¹

Ду́хъ Госпо́день на Мнѣ́, єго́же ра́ди пома́за Мя́, благовѣсти́ти ни́щымъ посла́ Мя, исцѣли́ти сокруше́нныя се́рдцемъ, проповѣ́дати плѣ́нникомъ отпуще́ніє и слѣпы́мъ прозрѣ́ніє,

²

нарещи́ лѣ́то Госпо́дне прія́тно и де́нь воздая́нія, утѣ́шити вся́ пла́чущыя,

³

да́ти пла́чущымъ Сіо́на сла́ву вмѣ́сто пе́пела, пома́заніє весе́лія пла́чущымъ, украше́ніє сла́вы вмѣ́сто ду́ха уны́нія: и нареку́тся ро́дове пра́вды, насажде́ніє Госпо́дне во сла́ву.

⁴

И сози́ждутъ пусты́ни вѣ́чныя, запустѣ́вшыя пре́жде воздви́гнутъ: и обновя́тъ гра́ды пусты́я, опустоше́нныя въ ро́ды.

⁵

И пріи́дутъ иноро́дніи, пасу́щіи о́вцы твоя́, и иноплеме́нницы ора́теліє и віногра́даріє ва́ши:

⁶

вы́ же свяще́нницы Госпо́дни нарече́теся, служи́теліє Бо́га ва́шего, рече́тся ва́мъ: крѣ́пость язы́къ снѣ́сте и въ бога́тствѣ и́хъ чу́дни бу́дете.

⁷

Си́це зе́млю свою́ втори́цею наслѣ́дятъ, и весе́ліє вѣ́чноє надъ главо́ю и́хъ.

⁸

А́зъ бо є́смь Госпо́дь любя́й пра́вду и ненави́дяй грабле́нія от непра́вды: и да́мъ тру́дъ и́хъ пра́ведникомъ и завѣ́тъ вѣ́ченъ завѣща́ю и́мъ.

⁹

И позна́єтся во язы́цѣхъ сѣ́мя и́хъ, и вну́цы и́хъ посредѣ́ люді́й: вся́къ ви́дяй я́ позна́єтъ я́, я́ко сі́и су́ть сѣ́мя благослове́но от Бо́га, и ра́достію возра́дуются о Го́сподѣ.

¹⁰

Да возра́дуєтся душа́ моя́ о Го́сподѣ: облече́ бо мя́ въ ри́зу спасе́нія и оде́ждею весе́лія (одѣ́я мя́): я́ко на жениха́ возложи́ на мя́ вѣне́цъ, и я́ко невѣ́сту украси́ мя красото́ю.

¹¹

И я́ко земля́ растя́щая цвѣ́тъ сво́й, и я́ко вертогра́дъ сѣ́мена своя́ прозяба́єтъ: та́ко возрасти́тъ Госпо́дь Госпо́дь пра́вду и весе́ліє предъ всѣ́ми язы́ки.