¹

Лѣ́та вторагона́десять ца́рства Навуходоно́сора, и́же ца́рствова надъ Ассирі́аны въ Ніневі́і гра́дѣ вели́цѣмъ, во дни́ Арфакса́да, и́же ца́рствова надъ ми́дяны во єквата́нѣхъ

¹

Лѣ́та вторагѡна́десѧть ца́рства навꙋходоно́сора, и҆́же ца́рствова над̾ а҆ссѷрі̑аны въ нїнеѵі́и гра́дѣ вели́цѣмъ, во дни̑ а҆рфаѯа́да, и҆́же ца́рствова над̾ ми̑дѧны во є҆квата́нѣхъ

²

и созда́ во єквата́нѣхъ о́крестъ стѣ́ны от ка́меней те́саныхъ въ широту́ ла́ктей тріє́хъ, а въ долготу́ ла́ктей шести́, и сотвори́ высоту́ стѣны́ ла́ктей седми́десяти, а широту́ єя́ ла́ктей пяти́десяти:

²

и҆ созда̀ во є҆квата́нѣхъ ѡ҆́крестъ стѣ́ны ѿ ка́меней те́саныхъ въ широтꙋ̀ ла́ктей трїе́хъ, а҆ въ долготꙋ̀ ла́ктей шестѝ, и҆ сотворѝ высотꙋ̀ стѣны̀ ла́ктей седми́десѧти, а҆ широтꙋ̀ є҆ѧ̀ ла́ктей пѧти́десѧти:

³

и столпы́ єя́ поста́ви на вратѣ́хъ єго́ ла́ктей сто́, и широту́ и́хъ основа́ на ла́ктей шестьдеся́тъ:

³

и҆ столпы̀ є҆ѧ̀ поста́ви на вратѣ́хъ є҆гѡ̀ ла́ктей сто̀, и҆ широтꙋ̀ и҆́хъ ѡ҆снова̀ на ла́ктей шетьдесѧ́тъ:

⁴

и сотвори́ врата́ єго́ врата́ воздви́жена въ высоту́ ла́ктей седмьдесятъ, а широту́ и́хъ ла́ктей четы́редесять ко исхо́ду си́лъ си́льныхъ єго́ и устроє́ніємъ пѣшце́въ єго́:

⁴

и҆ сотворѝ врата̀ є҆гѡ̀ врата̀ воздви́жєна въ высотꙋ̀ ла́ктей седмьдесѧтъ, а҆ широтꙋ̀ и҆́хъ ла́ктей четы́редесѧть ко и҆схо́дꙋ си́лъ си́льныхъ є҆гѡ̀ и҆ оу҆строе́нїємъ пѣшцє́въ є҆гѡ̀:

⁵

и сотвори́ бра́нь во дни́ о́ны ца́рь Навуходоно́соръ на царя́ Арфакса́да на по́ли вели́цѣмъ, є́же є́сть въ предѣ́лѣхъ Рага́влихъ.

⁵

и҆ сотворѝ бра́нь во дни̑ ѡ҆́ны ца́рь навꙋходоно́соръ на царѧ̀ а҆рфаѯа́да на по́ли вели́цѣмъ, є҆́же є҆́сть въ предѣ́лѣхъ рага́ѵлихъ.

⁶

И собра́шася къ нему́ вси́ живу́щіи въ го́рней и вси́ обита́ющіи при Євфра́тѣ и Ті́грѣ и ида́спи и на по́ли Аріо́ха царя́ Єлимео́нска, и собра́шася язы́цы мно́зи зѣло́ на ополче́ніє сыно́въ хелеу́дихъ.

⁶

И҆ собра́шасѧ къ немꙋ̀ всѝ живꙋ́щїи въ го́рней и҆ всѝ ѡ҆бита́ющїи при є҆ѵфра́тѣ и҆ ті́грѣ и҆ ѵ҆да́спи и҆ на по́ли а҆рїѡ́ха царѧ̀ є҆лѷмеѡ́нска, и҆ собра́шасѧ ꙗ҆зы́цы мно́зи ѕѣлѡ̀ на ѡ҆полче́нїе сынѡ́въ хелеꙋ́дихъ.

