¹

Ны́нѣ же слы́ши, ра́бе мо́й Іа́кове, и Ізра́илю, єго́же избра́хъ.

²

Си́це глаго́летъ Госпо́дь Бо́гъ сотвори́вый тя́ и созда́вый тя́ изъ утро́бы: єще́ помо́жетъ ти́: не бо́йся, ра́бе мо́й Іа́кове, и возлю́бленный Ізра́илю, єго́же избра́хъ.

³

Я́ко а́зъ да́мъ во́ду въ жа́жду ходя́щымъ въ безво́днѣй, наложу́ Ду́хъ мо́й на сѣ́мя твоє́ и благослове́нія моя́ на ча́да твоя́,

⁴

и прозя́бнутъ а́ки трава́ посредѣ́ воды́ и я́ко ве́рба при водѣ́ теку́щей.

⁵

Се́й рече́тъ: Бо́жій є́смь: и се́й возопіє́тъ о и́мени Іа́ковли, и другі́й напи́шетъ руко́ю своє́ю: Бо́жій є́смь: и о и́мени Ізра́илевѣ возопіє́тъ.

⁶

Си́це глаго́летъ Бо́гъ Ца́рь Ізра́илевъ, и избавле́й єго́ Бо́гъ Савао́ѳъ: а́зъ пе́рвый и а́зъ по си́хъ, кромѣ́ мене́ нѣ́сть Бо́га:

⁷

кто́ я́коже а́зъ? да ста́нетъ и да призове́тъ, и да возвѣсти́тъ и да угото́витъ ми́, отне́лѣже сотвори́хъ человѣ́ка во вѣ́къ, и гряду́щая пре́жде не́же пріити́ и́мъ, да возвѣстя́тъ ва́мъ.

⁸

Не укрыва́йтеся, ниже́ заблужда́йте: не испе́рва ли внуши́сте, и возвѣсти́хъ ва́мъ? свидѣ́теліє вы́ єсте́, а́ще є́сть Бо́гъ ра́звѣ мене́.

⁹

И не послу́шаша тогда́ созида́ющіи, и вая́ющіи вси́ тще́тни, творя́щіи жела́нія своя́, я́же не упо́льзуютъ и́хъ:

¹⁰

но посра́мятся вси́ созида́ющіи бо́га и вая́ющіи вси́ неполе́зная.

¹¹

И вси́, отню́дуже бы́ша, изсхо́ша: и глусі́и от человѣ́къ да соберу́тся вси́ и да ста́нутъ вку́пѣ, и да посра́мятся и устыдя́тся вку́пѣ.

¹²

Я́ко наостри́ древодѣ́латель сѣ́чиво, тесло́ю содѣ́ла о́ноє, и све́рдломъ соста́ви є́, и дла́томъ издолбе́ є́, и содѣ́ла є́ крѣ́постію мы́шцы своєя́: и вза́лчетъ, и изнемо́жетъ, и не напіє́тся воды́.

¹³

И избра́въ древодѣ́ля дре́во, поста́ви є́ въ мѣ́ру, и кле́ємъ состро́и є́, и сотвори́ є́ а́ки о́бразъ му́жескъ и а́ки красоту́ человѣ́чу, поста́вити є́ въ дому́.

¹⁴

Посѣче́ дре́во въ дубра́вѣ, є́же насади́ Госпо́дь, со́сну, и до́ждь возрасти́,

¹⁵

да бу́детъ человѣ́комъ на жже́ніє: и взя́въ от него́, согрѣ́ся, и изже́гше я́, испеко́ша и́ми хлѣ́бы, изъ оста́вшаго же сотвори́ша бо́ги и покланя́ются и́мъ: сотвори́ є́ изва́янноє, и прекланя́єтся и́мъ.

¹⁶

По́лъ єго́ сожже́ огне́мъ, и по́лъ єго́ сожже́ на у́гліє, и испече́ въ ни́хъ хлѣ́бы, и на ни́хъ испече́ мя́со, и яде́, и насы́тися, и согрѣ́вся рече́: сла́дко мнѣ́, я́ко согрѣ́хся и ви́дѣхъ о́гнь.

¹⁷

Изъ оста́вшаго же сотвори́ бо́га изва́янна, прекланя́єтся єму́ и покланя́єтся, и мо́лится єму́ глаго́ля: изба́ви мя́, я́ко бо́гъ мо́й єси́ ты́.

¹⁸

Не увѣ́даша смы́слити, я́ко отемнѣ́ша о́чи и́хъ, є́же ви́дѣти и разумѣ́ти се́рдцемъ свои́мъ.

¹⁹

И не помы́сли въ души́ своє́й, ни увѣ́дѣ смышле́ніємъ, я́ко по́лъ єго́ сожже́ огне́мъ, и испече́ на у́глієхъ єго́ хлѣ́бы, и испе́къ мяса́ снѣде́, и оста́вшеє єго́ въ ме́рзость сотвори́, и покланя́ются єму́.

²⁰

Увѣ́ждь, я́ко пе́пелъ є́сть се́рдце и́хъ, и прельща́ются, и ни єди́нъ мо́жетъ души́ своєя́ изба́вити: ви́дите, не рцы́те, я́ко лжа́ въ десни́цѣ моє́й.

²¹

Помяни́ сія́, Іа́кове и Ізра́илю, я́ко ра́бъ мо́й єси́ ты́, сотвори́хъ тя́ раба́ моєго́, и ты́, Ізра́илю, не забыва́й мене́.

²²

Се́ бо, отъя́хъ я́ко о́блакъ беззако́нія твоя́ и я́ко примра́къ грѣхи́ твоя́: обрати́ся ко мнѣ́, и изба́влю тя́.

²³

Возвесели́теся, небеса́, я́ко поми́лова Бо́гъ Ізра́иля: воструби́те, основа́нія земна́я, возопі́йте, го́ры, весе́ліє, хо́лми и вся́ древеса́, я́же на ни́хъ: я́ко изба́ви Бо́гъ Іа́кова, и Ізра́иль просла́вится.

²⁴

Си́це глаго́летъ Госпо́дь избавля́яй тя́ и созда́вый тя́ от чре́ва: а́зъ Госпо́дь соверша́яй вся́, распростро́хъ не́бо єди́нъ и утверди́хъ зе́млю.

²⁵

Кто́ и́нъ разсы́плетъ зна́менія чревоволше́бниковъ и волшбы́ от се́рдца, отвраща́яй му́дрыя вспя́ть и совѣ́ты и́хъ обуя́яй,

²⁶

и уставля́я глаго́лъ раба́ своєго́, и совѣ́тъ вѣ́стниковъ свои́хъ и́стиненъ творя́й? глаго́ляй Ієрусали́му: насели́шися: и градо́мъ іуде́йскимъ: возградите́ся, и пусты́ни єго́ просія́ютъ,

²⁷

глаго́ляй бе́зднѣ: опустѣ́єши, и рѣ́ки твоя́ изсушу́,

²⁸

глаго́ляй ки́ру смы́слити, и вся́ во́ли моя́ сотвори́тъ: глаго́ляй Ієрусали́му: возгради́шися, и хра́мъ святы́й мо́й осную́.