¹

И бы́сть сло́во Госпо́дне ко мнѣ́ глаго́ля:

¹

И҆ бы́сть сло́во гдⷭ҇не ко мнѣ̀ гл҃ѧ:

²

сы́не человѣ́чь, глаго́ли ко сыно́мъ люді́й твои́хъ и рече́ши къ ни́мъ: земля́, на ню́же а́зъ а́ще наведу́ ме́чь, и по́ймутъ лю́діє земли́ человѣ́ка єди́наго от себе́ и поста́вятъ єго́ себѣ́ во стра́жа,

²

сы́не человѣ́чь, глаго́ли ко сынѡ́мъ люді́й твои́хъ и҆ рече́ши къ ни̑мъ: землѧ̀, на ню́же а҆́зъ а҆́ще наведꙋ̀ ме́чь, и҆ по́ймꙋтъ лю́дїе землѝ человѣ́ка є҆ди́наго ѿ себє̀ и҆ поста́вѧтъ є҆го̀ себѣ̀ во стра́жа,

³

и у́зритъ ме́чь гряду́щь на зе́млю, и востру́битъ трубо́ю, и проповѣ́сть лю́демъ,

³

и҆ оу҆́зритъ ме́чь грѧдꙋ́щь на зе́млю, и҆ вострꙋ́битъ трꙋбо́ю, и҆ проповѣ́сть лю́демъ,

⁴

и услы́шитъ услы́шавый гла́съ трубы́, а не сохрани́тся, и на́йдетъ ме́чь и пости́гнетъ єго́, кро́вь єго́ на главѣ́ єго́ бу́детъ:

⁴

и҆ оу҆слы́шитъ оу҆слы́шавый гла́съ трꙋбы̀, а҆ не сохрани́тсѧ, и҆ на́йдетъ ме́чь и҆ пости́гнетъ є҆го̀, кро́вь є҆гѡ̀ на главѣ̀ є҆гѡ̀ бꙋ́детъ:

⁵

я́ко слы́ша гла́съ трубы́ и не сохрани́ся, кро́вь єго́ на не́мъ бу́детъ: а се́й, поне́же сохрани́ся, ду́шу свою́ изба́вилъ.

⁵

ꙗ҆́кѡ слы́ша гла́съ трꙋбы̀ и҆ не сохрани́сѧ, кро́вь є҆гѡ̀ на не́мъ бꙋ́детъ: а҆ се́й, поне́же сохрани́сѧ, дꙋ́шꙋ свою̀ и҆зба́вилъ.

⁶

И стра́жъ, а́ще уви́дитъ ме́чь гряду́щь, и не востру́битъ трубо́ю, [и не проповѣ́сть лю́демъ,] и лю́діє не охраня́тъ себе́, и наше́дъ ме́чь во́зметъ от ни́хъ ду́шу, та́ у́бо беззако́нія ра́ди своєго́ взя́ся, а кро́ве єя́ от руки́ стра́жа взыщу́.

⁶

И҆ стра́жъ, а҆́ще оу҆ви́дитъ ме́чь грѧдꙋ́щь, и҆ не вострꙋ́битъ трꙋбо́ю, (и҆ не проповѣ́сть лю́демъ,) и҆ лю́дїе не ѡ҆хранѧ́тъ себѐ, и҆ наше́дъ ме́чь во́зметъ ѿ ни́хъ дꙋ́шꙋ, та̀ оу҆́бѡ беззако́нїѧ ра́ди своегѡ̀ взѧ́сѧ, а҆ кро́ве є҆ѧ̀ ѿ рꙋкѝ стра́жа взыщꙋ̀.

⁷

И ты́, сы́не человѣ́чь, во стра́жа да́хъ тя́ до́му Ізра́илеву, и услы́шиши от у́стъ мои́хъ сло́во, и проповѣ́си и́мъ от мене́.

⁷

И҆ ты̀, сы́не человѣ́чь, во стра́жа да́хъ тѧ̀ до́мꙋ і҆и҃левꙋ, и҆ оу҆слы́шиши ѿ оу҆́стъ мои́хъ сло́во, и҆ проповѣ́си и҆̀мъ ѿ менє̀.

⁸

Єгда́ реку́ грѣ́шнику: грѣ́шниче, сме́ртію у́мреши: и не бу́деши глаго́лати [грѣ́шнику], є́же сохрани́тися нечести́вому, [є́же обрати́тся єму́] от пути́ своєго́ [и жи́ву бы́ти єму́], то́й беззако́нникъ во беззако́ніи своє́мъ у́мретъ, а кро́ве єго́ от руки́ твоєя́ взыщу́.

