¹

Утѣша́йте, утѣша́йте лю́ди моя́, глаго́летъ Бо́гъ:

²

свяще́нницы, глаго́лите въ се́рдце Ієрусали́му, утѣша́йте и́, я́ко напо́лнися смире́ніє єго́, разрѣши́ся грѣ́хъ єго́, я́ко прія́тъ от ру́ки Госпо́дни сугу́бы грѣхи́ своя́.

³

Гла́съ вопію́щаго въ пусты́ни: угото́вайте пу́ть Госпо́день, пра́вы сотвори́те стези́ Бо́га на́шего:

⁴

вся́ка де́брь напо́лнится, и вся́ка гора́ и хо́лмъ смири́тся, и бу́дутъ вся́ стро́потная въ пра́во, и о́страя въ пути́ гла́дки.

⁵

И яви́тся сла́ва Госпо́дня, и у́зритъ вся́ка пло́ть спасе́ніє Бо́жіє, я́ко Госпо́дь глаго́ла.

⁶

Гла́съ вопію́щаго: возопі́й. И реко́хъ: что́ возопію́? вся́ка пло́ть сѣ́но, и вся́ка сла́ва человѣ́ча я́ко цвѣ́тъ травны́й:

⁷

и́зсше трава́, и цвѣ́тъ отпаде́,

⁸

глаго́лъ же Бо́га на́шего пребыва́єтъ во вѣ́ки.

⁹

На го́ру высо́ку взы́ди, благовѣству́яй Сіо́ну, возвы́си крѣ́постію гла́съ тво́й, благовѣству́яй Ієрусали́му: возвы́сите, не бо́йтеся. Рцы́ градо́мъ Іу́динымъ:

¹⁰

се́, Бо́гъ ва́шъ, се́, Госпо́дь, Госпо́дь со крѣ́постію и́детъ, и мы́шца єго́ со вла́стію: се́, мзда́ єго́ съ ни́мъ, и дѣ́ло єго́ предъ ни́мъ:

¹¹

а́ки па́стырь упасе́тъ па́ству свою́, и мы́шцею своє́ю собере́тъ а́гнцы, и иму́щыя во утро́бѣ утѣ́шитъ.

¹²

Кто́ измѣ́ри го́рстію во́ду и не́бо пя́дію и всю́ зе́млю го́рстію? кто́ поста́ви го́ры въ мѣ́рилѣ и хо́лмы въ вѣ́сѣ?

¹³

кто́ уразумѣ́ у́мъ Госпо́день, и кто́ совѣ́тникъ єму́ бы́сть, и́же науча́єтъ єго́?

¹⁴

или́ съ ки́мъ совѣ́това, и наста́ви и́? или́ кто́ показа́ єму́ су́дъ? или́ пу́ть разумѣ́нія кто́ показа́ єму́? или́ кто́ пре́жде даде́ єму́, и возда́стся єму́?

¹⁵

А́ще вси́ язы́цы, а́ки ка́пля от ка́ди, и я́ко претяже́ніє вѣ́са вмѣни́шася, и а́ки плюнове́ніє вмѣня́тся?

¹⁶

Дубра́ва же Ліва́нова не дово́лна на сожже́ніє, и вся́ четвероно́гая не дово́лна на всесожже́ніє.

¹⁷

И вси́ язы́цы я́ко ничто́же су́ть, и въ ничто́же вмѣни́шася.

¹⁸

Кому́ уподо́бисте Го́спода, и ко́єму подо́бію уподо́бисте єго́?

¹⁹

Єда́ о́бразъ сотвори́ древодѣ́латель, или́ зла́тарь слія́въ зла́то позлати́ єго́, или́ подо́біємъ сотвори́ єго́?

²⁰

Дре́во бо негнію́щеє избира́єтъ древодѣ́латель и му́дрѣ и́щетъ, ка́ко поста́витъ о́бразъ єго́, и да не поколе́блется.

²¹

Не разумѣ́сте ли, не слы́шасте ли, не возвѣсти́ся ли ва́мъ испе́рва? не разумѣ́сте ли основа́нія земли́?

²²

Содержа́й кру́гъ земли́, и живу́щіи на не́й а́ки пру́зи: поста́вивый не́бо я́ко кама́ру и просте́ръ є́, я́ко ски́нію обита́ти:

²³

дая́й кня́зи а́ки ничто́же владѣ́ти, и зе́млю а́ки ничто́же сотвори́.

²⁴

Не насадя́тъ бо, ниже́ насѣ́ютъ, и не вкорени́тся въ земли́ коре́ніє и́хъ: дхну́ на ни́хъ вѣ́тръ, и изсхо́ша, и бу́ря а́ки сте́бліє во́зметъ и́хъ.

²⁵

Ны́нѣ у́бо кому́ мя уподо́бисте, и вознесу́ся? рече́ святы́й.

²⁶

Воззри́те на высоту́ очи́ма ва́шима и ви́дите, кто́ сотвори́ сія́ вся́: нося́й по числу́ у́тварь свою́, и вся́ по и́мени прозове́тъ от мно́гія сла́вы и въ держа́вѣ крѣ́пости своєя́: ничто́же утаи́ся от тебе́.

²⁷

Єда́ бо рече́ши, Іа́кове, и что́ глаго́лалъ єси́, Ізра́илю: утаи́ся пу́ть мо́й от Бо́га, и Бо́гъ мо́й су́дъ отъя́, и отступи́?

²⁸

И ны́нѣ не уразумѣ́лъ ли єси́? ни ли́ слы́шалъ єси́? Бо́гъ вѣ́чный, Бо́гъ устро́ивый концы́ земли́, не вза́лчетъ, ниже́ утруди́тся, ниже́ є́сть изобрѣ́теніє прему́дрости єго́,

²⁹

дая́й а́лчущымъ крѣ́пость и неболѣ́зненнымъ печа́ль.

³⁰

Вза́лчутъ бо юнѣ́йшіи, и утрудя́тся ю́ноты, и избра́нніи не крѣ́пцы бу́дутъ:

³¹

терпя́щіи же Го́спода измѣня́тъ крѣ́пость, окрыла́тѣютъ а́ки орли́, потеку́тъ и не утрудя́тся, по́йдутъ и не вза́лчутъ.