¹

Сія́ глаго́летъ Госпо́дь: сохрани́те су́дъ и сотвори́те пра́вду, прибли́жися бо спасе́ніє моє́ пріити́ и ми́лость моя́ откры́тися.

²

Блаже́нъ му́жъ творя́й сія́, и человѣ́къ держа́йся и́хъ, и храня́й суббо́ты не оскверня́ти, и блюды́й ру́цѣ свои́ не твори́ти непра́вды.

³

Да не глаго́летъ иноплеме́нникъ приложи́выйся ко Го́сподеви: єда́ отлучи́тъ мя́ Госпо́дь от люді́й свои́хъ? и да не глаго́летъ ка́женикъ, я́ко а́зъ є́смь дре́во су́хо.

⁴

Сія́ глаго́летъ Госпо́дь ка́женикомъ: єли́цы сохраня́тъ суббо́ты моя́ и изберу́тъ, я́же а́зъ хощу́, и содержа́тъ завѣ́тъ мо́й,

⁵

да́мъ и́мъ въ дому́ моє́мъ и во огра́дѣ моє́й мѣ́сто имени́то, лу́чшеє от сыно́въ и дще́рей, и́мя вѣ́чно да́мъ и́мъ, и не оскудѣ́єтъ:

⁶

и иноплеме́нникомъ приложи́вшымся Го́сподеви рабо́тати єму́ и люби́ти и́мя Госпо́дне, є́же бы́ти єму́ въ рабы́ и рабы́ни, и вся́ снабдя́щыя суббо́ты моя́ не оскверня́ти и держа́щыя завѣ́тъ мо́й,

⁷

введу́ я́ въ го́ру святу́ю мою́ и возвеселю́ я́ въ дому́ моли́твы моєя́: всесожже́нія и́хъ и же́ртвы и́хъ бу́дутъ прія́тны на тре́бницѣ моє́мъ: до́мъ бо мо́й до́мъ моли́твы нарече́тся всѣ́мъ язы́комъ,

⁸

глаго́летъ Госпо́дь, собира́яй разсѣ́яныя Ізра́илевы, я́ко соберу́ къ нему́ собо́ръ.

⁹

Вси́ звѣ́ріє ди́віи, пріиди́те, яди́те, вси́ звѣ́ріє дубра́вніи.

¹⁰

Ви́дите, я́ко вси́ ослѣпо́ша, не разумѣ́ша смы́слити, вси́ пси́ нѣмі́и не возмо́гутъ ла́яти, ви́дяще сны́ на ло́жи, лю́бяще дрема́ти,

¹¹

и пси́ безсту́дніи душе́ю, не вѣ́дяще сы́тости: и су́ть лука́ви, не вѣ́дяще смы́сла, вси́ путе́мъ свои́мъ послѣ́доваша, кі́йждо уклони́шася въ лихои́мство своє́, от пе́рваго и до послѣ́дняго.

¹²

Пріиди́те, да во́змемъ віно́ и напо́лнимся пія́нства, и бу́детъ я́ко дне́сь, та́ко и зау́тра, и мно́го мно́жає.