⁸

Є҆гда̀ рекꙋ̀ грѣ́шникꙋ: грѣ́шниче, сме́ртїю оу҆́мреши: и҆ не бꙋ́деши глаго́лати (грѣ́шникꙋ), є҆́же сохрани́тисѧ нечести́вомꙋ, (є҆́же ѡ҆брати́тсѧ є҆мꙋ̀) ѿ пꙋтѝ своегѡ̀ (и҆ жи́вꙋ бы́ти є҆мꙋ̀), то́й беззако́нникъ во беззако́нїи свое́мъ оу҆́мретъ, а҆ кро́ве є҆гѡ̀ ѿ рꙋкѝ твоеѧ̀ взыщꙋ̀.

⁹

А́ще же ты́ проповѣ́си нечести́вому пу́ть єго́, є́же обрати́тися от него́, и не обрати́тся съ пути́ своєго́, то́й въ нече́стіи своє́мъ у́мретъ, а ты́ ду́шу твою́ изба́вилъ єси́.

⁹

А҆́ще же ты̀ проповѣ́си нечести́вомꙋ пꙋ́ть є҆гѡ̀, є҆́же ѡ҆брати́тисѧ ѿ негѡ̀, и҆ не ѡ҆брати́тсѧ съ пꙋтѝ своегѡ̀, то́й въ нече́стїи свое́мъ оу҆́мретъ, а҆ ты̀ дꙋ́шꙋ твою̀ и҆зба́вилъ є҆сѝ.

¹⁰

И ты́, сы́не человѣ́чь, рцы́ до́му Ізра́илеву: си́це рѣ́сте глаго́люще: пре́лести на́шя и беззако́нія на́ша въ на́съ су́ть, и мы́ въ ни́хъ та́ємъ, и ка́ко на́мъ живы́мъ бы́ти?

¹⁰

И҆ ты̀, сы́не человѣ́чь, рцы̀ до́мꙋ і҆и҃левꙋ: си́це рѣ́сте глаго́люще: пре́лєсти на́шѧ и҆ беззакѡ́нїѧ на̑ша въ на́съ сꙋ́ть, и҆ мы̀ въ ни́хъ та́емъ, и҆ ка́кѡ на́мъ живы̑мъ бы́ти;

¹¹

Рцы́ и́мъ: живу́ а́зъ, глаго́летъ Адонаі́ Госпо́дь, не хощу́ сме́рти грѣ́шника, но є́же обрати́тися нечести́вому от пути́ своєго́ и жи́ву бы́ти єму́: обраще́ніємъ обрати́теся от пути́ ва́шего зла́го: и вску́ю умира́єте, до́ме Ізра́илевъ?

¹¹

Рцы̀ и҆̀мъ: живꙋ̀ а҆́зъ, гл҃етъ а҆дѡнаі̀ гдⷭ҇ь, не хощꙋ̀ сме́рти грѣ́шника, но є҆́же ѡ҆брати́тисѧ нечести́вомꙋ ѿ пꙋтѝ своегѡ̀ и҆ жи́вꙋ бы́ти є҆мꙋ̀: ѡ҆браще́нїемъ ѡ҆брати́тесѧ ѿ пꙋтѝ ва́шегѡ ѕла́гѡ: и҆ вскꙋ́ю оу҆мира́ете, до́ме і҆и҃левъ;

¹²

И ты́, сы́не человѣ́чь, рцы́ ко сыно́мъ люді́й твои́хъ: пра́вда пра́ведника не изба́витъ єго́, въ о́ньже де́нь прельсти́тся: и беззако́ніє беззако́нника не убіє́тъ, въ о́ньже де́нь обрати́тся от беззако́нія своєго́: и пра́ведникъ не мо́жетъ спасти́ся въ де́нь грѣха́ своєго́.

¹²

И҆ ты̀, сы́не человѣ́чь, рцы̀ ко сынѡ́мъ люді́й твои́хъ: пра́вда првⷣника не и҆зба́витъ є҆го̀, въ ѻ҆́ньже де́нь прельсти́тсѧ: и҆ беззако́нїе беззако́нника не оу҆бїе́тъ, въ ѻ҆́ньже де́нь ѡ҆брати́тсѧ ѿ беззако́нїѧ своегѡ̀: и҆ првⷣникъ не мо́жетъ спасти́сѧ въ де́нь грѣха̀ своегѡ̀.

