Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
Бы́сть же по глаго́лѣхъ си́хъ, и повѣ́дано бы́сть Іо́сифу, я́ко оте́цъ тво́й изнемога́єтъ: и пои́мъ два́ сы́на своя́, Манассі́ю и Єфре́ма, пріи́де ко Іа́кову.
1
Бы́сть же по глаго́лѣхъ си́хъ, и҆ повѣ́дано бы́сть і҆ѡ́сифꙋ, ꙗ҆́кѡ ѻ҆те́цъ тво́й и҆знемога́етъ: и҆ пои́мъ два̀ сы̑на своѧ̑, манассі́ю и҆ є҆фре́ма, прїи́де ко і҆а́кѡвꙋ.
2
Повѣ́даша же Іа́кову, глаго́люще: се́, сы́нъ тво́й Іо́сифъ гряде́тъ къ тебѣ́. И укрѣпи́вся Ізра́иль сѣ́де на одрѣ́,
2
Повѣ́даша же і҆а́кѡвꙋ, глаго́люще: сѐ, сы́нъ тво́й і҆ѡ́сифъ грѧде́тъ къ тебѣ̀. И҆ оу҆крѣпи́всѧ і҆и҃ль сѣ́де на ѻ҆дрѣ̀,
3
и рече́ Іа́ковъ ко Іо́сифу: Бо́гъ мо́й яви́ся мнѣ́ въ Лу́зѣ, въ земли́ Ханаа́ни, и благослови́ мя
3
и҆ речѐ і҆а́кѡвъ ко і҆ѡ́сифꙋ: бг҃ъ мо́й ꙗ҆ви́сѧ мнѣ̀ въ лꙋ́зѣ, въ землѝ ханаа́ни, и҆ блгⷭ҇ви́ мѧ
4
и рече́ ми: се́, А́зъ возращу́ тя и умно́жу тя́, и сотворю́ тя въ собра́нія язы́ковъ: и да́мъ ти́ зе́млю сію́ и сѣ́мени твоєму́ по тебѣ́ во одержа́ніє вѣ́чноє.
4
и҆ рече́ ми: сѐ, а҆́зъ возращꙋ́ тѧ и҆ оу҆мно́жꙋ тѧ̀, и҆ сотворю́ тѧ въ собра̑нїѧ ꙗ҆зы́кѡвъ: и҆ да́мъ тѝ зе́млю сїю̀ и҆ сѣ́мени твоемꙋ̀ по тебѣ̀ во ѡ҆держа́нїе вѣ́чное.
5
Ны́нѣ у́бо два́ сы́на твоя́, и́же бы́ша тебѣ́ въ земли́ Єги́петстѣй пре́жде прише́ствія моєго́ къ тебѣ́ во Єги́петъ, мои́ су́ть: Єфре́мъ и Манассі́а, а́ки Руви́мъ и Симео́нъ бу́дутъ мнѣ́:
5
Нн҃ѣ оу҆̀бо два̀ сы̑на твоѧ̑, и҆̀же бы́ша тебѣ̀ въ землѝ є҆гѵ́петстѣй пре́жде прише́ствїѧ моегѡ̀ къ тебѣ̀ во є҆гѵ́петъ, моѝ сꙋ́ть: є҆фре́мъ и҆ манассі́а, а҆́ки рꙋви́мъ и҆ сѷмеѡ́нъ бꙋ́дꙋтъ мнѣ̀:
6
сы́ны же, я́же а́ще роди́ши по си́хъ, бу́дутъ тебѣ́: во и́мя бра́тіи своєя́ призову́тся ко жре́біямъ о́ныхъ:
6
сы́ны же, ꙗ҆̀же а҆́ще роди́ши по си́хъ, бꙋ́дꙋтъ тебѣ̀: во и҆́мѧ бра́тїи своеѧ̀ призовꙋ́тсѧ ко жре́бїѧмъ ѻ҆́ныхъ:
7
а́зъ же єгда́ идя́хъ от Месопота́міи Си́рскія, у́мре Рахи́ль ма́ти твоя́ въ земли́ Ханаа́ни, приближа́ющуся ми́ ко іпподро́му Хавра́ѳы земли́, є́же пріити́ во Єфра́ѳу: и погребо́хъ ю́ на пути́ іпподро́ма: се́й є́сть Виѳлеє́мъ.
7
а҆́зъ же є҆гда̀ и҆дѧ́хъ ѿ месопота́мїи сѵ́рскїѧ, оу҆́мре рахи́ль ма́ти твоѧ̀ въ землѝ ханаа́ни, приближа́ющꙋсѧ мѝ ко і҆пподро́мꙋ хавра́ѳы землѝ, є҆́же прїитѝ во є҆фра́ѳꙋ: и҆ погребо́хъ ю҆̀ на пꙋтѝ і҆пподро́ма: се́й є҆́сть виѳлее́мъ.
