¹

Призва́въ же Ісаа́къ Іа́кова, благослови́ єго́ и заповѣ́да єму́, глаго́ля: да не по́ймеши жены́ от дще́рей Ханане́йскихъ:

¹

Призва́въ же і҆саа́къ і҆а́кѡва, бл҃гословѝ є҆го̀ и҆ заповѣ́да є҆мꙋ̀, глаго́лѧ: да не по́ймеши жены̀ ѿ дще́рей ханане́йскихъ:

²

воста́въ отбѣжи́ въ Месопота́мію въ до́мъ Ваѳуи́ла отца́ ма́тере твоєя́, и поими́ себѣ́ отту́ду жену́ от дще́рей Лава́на бра́та ма́тере твоєя́:

²

воста́въ ѿбѣжѝ въ месопота́мїю въ до́мъ ваѳꙋи́ла ѻ҆тца̀ ма́тере твоеѧ̀, и҆ поимѝ себѣ̀ ѿтꙋ́дꙋ женꙋ̀ ѿ дще́рей лава́на бра́та ма́тере твоеѧ̀:

³

Бо́гъ же мо́й да благослови́тъ тя́ и возрасти́тъ тя́ и умно́житъ тя́, и бу́деши въ собра́нія язы́ковъ:

³

бг҃ъ же мо́й да блгⷭ҇ви́тъ тѧ̀ и҆ возрасти́тъ тѧ̀ и҆ оу҆мно́житъ тѧ̀, и҆ бꙋ́деши въ собра̑нїѧ ꙗ҆зы́кѡвъ:

⁴

и да да́стъ тебѣ́ благослове́ніє Авраа́ма отца́ моєго́, тебѣ́ и сѣ́мени твоєму́ по тебѣ́ наслѣ́дити зе́млю обита́нія твоєго́, ю́же даде́ Бо́гъ Авраа́му.

⁴

и҆ да да́стъ тебѣ̀ блгⷭ҇ве́нїе а҆враа́ма ѻ҆тца̀ моегѡ̀, тебѣ̀ и҆ сѣ́мени твоемꙋ̀ по тебѣ̀ наслѣ́дити зе́млю ѡ҆бита́нїѧ твоегѡ̀, ю҆́же дадѐ бг҃ъ а҆враа́мꙋ.

⁵

Посла́ же Ісаа́къ Іа́кова: и отъи́де въ Месопота́мію къ Лава́ну сы́ну Ваѳуи́ла Си́ріна, къ бра́ту же Реве́кки ма́тере Іа́ковли и Иса́вли.

⁵

Посла́ же і҆саа́къ і҆а́кѡва: и҆ ѿи́де въ месопота́мїю къ лава́нꙋ сы́нꙋ ваѳꙋи́ла сѵ́рїна, къ бра́тꙋ же реве́кки ма́тере і҆а́кѡвли и҆ и҆са́ѵли.

⁶

Ви́дѣ же Иса́въ, я́ко благослови́ Ісаа́къ Іа́кова и посла́ въ Месопота́мію Си́рскую поя́ти отту́ду себѣ́ жену́, єгда́ благослови́ єго́ и заповѣ́да єму́, глаго́ля: да не по́ймеши жены́ от дще́рей Ханане́йскихъ.

⁶

Ви́дѣ же и҆са́ѵъ, ꙗ҆́кѡ бл҃гословѝ і҆саа́къ і҆а́кѡва и҆ посла̀ въ месопота́мїю сѵ́рскꙋю поѧ́ти ѿтꙋ́дꙋ себѣ̀ женꙋ̀, є҆гда̀ бл҃гословѝ є҆го̀ и҆ заповѣ́да є҆мꙋ̀, глаго́лѧ: да не по́ймеши жены̀ ѿ дще́рей ханане́йскихъ.

⁷

И послу́ша Іа́ковъ отца́ и ма́тере своєя́, и отъи́де въ Месопота́мію Си́рскую.

