¹

Бы́сть же житіє́ Са́ррино лѣ́тъ сто́ два́десять се́дмь.

¹

Бы́сть же житїѐ са́ррино лѣ́тъ сто̀ два́десѧть се́дмь.

²

И у́мре Са́рра во гра́дѣ Арво́цѣ, и́же є́сть въ раздо́ліи: се́й є́сть Хевро́нъ въ земли́ Ханаа́нстѣй. Пріи́де же Авраа́мъ рыда́ти по Са́ррѣ и пла́кати.

²

И҆ оу҆́мре са́рра во гра́дѣ а҆рво́цѣ, и҆́же є҆́сть въ раздо́лїи: се́й є҆́сть хеврѡ́нъ въ землѝ ханаа́нстѣй. Прїи́де же а҆враа́мъ рыда́ти по са́ррѣ и҆ пла́кати.

³

И воста́ Авраа́мъ от мертвеца́ своєго́ и рече́ сыно́мъ Хетте́овымъ, глаго́ля:

³

И҆ воста̀ а҆враа́мъ ѿ мертвеца̀ своегѡ̀ и҆ речѐ сынѡ́мъ хетте́ѡвымъ, глаго́лѧ:

⁴

пресе́лникъ и пришле́цъ а́зъ є́смь у ва́съ, дади́те ми́ у́бо стяжа́ніє гро́ба между́ ва́ми, да погребу́ мертвеца́ моєго́ от мене́.

⁴

пресе́лникъ и҆ пришле́цъ а҆́зъ є҆́смь оу҆ ва́съ, дади́те мѝ оу҆̀бо стѧжа́нїе гро́ба междꙋ̀ ва́ми, да погребꙋ̀ мертвеца̀ моего̀ ѿ менє̀.

⁵

Отвѣща́ша же сы́нове Хетте́овы ко Авраа́му, глаго́люще: ни́, господи́не:

⁵

Ѿвѣща́ша же сы́нове хетте́ѡвы ко а҆враа́мꙋ, глаго́люще: нѝ, господи́не:

⁶

послу́шай же на́съ: ца́рь от Бо́га ты́ єси́ въ на́съ: во избра́нныхъ гробѣ́хъ на́шихъ погреби́ мертвеца́ твоєго́: никто́же бо от на́съ возбрани́тъ гро́ба своєго́ от тебе́, є́же погребсти́ мертвеца́ твоєго́ та́мо.

⁶

послꙋ́шай же на́съ: ца́рь ѿ бг҃а ты̀ є҆сѝ въ на́съ: во и҆збра́нныхъ гробѣ́хъ на́шихъ погребѝ мертвеца̀ твоего̀: никто́же бо ѿ на́съ возбрани́тъ гро́ба своегѡ̀ ѿ тебє̀, є҆́же погребстѝ мертвеца̀ твоего̀ та́мѡ.

⁷

Воста́въ же Авраа́мъ поклони́ся наро́ду земли́, сыно́мъ Хетте́овымъ,

⁷

Воста́въ же а҆враа́мъ поклони́сѧ наро́дꙋ землѝ, сынѡ́мъ хетте́ѡвымъ,

⁸

и рече́ къ ни́мъ Авраа́мъ, глаго́ля: а́ще и́мате въ души́ ва́шей, я́ко погребсти́ мертвеца́ моєго́ от лица́ моєго́, послу́шайте мене́ и рцы́те о мнѣ́ Єфро́ну Саа́рову:

⁸

и҆ речѐ къ ни̑мъ а҆враа́мъ, глаго́лѧ: а҆́ще и҆́мате въ дꙋшѝ ва́шей, ꙗ҆́кѡ погребстѝ мертвеца̀ моего̀ ѿ лица̀ моегѡ̀, послꙋ́шайте менѐ и҆ рцы́те ѡ҆ мнѣ̀ є҆фрѡ́нꙋ саа́ровꙋ:

⁹

и да да́стъ ми́ пеще́ру Сугу́бую, я́же є́сть єго́, су́щую на ча́сти села́ єго́: сребро́мъ досто́йнымъ да да́стъ ми́ ю́ у ва́съ въ стяжа́ніє гро́ба.

⁹

и҆ да да́стъ мѝ пеще́рꙋ сꙋгꙋ́бꙋю, ꙗ҆́же є҆́сть є҆гѡ̀, сꙋ́щꙋю на ча́сти села̀ є҆гѡ̀: сребро́мъ досто́йнымъ да да́стъ мѝ ю҆̀ оу҆ ва́съ въ стѧжа́нїе гро́ба.

¹⁰

Єфро́нъ же сѣдя́ше посредѣ́ сыно́въ Хетте́овыхъ. Отвѣща́въ же Єфро́нъ Хетте́йскій ко Авраа́му, рече́ слы́шащымъ сыно́мъ Хетте́овымъ и всѣ́мъ приходя́щымъ во гра́дъ, глаго́ля:

¹⁰

Є҆фрѡ́нъ же сѣдѧ́ше посредѣ̀ сынѡ́въ хетте́овыхъ. Ѿвѣща́въ же є҆фрѡ́нъ хетте́йскїй ко а҆враа́мꙋ, речѐ слы́шащымъ сынѡ́мъ хетте́ѡвымъ и҆ всѣ̑мъ приходѧ́щымъ во гра́дъ, глаго́лѧ:

¹¹

у мене́ бу́ди, господи́не, и послу́шай мене́: село́ и пеще́ру я́же въ не́мъ, тебѣ́ даю́: предъ всѣ́ми гра́жданы мои́ми да́хъ тебѣ́, погреби́ мертвеца́ твоєго́.

