Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
Во дне́хъ єго́ взы́де Навуходоно́соръ ца́рь Вавило́нскій, и бы́сть єму́ Іоакі́мъ ра́бъ три́ лѣ́та, и отврати́ся, и отве́ржеся єго́.
2
И посла́ Госпо́дь єму́ єдинопоя́сники халде́йскія и єдинопоя́сники сирі́йскія, поя́сники сыно́въ Аммо́нихъ, и посла́ и́хъ въ зе́млю Іу́дову на побѣжде́ніє по словеси́ Госпо́дню, є́же глаго́ла руко́ю рабо́въ свои́хъ проро́ковъ.
3
Оба́че пріи́де по гнѣ́ву Госпо́дню на Іу́ду, є́же отста́вити єго́ от лица́ своєго́ грѣ́хъ ра́ди Манассі́иныхъ, по всѣ́мъ єли́ка сотвори́,
4
и кро́вь непови́нную пролія́, и напо́лни Ієрусали́мъ кро́ве непови́нныя, сего́ ра́ди не восхотѣ́ Госпо́дь уми́лостивитися.
5
И про́чая слове́съ Іоакі́мовыхъ, и вся́ єли́ка сотвори́, не се́ ли, сія́ напи́сана въ кни́зѣ слове́съ дні́й царе́й Іу́диныхъ?
6
И у́спе Іоакі́мъ со отцы́ свои́ми, и воцари́ся Ієхоні́а вмѣ́сто єго́.
7
И не приложи́ ксему́ ца́рь Єги́петскій изы́ти изъ земли́ своєя́, я́ко взя́ ца́рь Вавило́нскій от пото́ка Єги́петска да́же до рѣки́ Євфра́та, вся́ єли́ка бы́ша царя́ Єги́петска.
8
Сы́нъ осмина́десяти лѣ́тъ Ієхоні́а, єгда́ нача́ ца́рствовати, и три́ ме́сяцы ца́рствова во Ієрусали́мѣ. И́мя же ма́тере єго́ не́сѳа, дщи́ Єланасѳа́на, от Ієрусали́ма.
9
И сотвори́ лука́воє предъ очи́ма Госпо́днима, по всему́ єли́ко сотвори́ оте́цъ єго́.
10
И во вре́мя то́ взы́де Навуходоно́соръ ца́рь Вавило́нский на Ієрусали́мъ, и бы́сть гра́дъ во облеже́ніи.
11
И пріи́де Навуходоно́соръ ца́рь Вавило́нскій на гра́дъ Ієрусали́мъ, и о́троцы єго́ о́коло обсѣдя́ху гра́дъ.
12
И изы́де Ієхоні́а ца́рь Іу́динъ ко царю́ Вавило́нскому, са́мъ и о́троцы єго́, и ма́ти єго́, и кня́зи єго́, и скопцы́ єго́, и взя́ єго́ ца́рь Вавило́нскій въ осмо́є лѣ́то ца́рства своєго́.
13
И изнесе́ вся́ сокро́вища отту́ду су́щая во хра́мѣ Госпо́дни и сокро́вища до́му царе́ва, и сокруши́ вся́ сосу́ды златы́я, я́же сотвори́ Соломо́нъ ца́рь Ізра́илевъ во хра́мѣ по глаго́лу Госпо́дню,
14
и пресели́ Ієрусали́мляны и вся́ кня́зи, и си́льныя крѣ́постію, плѣ́на де́сять ты́сящъ плѣни́въ, и вся́каго древодѣ́ля, и худо́жники: и никто́же оста́ся, то́кмо убо́зіи земли́ тоя́:
15
и преведе́ Ієхоні́ю въ Вавило́нъ, и ма́терь царе́ву, и жены́ царе́вы, и скопцы́ єго́, и крѣ́пкія земли́ тоя́ введе́ на преселе́ніє изъ Ієрусали́ма въ Вавило́нъ:
16
и вся́ му́жы си́лы, се́дмь ты́сящъ, и древодѣ́ль и худо́жниковъ ты́сящу, вси́ си́льніи творя́щіи бра́нь, и введе́ и́хъ ца́рь Вавило́нскій въ преселе́ніє въ Вавило́нъ.
17
И поста́ви царе́мъ Вавило́нскій ца́рь ватѳані́ю сы́на єго́ вмѣ́сто єго́, и преложи́ и́мя єму́ седекі́а.
18
Сы́нъ два́десяти и єди́наго лѣ́та седекі́а, внегда́ нача́ ца́рствовати, и єдинона́десять лѣ́тъ ца́рствова во Ієрусали́мѣ. И́мя же ма́тере єго́ Аміта́ла, дщи́ ієремі́ина, от ловны́.
19
И сотвори́ лука́воє предъ очи́ма Госпо́днима, по всему́ єли́ка сотвори́ Іоакі́мъ,
20
я́ко я́рость бѣ́ Госпо́дня на Ієрусали́мѣ и на Іу́дѣ, до́ндеже отве́рже я́ от лица́ своєго́. И отве́ржеся седекі́а царя́ Вавило́нска.