⁷

И҆ послꙋ́ша і҆а́кѡвъ ѻ҆тца̀ и҆ ма́тере своеѧ̀, и҆ ѿи́де въ месопота́мїю сѵ́рскꙋю.

⁸

Ви́дѣвъ же Иса́въ, я́ко злы́ су́ть дще́ри Ханане́йскія предъ Ісаа́комъ отце́мъ єго́,

⁸

Ви́дѣвъ же и҆са́ѵъ, ꙗ҆́кѡ ѕлы̑ сꙋ́ть дщє́ри хананє́йскїѧ пред̾ і҆саа́комъ ѻ҆тце́мъ є҆гѡ̀,

⁹

отъи́де Иса́въ ко Ісма́илу и взя́ Маєле́ѳу дще́рь Ісма́ила сы́на Авраа́мля, сестру́ Навео́ѳову, жену́ къ жена́мъ свои́мъ.

⁹

ѿи́де и҆са́ѵъ ко і҆сма́илꙋ и҆ взѧ̀ маеле́ѳꙋ дще́рь і҆сма́ила сы́на а҆враа́млѧ, сестрꙋ̀ навеѡ́ѳовꙋ, женꙋ̀ къ жена́мъ свои̑мъ.

¹⁰

И отъи́де Іа́ковъ от кла́дязя Кля́твеннаго и и́де въ Харра́нъ,

¹⁰

И҆ ѿи́де і҆а́кѡвъ ѿ кла́дѧзѧ клѧ́твеннагѡ и҆ и҆́де въ харра́нъ,

¹¹

и обрѣ́те мѣ́сто и у́спе та́мо, за́йде бо со́лнце: и взя́ от ка́менія мѣ́ста [того́] и положи́ въ возгла́віє себѣ́, и спа́ на мѣ́стѣ о́нѣмъ.

¹¹

и҆ ѡ҆брѣ́те мѣ́сто и҆ оу҆́спе та́мѡ, за́йде бо со́лнце: и҆ взѧ̀ ѿ ка́менїѧ мѣ́ста (тогѡ̀) и҆ положѝ въ возгла́вїе себѣ̀, и҆ спа̀ на мѣ́стѣ ѻ҆́нѣмъ.

¹²

И со́нъ ви́дѣ: и се́, лѣ́ствица утвержде́на на земли́, єя́же глава́ досяза́ше до небесе́, и А́нгели Бо́жіи восхожда́ху и низхожда́ху по не́й:

¹²

И҆ со́нъ ви́дѣ: и҆ сѐ, лѣ́ствица оу҆твержде́на на землѝ, є҆ѧ́же глава̀ досѧза́ше до небесѐ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й:

¹³

Госпо́дь же утвержда́шеся на не́й и рече́: А́зъ є́смь Бо́гъ Авраа́ма отца́ твоєго́ и Бо́гъ Ісаа́ка, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоєму́:

¹³

гдⷭ҇ь же оу҆твержда́шесѧ на не́й и҆ речѐ: а҆́зъ є҆́смь бг҃ъ а҆враа́ма ѻ҆тца̀ твоегѡ̀ и҆ бг҃ъ і҆саа́ка, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀ и҆ сѣ́мени твоемꙋ̀:

¹⁴

и бу́детъ сѣ́мя твоє́ я́ко песо́къ земны́й, и распространи́тся на мо́ре, и Лі́ву, и сѣ́веръ, и на восто́ки: и благословя́тся о тебѣ́ вся́ колѣ́на земна́я и о сѣ́мени твоє́мъ:

¹⁴

и҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ благословѧ́тсѧ ѡ҆ тебѣ̀ всѧ̑ колѣ̑на зємна́ѧ и҆ ѡ҆ сѣ́мени твое́мъ:

¹⁵

и се́, А́зъ є́смь съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя въ зе́млю сію́: я́ко не и́мамъ тебе́ оста́вити, до́ндеже сотвори́ти ми́ вся́, єли́ка глаго́лахъ тебѣ́.