8
Ви́дѣвъ же Ізра́иль сы́ны Іо́сифовы, рече́: что́ тебѣ́ сі́и?
8
Ви́дѣвъ же і҆и҃ль сы́ны і҆ѡ́сифѡвы, речѐ: что̀ тебѣ̀ сі́и;
9
Рече́ же Іо́сифъ отцу́ своєму́: сы́нове мои́ су́ть, я́же даде́ ми Бо́гъ здѣ́. И рече́ Іа́ковъ: приведи́ ми я́, да благословлю́ и́хъ.
9
Рече́ же і҆ѡ́сифъ ѻ҆тцꙋ̀ своемꙋ̀: сы́нове моѝ сꙋ́ть, ꙗ҆̀же даде́ ми бг҃ъ здѣ̀. И҆ речѐ і҆а́кѡвъ: приведи́ ми ѧ҆̀, да благословлю̀ и҆̀хъ.
10
О́чи же Ізра́илю тя́жко ви́дѣста от ста́рости, и не можа́ше ви́дѣти: и прибли́жи и́хъ къ нему́, и лобза́ и́хъ, и объя́тъ я́.
10
Ѻ҆́чи же і҆и҃лю тѧ́жкѡ ви́дѣста ѿ ста́рости, и҆ не можа́ше ви́дѣти: и҆ прибли́жи и҆̀хъ къ немꙋ̀, и҆ лобза̀ и҆̀хъ, и҆ ѡ҆б̾ѧ́тъ ѧ҆̀.
11
И рече́ Ізра́иль ко Іо́сифу: се́, лица́ твоєго́ не лиши́хся, и се́, показа́ ми Бо́гъ и сѣ́мя твоє́.
11
И҆ речѐ і҆и҃ль ко і҆ѡ́сифꙋ: сѐ, лица̀ твоегѡ̀ не лиши́хсѧ, и҆ сѐ, показа́ ми бг҃ъ и҆ сѣ́мѧ твоѐ.
12
И отведе́ и́хъ Іо́сифъ от колѣ́нъ єго́, и поклони́шася єму́ лице́мъ до земли́.
12
И҆ ѿведѐ и҆̀хъ і҆ѡ́сифъ ѿ колѣ́нъ є҆гѡ̀, и҆ поклони́шасѧ є҆мꙋ̀ лице́мъ до землѝ.
13
Пои́мъ же Іо́сифъ два́ сы́на своя́, Єфре́ма въ десни́цу, пря́мо лѣви́цы Ізра́иля, Манассі́ю же въ лѣ́вую, пря́мо десни́цы Ізра́илевы, прибли́жи и́хъ къ нему́.
13
Пои́мъ же і҆ѡ́сифъ два̀ сы̑на своѧ̑, є҆фре́ма въ десни́цꙋ, прѧ́мѡ лѣви́цы і҆и҃лѧ, манассі́ю же въ лѣ́вꙋю, прѧ́мѡ десни́цы і҆и҃левы, прибли́жи и҆̀хъ къ немꙋ̀.
14
Просте́ръ же Ізра́иль ру́ку десну́ю, возложи́ на главу́ Єфре́млю, се́й же бя́ше ме́ншій, а лѣ́вую на главу́ Манассі́ину, премѣни́въ ру́цѣ,
14
Просте́ръ же і҆и҃ль рꙋ́кꙋ деснꙋ́ю, возложѝ на главꙋ̀ є҆фре́млю, се́й же бѧ́ше ме́ншїй, а҆ лѣ́вꙋю на главꙋ̀ манассі́инꙋ, премѣни́въ рꙋ́цѣ,
15
и благослови́ я́ и рече́: Бо́гъ, Єму́же благоугоди́ша отцы́ мои́ предъ ни́мъ, Авраа́мъ и Ісаа́къ, Бо́гъ, И́же пита́єтъ мя́ измла́да да́же до дне́ сего́,
15
и҆ благословѝ ѧ҆̀ и҆ речѐ: бг҃ъ, є҆мꙋ́же бл҃гоꙋгоди́ша ѻ҆тцы̀ моѝ пред̾ ни́мъ, а҆враа́мъ и҆ і҆саа́къ, бг҃ъ, и҆́же пита́етъ мѧ̀ и҆змла́да да́же до днѐ сегѡ̀,
16
А́нгелъ, и́же мя́ избавля́єтъ от всѣ́хъ зо́лъ, да благослови́тъ дѣ́тища сія́, и прозове́тся въ ни́хъ и́мя моє́, и и́мя оте́цъ мои́хъ, Авраа́ма и Ісаа́ка, и да умно́жатся во мно́жество мно́гоє на земли́.
