¹

И бы́сть сло́во Госпо́дне ко мнѣ́ глаго́ля:

²

сы́не человѣ́чь, повѣ́ждь по́вѣсть и рцы́ при́тчу на до́мъ Ізра́илевъ,

³

и рече́ши: сія́ глаго́летъ Адонаі́ Госпо́дь: оре́лъ вели́кій, великокри́лый, до́лгій протяже́ніємъ, испо́лнь ногте́й, и́же и́мать повелѣ́ніє вни́ти въ Ліва́нъ, и взя́ избра́нныя ке́дра,

⁴

и верхи́ мя́гкости острога́, и принесе́ я́ въ зе́млю Ханане́йску, во гра́дѣ огражде́ннѣмъ положи́ я́:

⁵

и взя́ от сѣ́мене земна́го и даде́ є́ на по́ли пло́днѣ, [да утверди́тъ коре́ніє] надъ вода́ми мно́гими, ви́дѣно учини́ є́:

⁶

и прозябе́ и бы́сть въ віногра́дъ не́мощенъ и ма́лъ вели́чествомъ, є́же явля́тися ло́зію єго́ на не́мъ, и коре́ніє єго́ подъ ни́мъ бя́ше: и бы́сть въ віногра́дъ, и сотвори́ ро́зги, и простре́ отра́сли своя́.

⁷

И бы́сть оре́лъ другі́й вели́къ, великокри́лный, мно́гъ ногтьми́, и се́, віногра́дъ се́й оплета́яся объ не́мъ: и коре́ніє єго́ къ нему́, и ло́зіє своє́ испусти́ єму́, є́же напая́ти себе́ со гру́діємъ са́да своєго́.

⁸

На по́ли до́брѣ, на водѣ́ мно́зѣ пита́єтся то́й, є́же сотвори́ти прозябе́нія и приноси́ти пло́дъ, є́же бы́ти въ віногра́дъ вели́къ.

⁹

Сего́ ра́ди рцы́: сія́ глаго́летъ Адонаі́ Госпо́дь: єда́ испра́вится? не коре́ніє ли мягкоты́ єго́ и пло́дъ изгніє́тъ? и и́зсхнутъ вся́ лѣ́торасли єго́, и не мы́шцею ли вели́кою, ни людьми́ мно́гими є́же исто́ргнути єго́ изъ коре́нія єго́?

¹⁰

И се́, ты́єтъ: єда́ успѣ́єтъ? не а́біє ли, єгда́ ко́снется єму́ вѣ́тръ зно́йный, посхне́тъ сухото́ю? со гру́діємъ прозябе́нія своєго́ и́зсхнетъ.

¹¹

И бы́сть сло́во Госпо́дне ко мнѣ́ глаго́ля:

¹²

сы́не человѣ́чь, рцы́ ко до́му прогнѣвля́ющему мя́: не вѣ́сте ли, что́ су́ть сія́? рцы́ и́мъ: се́, гряде́тъ ца́рь Вавило́нскъ на Ієрусали́мъ, и во́зметъ царя́ єго́ и кня́зя єго́, и отведе́тъ я́ къ себѣ́ въ Вавило́нъ:

¹³

и по́йметъ от пле́мене ца́рска, и завѣща́єтъ съ ни́мъ завѣ́тъ, и введе́тъ єго́ въ кля́твѣ, и старѣ́йшины земли́ во́зметъ,

¹⁴

є́же бы́ти въ ца́рство немощно́, є́же весьма́ не возноси́тися, [но] храни́ти завѣ́тъ єго́ и стоя́ти въ не́мъ:

¹⁵

и отве́ржется от него́ посыла́я послы́ своя́ во Єги́петъ да́ти єму́ ко́ни и лю́ди мно́ги: єда́ испра́витъ? спасе́тся ли творя́й сопроти́вная? и преступа́яй завѣ́тъ спасе́тся ли?

¹⁶

Живу́ а́зъ, глаго́летъ Адонаі́ Госпо́дь, а́ще не на мѣ́стѣ, идѣ́же ца́рь воцари́вый єго́, и́же поху́ли кля́тву мою́ и и́же преступи́ завѣ́тъ мо́й, съ ни́мъ средѣ́ Вавило́на сконча́єтся.

¹⁷

И не въ си́лѣ вели́цѣй, ниже́ въ наро́дѣ мно́зѣ сотвори́тъ съ ни́мъ фарао́нъ бра́нь во остро́зѣ и въ согражде́ніи стрѣ́льницъ, є́же изъя́ти ду́шы мно́ги.

¹⁸

И поху́ли кля́тву, є́же преступи́ти завѣ́тъ, и се́, даде́ ру́ку свою́ и вся́ сія́ сотвори́ єму́: не спасе́тся.

¹⁹

Сего́ ра́ди рцы́: сія́ глаго́летъ Адонаі́ Госпо́дь: живу́ а́зъ, а́ще не кля́тву мою́, ю́же поху́ли, и завѣ́тъ мо́й, єго́же преступи́, да́мъ на главу́ єго́:

²⁰

и простру́ мре́жу мою́ на́нь, и я́тъ бу́детъ во одержа́ніи єя́: и приведу́ єго́ въ Вавило́нъ и разсужду́ся съ ни́мъ та́мо о непра́вдѣ єго́, є́юже непра́вдова ко мнѣ́:

²¹

и вси́ избѣ́гшіи єго́ и вси́ избра́нніи со всѣ́ми ополче́ніи єго́ мече́мъ паду́тъ, и вся́ оста́вшая и́хъ разсѣ́ю по всему́ вѣ́тру, и увѣ́сте, я́ко а́зъ Госпо́дь глаго́лахъ.

²²

Сего́ ра́ди сія́ глаго́летъ Адонаі́ Госпо́дь: и возму́ а́зъ от избра́нныхъ ке́дра высо́каго от верха́ и да́мъ от главы́ отра́слей єго́, сердца́ и́хъ остружу́ и насажду́ а́зъ на горѣ́ высо́цѣ:

²³

и повѣ́шу и́ въ горѣ́ высо́цѣ Ізра́илевѣ и насажду́ и́, и прорасти́тъ отра́сль и сотвори́тъ пло́дъ и бу́детъ въ ке́дръ вели́къ: и почі́єтъ подъ ни́мъ вся́къ звѣ́рь, и подъ сѣ́нію єго́ почі́єтъ вся́ка пти́ца, и ло́зіє єго́ па́ки устро́ятся:

²⁴

и увѣ́сть вся́ко дре́во полево́є, я́ко а́зъ Госпо́дь смиря́яй дре́во высо́коє и вознося́й дре́во смире́нноє, и изсуша́яй дре́во зеле́ноє и прораща́яй дре́во сухо́є: а́зъ Госпо́дь глаго́лахъ и сотворю́.