¹

И рече́ даві́дъ: є́сть ли єще́ оста́вшійся въ дому́ Сау́ли, и сотворю́ съ ни́мъ ми́лость Іонаѳа́на ра́ди?

¹

И҆ речѐ даві́дъ: є҆́сть ли є҆щѐ ѡ҆ста́вшїйсѧ въ домꙋ̀ саꙋ́ли, и҆ сотворю̀ съ ни́мъ ми́лость і҆ѡнаѳа́на ра́ди;

²

И от до́му Сау́ля бѣ́ о́трокъ, и и́мя єму́ Сіва́: и призва́ша єго́ къ даві́ду, и рече́ къ нему́ ца́рь: ты́ ли єси́ Сіва́? И рече́: а́зъ ра́бъ тво́й.

²

И҆ ѿ до́мꙋ саꙋ́лѧ бѣ̀ ѻ҆́трокъ, и҆ и҆́мѧ є҆мꙋ̀ сїва̀: и҆ призва́ша є҆го̀ къ даві́дꙋ, и҆ речѐ къ немꙋ̀ ца́рь: ты́ ли є҆сѝ сїва̀; И҆ речѐ: а҆́зъ ра́бъ тво́й.

³

И рече́ ца́рь: оста́ся ли от до́му Сау́ля єще́ му́жъ, и сотворю́ съ ни́мъ ми́лость Бо́жію? И рече́ Сіва́ къ царю́: єще́ є́сть сы́нъ Іонаѳа́новъ, хро́мъ нога́ма.

³

И҆ речѐ ца́рь: ѡ҆ста́сѧ ли ѿ до́мꙋ саꙋ́лѧ є҆щѐ мꙋ́жъ, и҆ сотворю̀ съ ни́мъ млⷭ҇ть бж҃їю; И҆ речѐ сїва̀ къ царю̀: є҆щѐ є҆́сть сы́нъ і҆ѡнаѳа́новъ, хро́мъ нога́ма.

⁴

И рече́ ца́рь: гдѣ́ єсть? И рече́ Сіва́ къ царю́: се́, въ дому́ Махі́ра сы́на Аміи́ля от лода́вара.

⁴

И҆ речѐ ца́рь: гдѣ́ є҆сть; И҆ речѐ сїва̀ къ царю̀: сѐ, въ домꙋ̀ махі́ра сы́на а҆мїи́лѧ ѿ лода́вара.

⁵

И посла́ ца́рь даві́дъ, и взя́ єго́ изъ до́му Махі́ра сы́на Аміи́ля от лода́вара.

⁵

И҆ посла̀ ца́рь даві́дъ, и҆ взѧ̀ є҆го̀ и҆з̾ до́мꙋ махі́ра сы́на а҆мїи́лѧ ѿ лода́вара.

⁶

И пріи́де мемфівосѳе́й сы́нъ Іонаѳа́на сы́на Сау́лова къ царю́ даві́ду, и паде́ на лицы́ своє́мъ и поклони́ся єму́. И рече́ єму́ даві́дъ: мемфівосѳе́є. И рече́: се́, ра́бъ тво́й.

⁶

И҆ прїи́де мемфївосѳе́й сы́нъ і҆ѡнаѳа́на сы́на саꙋ́лова къ царю̀ даві́дꙋ, и҆ падѐ на лицы̀ свое́мъ и҆ поклони́сѧ є҆мꙋ̀. И҆ речѐ є҆мꙋ̀ даві́дъ: мемфївосѳе́е. И҆ речѐ: сѐ, ра́бъ тво́й.

⁷

И рече́ єму́ даві́дъ: не бо́йся, я́ко творя́ сотворю́ съ тобо́ю ми́лость Іонаѳа́на ра́ди отца́ твоєго́, и возвращу́ тебѣ́ вся́ се́ла Сау́ла дѣ́да твоєго́, и ты́ я́ждь хлѣ́бъ на трапе́зѣ моє́й всегда́.

⁷

И҆ речѐ є҆мꙋ̀ даві́дъ: не бо́йсѧ, ꙗ҆́кѡ творѧ̀ сотворю̀ съ тобо́ю ми́лость і҆ѡнаѳа́на ра́ди ѻ҆тца̀ твоегѡ̀, и҆ возвращꙋ̀ тебѣ̀ всѧ̑ се́ла саꙋ́ла дѣ́да твоегѡ̀, и҆ ты̀ ꙗ҆́ждь хлѣ́бъ на трапе́зѣ мое́й всегда̀.