¹⁵

и҆ сѐ, а҆́зъ є҆́смь съ тобо́ю, сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка гл҃ахъ тебѣ̀.

¹⁶

И воста́ Іа́ковъ от сна́ своєго́ и рече́: я́ко є́сть Госпо́дь на мѣ́стѣ се́мъ, а́зъ же не вѣ́дѣхъ.

¹⁶

И҆ воста̀ і҆а́кѡвъ ѿ сна̀ своегѡ̀ и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ.

¹⁷

И убоя́ся и рече́: я́ко стра́шно мѣ́сто сіє́: нѣ́сть сіє́, но до́мъ Бо́жій, и сія́ врата́ небе́сная.

¹⁷

И҆ оу҆боѧ́сѧ и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.

¹⁸

И воста́ Іа́ковъ зау́тра, и взя́ ка́мень, єго́же положи́ та́мо въ возгла́віє себѣ́: и поста́ви єго́ въ сто́лпъ, и возлія́ єле́й верху́ єго́.

¹⁸

И҆ воста̀ і҆а́кѡвъ заꙋ́тра, и҆ взѧ̀ ка́мень, є҆го́же положѝ та́мѡ въ возгла́вїе себѣ̀: и҆ поста́ви є҆го̀ въ сто́лпъ, и҆ возлїѧ̀ є҆ле́й верхꙋ̀ є҆гѡ̀.

¹⁹

И прозва́ Іа́ковъ и́мя мѣ́сту тому́ До́мъ Бо́жій: Уламлу́зъ же бѣ́ и́мя гра́ду пе́рвѣє.

¹⁹

И҆ прозва̀ і҆а́кѡвъ и҆́мѧ мѣ́стꙋ томꙋ̀ до́мъ бж҃їй: оу҆ламлꙋ́зъ же бѣ̀ и҆́мѧ гра́дꙋ пе́рвѣе.

²⁰

И положи́ Іа́ковъ обѣ́тъ, глаго́ля: а́ще бу́детъ Госпо́дь Бо́гъ со мно́ю и сохрани́тъ мя́ на пути́ се́мъ, въ о́ньже а́зъ иду́, и да́стъ ми́ хлѣ́бъ я́сти, и ри́зы облещи́ся,

²⁰

И҆ положѝ і҆а́кѡвъ ѡ҆бѣ́тъ, глаго́лѧ: а҆́ще бꙋ́детъ гдⷭ҇ь бг҃ъ со мно́ю и҆ сохрани́тъ мѧ̀ на пꙋтѝ се́мъ, въ ѻ҆́ньже а҆́зъ и҆дꙋ̀, и҆ да́стъ мѝ хлѣ́бъ ꙗ҆́сти, и҆ ри̑зы ѡ҆блещи́сѧ,

²¹

и возврати́тъ мя́ здра́ва въ до́мъ отца́ моєго́, и бу́детъ Госпо́дь мнѣ́ въ Бо́га:

²¹

и҆ возврати́тъ мѧ̀ здра́ва въ до́мъ ѻ҆тца̀ моегѡ̀, и҆ бꙋ́детъ гдⷭ҇ь мнѣ̀ въ бг҃а:

²²

и ка́мень се́й, єго́же поста́вихъ въ сто́лпъ, бу́детъ ми́ до́мъ Бо́жій, и от всѣ́хъ, я́же ми́ да́си, десяти́ну одеся́тствую та́ Тебѣ́.

²²

и҆ ка́мень се́й, є҆го́же поста́вихъ въ сто́лпъ, бꙋ́детъ мѝ до́мъ бж҃їй, и҆ ѿ всѣ́хъ, ꙗ҆̀же мѝ да́си, десѧти́нꙋ ѡ҆десѧ́тствꙋю та̑ тебѣ̀.