Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
Воста́въ же Ізра́иль са́мъ и вся́ су́щая єго́, пріи́де ко кла́дязю Кля́твенному и пожре́ же́ртву Бо́гу отца́ своєго́ Ісаа́ка.
1
Воста́въ же і҆и҃ль са́мъ и҆ всѧ̑ сꙋ̑щаѧ є҆гѡ̀, прїи́де ко кла́дѧзю клѧ́твенномꙋ и҆ пожрѐ же́ртвꙋ бг҃ꙋ ѻ҆тца̀ своегѡ̀ і҆саа́ка.
2
Рече́ же Бо́гъ ко Ізра́илю въ видѣ́ніи но́щію, глаго́ля: Іа́кове, Іа́кове. О́нъ же рече́: что́ єсть?
2
Рече́ же бг҃ъ ко і҆и҃лю въ видѣ́нїи но́щїю, гл҃ѧ: і҆а́кѡве, і҆а́кѡве. Ѻ҆́нъ же речѐ: что́ є҆сть;
3
О́нъ же рече́ єму́: А́зъ є́смь Бо́гъ отце́въ твои́хъ, не убо́йся изы́ти во Єги́петъ: въ язы́къ бо ве́лій сотворю́ тя та́мо:
3
Ѻ҆́нъ же речѐ є҆мꙋ̀: а҆́зъ є҆́смь бг҃ъ ѻ҆тцє́въ твои́хъ, не оу҆бо́йсѧ и҆зы́ти во є҆гѵ́петъ: въ ꙗ҆зы́къ бо ве́лїй сотворю́ тѧ та́мѡ:
4
и А́зъ сни́ду съ тобо́ю во Єги́петъ, и А́зъ возведу́ тя до конца́: и Іо́сифъ возложи́тъ ру́ки своя́ на о́чи твои́.
4
и҆ а҆́зъ сни́дꙋ съ тобо́ю во є҆гѵ́петъ, и҆ а҆́зъ возведꙋ́ тѧ до конца̀: и҆ і҆ѡ́сифъ возложи́тъ рꙋ́ки своѧ̑ на ѻ҆́чи твоѝ.
5
Воста́ же Іа́ковъ от кла́дязя Кля́твеннаго, и взя́ша сы́нове Ізра́иля отца́ своєго́, и стяжа́ніє, и жены́ своя́ на колесни́цы, я́же посла́ Іо́сифъ, взя́ти єго́:
5
Воста́ же і҆а́кѡвъ ѿ кла́дѧзѧ клѧ́твеннагѡ, и҆ взѧ́ша сы́нове і҆и҃лѧ ѻ҆тца̀ своего̀, и҆ стѧжа́нїе, и҆ жєны̀ своѧ̑ на колесни̑цы, ꙗ҆̀же посла̀ і҆ѡ́сифъ, взѧ́ти є҆го̀:
6
и взе́мше имѣ́нія своя́ и все́ стяжа́ніє, є́же стяжа́ша въ земли́ Ханаа́нстѣй, внидо́ша во Єги́петъ Іа́ковъ и все́ сѣ́мя єго́ съ ни́мъ:
6
и҆ взе́мше и҆мѣ̑нїѧ своѧ̑ и҆ всѐ стѧжа́нїе, є҆́же стѧжа́ша въ землѝ ханаа́нстѣй, внидо́ша во є҆гѵ́петъ і҆а́кѡвъ и҆ всѐ сѣ́мѧ є҆гѡ̀ съ ни́мъ:
7
сы́нове и сы́нове сыно́въ єго́ съ ни́мъ, дще́ри и дще́ри дще́рей єго́, и все́ сѣ́мя своє́ введе́ во Єги́петъ.
7
сы́нове и҆ сы́нове сынѡ́въ є҆гѡ̀ съ ни́мъ, дщє́ри и҆ дщє́ри дще́рей є҆гѡ̀, и҆ всѐ сѣ́мѧ своѐ введѐ во є҆гѵ́петъ.
8
Сія́ же имена́ сыно́въ Ізра́илевыхъ вше́дшихъ во Єги́петъ ку́пно со Іа́ковомъ отце́мъ свои́мъ: Іа́ковъ и сы́нове єго́: пе́рвенецъ Іа́ковль Руви́мъ.
8
Сїѧ̑ же и҆мена̀ сынѡ́въ і҆и҃левыхъ вше́дшихъ во є҆гѵ́петъ кꙋ́пнѡ со і҆а́кѡвомъ ѻ҆тце́мъ свои́мъ: і҆а́кѡвъ и҆ сы́нове є҆гѡ̀: пе́рвенецъ і҆а́кѡвль рꙋви́мъ.
