¹

Го́споди, кто́ вѣ́рова слу́ху на́шему, и мы́шца Госпо́дня кому́ откры́ся?

²

Возвѣсти́хомъ, я́ко отроча́ предъ ни́мъ я́ко ко́рень въ земли́ жа́ждущей, нѣ́сть ви́да єму́, ниже́ сла́вы: и ви́дѣхомъ єго́, и не имя́ше ви́да, ни добро́ты:

³

но ви́дъ єго́ безче́стенъ, ума́ленъ па́че всѣ́хъ сыно́въ человѣ́ческихъ: человѣ́къ въ я́звѣ сы́й и вѣ́дый терпѣ́ти болѣ́знь, я́ко отврати́ся лице́ єго́, безче́стно бы́сть, и не вмѣни́ся.

⁴

Се́й грѣхи́ на́шя но́ситъ и о на́съ болѣ́знуєтъ, и мы́ вмѣни́хомъ єго́ бы́ти въ трудѣ́ и въ я́звѣ от Бо́га и во озлобле́ніи.

⁵

То́й же я́звенъ бы́сть за грѣхи́ на́шя и му́ченъ бы́сть за беззако́нія на́ша, наказа́ніє ми́ра на́шего на не́мъ, я́звою єго́ мы́ исцѣлѣ́хомъ.

⁶

Вси́ я́ко о́вцы заблуди́хомъ: человѣ́къ от пути́ своєго́ заблуди́, и Госпо́дь предаде́ єго́ грѣ́хъ ра́ди на́шихъ.

⁷

И то́й, зане́ озло́бленъ бы́сть, не отверза́єтъ у́стъ свои́хъ: я́ко овча́ на заколе́ніє веде́ся, и я́ко а́гнецъ предъ стригу́щимъ єго́ безгла́сенъ, та́ко не отверза́єтъ у́стъ свои́хъ.

⁸

Во смире́ніи єго́ су́дъ єго́ взя́тся: ро́дъ же єго́ кто́ исповѣ́сть? я́ко взе́млется от земли́ живо́тъ єго́, ра́ди беззако́ній люді́й мои́хъ веде́ся на сме́рть.

⁹

И да́мъ лука́выя вмѣ́сто погребе́нія єго́ и бога́тыя вмѣ́сто сме́рти єго́: я́ко беззако́нія не сотвори́, ниже́ обрѣ́теся ле́сть во устѣ́хъ єго́.

¹⁰

И Госпо́дь хо́щетъ очи́стити єго́ от я́звы: а́ще да́стся о грѣсѣ́, душа́ ва́ша у́зритъ сѣ́мя долгоживо́тноє.

¹¹

И хо́щетъ Госпо́дь руко́ю своє́ю отъя́ти болѣ́знь от души́ єго́, яви́ти єму́ свѣ́тъ и созда́ти ра́зумомъ, оправда́ти пра́веднаго бла́го служа́ща мно́гимъ, и грѣхи́ и́хъ то́й понесе́тъ.

¹²

Сего́ ра́ди то́й наслѣ́дитъ мно́гихъ и крѣ́пкихъ раздѣли́тъ коры́сти, зане́ предана́ бы́сть на сме́рть душа́ єго́, и со беззако́нными вмѣни́ся, и то́й грѣхи́ мно́гихъ вознесе́ и за беззако́нія и́хъ пре́данъ бы́сть.