16
а҆́гг҃лъ, и҆́же мѧ̀ и҆збавлѧ́етъ ѿ всѣ́хъ ѕѡ́лъ, да блгⷭ҇ви́тъ дѣ̑тища сїѧ̑, и҆ прозове́тсѧ въ ни́хъ и҆́мѧ моѐ, и҆ и҆́мѧ ѻ҆тє́цъ мои́хъ, а҆враа́ма и҆ і҆саа́ка, и҆ да оу҆мно́жатсѧ во мно́жество мно́гое на землѝ.
17
Ви́дѣвъ же Іо́сифъ, я́ко возложи́ оте́цъ єго́ ру́ку десну́ю свою́ на главу́ Єфре́млю, тя́жко єму́ яви́ся: и прія́ Іо́сифъ ру́ку отца́ своєго́ отъя́ти ю́ от главы́ Єфре́мли на главу́ Манассі́ину,
17
Ви́дѣвъ же і҆ѡ́сифъ, ꙗ҆́кѡ возложѝ ѻ҆те́цъ є҆гѡ̀ рꙋ́кꙋ деснꙋ́ю свою̀ на главꙋ̀ є҆фре́млю, тѧ́жко є҆мꙋ̀ ꙗ҆ви́сѧ: и҆ прїѧ̀ і҆ѡ́сифъ рꙋ́кꙋ ѻ҆тца̀ своегѡ̀ ѿѧ́ти ю҆̀ ѿ главы̀ є҆фре́мли на главꙋ̀ манассі́инꙋ,
18
и рече́ Іо́сифъ отцу́ своєму́: не та́ко, о́тче: се́й бо [є́сть] пе́рвенецъ, возложи́ ру́ку десну́ю твою́ на главу́ єго́.
18
и҆ речѐ і҆ѡ́сифъ ѻ҆тцꙋ̀ своемꙋ̀: не та́кѡ, ѻ҆́тче: се́й бо (є҆́сть) пе́рвенецъ, возложѝ рꙋ́кꙋ деснꙋ́ю твою̀ на главꙋ̀ є҆гѡ̀.
19
И не хотя́ше, но рече́: вѣ́мъ, ча́до, вѣ́мъ: и се́й бу́детъ въ лю́ди, и се́й вознесе́тся: но бра́тъ єго́ ме́ншій бо́лій єго́ бу́детъ, и сѣ́мя єго́ бу́детъ во мно́жество язы́ковъ.
19
И҆ не хотѧ́ше, но речѐ: вѣ́мъ, ча́до, вѣ́мъ: и҆ се́й бꙋ́детъ въ лю́ди, и҆ се́й вознесе́тсѧ: но бра́тъ є҆гѡ̀ ме́ншїй бо́лїй є҆гѡ̀ бꙋ́детъ, и҆ сѣ́мѧ є҆гѡ̀ бꙋ́детъ во мно́жество ꙗ҆зы́кѡвъ.
20
И благослови́ я́ въ то́мъ дни́, глаго́ля: въ ва́съ благослови́тся Ізра́иль, глаго́люще: да сотвори́тъ тя́ Бо́гъ я́коже Єфре́ма и я́ко Манассі́ю. И поста́ви Єфре́ма вы́шше Манассі́и.
20
И҆ благословѝ ѧ҆̀ въ то́мъ днѝ, глаго́лѧ: въ ва́съ благослови́тсѧ і҆и҃ль, глаго́люще: да сотвори́тъ тѧ̀ бг҃ъ ꙗ҆́коже є҆фре́ма и҆ ꙗ҆́кѡ манассі́ю. И҆ поста́ви є҆фре́ма вы́шше манассі́и.
21
Рече́ же Ізра́иль Іо́сифу: се́, а́зъ умира́ю, и бу́детъ Бо́гъ съ ва́ми, и возврати́тъ ва́съ от земли́ сея́ на зе́млю оте́цъ ва́шихъ:
21
Рече́ же і҆и҃ль і҆ѡ́сифꙋ: сѐ, а҆́зъ оу҆мира́ю, и҆ бꙋ́детъ бг҃ъ съ ва́ми, и҆ возврати́тъ ва́съ ѿ землѝ сеѧ̀ на зе́млю ѻ҆тє́цъ ва́шихъ:
22
а́зъ же даю́ ти Сікі́му избра́нную свы́ше бра́тіи твоєя́, ю́же взя́хъ изъ руки́ Аморре́йски мече́мъ мои́мъ и лу́комъ.
22
а҆́зъ же даю́ ти сїкі́мꙋ и҆збра́ннꙋю свы́ше бра́тїи твоеѧ̀, ю҆́же взѧ́хъ и҆з̾ рꙋкѝ а҆морре́йски мече́мъ мои́мъ и҆ лꙋ́комъ.