9
Сы́нове же Руви́мли: Єно́хъ и Фалло́съ, Асро́нъ и Хармі́.
9
Сы́нове же рꙋви̑мли: є҆нѡ́хъ и҆ фалло́съ, а҆срѡ́нъ и҆ хармі̀.
10
Сы́нове же Симео́ни: Іємуи́лъ и Іамі́нъ, и Ао́дъ и Ахі́нъ, и Саа́ръ и Сау́лъ, сы́нъ Ханані́тідинъ.
10
Сы́нове же сѷмеѡ̑ни: і҆емꙋи́лъ и҆ і҆амі́нъ, и҆ а҆ѡ́дъ и҆ а҆хі́нъ, и҆ саа́ръ и҆ саꙋ́лъ, сы́нъ ханані́тїдинъ.
11
Сы́нове же Леві́ини: Гирсо́нъ, Каа́ѳъ и Мера́рій.
11
Сы́нове же леѵі̑ини: гирсѡ́нъ, каа́ѳъ и҆ мера́рїй.
12
Сы́нове же Іу́дины: И́ръ и Авна́нъ, и Сило́мъ и Фаре́съ и За́ра: умро́ша же И́ръ и Авна́нъ въ земли́ Ханаа́ни. Бы́ша же сы́нове Фаре́су: Єсро́мъ и Іємуи́лъ.
12
Сы́нове же і҆ꙋ̑дины: и҆́ръ и҆ а҆ѵна́нъ, и҆ силѡ́мъ и҆ фаре́съ и҆ за́ра: оу҆мро́ша же и҆́ръ и҆ а҆ѵна́нъ въ землѝ ханаа́ни. Бы́ша же сы́нове фаре́сꙋ: є҆срѡ́мъ и҆ і҆емꙋи́лъ.
13
Сы́нове же Іссаха́ровы: Ѳола́ и Фуа́, и Асу́мъ и Самвра́нъ.
13
Сы́нове же і҆ссаха́рѡвы: ѳѡла̀ и҆ фꙋа̀, и҆ а҆сꙋ́мъ и҆ самвра́нъ.
14
Сы́нове же Завуло́ни: Сере́дъ и Алло́нъ и Ахои́лъ.
14
Сы́нове же завꙋлѡ̑ни: сере́дъ и҆ а҆ллѡ́нъ и҆ а҆хои́лъ.
15
Сі́и сы́нове Лі́ини, и́хже роди́ Іа́кову въ Месопота́міи Си́рстѣй, и Ді́ну дще́рь єго́: всѣ́хъ ду́шъ сыно́въ и дще́рей три́десять три́.
15
Сі́и сы́нове лі́ини, и҆̀хже родѝ і҆а́кѡвꙋ въ месопота́мїи сѵ́рстѣй, и҆ ді́нꙋ дще́рь є҆гѡ̀: всѣ́хъ дꙋ́шъ сынѡ́въ и҆ дще́рей три́десѧть трѝ.
16
Сы́нове же Га́довы: Сафо́нъ и Ангі́съ, и Санні́съ и Ѳасова́нъ, и Аиді́съ и Ароиді́съ и Ареилі́съ.
16
Сы́нове же га́дѡвы: сафѡ́нъ и҆ а҆нгі́съ, и҆ санні́съ и҆ ѳасова́нъ, и҆ а҆иді́съ и҆ а҆роиді́съ и҆ а҆реилі́съ.
17
Сы́нове же Аси́ровы: Іємна́ и Єссуа́, и Ієу́лъ и Варіа́, и Са́ра сестра́ и́хъ. Сы́нове же Варіины́: Хово́ръ и Мелхі́илъ.
17
Сы́нове же а҆си́рѡвы: і҆емна̀ и҆ є҆ссꙋа̀, и҆ і҆еꙋ́лъ и҆ варїа̀, и҆ са́ра сестра̀ и҆́хъ. Сы́нове же варїины̑: хово́ръ и҆ мелхі́илъ.
18
Сі́и сы́нове Зе́лфины, ю́же даде́ Лава́нъ Лі́и, дще́ри своє́й, я́же роди́ си́хъ Іа́кову, шестьна́десять ду́шъ.
18
Сі́и сы́нове зє́лфины, ю҆́же дадѐ лава́нъ лі́и, дще́ри свое́й, ꙗ҆́же родѝ си́хъ і҆а́кѡвꙋ, шестьна́десѧть дꙋ́шъ.
19
Сы́нове же Рахи́ли, жены́ Іа́ковли: Іо́сифъ и Веніамі́нъ.
