Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
И возвѣсти́ша сія́ глаго́лы царе́ви: и посла́ ца́рь, и собра́ къ себѣ́ вся́ старѣ́йшины Іу́дины и Ієрусали́мляны,
2
и вни́де ца́рь въ до́мъ Госпо́день, и вси́ му́жіє Іу́дины и вси́ живу́щіи во Ієрусали́мѣ съ ни́мъ, и жерцы́, и проро́цы, и вси́ лю́діє от ма́ла и до вели́ка, и прочте́ во ушеса́ и́хъ вся́ словеса́ кни́ги завѣ́та обрѣ́тшіяся въ дому́ Госпо́дни:
3
и ста́ ца́рь у столпа́ и завѣща́ завѣ́тъ предъ Го́сподемъ, є́же ходи́ти вслѣ́дъ Го́спода и храни́ти за́повѣди єго́ и свидѣ́нія єго́ и оправда́нія єго́ всѣ́мъ се́рдцемъ и все́ю душе́ю, є́же возста́вити словеса́ завѣ́та сего́, я́же пи́сана въ кни́зѣ се́й. И ста́ша вси́ лю́діє въ завѣ́тѣ.
4
И заповѣ́да ца́рь хелкі́и жерцу́ вели́кому и жерце́мъ вторы́мъ и стрегу́щымъ вра́тъ изнести́ от хра́ма Госпо́дня вся́ сосу́ды сотворе́ныя Ваа́лу и дубра́вѣ и все́й си́лѣ небе́снѣй, и сожже́ и внѣ́ Ієрусали́ма въ садимо́ѳѣ ке́дрстѣ и изве́рже пра́хъ и́хъ въ Веѳи́ль:
5
и сожже́ хомарі́мы, и́хже да́ша ца́ріє Іу́дины, и кадя́ху въ высо́кихъ и во градѣ́хъ Іу́диныхъ и во окре́стныхъ Ієрусали́ма, и кадя́щихъ Ваа́лу, и со́лнцу, и лунѣ́, и плане́тамъ и все́й си́лѣ небе́снѣй:
6
и изнесе́ кумі́ръ изъ хра́ма Госпо́дня внѣ́ Ієрусали́ма на пото́къ ке́дрскъ, и сожже́ єго́ въ пото́цѣ ке́дрстѣ, и истни́ въ пра́хъ, и вве́рже пра́хъ и́хъ въ гро́бы сыно́въ людски́хъ:
7
и разруши́ хра́мъ кадисі́мовъ, и́же бѣ́ въ хра́мѣ Госпо́дни, идѣ́же жены́ прядя́ху ри́зы кумі́ру:
8
и возведе́ вся́ жерцы́ от градо́въ Іу́диныхъ, и оскверни́ высо́кая, идѣ́же кадя́ху жерцы́, от гаваи́ да вирсаве́и: и разруши́ хра́мъ вра́тъ, и́же бѣ́ при две́рехъ вра́тъ Іису́са кня́зя гра́днаго, и́же ошу́юю входя́щымъ две́рми гра́да.
9
Оба́че не вхожда́ху жерцы́ высо́кихъ ко олтарю́ Госпо́дню во Ієрусали́мѣ, но то́кмо ядя́ху опрѣсно́ки посредѣ́ бра́тіи своєя́.
