¹

И ны́нѣ си́це глаго́летъ Госпо́дь Бо́гъ сотвори́вый тя́, Іа́кове, и созда́вый тя́, Ізра́илю: не бо́йся, я́ко изба́вихъ тя́, прозва́хъ тя́ и́менемъ твои́мъ: мо́й єси́ ты́.

²

И а́ще прехо́диши сквозѣ́ во́ду, съ тобо́ю є́смь, и рѣ́ки не покры́ютъ тебе́: и а́ще сквозѣ́ о́гнь про́йдеши, не сожже́шися, и пла́мень не опали́тъ тебе́,

³

я́ко а́зъ Госпо́дь Бо́гъ тво́й, святы́й Ізра́илевъ, спаса́яй тя́: сотвори́хъ премѣ́ну твою́ Єги́петъ и єѳіо́пію, и сои́ну за тя́.

⁴

Отне́лиже че́стенъ бы́лъ єси́ предо мно́ю, просла́вился єси́, и а́зъ тя́ возлюби́хъ, и да́мъ человѣ́ки за тебе́ и кня́зи за главу́ твою́.

⁵

Не бо́йся, я́ко съ тобо́ю є́смь: от восто́къ приведу́ сѣ́мя твоє́ и от за́падъ соберу́ тя:

⁶

реку́ сѣ́веру: приведи́: и Лі́ву: не возбраня́й, приведи́ сы́ны моя́ от земли́ да́льнія и дще́ри моя́ от кра́євъ земны́хъ,

⁷

всѣ́хъ, єли́цы нарица́ются и́менемъ мои́мъ: во сла́вѣ бо моє́й устро́ихъ єго́ и созда́хъ єго́ и сотвори́хъ и́.

⁸

И изведо́хъ лю́ди слѣ́пы, и о́чи су́ть та́кожде слѣ́пы, и глу́си у́шы иму́щіи.

⁹

Вси́ язы́цы собра́шася вку́пѣ, и соберу́тся кня́зи от ни́хъ. Кто́ возвѣсти́тъ сія́? или́ я́же испе́рва кто́ возвѣсти́тъ ва́мъ? да приведу́тъ свидѣ́тели своя́ и оправдя́тся, и да услы́шатъ и да реку́тъ и́стину.

¹⁰

Бу́дите ми́ свидѣ́теліє, и а́зъ свидѣ́тель, глаго́летъ Госпо́дь Бо́гъ, и о́трокъ мо́й, єго́же избра́хъ, да увѣ́сте и вѣ́руєте ми́ и уразумѣ́єте, я́ко а́зъ є́смь: пре́жде мене́ не бы́сть и́нъ Бо́гъ, и по мнѣ́ не бу́детъ.

¹¹

А́зъ Бо́гъ, и нѣ́сть ра́звѣ мене́ спаса́яй.

¹²

А́зъ возвѣсти́хъ и спасо́хъ, укори́хъ, и не бѣ́ въ ва́съ чужді́й: вы́ мнѣ́ свидѣ́теліє, и а́зъ свидѣ́тель, глаго́летъ Госпо́дь Бо́гъ,

¹³

єще́ от нача́ла, и нѣ́сть изъима́яй от руку́ моє́ю: сотворю́, и кто́ отврати́тъ є́?

¹⁴

Та́ко глаго́летъ Госпо́дь Бо́гъ, избавля́яй ва́съ, святы́й Ізра́илевъ: ва́съ ра́ди послю́ въ Вавило́нъ и воздви́гну вся́ бѣжа́щыя, и халде́є въ корабле́хъ свя́жутся.

¹⁵

А́зъ Госпо́дь Бо́гъ святы́й ва́шъ, показа́вый Ізра́иля царя́ ва́шего.

¹⁶

Си́це глаго́летъ Госпо́дь, дая́й пу́ть по мо́рю и по водѣ́ си́льнѣ стезю́:

¹⁷

изводя́й колесни́цы и ко́ни и наро́дъ си́ленъ: но успо́ша и не воста́нутъ, угасо́ша а́ки ле́нъ угаше́нъ.

¹⁸

Не помина́йте пе́рвыхъ, и ве́тхихъ не помышля́йте,

¹⁹

се́, а́зъ творю́ но́вая, я́же ны́нѣ возсія́ютъ, и увѣ́сте я́: и сотворю́ въ пусты́ни пу́ть и въ безво́днѣй рѣ́ки.

²⁰

Возблагословя́тъ мя́ звѣ́ріє се́лніи, Сі́рини и дще́ри стру́ѳовы: я́ко да́хъ въ пусты́ни во́ду и рѣ́ки въ безво́днѣй, напои́ти ро́дъ мо́й избра́нный,

²¹

лю́ди моя́, я́же снабдѣ́хъ, добродѣ́тели моя́ повѣ́дати.

²²

Не ны́нѣ призва́хъ тебе́, Іа́кове, ниже́ труди́тися сотвори́хъ тя́, Ізра́илю.

²³

Не прине́слъ єси́ мнѣ́ ове́цъ твои́хъ всесожже́нія твоєго́, ни въ же́ртвахъ твои́хъ просла́вилъ мя́ єси́, не порабо́тихъ тя́ въ же́ртвахъ, ниже́ утружде́на сотвори́хъ тя́ въ Ліва́нѣ:

²⁴

не купи́лъ єси́ мнѣ́ на сребро́ ѳиміа́ма, ниже́ ту́ка тре́бъ твои́хъ возжела́хъ, но во грѣсѣ́хъ твои́хъ ста́лъ єси́ предо мно́ю и въ непра́вдахъ твои́хъ.

²⁵

А́зъ є́смь, а́зъ є́смь заглажда́яй беззако́нія твоя́ мене́ ра́ди и грѣхи́ твоя́, и не помяну́.

²⁶

Ты́ же помяни́, и да су́димся: глаго́ли ты́ беззако́нія твоя́ пре́жде, да оправди́шися.

²⁷

Отцы́ ва́ши пе́рвіи согрѣши́ша, и кня́зи ва́ши беззако́нноваша на мя́.

²⁸

И оскверни́ша кня́зи свята́я моя́, и да́хъ погуби́ти Іа́кова и Ізра́иля во укори́зну.