¹

И бы́сть сло́во Госпо́дне ко мнѣ́ глаго́ля:

²

и ты́, сы́не человѣ́чь, возми́ на со́ръ пла́чь,

³

и рече́ши со́ру населе́нному на морстѣ́мъ вхо́дѣ, то́ржищу люді́й от острово́въ мно́гихъ, сія́ глаго́летъ Адонаі́ Госпо́дь со́ру: ты́ ре́клъ єси́: а́зъ са́мъ возложи́хъ на мя́ мою́ добро́ту,

⁴

въ се́рдцы морстѣ́мъ веєлі́му, и сы́нове твои́ возложи́ша на тя́ добро́ту.

⁵

Ке́дръ от сані́ра истеса́ся тебѣ́, то́нкія до́ски кипарі́сныя от Ліва́на взяты́ бы́ша, є́же сотвори́ти тебѣ́ ядри́ла Єло́ва:

⁶

от Васані́тіды сотвори́ша ве́сла твоя́: святи́лища твоя́ состро́иша от слоно́выхъ [косте́й], до́мы древя́ны от острово́въ Хеттіи́мскихъ:

⁷

виссо́нъ со испещре́ніємъ от Єги́пта бы́сть тебѣ́ посте́ля, є́же обложи́ти тебѣ́ сла́ву и облещи́ тя въ синету́ и во багряни́цу от острово́въ Єліссе́, и бы́сть оде́жда твоя́.

⁸

И кня́зи твои́ живу́щіи во Сідо́нѣ и Араді́ане бы́ша ве́сленицы твои́: прему́дріи твои́, со́ръ, и́же бы́ша въ тебѣ́, сі́и ко́рмчіи твои́.

⁹

Старѣ́йшины вівлі́йстіи и прему́дріи и́хъ, и́же бы́ша въ тебѣ́, ті́и укрѣпля́ху совѣ́тъ тво́й: и вси́ корабли́ морсті́и и ве́сленицы и́хъ бы́ша въ тебѣ́ ко за́падомъ за́падовъ.

¹⁰

Пе́рсяне и ли́дяне и Ліви́ане бѣ́ша въ си́лѣ твоє́й, му́жіє до́бліи твои́ щиты́ и шле́мы повѣ́сиша въ тебѣ́, сі́и да́ша сла́ву твою́.

¹¹

Сы́нове Араді́йстіи и си́ла твоя́ на забра́лѣхъ твои́хъ о́крестъ: но и ми́дяне во пи́ргахъ твои́хъ бы́ша стра́жіє, ту́лы своя́ обѣ́сиша на забра́лѣхъ твои́хъ о́крестъ: сі́и соверши́ша твою́ добро́ту.

¹²

Кархидо́няне купцы́ твои́, от мно́жества си́лы твоєя́, сребро́ и зла́то, и мѣ́дь и желѣ́зо, и чи́стоє о́лово и свине́цъ да́ша ку́плю твою́.

¹³

Єлла́да вся́ и бли́жніи твои́ продая́ху въ тебѣ́ ду́шы человѣ́чы, и сосу́ды мѣ́дяны да́ша ку́плю твою́.

¹⁴

От до́му Ѳорга́мова ко́ни и ко́нники и мщя́та да́ша ку́плю твою́.

¹⁵

Сы́нове роді́йстіи купцы́ твои́ от острово́въ умно́жиша ку́плю твою́, зу́бы слоно́вы, и вводи́мымъ воздава́лъ єси́ мзды́ твоя́.

¹⁶

Человѣ́ки ку́плю твою́ от мно́жества примѣ́шенца твоєго́, ста́кти и пестроты́ и синету́ от Ѳарсі́са, и рамо́ѳъ и хорхо́ръ да́ша ку́плю твою́.

¹⁷

Іу́да и сы́нове Ізра́илевы, сі́и купцы́ твои́: продая́ніємъ пшени́цы и ми́ровъ и касі́и, и пе́рвый ме́дъ и єле́й и риті́ну да́ша примѣ́шенцу твоєму́.

¹⁸

Дама́скъ купцы́ твои́ от мно́жества всея́ си́лы твоєя́, віно́ от хелво́на, и во́лну блеща́щуся от Міли́та, и віно́ Деда́ново и Іона́ново и меозе́лево въ ку́плю твою́ да́ша.

