Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
Услы́шите сія́, до́ме Іа́ковль, прозва́нніи и́менемъ Ізра́илевымъ и изше́дшіи изъ Іу́ды, клену́щіися и́менемъ Го́спода Бо́га Ізра́илева, помина́ющіи не со и́стиною, ниже́ со пра́вдою,
2
и придержа́щіися и́мени гра́да свята́го, и о Бо́зѣ Ізра́илевѣ подтвержда́ющіися: Госпо́дь Савао́ѳъ и́мя єму́.
3
Пре́ждняя єще́ возвѣсти́хъ, и изъ у́стъ мои́хъ изыдо́ша, и слы́шано бы́сть: внеза́пу сотвори́хъ, и на́йде.
4
Вѣ́мъ, я́ко же́стокъ єси́, и жи́ла желѣ́зна вы́я твоя́, и чело́ твоє́ мѣ́дяно.
5
И возвѣсти́хъ ти́, я́же дре́вле, пре́жде не́же пріити́ на тя́: слы́шана тебѣ́ сотвори́хъ, да не когда́ рече́ши, я́ко і́доли мнѣ́ сія́ сотвори́ша, и не рцы́, я́ко изва́янная и слія́нная заповѣ́даша мнѣ́.
6
Слы́шасте вся́, и вы́ не разумѣ́сте: но и слы́шана тебѣ́ сотвори́хъ но́вая отны́нѣ, я́же и́мутъ бы́ти:
7
и не ре́клъ єси́: ны́нѣ быва́ютъ, а не пре́жде, и не въ пре́жднія дни́ слы́шалъ єси́ сія́: не рцы́: є́й, вѣ́мъ сія́.
8
Не вѣ́дѣлъ єси́, ниже́ разумѣ́лъ єси́, ниже́ испе́рва отверзо́хъ ушеса́ твоя́: вѣ́дѣхъ бо, я́ко отверга́я отри́неши и беззако́нникъ єще́ от чре́ва прозове́шися.
9
И́мене моєго́ ра́ди покажу́ ти я́рость мою́, и сла́вная моя́ наведу́ на тя́, да не потреблю́ тебе́.
10
Се́, прода́хъ тя́ не сребра́ ра́ди: изъя́хъ же тя́ изъ пе́щи убо́жества.
11
Мене́ ра́ди сотворю́ ти́, я́ко моє́ и́мя оскверня́єтся, и сла́вы моєя́ ино́му не да́мъ.
12
Послу́шай мене́, Іа́кове и Ізра́илю, єго́же а́зъ призыва́ю: а́зъ є́смь пе́рвый и а́зъ є́смь во вѣ́къ.
13
И рука́ моя́ основа́ зе́млю, и десни́ца моя́ утверди́ не́бо: призову́ я́, и ста́нетъ вку́пѣ,
14
и соберу́тся вси́ и услы́шатъ: кто́ и́мъ возвѣсти́ сія́? любя́ тя́ сотвори́хъ во́лю твою́ надъ Вавило́номъ, є́же отъя́ти пле́мя Халде́йско.
15
А́зъ глаго́лахъ, а́зъ призва́хъ, приведо́хъ и́, и благопоспѣши́тъ пу́ть єго́.
16
Приступи́те ко мнѣ́ и слы́шите сія́, испе́рва не о́тай глаго́лахъ: єгда́ быва́ху, та́мо бѣ́хъ, и ны́нѣ Госпо́дь Госпо́дь посла́ мя и Ду́хъ єго́.
17
Та́ко глаго́летъ Госпо́дь, изба́вивый тя́, святы́й Ізра́илевъ: а́зъ є́смь Госпо́дь Бо́гъ тво́й, научи́хъ тя́, є́же обрѣсти́ тебѣ́ пу́ть, по нему́же по́йдеши.
18
И а́ще бы єси́ послу́шалъ за́повѣдій мои́хъ, то́ бы́лъ бы у́бо а́ки рѣка́ ми́ръ тво́й, и пра́вда твоя́ я́ко волна́ морска́я,
19
и бы́ло бы я́ко песо́къ сѣ́мя твоє́, и исча́дія чре́ва твоєго́ я́ко пе́рсть земли́: ниже́ ны́нѣ потреби́шися, ниже́ поги́бнетъ и́мя твоє́ предо мно́ю.
20
Изы́ди от Вавило́на, бѣжа́й от халде́євъ: гла́съ ра́дости возвѣсти́те, и да слы́шано бу́детъ сіє́, возвѣсти́те да́же до послѣ́днихъ земли́, глаго́лите: изба́ви Госпо́дь раба́ своєго́ Іа́кова.
21
И а́ще вжа́ждутъ, пусты́нею проведе́тъ и́хъ и во́ду изъ ка́мене изведе́тъ и́мъ: разся́дется ка́мень, и потече́тъ вода́, и испію́тъ лю́діє мои́.
22
Нѣ́сть ра́доватися нечести́вымъ, глаго́летъ Госпо́дь.