ и҆зыди́те ко мнѣ̀, и҆ да пїе́тъ мꙋ́жъ ѿ вїногра́да своегѡ̀, и҆ мꙋ́жъ вкꙋ́ситъ ѿ смо́квей свои́хъ, и҆ да пїе́тъ во́дꙋ ѿ ро́ва своегѡ̀,

³²

до́ндеже пріиду́ и поиму́ вы́ въ зе́млю [такову́] я́коже земля́ ва́ша, земля́ пшени́цы и віна́, и хлѣ́бовъ и віногра́довъ, земля́ ма́сличинъ єле́а и ме́да, и жи́ви бу́дете и не у́мрете: и не послу́шайте єзекі́и, я́ко прельща́єтъ вы́, глаго́ля: Госпо́дь ны́ изба́витъ:

³²

до́ндеже прїидꙋ̀ и҆ поимꙋ̀ вы̀ въ зе́млю (таковꙋ̀) ꙗ҆́коже землѧ̀ ва́ша, землѧ̀ пшени́цы и҆ вїна̀, и҆ хлѣ́бѡвъ и҆ вїногра́дѡвъ, землѧ̀ ма́сличинъ є҆ле́а и҆ ме́да, и҆ жи́ви бꙋ́дете и҆ не оу҆́мрете: и҆ не послꙋ́шайте є҆зекі́и, ꙗ҆́кѡ прельща́етъ вы̀, глаго́лѧ: гдⷭ҇ь ны̀ и҆зба́витъ:

³³

єда́ избавля́юще изба́виша бо́зи язы́ковъ кі́йждо и́хъ свою́ страну́ изъ руки́ царя́ Ассирі́йска?

³³

є҆да̀ и҆збавлѧ́юще и҆зба́виша бо́зи ꙗ҆зы́кѡвъ кі́йждо и҆́хъ свою̀ странꙋ̀ и҆з̾ рꙋкѝ царѧ̀ а҆ссѷрі́йска;

³⁴

гдѣ́ є́сть бо́гъ Єма́ѳа и Арфа́да? гдѣ́ є́сть бо́гъ Сепфаруі́ма, Ана́ и Ава́? єда́ изба́виша самарі́ю изъ руку́ моє́ю?

³⁴

гдѣ̀ є҆́сть бо́гъ є҆ма́ѳа и҆ а҆рфа́да; гдѣ̀ є҆́сть бо́гъ сепфарꙋі́ма, а҆на̀ и҆ а҆ва̀; є҆да̀ и҆зба́виша самарі́ю и҆з̾ рꙋкꙋ̀ моє́ю;

³⁵

кто́ во всѣ́хъ бозѣ́хъ земны́хъ, и́же изба́виша зе́мли их от руки́ моєя́? и ка́ко и́зметъ Госпо́дь Ієрусали́ма изъ руки́ моєя́?

³⁵

кто̀ во всѣ́хъ бозѣ́хъ земны́хъ, и҆́же и҆зба́виша зе́мли и҆ ѿ рꙋкѝ моеѧ̀; и҆ ка́кѡ и҆́зметъ гдⷭ҇ь і҆ерⷭ҇ли́ма и҆з̾ рꙋкѝ моеѧ̀;

³⁶

И умолко́ша лю́діє и не отвѣща́ша єму́ сло́ва, я́ко заповѣ́да и́мъ ца́рь глаго́ля: не отвѣща́йте єму́.

³⁶

И҆ оу҆молко́ша лю́дїе и҆ не ѿвѣща́ша є҆мꙋ̀ сло́ва, ꙗ҆́кѡ заповѣ́да и҆̀мъ ца́рь глаго́лѧ: не ѿвѣща́йте є҆мꙋ̀.

³⁷

И вни́де Єліакі́мъ сы́нъ хелкі́инъ строи́тель, и сомна́съ книго́чій, и Іоа́съ сы́нъ Сафа́товъ воспомина́тель ко єзекі́и, раздра́вше ри́зы своя́, и возвѣсти́ша єму́ словеса́ рапса́кова.

³⁷

И҆ вни́де є҆лїакі́мъ сы́нъ хелкі́инъ строи́тель, и҆ сѡмна́съ книго́чїй, и҆ і҆ѡа́съ сы́нъ сафа́товъ воспомина́тель ко є҆зекі́и, раздра́вше ри̑зы своѧ̑, и҆ возвѣсти́ша є҆мꙋ̀ словеса̀ раѱа́кѡва.