¹

Воззрѣ́въ же Па́велъ на со́нмъ, рече́: му́жіє бра́тіє, а́зъ все́ю со́вѣстію благо́ю жи́телствовахъ предъ Бо́гомъ да́же до сего́ дне́.

¹

(Заⷱ҇ м҃з҃.) Воззрѣ́въ же па́ѵелъ на со́нмъ, речѐ: мꙋ́жїе бра́тїе, а҆́зъ все́ю со́вѣстїю бл҃го́ю жи́телствовахъ пред̾ бг҃омъ да́же до сегѡ̀ днѐ.

²

Архієре́й же Ана́ніа повелѣ́ предстоя́щымъ єму́ би́ти єго́ уста́.

²

А҆рхїере́й же а҆на́нїа повелѣ̀ предстоѧ́щымъ є҆мꙋ̀ би́ти є҆гѡ̀ оу҆ста̀.

³

Тогда́ Па́велъ рече́ къ нему́: би́ти тя́ и́мать Бо́гъ, стѣно́ пова́пленая: и ты́ сѣди́ши судя́ ми по зако́ну, преступа́я же зако́нъ вели́ши, да бію́тъ мя́.

³

Тогда̀ па́ѵелъ речѐ къ немꙋ̀: би́ти тѧ̀ и҆́мать бг҃ъ, стѣно̀ пова́пленаѧ: и҆ ты̀ сѣди́ши сꙋдѧ́ ми по зако́нꙋ, престꙋпа́ѧ же зако́нъ вели́ши, да бїю́тъ мѧ̀.

⁴

Предстоя́щіи же рѣ́ша: архієре́ю ли Бо́жію досажда́єши?

⁴

Предстоѧ́щїи же рѣ́ша: а҆рхїере́ю ли бж҃їю досажда́еши;

⁵

Рече́ же Па́велъ: не вѣ́дахъ, бра́тіє, я́ко архієре́й є́сть: пи́сано бо є́сть: кня́зю люді́й твои́хъ да не рече́ши зла́.

⁵

Рече́ же па́ѵелъ: не вѣ́дахъ, бра́тїе, ꙗ҆́кѡ а҆рхїере́й є҆́сть: пи́сано бо є҆́сть: кнѧ́зю люді́й твои́хъ да не рече́ши ѕла̀.

⁶

Разумѣ́въ же Па́велъ, я́ко єди́на ча́сть є́сть саддуке́й, друга́я же фарісе́й, воззва́ въ со́нмищи: му́жіє бра́тіє, а́зъ фарісе́й є́смь, сы́нъ фарісе́овъ: о упова́ніи и о воскресе́ніи ме́ртвыхъ а́зъ су́дъ пріє́млю.

⁶

Разꙋмѣ́въ же па́ѵелъ, ꙗ҆́кѡ є҆ди́на ча́сть є҆́сть саддꙋкє́й, дрꙋга́ѧ же фарїсє́й, воззва̀ въ со́нмищи: мꙋ́жїе бра́тїе, а҆́зъ фарїсе́й є҆́смь, сы́нъ фарїсе́овъ: ѡ҆ оу҆пова́нїи и҆ ѡ҆ воскрⷭ҇нїи ме́ртвыхъ а҆́зъ сꙋ́дъ прїе́млю.

⁷

Се́ же єму́ ре́кшу, бы́сть ра́спря между́ саддуке́и и фарісе́и, и раздѣли́ся наро́дъ:

⁷

Се́ же є҆мꙋ̀ ре́кшꙋ, бы́сть ра́спрѧ междꙋ̀ саддꙋкє́и и҆ фарїсє́и, и҆ раздѣли́сѧ наро́дъ:

⁸

саддуке́є бо глаго́лютъ не бы́ти воскресе́нія, ни А́нгела, ни ду́ха: фарісе́є же исповѣ́дуютъ обоя́.

⁸

саддꙋке́є бо глаго́лютъ не бы́ти воскрⷭ҇нїѧ, ни а҆́гг҃ла, ни дх҃а: фарїсе́є же и҆сповѣ́дꙋютъ ѻ҆боѧ̀.

⁹

Бы́сть же кли́чь вели́къ, и воста́вше кни́жницы ча́сти фарісе́йскія пря́хуся между́ собо́ю, глаго́люще: ни єди́но зло́ обрѣта́ємъ въ человѣ́цѣ се́мъ: а́ще же ду́хъ глаго́ла єму́ или́ А́нгелъ, не проти́вимся Бо́гу.

⁹

Бы́сть же кли́чь вели́къ, и҆ воста́вше кни́жницы ча́сти фарїсе́йскїѧ прѧ́хꙋсѧ междꙋ̀ собо́ю, глаго́люще: ни є҆ди́но ѕло̀ ѡ҆брѣта́емъ въ человѣ́цѣ се́мъ: а҆́ще же дх҃ъ гл҃а є҆мꙋ̀ и҆лѝ а҆́гг҃лъ, не проти́вимсѧ бг҃ꙋ.