10
И оскверни́ тафе́ѳа, и́же въ де́бри сыно́въ Єно́млихъ, є́же не превести́ му́жу сы́на своєго́ и му́жу дще́ре своєя́ моло́ху сквозѣ́ о́гнь:
11
и сожже́ ко́ни, и́хже да́ша ца́ріє Іу́дины со́лнцу во вхо́дѣ хра́му Госпо́дня, при влага́лищи наѳа́на, царе́ва скопца́ во фарурі́мѣ: и колесни́цу со́лнечную сожже́ огне́мъ:
12
и олтари́, я́же на кро́вѣ го́рницы Аха́зовы, я́же сотвори́ша ца́ріє Іу́дины и олтари́, и́же созда́ Манассі́а во двою́ двору́ хра́ма Госпо́дня, раскопа́ ца́рь, и све́рже отту́ду, и всы́па пра́хъ и́хъ въ пото́къ ке́дрскъ:
13
и хра́мъ, и́же предъ лице́мъ Ієрусали́ма, одесну́ю горы́ мосѳа́ѳъ, єго́же созда́ Соломо́нъ ца́рь Ізра́илевъ Аста́ртѣ ме́рзости Сідо́нстѣй и хамо́су ме́рзости Моа́вли и молхо́лу ме́рзости сыно́въ Аммо́нихъ, оскверни́ ца́рь:
14
и сокруши́ столпы́, и искорени́ дубра́вы, и напо́лни мѣста́ и́хъ костми́ человѣ́ческими:
15
и олта́рь и́же во Веѳи́ли высо́кій, єго́же сотвори́ ієровоа́мъ сы́нъ нава́товъ, и́же въ грѣ́хъ введе́ Ізра́иля, и олта́рь то́й высо́кій раскопа́, и сокруши́ ка́меніє єго́, и истни́ въ пра́хъ, и сожже́ кумі́ры.
16
И восклони́ся Іосі́а, и ви́дѣ гро́бы су́щыя во гра́дѣ та́мо, и посла́, и взя́ ко́сти от гро́бъ, и сожже́ на олтари́, и оскверни́ єго́ по глаго́лу Госпо́дню, єго́же глаго́ла человѣ́къ Бо́жій, єгда́ стоя́ше ієровоа́мъ въ пра́здникъ предъ олтаре́мъ: и обра́щься возведе́ о́чи свои́ на гро́бъ человѣ́ка Бо́жія глаго́лавшаго словеса́ сія́.
17
и рече́: что́ моги́ла сія́, ю́же а́зъ ви́жду? И рѣ́ша єму́ му́жіє гра́да: гро́бъ се́й человѣ́ка Бо́жія є́сть, и́же пріи́де от Іу́ды и проглаго́ла словеса́ сія́, я́же сотвори́лъ єси́ ны́нѣ надъ олтаре́мъ, и́же въ Веѳи́ли.
18
И рече́: оста́вите єго́, да не подви́жетъ ни єди́нъ му́жъ косте́й єго́. И оста́виша ко́сти єго́ съ костьми́ проро́ка прише́дшаго от самарі́и.
19
Єще́ и вся́ хра́мы высо́кихъ су́щихъ во градѣ́хъ самарі́йскихъ, я́же сотвори́ша ца́ріє Ізра́илевы прогнѣвля́юще Го́спода, отве́рже Іосі́а, и сотвори́ и́мъ вся́ дѣла́, я́же сотвори́ въ Веѳи́ли,
20
и закла́ вся́ жерцы́ высо́кихъ су́щыя та́мо предъ олтарми́, и сожже́ на ни́хъ ко́сти человѣ́чи, и возврати́ся во Ієрусали́мъ.
21
И заповѣ́да ца́рь все́мъ лю́демъ, глаго́ля: сотвори́те па́сху Го́сподеви Бо́гу на́шему, я́коже пи́сано въ кни́зѣ завѣ́та сего́:
22
я́ко не бы́сть па́сха сія́ от дні́й суді́й, и́же суди́ша Ізра́илеви, и во всѣ́хъ дне́хъ царе́й Ізра́илевыхъ и царе́й Іу́диныхъ:
23
но то́кмо во осмоєна́десять лѣ́то царя́ Іосі́и бы́сть па́сха Го́споду во Ієрусали́мѣ.
24
Єще́ и волше́бники, и вражби́ты, и Ѳерафі́мы, и кумі́ры, и вся́ ме́рзости бы́вшыя въ земли́ Іу́динѣ и во Ієрусали́мѣ, искорени́ ца́рь Іосі́а, да утверди́тъ словеса́ зако́нная пи́санная въ кни́зѣ, ю́же обрѣ́те хелкі́а жре́цъ въ хра́мѣ Госпо́дни.
