¹

И не можа́ше Іо́сифъ удержа́тися всѣ́мъ предстоя́щымъ єму́, но рече́: отосли́те всѣ́хъ от мене́. И не предстоя́ше ни єди́нъ Іо́сифу, єгда́ познава́шеся бра́тіи своє́й.

¹

И҆ не можа́ше і҆ѡ́сифъ оу҆держа́тисѧ всѣ̑мъ предстоѧ́щымъ є҆мꙋ̀, но речѐ: ѡ҆тосли́те всѣ́хъ ѿ менє̀. И҆ не предстоѧ́ше ни є҆ди́нъ і҆ѡ́сифꙋ, є҆гда̀ познава́шесѧ бра́тїи свое́й.

²

И испусти́ гла́съ съ пла́чемъ: слы́шаша же вси́ Єги́птяне, и слы́шано бы́сть въ дому́ фарао́новѣ.

²

И҆ и҆спꙋстѝ гла́съ съ пла́чемъ: слы́шаша же всѝ є҆гѵ́птѧне, и҆ слы́шано бы́сть въ домꙋ̀ фараѡ́новѣ.

³

Рече́ же Іо́сифъ бра́тіи своє́й: а́зъ є́смь Іо́сифъ: єще́ ли оте́цъ мо́й жи́въ є́сть? И не мого́ша бра́тія отвѣща́ти єму́: смути́шася бо.

³

Рече́ же і҆ѡ́сифъ бра́тїи свое́й: а҆́зъ є҆́смь і҆ѡ́сифъ: є҆ще́ ли ѻ҆те́цъ мо́й жи́въ є҆́сть; И҆ не мого́ша бра́тїѧ ѿвѣща́ти є҆мꙋ̀: смꙋти́шасѧ бо.

⁴

Рече́ же Іо́сифъ бра́тіи своє́й: прибли́житеся ко мнѣ́. И прибли́жишася. И рече́: а́зъ є́смь Іо́сифъ, бра́тъ ва́шъ, єго́же прода́сте во Єги́петъ:

⁴

Рече́ же і҆ѡ́сифъ бра́тїи свое́й: прибли́житесѧ ко мнѣ̀. И҆ прибли́жишасѧ. И҆ речѐ: а҆́зъ є҆́смь і҆ѡ́сифъ, бра́тъ ва́шъ, є҆го́же прода́сте во є҆гѵ́петъ:

⁵

ны́нѣ у́бо не скорби́те, ниже́ же́стоко ва́мъ да яви́тся, я́ко прода́сте мя́ сѣ́мо: на жи́знь бо посла́ мя Бо́гъ предъ ва́ми:

⁵

нн҃ѣ оу҆̀бо не скорби́те, нижѐ же́стоко ва́мъ да ꙗ҆ви́тсѧ, ꙗ҆́кѡ прода́сте мѧ̀ сѣ́мѡ: на жи́знь бо посла́ мѧ бг҃ъ пред̾ ва́ми:

⁶

сіє́ бо второ́є лѣ́то гла́дъ на земли́, и єще́ пя́ть лѣ́тъ оста́, въ ни́хже не бу́детъ ора́нія, ни жа́твы:

⁶

сїе́ бо второ́е лѣ́то гла́дъ на землѝ, и҆ є҆щѐ пѧ́ть лѣ́тъ ѡ҆ста̀, въ ни́хже не бꙋ́детъ ѡ҆ра́нїѧ, ни жа́твы:

⁷

посла́ бо мя́ Бо́гъ предъ ва́ми оста́вити ва́мъ оста́нокъ на земли́ и препита́ти ва́шъ оста́нокъ ве́лій:

⁷

посла́ бо мѧ̀ бг҃ъ пред̾ ва́ми ѡ҆ста́вити ва́мъ ѡ҆ста́нокъ на землѝ и҆ препита́ти ва́шъ ѡ҆ста́нокъ ве́лїй:

⁸

ны́нѣ у́бо не вы́ посла́сте мя́ сѣ́мо, но Бо́гъ: и сотвори́ мя я́ко отца́ фарао́ну и господи́на всему́ до́му єго́ и кня́зя все́й земли́ Єги́петстѣй:

⁸

нн҃ѣ оу҆̀бо не вы̀ посла́сте мѧ̀ сѣ́мѡ, но бг҃ъ: и҆ сотвори́ мѧ ꙗ҆́кѡ ѻ҆тца̀ фараѡ́нꙋ и҆ господи́на всемꙋ̀ до́мꙋ є҆гѡ̀ и҆ кнѧ́зѧ все́й землѝ є҆гѵ́петстѣй:

⁹

потща́вшеся у́бо, взы́дите ко отцу́ моєму́ и рцы́те єму́: сія́ глаго́летъ сы́нъ тво́й Іо́сифъ: сотвори́ мя Бо́гъ господи́на все́й земли́ Єги́петстѣй: сни́ди у́бо ко мнѣ́ и не уме́дли:

⁹

потща́вшесѧ оу҆̀бо, взы́дите ко ѻ҆тцꙋ̀ моемꙋ̀ и҆ рцы́те є҆мꙋ̀: сїѧ̑ глаго́летъ сы́нъ тво́й і҆ѡ́сифъ: сотвори́ мѧ бг҃ъ господи́на все́й землѝ є҆гѵ́петстѣй: сни́ди оу҆̀бо ко мнѣ̀ и҆ не оу҆ме́дли:

¹⁰

и всели́шися въ земли́ Гесе́мли Араві́йстѣй, и бу́деши бли́зъ мене́ ты́ и сы́нове твои́, и сы́нове сыно́въ твои́хъ, о́вцы твоя́ и воло́ве твои́, и єли́ка су́ть твоя́:

¹⁰

и҆ всели́шисѧ въ землѝ гесе́мли а҆раві́йстѣй, и҆ бꙋ́деши бли́з̾ менє̀ ты̀ и҆ сы́нове твоѝ, и҆ сы́нове сынѡ́въ твои́хъ, ѻ҆́вцы твоѧ̑ и҆ воло́ве твоѝ, и҆ є҆ли̑ка сꙋ́ть твоѧ̑:

¹¹

и препита́ю тя́ та́мо, єще́ бо пя́ть лѣ́тъ бу́детъ гла́дъ на земли́, да не поги́бнеши ты́ и сы́нове твои́, и вся́ имѣ́нія твоя́.

¹¹

и҆ препита́ю тѧ̀ та́мѡ, є҆ще́ бо пѧ́ть лѣ́тъ бꙋ́детъ гла́дъ на землѝ, да не поги́бнеши ты̀ и҆ сы́нове твоѝ, и҆ всѧ̑ и҆мѣ̑нїѧ твоѧ̑.

¹²

Се́, о́чи ва́ши ви́дятъ, и о́чи Веніамі́на бра́та моєго́, я́ко уста́ моя́ глаго́лющая къ ва́мъ:

¹²

Сѐ, ѻ҆́чи ва́ши ви́дѧтъ, и҆ ѻ҆́чи венїамі́на бра́та моегѡ̀, ꙗ҆́кѡ оу҆ста̀ моѧ̑ глагѡ́лющаѧ къ ва́мъ:

¹³

возвѣсти́те у́бо отцу́ моєму́ всю́ сла́ву мою́ су́щую во Єги́птѣ, и єли́ка ви́дите: и ускори́вше, приведи́те отца́ моєго́ сѣ́мо.

¹³

возвѣсти́те оу҆̀бо ѻ҆тцꙋ̀ моемꙋ̀ всю̀ сла́вꙋ мою̀ сꙋ́щꙋю во є҆гѵ́птѣ, и҆ є҆ли̑ка ви́дите: и҆ оу҆скори́вше, приведи́те ѻ҆тца̀ моего̀ сѣ́мѡ.

¹⁴

И напа́дъ на вы́ю Веніамі́на, бра́та своєго́, пла́кася надъ ни́мъ, и Веніамі́нъ пла́кася на вы́и єго́.