¹³

Єгда́ реку́ пра́веднику: жи́знію жи́въ бу́деши: се́й же упова́я на пра́вду свою́ и сотвори́тъ беззако́ніє, вся́ пра́вды єго́ не воспомяну́тся, въ непра́вдѣ своє́й, ю́же сотвори́, въ то́й у́мретъ.

¹³

Є҆гда̀ рекꙋ̀ првⷣникꙋ: жи́знїю жи́въ бꙋ́деши: се́й же оу҆пова́ѧ на пра́вдꙋ свою̀ и҆ сотвори́тъ беззако́нїе, всѧ̑ пра̑вды є҆гѡ̀ не воспомѧнꙋ́тсѧ, въ непра́вдѣ свое́й, ю҆́же сотворѝ, въ то́й оу҆́мретъ.

¹⁴

И єгда́ реку́ нечести́вому: сме́ртію у́мреши: и обрати́тся от грѣха́ своєго́ и сотвори́тъ су́дъ и пра́вду,

¹⁴

И҆ є҆гда̀ рекꙋ̀ нечести́вомꙋ: сме́ртїю оу҆́мреши: и҆ ѡ҆брати́тсѧ ѿ грѣха̀ своегѡ̀ и҆ сотвори́тъ сꙋ́дъ и҆ пра́вдꙋ,

¹⁵

и зало́гъ отда́стъ и восхище́ноє возврати́тъ, беззако́нникъ въ за́повѣдехъ жи́зни ходи́ти бу́детъ, є́же не сотвори́ти непра́вды, жи́знію жи́въ бу́детъ и не у́мретъ:

¹⁵

и҆ зало́гъ ѿда́стъ и҆ восхище́ное возврати́тъ, беззако́нникъ въ за́повѣдехъ жи́зни ходи́ти бꙋ́детъ, є҆́же не сотвори́ти непра́вды, жи́знїю жи́въ бꙋ́детъ и҆ не оу҆́мретъ:

¹⁶

вси́ грѣси́ єго́, я́же согрѣши́, не помяну́тся: поне́же су́дъ и пра́вду сотвори́, жи́въ бу́детъ въ ни́хъ.

¹⁶

всѝ грѣсѝ є҆гѡ̀, ꙗ҆̀же согрѣшѝ, не помѧнꙋ́тсѧ: поне́же сꙋ́дъ и҆ пра́вдꙋ сотворѝ, жи́въ бꙋ́детъ въ ни́хъ.

¹⁷

И реку́тъ сы́нове люді́й твои́хъ: непра́въ пу́ть Госпо́день. И се́, пу́ть и́хъ непра́въ.

¹⁷

И҆ рекꙋ́тъ сы́нове люді́й твои́хъ: непра́въ пꙋ́ть гдⷭ҇ень. И҆ сѐ, пꙋ́ть и҆́хъ непра́въ.

¹⁸

Єгда́ соврати́тся пра́ведникъ от пра́вды своєя́ и сотвори́тъ беззако́ніє, и у́мретъ въ не́мъ.

¹⁸

Є҆гда̀ соврати́тсѧ првⷣникъ ѿ пра́вды своеѧ̀ и҆ сотвори́тъ беззако́нїе, и҆ оу҆́мретъ въ не́мъ.

¹⁹

И єгда́ грѣ́шникъ возврати́тся от беззако́нія своєго́ и сотвори́тъ су́дъ и пра́вду, то́й жи́въ бу́детъ въ ни́хъ.

¹⁹

И҆ є҆гда̀ грѣ́шникъ возврати́тсѧ ѿ беззако́нїѧ своегѡ̀ и҆ сотвори́тъ сꙋ́дъ и҆ пра́вдꙋ, то́й жи́въ бꙋ́детъ въ ни́хъ.

²⁰

И се́ є́сть, є́же реко́сте: непра́въ пу́ть Госпо́день. Кому́ждо по путе́мъ єго́ сужду́ ва́мъ, до́ме Ізра́илевъ.

²⁰

И҆ сѐ є҆́сть, є҆́же реко́сте: непра́въ пꙋ́ть гдⷭ҇ень. Комꙋ́ждо по пꙋтє́мъ є҆гѡ̀ сꙋждꙋ̀ ва́мъ, до́ме і҆и҃левъ.

²¹

И бы́сть во второєна́десять лѣ́то, ме́сяца вторагона́десять, въ пя́тый де́нь ме́сяца плѣне́нія на́шего, пріи́де ко мнѣ́ от Ієрусали́ма уцѣлѣ́вый глаго́ля: плѣне́нъ бы́сть гра́дъ.