⁷

И посла́ Навуходоно́соръ ца́рь Ассирі́йскій ко всѣ́мъ обита́ющымъ въ персі́дѣ и ко всѣ́мъ живу́щымъ къ за́падомъ, обита́ющымъ въ кілікі́и и дама́сцѣ, и Ліва́нѣ и антіліва́нѣ, и ко всѣ́мъ живу́щымъ на лицы́ примо́рія,

⁷

И҆ посла̀ навꙋходоно́соръ ца́рь а҆ссѷрі́йскїй ко всѣ̑мъ ѡ҆бита́ющымъ въ персі́дѣ и҆ ко всѣ̑мъ живꙋ́щымъ къ за́падѡмъ, ѡ҆бита́ющымъ въ кїлїкі́и и҆ дама́сцѣ, и҆ лїва́нѣ и҆ а҆нтїлїва́нѣ, и҆ ко всѣ̑мъ живꙋ́щымъ на лицы̀ примо́рїѧ,

⁸

и къ су́щымъ во язы́цѣхъ карми́ла и въ Галаа́дѣ, и въ вы́шней Галіле́и и на вели́цѣмъ по́ли єсдрило́на,

⁸

и҆ къ сꙋ́щымъ во ꙗ҆зы́цѣхъ карми́ла и҆ въ галаа́дѣ, и҆ въ вы́шней галїле́и и҆ на вели́цѣмъ по́ли є҆сдрилѡ́на,

⁹

и ко всѣ́мъ су́щымъ въ самарі́и и градѣ́хъ єя́, и объ о́нъ по́лъ Іорда́на да́же до Ієрусали́ма и вета́ни, и хе́лла и Ка́диса, и рѣки́ Єги́петскія и тафны́, и Рамесси́ и всея́ земли́ Гесе́мскія,

⁹

и҆ ко всѣ̑мъ сꙋ́щымъ въ самарі́и и҆ градѣ́хъ є҆ѧ̀, и҆ ѡ҆б̾ ѡ҆́нъ по́лъ і҆ѻрда́на да́же до і҆ерⷭ҇ли́ма и҆ вета́ни, и҆ хе́лла и҆ ка́диса, и҆ рѣкѝ є҆гѵ́пєтскїѧ и҆ тафны̀, и҆ рамессѝ и҆ всеѧ̀ землѝ гесе́мскїѧ,

¹⁰

до́ндеже пріити́ вы́ше та́ниса и ме́мфиса, и ко всѣ́мъ обита́ющымъ во Єги́птѣ, до́ндеже пріити́ на предѣ́лы єѳіо́піи.

¹⁰

до́ндеже прїитѝ вы́ше та́ниса и҆ ме́мфиса, и҆ ко всѣ̑мъ ѡ҆бита́ющымъ во є҆гѵ́птѣ, до́ндеже прїитѝ на предѣ́лы є҆Ѳїо́пїи.

¹¹

И ни во что́ вмѣни́ша вси́ обита́ющіи по все́й земли́ сло́во Навуходоно́сора царя́ Ассирі́йска, и не снидо́шася къ нему́ на бра́нь, поне́же не боя́шася єго́, но бы́сть предъ ни́ми а́ки му́жъ єди́нъ: и возврати́ша посла́нниковъ єго́ тщи́хъ со безче́стіємъ от лица́ своєго́.

¹¹

И҆ ни во что̀ вмѣни́ша всѝ ѡ҆бита́ющїи по все́й землѝ сло́во навꙋходоно́сора царѧ̀ а҆ссѷрі́йска, и҆ не снидо́шасѧ къ немꙋ̀ на бра́нь, поне́же не боѧ́шасѧ є҆гѡ̀, но бы́сть пред̾ ни́ми а҆́ки мꙋ́жъ є҆ди́нъ: и҆ возврати́ша посла́нникѡвъ є҆гѡ̀ тщи́хъ со безче́стїемъ ѿ лица̀ своегѡ̀.