¹¹

оу҆ менє̀ бꙋ́ди, господи́не, и҆ послꙋ́шай менѐ: село̀ и҆ пеще́рꙋ ꙗ҆́же въ не́мъ, тебѣ̀ даю̀: пред̾ всѣ́ми гра́жданы мои́ми да́хъ тебѣ̀, погребѝ мертвеца̀ твоего̀.

¹²

И поклони́ся Авраа́мъ предъ наро́домъ земли́

¹²

И҆ поклони́сѧ а҆враа́мъ пред̾ наро́домъ землѝ

¹³

и рече́ Єфро́ну во ушеса́ предъ всѣ́мъ наро́домъ земли́: поне́же по мнѣ́ єси́, послу́шай мене́: сребро́ села́ возми́ у мене́, и погребу́ мертвеца́ моєго́ та́мо.

¹³

и҆ речѐ є҆фрѡ́нꙋ во оу҆шеса̀ пред̾ всѣ́мъ наро́домъ землѝ: поне́же по мнѣ̀ є҆сѝ, послꙋ́шай менѐ: сребро̀ села̀ возмѝ оу҆ менє̀, и҆ погребꙋ̀ мертвеца̀ моего̀ та́мѡ.

¹⁴

Отвѣща́ же Єфро́нъ Авраа́му, глаго́ля:

¹⁴

Ѿвѣща́ же є҆фрѡ́нъ а҆враа́мꙋ, глаго́лѧ:

¹⁵

ни́, господи́не: слы́шахъ бо, я́ко земля́ четы́рехъ со́тъ дідра́хмъ сребра́: но что́ бы́ло бы сіє́ между́ мно́ю и тобо́ю? Ты́ же мертвеца́ твоєго́ погреби́.

¹⁵

нѝ, господи́не: слы́шахъ бо, ꙗ҆́кѡ землѧ̀ четы́рехъ сѡ́тъ дїдра́хмъ сребра̀: но что̀ бы́ло бы сїѐ междꙋ̀ мно́ю и҆ тобо́ю; ты́ же мертвеца̀ твоего̀ погребѝ.

¹⁶

И послу́ша Авраа́мъ Єфро́на, и даде́ Авраа́мъ Єфро́ну сребро́, є́же глаго́ла во ушеса́ сыно́въ Хетте́овыхъ, четы́ре ста́ дідра́хмъ сребра́ искуше́на купца́ми.

¹⁶

И҆ послꙋ́ша а҆враа́мъ є҆фрѡ́на, и҆ дадѐ а҆враа́мъ є҆фрѡ́нꙋ сребро̀, є҆́же глаго́ла во оу҆шеса̀ сынѡ́въ хетте́овыхъ, четы́ре ста̀ дїдра́хмъ сребра̀ и҆скꙋше́на кꙋпца́ми.

¹⁷

И бы́сть село́ Єфро́ново, є́же бѣ́ въ Сугу́бѣй пеще́рѣ, є́же є́сть лице́мъ къ Мамврі́и, село́ и пеще́ра я́же бѣ́ въ не́мъ, и вся́коє дре́во, є́же бѣ́ на селѣ́, и все́ є́же є́сть въ предѣ́лѣхъ єго́ о́крестъ,

¹⁷

И҆ бы́сть село̀ є҆фрѡ́ново, є҆́же бѣ̀ въ сꙋгꙋ́бѣй пеще́рѣ, є҆́же є҆́сть лице́мъ къ мамврі́и, село̀ и҆ пеще́ра ꙗ҆́же бѣ̀ въ не́мъ, и҆ всѧ́кое дре́во, є҆́же бѣ̀ на селѣ̀, и҆ всѐ є҆́же є҆́сть въ предѣ́лѣхъ є҆гѡ̀ ѡ҆́крестъ,

¹⁸

Авраа́му [бы́сть] въ стяжа́ніє предъ сы́ны Хетте́овыми и предъ всѣ́ми приходя́щими во гра́дъ.

¹⁸

а҆враа́мꙋ (бы́сть) въ стѧжа́нїе пред̾ сы̑ны хетте́овыми и҆ пред̾ всѣ́ми приходѧ́щими во гра́дъ.

¹⁹

По си́хъ погребе́ Авраа́мъ Са́рру жену́ свою́ въ пеще́рѣ се́лнѣй Сугу́бѣй, я́же є́сть проти́ву Мамврі́и: сія́ є́сть Хевро́нъ въ земли́ Ханаа́нстѣй.

¹⁹

По си́хъ погребѐ а҆враа́мъ са́ррꙋ женꙋ̀ свою̀ въ пеще́рѣ се́лнѣй сꙋгꙋ́бѣй, ꙗ҆́же є҆́сть проти́вꙋ мамврі́и: сїѧ̀ є҆́сть хеврѡ́нъ въ землѝ ханаа́нстѣй.

²⁰

И утвержде́но є́сть село́ и пеще́ра, я́же бѣ́ на не́мъ, Авраа́му въ стяжа́ніє гро́ба от сыно́въ Хетте́овыхъ.

²⁰

И҆ оу҆твержде́но є҆́сть село̀ и҆ пеще́ра, ꙗ҆́же бѣ̀ на не́мъ, а҆враа́мꙋ въ стѧжа́нїе гро́ба ѿ сынѡ́въ хетте́овыхъ.