19
Сы́нове же рахи́ли, жены̀ і҆а́кѡвли: і҆ѡ́сифъ и҆ венїамі́нъ.
20
Бы́ша же сы́нове Іо́сифу въ земли́ Єги́петстѣй, и́хже роди́ єму́ Асене́ѳа, дщи́ Петефрі́а жреца́ Иліопо́льска, Манассі́ю и Єфре́ма. Бы́ша же сы́нове Манассі́ины, и́хже роди́ єму́ нало́жница Си́ра, Махі́ра. Махі́ръ же роди́ Галаа́да. Сы́нове же Єфраі́ма, бра́та Манассі́ина: Суталаа́мъ и Таа́мъ. Сы́нове же Суталаа́мли, Єдо́мъ.
20
Бы́ша же сы́нове і҆ѡ́сифꙋ въ землѝ є҆гѵ́петстѣй, и҆̀хже родѝ є҆мꙋ̀ а҆сене́ѳа, дщѝ петефрі́а жреца̀ и҆лїопо́льска, манассі́ю и҆ є҆фре́ма. Бы́ша же сы́нове манассі̑ины, и҆̀хже родѝ є҆мꙋ̀ нало́жница сѵ́ра, махі́ра. Махі́ръ же родѝ галаа́да. Сы́нове же є҆фраі́ма, бра́та манассі́ина: сꙋталаа́мъ и҆ таа́мъ. Сы́нове же сꙋталаа̑мли, є҆дѡ́мъ.
21
Сы́нове же Веніамі́ни: Вала́ и Хово́ръ и Асфи́лъ. Бы́ша же сы́нове Ва́ловы: Гира́ и Ноєма́нъ, и Анхі́съ и Ро́съ, и Мамфі́мъ и Офімі́мъ. Гира́ же роди́ Ара́да.
21
Сы́нове же венїамі̑ни: вала̀ и҆ хово́ръ и҆ а҆сфи́лъ. Бы́ша же сы́нове ва́лѡвы: гира̀ и҆ ноема́нъ, и҆ а҆нхі́съ и҆ рѡ́съ, и҆ мамфі́мъ и҆ ѻ҆фїмі́мъ. Гира́ же родѝ а҆ра́да.
22
Сі́и сы́нове Рахи́лины, и́хже роди́ Іа́кову, всѣ́хъ ду́шъ осмьна́десять.
22
Сі́и сы́нове рахи̑лины, и҆̀хже родѝ і҆а́кѡвꙋ, всѣ́хъ дꙋ́шъ ѻ҆смьна́десѧть.
23
Сы́нове же Да́новы: Асо́мъ.
23
Сы́нове же да́нѡвы: а҆со́мъ.
24
Сы́нове же Нефѳалі́мли: Асіи́лъ и Гоні́, и Іссаа́ръ и Селли́мъ.
24
Сы́нове же нефѳалі̑мли: а҆сїи́лъ и҆ гѡні̀, и҆ і҆ссаа́ръ и҆ селли́мъ.
25
Сі́и сы́нове Ва́ллины, ю́же даде́ Лава́нъ Рахи́ли дще́ри своє́й, я́же роди́ си́хъ Іа́кову: всѣ́хъ ду́шъ се́дмь.
25
Сі́и сы́нове ва̑ллины, ю҆́же дадѐ лава́нъ рахи́ли дще́ри свое́й, ꙗ҆́же родѝ си́хъ і҆а́кѡвꙋ: всѣ́хъ дꙋ́шъ се́дмь.
26
Всѣ́хъ же ду́шъ вше́дшихъ со Іа́ковомъ во Єги́петъ, я́же изыдо́ша изъ чре́слъ єго́, кромѣ́ же́нъ сыно́въ Іа́ковлихъ, всѣ́хъ ду́шъ шестьдеся́тъ ше́сть.
26
Всѣ́хъ же дꙋ́шъ вше́дшихъ со і҆а́кѡвомъ во є҆гѵ́петъ, ꙗ҆̀же и҆зыдо́ша и҆з̾ чре́слъ є҆гѡ̀, кромѣ̀ же́нъ сынѡ́въ і҆а́кѡвлихъ, всѣ́хъ дꙋ́шъ шестьдесѧ́тъ ше́сть.
27
Сы́нове же Іо́сифовы, и́же бы́ша єму́ въ земли́ Єги́петстѣй, ду́шъ де́вять: всѣ́хъ ду́шъ до́му Іа́ковля, я́же пріидо́ша со Іа́ковомъ во Єги́петъ, ду́шъ се́дмьдесятъ пя́ть.