¹⁰

Мно́зѣ же бы́вшей ра́спри, боя́ся ты́сящникъ, да не растерза́нъ бу́детъ Па́велъ от ни́хъ, повелѣ́ во́иномъ сни́ти и восхи́тити єго́ от среды́ и́хъ и вести́ [єго́] въ по́лкъ.

¹⁰

Мно́зѣ же бы́вшей ра́спри, боѧ́сѧ ты́сѧщникъ, да не растерза́нъ бꙋ́детъ па́ѵелъ ѿ ни́хъ, повелѣ̀ во́инѡмъ сни́ти и҆ восхи́тити є҆го̀ ѿ среды̀ и҆́хъ и҆ вестѝ (є҆го̀) въ по́лкъ.

¹¹

Въ наста́вшую же но́щь предста́въ єму́ Госпо́дь, рече́: дерза́й, Па́вле: я́коже бо свидѣ́телствовалъ єси́ я́же о Мнѣ́ во Ієрусали́мѣ, си́це ти́ подоба́єтъ и въ Ри́мѣ свидѣ́телствовати.

¹¹

Въ наста́вшꙋю же но́щь предста́въ є҆мꙋ̀ гдⷭ҇ь, речѐ: дерза́й, па́ѵле: ꙗ҆́коже бо свидѣ́телствовалъ є҆сѝ ꙗ҆̀же ѡ҆ мнѣ̀ во і҆ерⷭ҇ли́мѣ, си́це тѝ подоба́етъ и҆ въ ри́мѣ свидѣ́телствовати.

¹²

Бы́вшу же дню́, сотво́рше нѣ́цыи от Іуде́й совѣ́тъ {навѣ́тъ}, закля́ша себе́, глаго́люще не я́сти ни пи́ти, до́ндеже убію́тъ Па́вла:

¹²

Бы́вшꙋ же дню̀, сотво́рше нѣ́цыи ѿ і҆ꙋдє́й совѣ́тъ [навѣ́тъ], заклѧ́ша себѐ, глаго́люще не ꙗ҆́сти ни пи́ти, до́ндеже оу҆бїю́тъ па́ѵла:

¹³

бя́ху же мно́жає четы́редесятихъ сію́ кля́тву сотво́ршіи,

¹³

бѧ́хꙋ же мно́жае четы́редесѧтихъ сїю̀ клѧ́твꙋ сотво́ршїи,

¹⁴

и́же присту́пльше ко архієре́ємъ и ста́рцемъ, рѣ́ша: кля́твою прокля́хомъ себе́ ничто́же вкуси́ти, до́ндеже убіє́мъ Па́вла:

¹⁴

и҆̀же пристꙋ́пльше ко а҆рхїере́ємъ и҆ ста́рцємъ, рѣ́ша: клѧ́твою проклѧ́хомъ себѐ ничто́же вкꙋси́ти, до́ндеже оу҆бїе́мъ па́ѵла:

¹⁵

ны́нѣ у́бо вы́ скажи́те ты́сящнику съ собо́ромъ, я́ко да у́трѣ сведе́тъ єго́ къ ва́мъ, а́ки бы хотя́ще разумѣ́ти извѣ́стнѣє я́же о не́мъ: мы́ же, пре́жде да́же не прибли́житися єму́, гото́ви єсмы́ уби́ти єго́.

¹⁵

нн҃ѣ оу҆̀бо вы̀ скажи́те ты́сѧщникꙋ съ собо́ромъ, ꙗ҆́кѡ да оу҆́трѣ сведе́тъ є҆го̀ къ ва́мъ, а҆́ки бы хотѧ́ще разꙋмѣ́ти и҆звѣ́стнѣе ꙗ҆̀же ѡ҆ не́мъ: мы́ же, пре́жде да́же не прибли́житисѧ є҆мꙋ̀, гото́ви є҆смы̀ оу҆би́ти є҆го̀.

¹⁶

Слы́шавъ же сы́нъ сестры́ Па́вловы ко́въ, прише́дъ и вше́дъ въ по́лкъ, сказа́ Па́влу.

¹⁶

Слы́шавъ же сы́нъ сестры̀ па́ѵловы ко́въ, прише́дъ и҆ вше́дъ въ по́лкъ, сказа̀ па́ѵлꙋ.

¹⁷

Призва́въ же Па́велъ єди́наго от со́тникъ, рече́: ю́ношу сего́ отведи́ къ ты́сящнику: и́мать бо нѣ́что сказа́ти єму́.