25
Подо́бенъ єму́ не бы́сть предъ ни́мъ ца́рь, и́же обрати́ся къ Го́сподеви всѣ́мъ се́рдцемъ свои́мъ и все́ю душе́ю своє́ю и все́ю си́лою своє́ю по всему́ зако́ну Моисе́ову, и по не́мъ не воста́ подо́бенъ єму́.
26
Оба́че не отврати́ся Госпо́дь от я́рости гнѣ́ва своєго́ вели́каго, и́мже возъяри́ся гнѣ́вомъ на Іу́ду, на прогнѣ́ванія, и́миже прогнѣ́ва єго́ Манассі́а,
27
и рече́ Госпо́дь: єще́ и Іу́ду отри́ну от лица́ моєго́, я́коже отри́нухъ Ізра́иля, и гра́дъ се́й отве́ргу, єго́же избра́хъ, Ієрусали́ма, и хра́мъ, о не́мже рѣ́хъ: бу́детъ и́мя моє́ ту́.
28
И про́чая слове́съ Іосі́євыхъ, и вся́ єли́ка сотвори́, не сія́ ли напи́сана въ кни́зѣ слове́съ дні́й царей Іу́диныхъ?
29
Во дне́хъ же єго́ взы́де фарао́нъ нехао́ ца́рь Єги́петскъ на царя́ Ассирі́йска на реку́ Євфра́тъ: и изы́де ца́рь Іосі́а на срѣ́теніє єму́, и уби́ єго́ нехао́ ца́рь въ Магеддо́нѣ, єгда́ єго́ узрѣ́.
30
И взя́ша єго́ о́троцы єго́ ме́ртва изъ Магеддо́на и принесо́ша єго́ во Ієрусали́мъ, и погребо́ша єго́ во гро́бѣ єго́ во гра́дѣ даві́довѣ. И поя́ша лю́діє земли́ тоя́ Іоаха́за сы́на Іосі́ина и пома́заша єго́, и воцари́ша єго́ вмѣ́сто отца́ єго́.
31
Сы́нъ два́десяти и тріє́хъ лѣ́тъ бѣ́ Іоаха́зъ, внегда́ нача́ ца́рствовати и три́ ме́сяцы ца́рствова во Ієрусали́мѣ. И́мя же ма́тери єго́ Аміта́ла, дщи́ ієремі́и изъ ловны́.
32
И сотвори́ лука́воє предъ очи́ма Госпо́днима, по всѣ́мъ єли́ка сотвори́ша отцы́ єго́.
33
И пресели́ єго́ фарао́нъ нехао́ въ ревла́амъ въ зе́млю Єма́ѳъ, да не ца́рствуєтъ во Ієрусали́мѣ, и возложи́ да́нь на зе́млю ту́ сто́ тала́нтъ сребра́ и сто́ тала́нтъ зла́та.
34
И поста́ви царе́мъ фарао́нъ нехао́ надъ ни́ми Єліакі́ма, сы́на Іосі́и царя́ Іу́дина, вмѣ́сто Іосі́и отца́ єго́, и премѣни́ и́мя єму́ Іоакі́мъ: Іоаха́за же взя́ и введе́ во Єги́петъ и у́мре та́мо.
35
И сребро́ и зла́то даде́ Іоакі́мъ фарао́ну, оба́че написа́ зе́млю дая́ти сребро́ по словеси́ фарао́ню: му́жъ по оцѣне́нію своєму́ дая́ше сребро́ и зла́то от люді́й земли́ тоя́ дая́ти фарао́ну нехао́.
36
Сы́нъ бѣ́ два́десяти и пяти́ лѣ́тъ Іоакі́мъ, єгда́ нача́ ца́рствовати, и єдинона́десять лѣ́тъ ца́рствова во Ієрусали́мѣ. И́мя же ма́тери єго́ Ієлда́фъ, дщи́ фадаі́ля, от ру́мы.
37
И сотвори́ лука́воє предъ очи́ма Госпо́днима, по всѣ́мъ єли́ка сотвори́ша отцы́ єго́.