¹

И бы́сть сло́во Госпо́дне ко мнѣ́ глаго́ля:

¹

И҆ бы́сть сло́во гдⷭ҇не ко мнѣ̀ гл҃ѧ:

²

и ты́, сы́не человѣ́чь, а́ще суди́ти бу́деши гра́ду крове́й, и яви́ єму́ вся́ беззако́нія єго́,

²

и҆ ты̀, сы́не человѣ́чь, а҆́ще сꙋди́ти бꙋ́деши гра́дꙋ крове́й, и҆ ꙗ҆вѝ є҆мꙋ̀ всѧ̑ беззакѡ́нїѧ є҆гѡ̀,

³

и рече́ши: сія́ глаго́летъ Адонаі́ Госпо́дь: о, гра́де пролива́яй кро́вь средѣ́ себе́, є́же пріити́ вре́мени єго́, и творя́й кумі́ры на себе́, є́же оскверни́тися самому́:

³

и҆ рече́ши: сїѧ̑ гл҃етъ а҆дѡнаі̀ гдⷭ҇ь: ѽ, гра́де пролива́ѧй кро́вь средѣ̀ себє̀, є҆́же прїитѝ вре́мени є҆гѡ̀, и҆ творѧ́й кꙋмі́ры на себѐ, є҆́же ѡ҆скверни́тисѧ самомꙋ̀:

⁴

въ кро́ви и́хъ, ю́же излія́лъ єси́, согрѣши́лъ єси́, и въ кумі́рѣхъ твои́хъ, я́же твори́лъ, оскверни́лся єси́, и сократи́лъ єси́ дни́ твоя́, и приве́дъ вре́мя лѣ́тъ твои́хъ: сего́ ра́ди да́хъ тя́ на укори́зну язы́комъ и на поруга́ніє всѣ́мъ страна́мъ,

⁴

въ кро́ви и҆́хъ, ю҆́же и҆злїѧ́лъ є҆сѝ, согрѣши́лъ є҆сѝ, и҆ въ кꙋмі́рѣхъ твои́хъ, ꙗ҆̀же твори́лъ, ѡ҆скверни́лсѧ є҆сѝ, и҆ сократи́лъ є҆сѝ дни̑ твоѧ̑, и҆ приве́дъ вре́мѧ лѣ́тъ твои́хъ: сегѡ̀ ра́ди да́хъ тѧ̀ на оу҆кори́знꙋ ꙗ҆зы́кѡмъ и҆ на порꙋга́нїе всѣ̑мъ страна́мъ,

⁵

бли́зъ тебе́ и дале́че от тебе́ су́щымъ, и поруга́ются тебѣ́ и возопію́тъ на тя́: о, нечи́стый, преслову́тый и мно́гъ во беззако́ніихъ!

⁵

бли́з̾ тебє̀ и҆ дале́че ѿ тебє̀ сꙋ́щымъ, и҆ порꙋга́ютсѧ тебѣ̀ и҆ возопїю́тъ на тѧ̀: ѽ, нечи́стый, пресловꙋ́тый и҆ мно́гъ во беззако́нїихъ!

⁶

се́, старѣ́йшины до́му Ізра́илева, кі́йждо ко свои́мъ у́жикамъ смѣси́шася въ тебѣ́, я́ко да пролію́тъ кро́вь:

⁶

сѐ, старѣ̑йшины до́мꙋ і҆и҃лева, кі́йждо ко свои̑мъ оу҆́жикамъ смѣси́шасѧ въ тебѣ̀, ꙗ҆́кѡ да пролїю́тъ кро́вь:

⁷

отцу́ и ма́тери злосло́вяху въ тебѣ́ и ко прише́лцу обраща́хуся непра́вдами въ тебѣ́: сироту́ и вдови́цу преоби́дяху въ тебѣ́:

⁷

ѻ҆тцꙋ̀ и҆ ма́тери ѕлосло́вѧхꙋ въ тебѣ̀ и҆ ко прише́лцꙋ ѡ҆браща́хꙋсѧ непра́вдами въ тебѣ̀: сиротꙋ̀ и҆ вдови́цꙋ преѡби́дѧхꙋ въ тебѣ̀:

⁸

и свята́я моя́ уничижа́ху и суббо́ты моя́ оскверня́ху въ тебѣ́:

⁸

и҆ ст҃а̑ѧ моѧ̑ оу҆ничижа́хꙋ и҆ сꙋббѡ̑ты моѧ̑ ѡ҆сквернѧ́хꙋ въ тебѣ̀:

⁹

му́жіє разбо́йницы бѣ́ша въ тебѣ́, я́ко да пролію́тъ въ тебѣ́ кро́вь, и на гора́хъ ядя́ху въ тебѣ́ и скве́рны творя́ху въ тебѣ́:

⁹

мꙋ́жїе разбѡ́йницы бѣ́ша въ тебѣ̀, ꙗ҆́кѡ да пролїю́тъ въ тебѣ̀ кро́вь, и҆ на гора́хъ ꙗ҆дѧ́хꙋ въ тебѣ̀ и҆ сквє́рны творѧ́хꙋ въ тебѣ̀:

¹⁰

сты́дъ о́тчій откры́ша въ тебѣ́, и въ нечистотѣ́ сѣдя́щую обруга́ша въ тебѣ́:

¹⁰

сты́дъ ѻ҆́тчїй ѿкры́ша въ тебѣ̀, и҆ въ нечистотѣ̀ сѣдѧ́щꙋю ѡ҆брꙋга́ша въ тебѣ̀:

¹¹

кі́йждо на жену́ по́друга своєго́ беззако́нноваша, и кі́йждо невѣ́стку свою́ оскверня́ше въ нече́стіи, и кі́йждо сестру́ свою́, дще́рь отца́ своєго́, обругава́ше въ тебѣ́:

¹¹

кі́йждо на женꙋ̀ по́дрꙋга своегѡ̀ беззако́нноваша, и҆ кі́йждо невѣ́сткꙋ свою̀ ѡ҆сквернѧ́ше въ нече́стїи, и҆ кі́йждо сестрꙋ̀ свою̀, дще́рь ѻ҆тца̀ своегѡ̀, ѡ҆брꙋгава́ше въ тебѣ̀:

¹²

мзды́ взима́ху въ тебѣ́, я́ко да пролію́тъ кро́вь, ли́хву и избы́токъ взима́ху въ тебѣ́: и сконча́лъ єси́ сконча́ніє зло́бы твоєя́ я́же въ наси́ліи, мене́ же забы́лъ єси́, глаго́летъ Адонаі́ Госпо́дь.

¹²

мзды̑ взима́хꙋ въ тебѣ̀, ꙗ҆́кѡ да пролїю́тъ кро́вь, ли́хвꙋ и҆ и҆збы́токъ взима́хꙋ въ тебѣ̀: и҆ сконча́лъ є҆сѝ сконча́нїе ѕло́бы твоеѧ̀ ꙗ҆̀же въ наси́лїи, мене́ же забы́лъ є҆сѝ, гл҃етъ а҆дѡнаі̀ гдⷭ҇ь.

¹³

Се́ у́бо, уда́рю руко́ю моє́ю о ру́ку мою́ на та́, я́же соверши́лъ єси́ и я́же сотвори́лъ єси́, и на кро́ви твоя́ бы́вшыя посредѣ́ тебе́:

¹³

Сѐ оу҆̀бо, оу҆да́рю рꙋко́ю мое́ю ѡ҆ рꙋ́кꙋ мою̀ на та̑, ꙗ҆̀же соверши́лъ є҆сѝ и҆ ꙗ҆̀же сотвори́лъ є҆сѝ, и҆ на крѡ́ви твоѧ̑ бы́вшыѧ посредѣ̀ тебє̀:

¹⁴

а́ще устои́тъ се́рдце твоє́, и а́ще преодолѣ́ютъ ру́цѣ твои́ во дне́хъ, въ ня́же а́зъ творю́ въ тебѣ́? А́зъ Госпо́дь глаго́лахъ, и сотворю́.

¹⁴

а҆́ще оу҆стои́тъ се́рдце твоѐ, и҆ а҆́ще преѡдолѣ́ютъ рꙋ́цѣ твоѝ во дне́хъ, въ нѧ́же а҆́зъ творю̀ въ тебѣ̀; А҆́зъ гдⷭ҇ь гл҃ахъ, и҆ сотворю̀.

¹⁵

И разсы́плю тя́ во язы́цѣхъ и разсѣ́ю тя́ въ страна́хъ, и оскудѣ́єтъ нечистота́ твоя́ изъ тебе́,

¹⁵

И҆ разсы́плю тѧ̀ во ꙗ҆зы́цѣхъ и҆ разсѣ́ю тѧ̀ въ страна́хъ, и҆ ѡ҆скꙋдѣ́етъ нечистота̀ твоѧ̀ и҆з̾ тебє̀,

¹⁶

и владѣ́ти бу́ду тобо́ю предъ очи́ма язы́ковъ, и позна́єши, я́ко а́зъ Госпо́дь.

¹⁶

и҆ владѣ́ти бꙋ́дꙋ тобо́ю пред̾ ѻ҆чи́ма ꙗ҆зы́кѡвъ, и҆ позна́еши, ꙗ҆́кѡ а҆́зъ гдⷭ҇ь.