¹⁴

И҆ напа́дъ на вы́ю венїамі́на, бра́та своегѡ̀, пла́касѧ над̾ ни́мъ, и҆ венїамі́нъ пла́касѧ на вы́и є҆гѡ̀.

¹⁵

И облобыза́въ всю́ бра́тію свою́, пла́кася надъ ни́ми: и по си́хъ глаго́лаша къ нему́ бра́тія єго́.

¹⁵

И҆ ѡ҆блобыза́въ всю̀ бра́тїю свою̀, пла́касѧ над̾ ни́ми: и҆ по си́хъ глаго́лаша къ немꙋ̀ бра́тїѧ є҆гѡ̀.

¹⁶

И пронесе́ся гла́съ въ дому́ фарао́новѣ, глаго́люще: пріидо́ша бра́тія Іо́сифова. Возра́довася же фарао́нъ и раби́ єго́.

¹⁶

И҆ пронесе́сѧ гла́съ въ домꙋ̀ фараѡ́новѣ, глаго́люще: прїидо́ша бра́тїѧ і҆ѡ́сифѡва. Возра́довасѧ же фараѡ́нъ и҆ рабѝ є҆гѡ̀.

¹⁷

Рече́ же фарао́нъ ко Іо́сифу: рцы́ бра́тіи своє́й: сіє́ сотвори́те: напо́лните сосу́ды ва́шя [пшени́цы] и иди́те въ зе́млю Ханаа́ню,

¹⁷

Рече́ же фараѡ́нъ ко і҆ѡ́сифꙋ: рцы̀ бра́тїи свое́й: сїѐ сотвори́те: напо́лните сосꙋ́ды ва́шѧ (пшени́цы) и҆ и҆ди́те въ зе́млю ханаа́ню,

¹⁸

и взе́мше отца́ ва́шего и имѣ́нія ва́ша, пріиди́те ко мнѣ́: и да́мъ ва́мъ от всѣ́хъ бла́гъ Єги́петскихъ, и снѣ́сте ту́къ земли́:

¹⁸

и҆ взе́мше ѻ҆тца̀ ва́шего и҆ и҆мѣ̑нїѧ ва̑ша, прїиди́те ко мнѣ̀: и҆ да́мъ ва́мъ ѿ всѣ́хъ бла̑гъ є҆гѵ́петскихъ, и҆ снѣ́сте тꙋ́къ землѝ:

¹⁹

ты́ же заповѣ́ждь сія́: взя́ти и́мъ колесни́цы от земли́ Єги́петскія, дѣ́темъ и́хъ и жена́мъ и́хъ: и пои́мше отца́ своєго́, пріиди́те:

¹⁹

ты́ же заповѣ́ждь сїѧ̑: взѧ́ти и҆̀мъ колесни̑цы ѿ землѝ є҆гѵ́петскїѧ, дѣ́темъ и҆́хъ и҆ жена́мъ и҆́хъ: и҆ пои́мше ѻ҆тца̀ своего̀, прїиди́те:

²⁰

и не пощади́те очи́ма сосу́довъ ва́шихъ: вся́ бо блага́я Єги́петская ва́мъ бу́дутъ.

²⁰

и҆ не пощади́те ѻ҆чи́ма сосꙋ́дѡвъ ва́шихъ: всѧ̑ бо блага̑ѧ є҆гѵ́пєтскаѧ ва́мъ бꙋ́дꙋтъ.

²¹

Сотвори́ша же та́ко сы́нове Ізра́илевы: даде́ же и́мъ Іо́сифъ колесни́цы по повелѣ́нію фарао́на царя́ [Єги́петска], и даде́ и́мъ бра́шно на пу́ть:

²¹

Сотвори́ша же та́кѡ сы́нове і҆и҃лєвы: даде́ же и҆̀мъ і҆ѡ́сифъ колесни̑цы по повелѣ́нїю фараѡ́на царѧ̀ (є҆гѵ́петска), и҆ дадѐ и҆̀мъ бра́шно на пꙋ́ть:

²²

и всѣ́мъ даде́ сугу́бы ри́зы, Веніамі́ну же даде́ три́ста златни́цъ и пя́теры ри́зы премѣ́нныя:

²²

и҆ всѣ̑мъ дадѐ сꙋгꙋ̑бы ри̑зы, венїамі́нꙋ же дадѐ три́ста златни́цъ и҆ пѧ́теры ри̑зы премѣ̑нныѧ:

²³

и отцу́ своєму́ посла́ та́кожде, и де́сять осло́въ везу́щихъ от всѣ́хъ бла́гъ Єги́петскихъ, и де́сять мско́въ везу́щихъ хлѣ́бы на пу́ть отцу́ єго́.

²³

и҆ ѻ҆тцꙋ̀ своемꙋ̀ посла̀ та́кожде, и҆ де́сѧть ѻ҆слѡ́въ везꙋ́щихъ ѿ всѣ́хъ бла̑гъ є҆гѵ́петскихъ, и҆ де́сѧть мскѡ́въ везꙋ́щихъ хлѣ́бы на пꙋ́ть ѻ҆тцꙋ̀ є҆гѡ̀.

²⁴

И отпусти́ бра́тію свою́. И отидо́ша. И рече́ и́мъ: не гнѣ́вайтеся на пути́.

²⁴

И҆ ѿпꙋстѝ бра́тїю свою̀. И҆ ѿидо́ша. И҆ речѐ и҆̀мъ: не гнѣ́вайтесѧ на пꙋтѝ.

²⁵

Изыдо́ша же изъ Єги́пта и пріидо́ша въ зе́млю Ханаа́ню ко Іа́кову отцу́ своєму́

²⁵

И҆зыдо́ша же и҆з̾ є҆гѵ́пта и҆ прїидо́ша въ зе́млю ханаа́ню ко і҆а́кѡвꙋ ѻ҆тцꙋ̀ своемꙋ̀

²⁶

и повѣ́даша єму́ глаго́люще: я́ко сы́нъ тво́й Іо́сифъ жи́въ є́сть, и о́нъ владѣ́єтъ надъ все́ю земле́ю Єги́петскою. И ужасе́ся въ мы́сли Іа́ковъ: не вѣ́роваше бо и́мъ.

²⁶

и҆ повѣ́даша є҆мꙋ̀ глаго́люще: ꙗ҆́кѡ сы́нъ тво́й і҆ѡ́сифъ жи́въ є҆́сть, и҆ ѻ҆́нъ владѣ́етъ над̾ все́ю земле́ю є҆гѵ́петскою. И҆ оу҆жасе́сѧ въ мы́сли і҆а́кѡвъ: не вѣ́роваше бо и҆̀мъ.

²⁷

Глаго́лаша же єму́ вся́ рече́нная от Іо́сифа, єли́ка рече́ и́мъ. Узрѣ́въ же колесни́цы, я́же посла́ Іо́сифъ, є́же взя́ти єго́, оживе́ ду́хъ Іа́кова, отца́ и́хъ,

²⁷

Глаго́лаша же є҆мꙋ̀ всѧ̑ речє́ннаѧ ѿ і҆ѡ́сифа, є҆ли̑ка речѐ и҆̀мъ. Оу҆зрѣ́въ же колесни̑цы, ꙗ҆̀же посла̀ і҆ѡ́сифъ, є҆́же взѧ́ти є҆го̀, ѡ҆живѐ дх҃ъ і҆а́кѡва, ѻ҆тца̀ и҆́хъ,

²⁸

и рече́ Ізра́иль: вели́ко ми́ є́сть [сіє́], а́ще єще́ Іо́сифъ сы́нъ мо́й жи́въ є́сть: ше́дъ узрю́ єго́, пре́жде не́же умре́ти ми́.

²⁸

и҆ речѐ і҆и҃ль: вели́ко мѝ є҆́сть (*сїѐ), а҆́ще є҆щѐ і҆ѡ́сифъ сы́нъ мо́й жи́въ є҆́сть: ше́дъ оу҆зрю̀ є҆го̀, пре́жде не́же оу҆мре́ти мѝ.