²¹

И҆ бы́сть во второена́десѧть лѣ́то, мцⷭ҇а вторагѡна́десѧть, въ пѧ́тый де́нь мцⷭ҇а плѣне́нїѧ на́шегѡ, прїи́де ко мнѣ̀ ѿ і҆ерⷭ҇ли́ма оу҆цѣлѣ́вый глаго́лѧ: плѣне́нъ бы́сть гра́дъ.

²²

И рука́ Госпо́дня бы́сть на мнѣ́ въ ве́черъ, пре́жде прише́ствія єго́, и отве́рзе уста́ моя́, до́ндеже пріи́де ко мнѣ́ зау́тра: и отве́рзшаяся уста́ моя́ не затвори́шася ктому́.

²²

И҆ рꙋка̀ гдⷭ҇нѧ бы́сть на мнѣ̀ въ ве́черъ, пре́жде прише́ствїѧ є҆гѡ̀, и҆ ѿве́рзе оу҆ста̀ моѧ̑, до́ндеже прїи́де ко мнѣ̀ заꙋ́тра: и҆ ѿвє́рзшаѧсѧ оу҆ста̀ моѧ̑ не затвори́шасѧ ктомꙋ̀.

²³

И бы́сть сло́во Госпо́дне ко мнѣ́ глаго́ля:

²³

И҆ бы́сть сло́во гдⷭ҇не ко мнѣ̀ гл҃ѧ:

²⁴

сы́не человѣ́чь, живу́щіи на опустѣ́вшихъ мѣ́стѣхъ во земли́ Ізра́илевѣ глаго́лютъ: єди́нъ бя́ше Авраа́мъ и одержа́ше зе́млю, а мы́ мно́жайшіи єсмы́, на́мъ дана́ є́сть земля́ во одержа́ніє.

²⁴

сы́не человѣ́чь, живꙋ́щїи на ѡ҆пꙋстѣ́вшихъ мѣ́стѣхъ во землѝ і҆и҃левѣ глаго́лютъ: є҆ди́нъ бѧ́ше а҆враа́мъ и҆ ѡ҆держа́ше зе́млю, а҆ мы̀ мно́жайшїи є҆смы̀, на́мъ дана̀ є҆́сть землѧ̀ во ѡ҆держа́нїе.

²⁵

Того́ ра́ди рцы́ и́мъ: си́це глаго́летъ Адонаі́ Госпо́дь: поне́же съ кро́вію я́сте и о́чи ва́ши воздвиго́сте ко кумі́ромъ и кро́вь пролива́єте, и зе́млю ли наслѣ́дите?

²⁵

Тогѡ̀ ра́ди рцы̀ и҆̀мъ: си́це гл҃етъ а҆дѡнаі̀ гдⷭ҇ь: поне́же съ кро́вїю ꙗ҆́сте и҆ ѻ҆́чи ва́ши воздвиго́сте ко кꙋмі́рѡмъ и҆ кро́вь пролива́ете, и҆ зе́млю ли наслѣ́дите;

²⁶

ста́сте съ мече́мъ ва́шимъ, сотвори́сте ме́рзости, и кі́йждо жену́ бли́жняго своєго́ оскверни́сте, и та́ко ли зе́млю и́мате наслѣ́дити?

²⁶

ста́сте съ мече́мъ ва́шимъ, сотвори́сте ме́рзѡсти, и҆ кі́йждо женꙋ̀ бли́жнѧгѡ своегѡ̀ ѡ҆скверни́сте, и҆ та́кѡ ли зе́млю и҆́мате наслѣ́дити;

²⁷

Того́ ра́ди рцы́ и́мъ: сія́ глаго́летъ Адонаі́ Госпо́дь: живу́ а́зъ, я́ко паду́тъ мече́мъ су́щіи во опустѣ́вшихъ, и и́же на лицы́ по́ля, звѣре́мъ по́льнымъ предаду́тся на изъяде́ніє, и су́щыя во градѣ́хъ и и́же въ пеще́рахъ сме́ртію поражу́,

²⁷

Тогѡ̀ ра́ди рцы̀ и҆̀мъ: сїѧ̑ гл҃етъ а҆дѡнаі̀ гдⷭ҇ь: живꙋ̀ а҆́зъ, ꙗ҆́кѡ падꙋ́тъ мече́мъ сꙋ́щїи во ѡ҆пꙋстѣ́вшихъ, и҆ и҆̀же на лицы̀ по́лѧ, ѕвѣрє́мъ пѡ́льнымъ предадꙋ́тсѧ на и҆з̾ѧде́нїе, и҆ сꙋ́щыѧ во градѣ́хъ и҆ и҆̀же въ пеще́рахъ сме́ртїю поражꙋ̀,