¹⁷

Призва́въ же па́ѵелъ є҆ди́наго ѿ сѡ́тникъ, речѐ: ю҆́ношꙋ сего̀ ѿведѝ къ ты́сѧщникꙋ: и҆́мать бо нѣ́что сказа́ти є҆мꙋ̀.

¹⁸

О́нъ же у́бо пои́мъ єго́ приведе́ къ ты́сящнику и рече́: у́зникъ Па́велъ призва́въ мя́, умоли́ сего́ ю́ношу привести́ къ тебѣ́, иму́ща нѣ́что глаго́лати тебѣ́.

¹⁸

Ѻ҆́нъ же оу҆̀бо пои́мъ є҆го̀ приведѐ къ ты́сѧщникꙋ и҆ речѐ: оу҆́зникъ па́ѵелъ призва́въ мѧ̀, оу҆молѝ сего̀ ю҆́ношꙋ привестѝ къ тебѣ̀, и҆мꙋ́ща нѣ́что глаго́лати тебѣ̀.

¹⁹

Пои́мъ же єго́ за ру́ку ты́сящникъ и отше́дъ на єди́нѣ, вопроша́ше єго́: что́ є́сть, є́же и́маши возвѣсти́ти ми́?

¹⁹

Пои́мъ же є҆го̀ за рꙋ́кꙋ ты́сѧщникъ и҆ ѿше́дъ на є҆ди́нѣ, вопроша́ше є҆го̀: что̀ є҆́сть, є҆́же и҆́маши возвѣсти́ти мѝ;

²⁰

Рече́ же, я́ко Іуде́є совѣща́ша умоли́ти тя́, я́ко да у́трѣ сведе́ши Па́вла къ ни́мъ въ собо́ръ, а́ки бы хотя́щымъ извѣ́стнѣє истяза́ти я́же о не́мъ:

²⁰

Рече́ же, ꙗ҆́кѡ і҆ꙋде́є совѣща́ша оу҆моли́ти тѧ̀, ꙗ҆́кѡ да оу҆́трѣ сведе́ши па́ѵла къ ни̑мъ въ собо́ръ, а҆́ки бы хотѧ́щымъ и҆звѣ́стнѣе и҆стѧза́ти ꙗ҆̀же ѡ҆ не́мъ:

²¹

ты́ у́бо не послу́шай и́хъ: ло́вятъ бо єго́ от ни́хъ му́жіє мно́жає четы́редесяти, и́же закля́ша себе́ ни я́сти ни пи́ти, до́ндеже убію́тъ єго́: и ны́нѣ гото́ви су́ть, ча́юще обѣща́нія, є́же от тебе́.

²¹

ты̀ оу҆̀бо не послꙋ́шай и҆́хъ: ло́вѧтъ бо є҆го̀ ѿ ни́хъ мꙋ́жїе мно́жае четы́редесѧти, и҆̀же заклѧ́ша себѐ ни ꙗ҆́сти ни пи́ти, до́ндеже оу҆бїю́тъ є҆го̀: и҆ нн҃ѣ гото́ви сꙋ́ть, ча́юще ѡ҆бѣща́нїѧ, є҆́же ѿ тебє̀.

²²

Ты́сящникъ у́бо отпусти́ ю́ношу, завѣща́въ ни єди́ному же повѣ́дати, я́ко сія́ яви́лъ єси́ мнѣ́.

²²

Ты́сѧщникъ оу҆̀бо ѿпꙋстѝ ю҆́ношꙋ, завѣща́въ ни є҆ди́номꙋ же повѣ́дати, ꙗ҆́кѡ сїѧ̑ ꙗ҆ви́лъ є҆сѝ мнѣ̀.

²³

И призва́въ два́ нѣ́кія от со́тникъ, рече́: угото́вита [ми́] во́иновъ вооруже́нныхъ двѣ́стѣ, я́ко да и́дутъ до Кесарі́и, и ко́нникъ се́дмьдесятъ, и стрѣле́цъ двѣ́стѣ, от тре́тіяго часа́ но́щи:

²³

И҆ призва́въ два̀ нѣ̑кїѧ ѿ сѡ́тникъ, речѐ: оу҆гото́вита (мѝ) во́инѡвъ воѡрꙋже́нныхъ двѣ́стѣ, ꙗ҆́кѡ да и҆́дꙋтъ до кесарі́и, и҆ кѡ́нникъ се́дмьдесѧтъ, и҆ стрѣлє́цъ двѣ́стѣ, ѿ тре́тїѧгѡ часа̀ но́щи:

²⁴

и ско́ты привести́, да всади́вше Па́вла прово́дятъ до Фи́лікса иге́мона.

²⁴

и҆ ско́ты привестѝ, да всади́вше па́ѵла прово́дѧтъ до фи́лїѯа и҆ге́мѡна.