⁸

И поклони́ся єму́ мемфівосѳе́й и рече́: кто́ єсмь а́зъ ра́бъ тво́й, я́ко призрѣ́лъ єси́ на пса́ уме́ршаго подо́бнаго мнѣ́?

⁸

И҆ поклони́сѧ є҆мꙋ̀ мемфївосѳе́й и҆ речѐ: кто́ є҆смь а҆́зъ ра́бъ тво́й, ꙗ҆́кѡ призрѣ́лъ є҆сѝ на пса̀ оу҆ме́ршаго подо́бнаго мнѣ̀;

⁹

И призва́ ца́рь Сіву́ о́трочища Сау́ля, и рече́ єму́: вся́ єли́ка су́ть Сау́ля и ве́сь до́мъ єго́ да́хъ сы́ну господи́на твоєго́:

⁹

И҆ призва̀ ца́рь сївꙋ̀ ѻ҆́трочища саꙋ́лѧ, и҆ речѐ є҆мꙋ̀: всѧ̑ є҆ли̑ка сꙋ́ть саꙋ̑лѧ и҆ ве́сь до́мъ є҆гѡ̀ да́хъ сы́нꙋ господи́на твоегѡ̀:

¹⁰

и дѣ́лай єму́ зе́млю ты́ и сы́нове твои́ и раби́ твои́, и да прино́сиши сы́ну господи́на твоєго́ хлѣ́бы, да я́стъ: и мемфівосѳе́й сы́нъ господи́на твоєго́ да я́стъ хлѣ́бъ всегда́ на трапе́зѣ моє́й. У Сівы́ же бя́ху пятьна́десять сыно́въ и два́десять рабо́въ.

¹⁰

и҆ дѣ́лай є҆мꙋ̀ зе́млю ты̀ и҆ сы́нове твоѝ и҆ рабѝ твоѝ, и҆ да прино́сиши сы́нꙋ господи́на твоегѡ̀ хлѣ́бы, да ꙗ҆́стъ: и҆ мемфївосѳе́й сы́нъ господи́на твоегѡ̀ да ꙗ҆́стъ хлѣ́бъ всегда̀ на трапе́зѣ мое́й. Оу҆ сївы́ же бѧ́хꙋ пѧтьна́десѧть сынѡ́въ и҆ два́десѧть рабѡ́въ.

¹¹

И рече́ Сіва́ къ царю́: по всѣ́мъ, єли́ка заповѣ́да господи́нъ мо́й ца́рь рабу́ своєму́, та́ко сотвори́тъ ра́бъ тво́й. И мемфівосѳе́й ядя́ше на трапе́зѣ даві́довѣ, я́коже єди́нъ от сыно́въ царе́выхъ.

¹¹

И҆ речѐ сїва̀ къ царю̀: по всѣ̑мъ, є҆ли̑ка заповѣ́да господи́нъ мо́й ца́рь рабꙋ̀ своемꙋ̀, та́кѡ сотвори́тъ ра́бъ тво́й. И҆ мемфївосѳе́й ꙗ҆дѧ́ше на трапе́зѣ даві́довѣ, ꙗ҆́коже є҆ди́нъ ѿ сынѡ́въ царе́выхъ.

¹²

И мемфівосѳе́ю сы́нъ бѣ́ ма́лъ, и и́мя єму́ мі́ха, и все́ обита́ніє до́му Сіви́на раби́ бя́ху мемфівосѳе́овы.

¹²

И҆ мемфївосѳе́ю сы́нъ бѣ̀ ма́лъ, и҆ и҆́мѧ є҆мꙋ̀ мі́ха, и҆ всѐ ѡ҆бита́нїе до́мꙋ сїви́на рабѝ бѧ́хꙋ мемфївосѳе́ѡвы.

¹³

И мемфівосѳе́й живя́ше во Ієрусали́мѣ, я́ко на трапе́зѣ царе́вѣ ядя́ше всегда́: и то́й бя́ше хро́мъ обѣ́ма нога́ма свои́ма.

¹³

И҆ мемфївосѳе́й живѧ́ше во і҆ерⷭ҇ли́мѣ, ꙗ҆́кѡ на трапе́зѣ царе́вѣ ꙗ҆дѧ́ше всегда̀: и҆ то́й бѧ́ше хро́мъ ѻ҆бѣ́ма нога́ма свои́ма.