27
Сы́нове же і҆ѡ́сифѡвы, и҆̀же бы́ша є҆мꙋ̀ въ землѝ є҆гѵ́петстѣй, дꙋ́шъ де́вѧть: всѣ́хъ дꙋ́шъ до́мꙋ і҆а́кѡвлѧ, ꙗ҆̀же прїидо́ша со і҆а́кѡвомъ во є҆гѵ́петъ, дꙋ́шъ се́дмьдесѧтъ пѧ́ть.
28
Іу́ду же посла́ предъ собо́ю ко Іо́сифу срѣ́сти єго́ у Иро́йска гра́да въ земли́ Рамессі́йстѣй.
28
І҆ꙋ́дꙋ же посла̀ пред̾ собо́ю ко і҆ѡ́сифꙋ срѣ́сти є҆го̀ оу҆ и҆рѡ́йска гра́да въ землѝ рамессі́йстѣй.
29
Впря́гъ же Іо́сифъ колесни́цы своя́, изы́де во срѣ́теніє Ізра́илю, отцу́ своєму́, ко Ироо́ну гра́ду: и яви́вся єму́, нападе́ на вы́ю єго́ и пла́кася пла́чемъ вели́кимъ.
29
Впрѧ́гъ же і҆ѡ́сифъ колєсни́цы своѧ̑, и҆зы́де во срѣ́тенїе і҆и҃лю, ѻ҆тцꙋ̀ своемꙋ̀, ко и҆рѡѡ́нꙋ гра́дꙋ: и҆ ꙗ҆ви́всѧ є҆мꙋ̀, нападѐ на вы́ю є҆гѡ̀ и҆ пла́касѧ пла́чемъ вели́кимъ.
30
И рече́ Ізра́иль ко Іо́сифу: да умру́ отны́нѣ, поне́же ви́дѣхъ лице́ твоє́: єще́ бо ты́ єси́ жи́въ.
30
И҆ речѐ і҆и҃ль ко і҆ѡ́сифꙋ: да оу҆мрꙋ̀ ѿнн҃ѣ, поне́же ви́дѣхъ лицѐ твоѐ: є҆ще́ бо ты̀ є҆сѝ жи́въ.
31
Рече́ же Іо́сифъ ко бра́тіи своє́й: ше́дъ повѣ́мъ фарао́ну и реку́ єму́: бра́тія моя́ и до́мъ отца́ моєго́, и́же бы́ша въ земли́ Ханаа́ни, пріидо́ша ко мнѣ́:
31
Рече́ же і҆ѡ́сифъ ко бра́тїи свое́й: ше́дъ повѣ́мъ фараѡ́нꙋ и҆ рекꙋ̀ є҆мꙋ̀: бра́тїѧ моѧ̑ и҆ до́мъ ѻ҆тца̀ моегѡ̀, и҆̀же бы́ша въ землѝ ханаа́ни, прїидо́ша ко мнѣ̀:
32
они́ же су́ть му́жіє пастуси́, му́жіє бо скотопита́теліє бы́ша: и скоты́, и волы́, и вся́ своя́ приведо́ша:
32
ѻ҆ни́ же сꙋ́ть мꙋ́жїе пастꙋсѝ, мꙋ́жїе бо скотопита́телїе бы́ша: и҆ скоты̀, и҆ волы̀, и҆ всѧ̑ своѧ̑ приведо́ша:
33
а́ще у́бо призове́тъ ва́съ фарао́нъ и рече́тъ ва́мъ: что́ дѣ́ло ва́ше є́сть?
33
а҆́ще оу҆́бѡ призове́тъ ва́съ фараѡ́нъ и҆ рече́тъ ва́мъ: что̀ дѣ́ло ва́ше є҆́сть;
34
Рцы́те: му́жіє скотопита́теліє єсмы́, раби́ твои́, издѣ́тска да́же до ны́нѣ, и мы́ и отцы́ на́ши: да вселите́ся въ земли́ Гесе́мъ Араві́йстѣй: ме́рзость бо є́сть Єги́птяномъ вся́къ пасту́хъ о́вчій.
34
рцы́те: мꙋ́жїе скотопита́телїе є҆смы̀, рабѝ твоѝ, и҆здѣ́тска да́же до нн҃ѣ, и҆ мы̀ и҆ ѻ҆тцы̀ на́ши: да вселите́сѧ въ землѝ гесе́мъ а҆раві́йстѣй: ме́рзость бо є҆́сть є҆гѵ́птѧнѡмъ всѧ́къ пастꙋ́хъ ѻ҆́вчїй.