¹⁹

От Ассіи́ла желѣ́зо дѣ́ланоє и коле́са въ примѣ́сницѣхъ твои́хъ су́ть.

²⁰

Деда́нъ купцы́ твои́ со скоты́ избра́нными въ колесни́цы.

²¹

Араві́а и вси́ кня́зи Кида́рстіи, сі́и купцы́ руко́ю твоє́ю, велблю́ды и овны́ и а́гнцы въ тебѣ́ продадя́тъ, и́миже ку́плю творя́тъ.

²²

Купцы́ са́вы и раммы́, ті́и купцы́ твои́ съ пе́рвыми сла́достьми и со ка́меніємъ драги́мъ, и зла́то да́ша ку́плю тебѣ́.

²³

Харра́нъ, ханаа́ и Деда́нъ, сі́и купцы́ твои́: Сава́, Ассу́ръ и Харма́нъ купцы́ твои́,

²⁴

принося́ще ку́плю синету́ и червлени́цу, и испещре́нная и сокро́вища избра́нная свя́зана у́жами, кипарі́сная.

²⁵

Корабли́, въ тѣ́хъ ку́пля твоя́, [корабли́] кархидо́нстіи купцы́ твои́, во мно́жествѣ смѣ́сникъ твои́хъ, и насы́тился єси́, и отягча́лъ зѣло́ въ сердца́хъ морски́хъ.

²⁶

Въ водѣ́ мно́зѣ привожда́ху тя́ ве́сленицы твои́: вѣ́тръ ю́жный сокруши́ тя въ се́рдцы морстѣ́мъ.

²⁷

Бы́ша си́лы твоя́ и мзда́ твоя́ от смѣ́сникъ твои́хъ, и ве́сленицы твои́ и ко́рмчіи твои́, и совѣ́тницы твои́ и смѣ́сницы от смѣ́сниковъ твои́хъ, и вси́ му́жіє твои́ до́бліи въ тебѣ́ и ве́сь со́нмъ тво́й паду́тъ средѣ́ тебе́ въ се́рдцы морстѣ́мъ, въ де́нь паде́нія твоєго́.

²⁸

От гла́са во́пля твоєго́ ко́рмчіи твои́ стра́хомъ убоя́тся.

²⁹

И сни́дутъ съ корабле́й свои́хъ вси́ ве́сленицы твои́, и вса́дницы и ловцы́ морсті́и на земли́ ста́нутъ:

³⁰

и воскли́кнутъ на тя́ гла́сомъ свои́мъ, и воскрича́тъ го́рцѣ, и возложа́тъ зе́млю на главы́ своя́, и пра́хъ посте́лютъ:

³¹

и оплѣши́вѣютъ надъ тобо́ю плѣшьми́, и облеку́тся во вре́тище, и воспла́чутся о тебѣ́ въ го́рести души́, и пла́чемъ го́рькимъ ужа́снутся:

³²

и во́змутъ о тебѣ́ сы́нове и́хъ пла́чь, возрыда́ютъ пла́каніємъ о тебѣ́: кто́ я́коже ти́ръ умо́лкнувый средѣ́ мо́ря? коли́ку обрѣ́лъ єси́ мзду́ от мо́ря?

³³

Напо́лнилъ єси́ страны́ от мно́жества твоєго́ и от смѣ́сникъ твои́хъ обогати́лъ єси́ вся́ цари́ земны́я.

³⁴

Ны́нѣ же сокруши́лся єси́ въ мо́ри, во глубина́хъ во́дныхъ смѣ́сницы твои́, и ве́сь со́нмъ тво́й средѣ́ тебе́ падо́ша, и вси́ ве́сленицы твои́.

³⁵

Вси́ же живу́щіи во о́стровѣхъ уны́ли по тебѣ́, и ца́ріє и́хъ у́жасомъ ужасо́шася, и прослези́ся лице́ и́хъ.

³⁶

Купцы́ от язы́къ позви́ждутъ о тебѣ́, въ поги́бель бы́лъ єси́, и ктому́ не бу́деши въ вѣ́къ, глаго́летъ Госпо́дь Бо́гъ.