¹⁷

И бы́сть сло́во Госпо́дне ко мнѣ́ глаго́ля:

¹⁷

И҆ бы́сть сло́во гдⷭ҇не ко мнѣ̀ гл҃ѧ:

¹⁸

сы́не человѣ́чь, се́, бы́ша мнѣ́ до́мъ Ізра́илевъ смѣ́шани вси́ съ мѣ́дію и желѣ́зомъ, и со о́ловомъ чи́стымъ и со свинце́мъ, средѣ́ пе́щи сребро́ смѣ́шено су́ть.

¹⁸

сы́не человѣ́чь, сѐ, бы́ша мнѣ̀ до́мъ і҆и҃левъ смѣ́шани всѝ съ мѣ́дїю и҆ желѣ́зомъ, и҆ со ѻ҆́ловомъ чи́стымъ и҆ со свинце́мъ, средѣ̀ пе́щи сребро̀ смѣ́шено сꙋ́ть.

¹⁹

Сего́ ра́ди рцы́: сія́ глаго́летъ Адонаі́ Госпо́дь: поне́же бы́сте вси́ во смѣше́ніє єди́но, сего́ ра́ди, се́, а́зъ пріиму́ ва́съ во среди́ну Ієрусали́ма:

¹⁹

Сегѡ̀ ра́ди рцы̀: сїѧ̑ гл҃етъ а҆дѡнаі̀ гдⷭ҇ь: поне́же бы́сте всѝ во смѣше́нїе є҆ди́но, сегѡ̀ ра́ди, сѐ, а҆́зъ прїимꙋ̀ ва́съ во среди́нꙋ і҆ерⷭ҇ли́ма:

²⁰

я́коже пріє́млется сребро́ и мѣ́дь, и желѣ́зо и свине́цъ и о́лово чи́стоє во среди́ну пе́щи, є́же ду́нути на ня́ огню́, да слію́тся, та́ко пріиму́ ва́съ во гнѣ́вѣ моє́мъ и въ я́рости моє́й, и соберу́ и слію́ ва́съ,

²⁰

ꙗ҆́коже прїе́млетсѧ сребро̀ и҆ мѣ́дь, и҆ желѣ́зо и҆ свине́цъ и҆ ѻ҆́лово чи́стое во среди́нꙋ пе́щи, є҆́же дꙋ́нꙋти на нѧ̀ ѻ҆гню̀, да слїю́тсѧ, та́кѡ прїимꙋ̀ ва́съ во гнѣ́вѣ мое́мъ и҆ въ ꙗ҆́рости мое́й, и҆ соберꙋ̀ и҆ слїю̀ ва́съ,

²¹

и ду́ну на вы́ во огни́ гнѣ́ва моєго́, и слія́ни бу́дете средѣ́ єго́:

²¹

и҆ дꙋ́нꙋ на вы̀ во ѻ҆гнѝ гнѣ́ва моегѡ̀, и҆ слїѧ́ни бꙋ́дете средѣ̀ є҆гѡ̀:

²²

я́коже слива́єтся сребро́ средѣ́ пе́щи, та́ко сліє́теся посредѣ́ єго́ и позна́єте, я́ко а́зъ Госпо́дь излія́хъ я́рость мою́ на ва́съ.

²²

ꙗ҆́коже слива́етсѧ сребро̀ средѣ̀ пе́щи, та́кѡ слїе́тесѧ посредѣ̀ є҆гѡ̀ и҆ позна́ете, ꙗ҆́кѡ а҆́зъ гдⷭ҇ь и҆злїѧ́хъ ꙗ҆́рость мою̀ на ва́съ.

²³

И бы́сть сло́во Госпо́дне ко мнѣ́ глаго́ля:

²³

И҆ бы́сть сло́во гдⷭ҇не ко мнѣ̀ гл҃ѧ:

²⁴

сы́не человѣ́чь, рцы́ єму́: ты́ єси́ земля́ неодожди́мая, ниже́ до́ждь бы́сть на тя́ въ де́нь я́рости.

²⁴

сы́не человѣ́чь, рцы̀ є҆мꙋ̀: ты̀ є҆сѝ землѧ̀ неѡдожди́маѧ, нижѐ до́ждь бы́сть на тѧ̀ въ де́нь ꙗ҆́рости.

