¹

Сни́ди, ся́ди на земли́, дѣ́во, дщи́ Вавило́ня, вни́ди во тму́ {По ины́мъ: ся́ди на зе́млю.}, дщи́ Халде́йска, я́ко не приложи́ши ксему́ прозыва́тися мягка́ и ю́на.

²

Возми́ же́рновы, мели́ муку́, откры́й покрыва́ло твоє́, откры́й сѣди́ны, возсучи́ го́лени, прейди́ рѣ́ки:

³

откры́єтся сту́дъ тво́й, явя́тся укори́зны твоя́, пра́ведноє от тебе́ возму́, ктому́ не преда́мъ человѣ́комъ.

⁴

Рече́ изба́вивый тя́ Госпо́дь Савао́ѳъ, и́мя єму́ святы́й Ізра́илевъ:

⁵

ся́ди умиле́на, вни́ди во тму́, дщи́ Халде́йска, ксему́ не прозове́шися крѣ́пость ца́рства.

⁶

Разгнѣ́вахся на лю́ди моя́, оскверни́ла єси́ наслѣ́діє моє́: а́зъ вда́хъ я́ въ ру́ку твою́, ты́ же не дала́ и́мъ ми́лости, ста́рчій яре́мъ отягчи́ла єси́ зѣло́

⁷

и рекла́ єси́: въ вѣ́къ бу́ду влады́чица: не помы́слила єси́ си́хъ въ се́рдцы твоє́мъ, ниже́ помяну́ла єси́ послѣ́днихъ:

⁸

ны́нѣ же слы́ши сіє́, ю́ная, сѣдя́щая, упова́ющая, глаго́лющая въ се́рдцы своє́мъ: а́зъ є́смь, и нѣ́сть ины́я, не ся́ду вдово́ю и не позна́ю сиротства́.

⁹

Ны́нѣ же пріи́дутъ на тя́ два́ сія́ внеза́пу во єди́нъ де́нь, безча́діє и вдовство́ внеза́пу пріи́детъ на тя́, въ волше́бствѣ твоє́мъ и въ крѣ́пости волхво́въ твои́хъ зѣло́,

¹⁰

въ надѣ́яніи зло́бы твоєя́: ты́ бо рекла́ єси́: а́зъ є́смь, и нѣ́сть ины́я: увѣ́ждь, я́ко смышле́ніє си́хъ и блуже́ніє твоє́ бу́детъ тебѣ́ сра́мъ: и рекла́ єси́ се́рдцемъ свои́мъ: а́зъ є́смь, и нѣ́сть ины́я.

¹¹

И пріи́детъ на тя́ па́губа, и не увѣ́си, про́пасть, и впаде́ши въ ню́: и пріи́детъ на тя́ печа́ль, и не возмо́жеши чиста́ бы́ти: и пріи́детъ на тя́ внеза́пу па́губа, и не увѣ́си.

¹²

Ста́ни ны́нѣ се́ волхвы́ твои́ми и со мно́гими ча́ры твои́ми, и́мже научи́лася єси́ изъ ю́ности твоєя́, а́ще возмо́гутъ ти́ помощи́.

¹³

Утруди́лася єси́ въ совѣ́тѣхъ твои́хъ: да ста́нутъ ны́нѣ и спасу́тъ тя́ звѣздоче́тцы небесе́, смотря́ющіи звѣ́здъ, да возвѣстя́тъ ти́, что́ и́мать на тя́ пріити́.

¹⁴

Се́, вси́ я́ко хвра́стіє огне́мъ погоря́тъ и не изъи́мутъ души́ своєя́ изъ пла́мене, поне́же и́маши у́гліє о́гненноє, ся́ди на ни́хъ.

¹⁵

Сі́и бу́дутъ тебѣ́ по́мощь: труди́лася єси́ въ преложе́ніи от ю́ности, человѣ́къ са́мъ въ себѣ́ прельсти́ся, тебѣ́ же не бу́детъ спасе́нія.