²⁸

и да́мъ зе́млю на опустѣ́ніє, и поги́бнетъ го́рдость крѣ́пости єя́, и опустѣ́ютъ го́ры Ізра́илевы, зане́же не бу́детъ проходя́щаго:

²⁸

и҆ да́мъ зе́млю на ѡ҆пꙋстѣ́нїе, и҆ поги́бнетъ го́рдость крѣ́пости є҆ѧ̀, и҆ ѡ҆пꙋстѣ́ютъ го́ры і҆и҃лєвы, зане́же не бꙋ́детъ проходѧ́щагѡ:

²⁹

и увѣ́дятъ, я́ко а́зъ Госпо́дь: и сотворю́ зе́млю и́хъ пу́сту, и опустѣ́єтъ всѣ́хъ ра́ди ме́рзостей и́хъ, я́же сотвори́ша.

²⁹

и҆ оу҆вѣ́дѧтъ, ꙗ҆́кѡ а҆́зъ гдⷭ҇ь: и҆ сотворю̀ зе́млю и҆́хъ пꙋ́стꙋ, и҆ ѡ҆пꙋстѣ́етъ всѣ́хъ ра́ди ме́рзостей и҆́хъ, ꙗ҆̀же сотвори́ша.

³⁰

И ты́, сы́не человѣ́чь, сы́нове люді́й твои́хъ глаго́лющіи о тебѣ́ у забра́лъ и во вратѣ́хъ дворо́въ, и глаго́лютъ кі́йждо ко бли́жнему своєму́ и кі́йждо ко бра́ту своєму́, глаго́люще: собери́мся и услы́шимъ исходя́щая от у́стъ Госпо́днихъ.

³⁰

И҆ ты̀, сы́не человѣ́чь, сы́нове люді́й твои́хъ глаго́лющїи ѡ҆ тебѣ̀ оу҆ забра̑лъ и҆ во вратѣ́хъ дворѡ́въ, и҆ глаго́лютъ кі́йждо ко бли́жнемꙋ своемꙋ̀ и҆ кі́йждо ко бра́тꙋ своемꙋ̀, глаго́люще: собери́мсѧ и҆ оу҆слы́шимъ и҆сходѧ̑щаѧ ѿ оу҆́стъ гдⷭ҇нихъ.

³¹

И прихо́дятъ къ тебѣ́, я́коже схо́дятся лю́діє, и сѣдя́тъ лю́діє мои́ предъ тобо́ю, и послу́шаютъ глаго́ловъ твои́хъ, и не сотворя́тъ и́хъ: поне́же лжа́ во устѣ́хъ и́хъ, и вслѣ́дъ скве́рнъ и́хъ се́рдце и́хъ хо́дитъ.

³¹

И҆ прихо́дѧтъ къ тебѣ̀, ꙗ҆́коже схо́дѧтсѧ лю́дїе, и҆ сѣдѧ́тъ лю́дїе моѝ пред̾ тобо́ю, и҆ послꙋ́шаютъ глаго́лѡвъ твои́хъ, и҆ не сотворѧ́тъ и҆́хъ: поне́же лжа̀ во оу҆стѣ́хъ и҆́хъ, и҆ в̾слѣ́дъ скве́рнъ и҆́хъ се́рдце и҆́хъ хо́дитъ.

³²

И бу́деши и́мъ я́ко гла́съ пѣ́снивца сладкогла́снаго благосли́чнаго, и услы́шатъ глаго́лы твоя́, и не сотворя́тъ и́хъ.

³²

И҆ бꙋ́деши и҆̀мъ ꙗ҆́кѡ гла́съ пѣ́снивца сладкогла́снагѡ благосли́чнагѡ, и҆ оу҆слы́шатъ глаго́лы твоѧ̑, и҆ не сотворѧ́тъ и҆́хъ.

³³

И єгда́ пріи́деши, реку́тъ: се́, пріи́де. И увѣ́дятъ, я́ко проро́къ бѣ́ средѣ́ и́хъ.

³³

И҆ є҆гда̀ прїи́деши, рекꙋ́тъ: сѐ, прїи́де. И҆ оу҆вѣ́дѧтъ, ꙗ҆́кѡ прⷪ҇ро́къ бѣ̀ средѣ̀ и҆́хъ.