²⁵

Єго́же старѣ́йшины средѣ́ єго́, я́ко львы́ рыка́юще, восхища́юще восхище́нія, ду́шы изъяда́юще наси́ліємъ, бога́тство и че́сть пріє́млюще, и вдови́цы твоя́ умно́жишася посредѣ́ тебе́:

²⁵

Є҆гѡ́же старѣ̑йшины средѣ̀ є҆гѡ̀, ꙗ҆́кѡ львы̀ рыка́юще, восхища́юще восхищє́нїѧ, дꙋ́шы и҆з̾ѧда́юще наси́лїемъ, бога́тство и҆ че́сть прїе́млюще, и҆ вдѡви́цы твоѧ̑ оу҆мно́жишасѧ посредѣ̀ тебє̀:

²⁶

и жерцы́ єго́ отверго́шася зако́на моєго́ и оскверни́ша свята́я моя́: между́ святы́мъ и скверна́вымъ не разлуча́ху, и между́ нечи́стымъ и чи́стымъ не раздѣля́ху, и от суббо́тъ мои́хъ покрыва́ху о́чи свои́, и оскверня́ху мя́ посредѣ́ себе́:

²⁶

и҆ жерцы̀ є҆гѡ̀ ѿверго́шасѧ зако́на моегѡ̀ и҆ ѡ҆скверни́ша ст҃а̑ѧ моѧ̑: междꙋ̀ ст҃ы́мъ и҆ скверна́вымъ не разлꙋча́хꙋ, и҆ междꙋ̀ нечи́стымъ и҆ чи́стымъ не раздѣлѧ́хꙋ, и҆ ѿ сꙋббѡ́тъ мои́хъ покрыва́хꙋ ѻ҆́чи своѝ, и҆ ѡ҆сквернѧ́хꙋ мѧ̀ посредѣ̀ себє̀:

²⁷

кня́зи єго́ средѣ́ єго́ я́ко во́лцы восхища́юще похище́нія, є́же пролія́ти кро́вь и погуби́ти ду́шы, я́ко да лихои́мствомъ лихои́мствуютъ:

²⁷

кнѧ̑зи є҆гѡ̀ средѣ̀ є҆гѡ̀ ꙗ҆́кѡ во́лцы восхища́юще похищє́нїѧ, є҆́же пролїѧ́ти кро́вь и҆ погꙋби́ти дꙋ́шы, ꙗ҆́кѡ да лихои́мствомъ лихои́мствꙋютъ:

²⁸

и проро́цы єго́ помазу́ющіи и́хъ паду́тъ, ви́дящіи су́єтная, волхву́ющіи ло́жная, глаго́люще: сія́ глаго́летъ Адонаі́ Госпо́дь: а Госпо́дь не глаго́ла.

²⁸

и҆ проро́цы є҆гѡ̀ помазꙋ́ющїи и҆̀хъ падꙋ́тъ, ви́дѧщїи сꙋ́єтнаѧ, волхвꙋ́ющїи лѡ́жнаѧ, глаго́люще: сїѧ̑ гл҃етъ а҆дѡнаі̀ гдⷭ҇ь: а҆ гдⷭ҇ь не гл҃а.

²⁹

Люді́й земли́ утѣсня́юще непра́вдою и восхища́юще восхище́нія, ни́ща и убо́га наси́льствующе и со прише́лцемъ не живу́ще судо́мъ.

²⁹

Люді́й землѝ оу҆тѣснѧ́юще непра́вдою и҆ восхища́юще восхищє́нїѧ, ни́ща и҆ оу҆бо́га наси́льствꙋюще и҆ со прише́лцемъ не живꙋ́ще сꙋдо́мъ.

³⁰

И иска́хъ от ни́хъ му́жа живу́ща пра́во и стоя́ща цѣ́ло предъ лице́мъ мои́мъ во вре́мя гнѣ́ва моєго́, є́же бы не до конца́ погуби́ти єго́ {гра́дъ Ієрусали́мъ}, и не обрѣто́хъ.

³⁰

И҆ и҆ска́хъ ѿ ни́хъ мꙋ́жа живꙋ́ща пра́вѡ и҆ стоѧ́ща цѣ́лѡ пред̾ лице́мъ мои́мъ во вре́мѧ гнѣ́ва моегѡ̀, є҆́же бы не до конца̀ погꙋби́ти є҆го̀ [гра́дъ і҆ерⷭ҇ли́мъ], и҆ не ѡ҆брѣто́хъ.

³¹

И излія́хъ на́нь я́рость мою́ во огни́ гнѣ́ва моєго́, є́же сконча́ти я́: пути́ и́хъ на главы́ и́хъ да́хъ, глаго́летъ Адонаі́ Госпо́дь.

³¹

И҆ и҆злїѧ́хъ на́нь ꙗ҆́рость мою̀ во ѻ҆гнѝ гнѣ́ва моегѡ̀, є҆́же сконча́ти ѧ҆̀: пꙋти̑ и҆́хъ на главы̑ и҆́хъ да́хъ, гл҃етъ а҆дѡнаі̀ гдⷭ҇ь.