²⁵

Написа́ же [и] посла́ніє иму́щеє о́бразъ се́й:

²⁵

Написа́ же (и҆) посла́нїе и҆мꙋ́щее ѡ҆́бразъ се́й:

²⁶

Клавді́й Лисі́а держа́вному иге́мону Фи́ліксу ра́доватися:

²⁶

клаѵді́й лѷсі́а держа́вномꙋ и҆ге́мѡнꙋ фи́лїѯꙋ ра́доватисѧ:

²⁷

му́жа сего́ я́та от Іуде́й и иму́ща убіє́на бы́ти от ни́хъ, присту́пль съ во́ины отъя́хъ єго́, увѣ́дѣвъ, я́ко Ри́млянинъ є́сть:

²⁷

мꙋ́жа сего̀ ꙗ҆́та ѿ і҆ꙋдє́й и҆ и҆мꙋ́ща оу҆бїе́на бы́ти ѿ ни́хъ, пристꙋ́пль съ вѡ́ины ѿѧ́хъ є҆го̀, оу҆вѣ́дѣвъ, ꙗ҆́кѡ ри́млѧнинъ є҆́сть:

²⁸

хотя́ же разумѣ́ти вину́, єя́же ра́ди поима́ху на́нь, сведо́хъ єго́ въ со́нмище и́хъ:

²⁸

хотѧ́ же разꙋмѣ́ти винꙋ̀, є҆ѧ́же ра́ди поима́хꙋ на́нь, сведо́хъ є҆го̀ въ со́нмище и҆́хъ:

²⁹

єго́же обрѣто́хъ оглаго́луєма о взыска́ніи зако́на и́хъ, ни єди́но же досто́йно сме́рти или́ у́замъ согрѣше́ніє иму́ща:

²⁹

є҆го́же ѡ҆брѣто́хъ ѡ҆глаго́лꙋема ѡ҆ взыска́нїи зако́на и҆́хъ, ни є҆ди́но же досто́йно сме́рти и҆лѝ оу҆́замъ согрѣше́нїе и҆мꙋ́ща:

³⁰

ска́зану же бы́вшу ми́ ко́ву хотя́щу бы́ти от Іуде́й на му́жа сего́, а́біє посла́хъ [єго́] къ тебѣ́, завѣща́въ и клеветнико́мъ [єго́] глаго́лати предъ тобо́ю, я́же на́нь: здра́въ бу́ди.

³⁰

ска́занꙋ же бы́вшꙋ мѝ ко́вꙋ хотѧ́щꙋ бы́ти ѿ і҆ꙋдє́й на мꙋ́жа сего̀, а҆́бїе посла́хъ (є҆го̀) къ тебѣ̀, завѣща́въ и҆ клеветникѡ́мъ (є҆гѡ̀) глаго́лати пред̾ тобо́ю, ꙗ҆̀же на́нь: здра́въ бꙋ́ди.

³¹

Во́ини же у́бо по повелѣ́нному и́мъ, взе́мше Па́вла, ведо́ша объ но́щь во Антіпатрі́ду:

³¹

Во́ини же оу҆̀бо по повелѣ́нномꙋ и҆̀мъ, взе́мше па́ѵла, ведо́ша ѡ҆б̾ но́щь во а҆нтїпатрі́дꙋ:

³²

во у́тріє же, оста́вльше ко́нники ити́ съ ни́мъ, возврати́шася въ по́лкъ.

³²

во оу҆́трїе же, ѡ҆ста́вльше ко́нники и҆тѝ съ ни́мъ, возврати́шасѧ въ по́лкъ.

³³

Они́ же прише́дше въ Кесарі́ю и вда́вше посла́ніє иге́мону, предста́виша єму́ и Па́вла.

³³

Ѻ҆ни́ же прише́дше въ кесарі́ю и҆ вда́вше посла́нїе и҆ге́мѡнꙋ, предста́виша є҆мꙋ̀ и҆ па́ѵла.

³⁴

Проче́тъ же иге́монъ посла́ніє и вопро́шь, от ко́єя о́бласти є́сть, и увѣ́дѣвъ, я́ко от Кілікі́и, рече́:

³⁴

Проче́тъ же и҆ге́мѡнъ посла́нїе и҆ вопро́шь, ѿ ко́еѧ ѡ҆́бласти є҆́сть, и҆ оу҆вѣ́дѣвъ, ꙗ҆́кѡ ѿ кїлїкі́и, речѐ:

³⁵

услы́шу о тебѣ́, єгда́ и клеветницы́ твои́ пріи́дутъ. И повелѣ́ въ прето́рѣ И́родовѣ стрещи́ єго́.

³⁵

оу҆слы́шꙋ ѡ҆ тебѣ̀, є҆гда̀ и҆ клеветницы̀ твоѝ прїи́дꙋтъ. И҆ повелѣ̀ въ претѡ́рѣ и҆́рѡдовѣ стрещѝ є҆го̀.