¹²

И разъяри́ся Навуходоно́соръ на вся́ку зе́млю сію́ зѣло́, и кля́тся престо́ломъ и ца́рствомъ свои́мъ вся́чески отмсти́ти всѣ́мъ предѣ́ломъ кілікі́и и Дама́ска и сирі́и, погуби́ти мече́мъ свои́мъ и вся́ живу́щыя въ земли́ Моа́вли и сы́ны Аммони, и всю́ Іуде́ю и всѣ́хъ су́щихъ во Єги́птѣ, до́ндеже пріити́ на предѣ́лы дву́хъ мо́рь.

¹²

И҆ раз̾ѧри́сѧ навꙋходоно́соръ на всѧ́кꙋ зе́млю сїю̀ ѕѣлѡ̀, и҆ клѧ́тсѧ престо́ломъ и҆ ца́рствомъ свои́мъ всѧ́чески ѿмсти́ти всѣ̑мъ предѣ́лѡмъ кїлїкі́и и҆ дама́ска и҆ сѷрі́и, погꙋби́ти мече́мъ свои́мъ и҆ всѧ̑ живꙋ́щыѧ въ землѝ мѡа́вли и҆ сы́ны а҆ммѡ҆ни, и҆ всю̀ і҆ꙋде́ю и҆ всѣ́хъ сꙋ́щихъ во є҆гѵ́птѣ, до́идеже прїитѝ на предѣ́лы двꙋ́хъ мо́рь.

¹³

И ополчи́ся въ си́лѣ своє́й на Арфакса́да царя́ въ лѣ́то седмоєна́десять, и одолѣ́ на бра́ни своє́й, и побѣди́ всю́ си́лу Арфакса́дову и всю́ ко́нницу єго́ и вся́ колесни́цы єго́,

¹³

И҆ ѡ҆полчи́сѧ въ си́лѣ свое́й на а҆рфаѯа́да царѧ̀ въ лѣ́то седмоена́десѧть, и҆ ѡ҆долѣ̀ на бра́ни свое́й, и҆ побѣдѝ всю̀ си́лꙋ а҆рфаѯа́довꙋ и҆ всю̀ ко́нницꙋ є҆гѡ̀ и҆ всѧ̑ колєсни́цы є҆гѡ̀,

¹⁴

и возоблада́ гра́дами єго́: и пріи́де да́же до єквата́нъ, и одержа́ столпы́, и плѣни́ сто́гны єго́, и красоту́ єго́ положи́ во уничиже́ніє єго́:

¹⁴

и҆ воз̾ѡблада̀ гра́дами є҆гѡ̀: и҆ прїи́де да́же до є҆квата́нъ, и҆ ѡ҆держа̀ столпы̀, и҆ плѣнѝ стѡ́гны є҆гѡ̀, и҆ красотꙋ̀ є҆гѡ̀ положѝ во оу҆ничиже́нїе є҆гѡ̀:

¹⁵

и взя́ Арфакса́да на гора́хъ Рага́влихъ, и избоде́ єго́ су́лицами свои́ми, и истреби́ єго́ да́же въ де́нь о́ный:

¹⁵

и҆ взѧ̀ а҆рфаѯа́да на гора́хъ рага́влихъ, и҆ и҆збодѐ є҆го̀ сꙋ́лицами свои́ми, и҆ и҆стребѝ є҆го̀ да́же въ де́нь ѻ҆́ный:

¹⁶

и возврати́ся съ ни́ми въ Ніневі́ю са́мъ и все́ присовокупле́ніє єго́, мно́жество муже́й ра́тныхъ мно́гоє зѣло́, и бѣ́ та́мо почива́я и пи́ршествуя са́мъ и си́ла єго́ дні́й сто́ два́десять.

¹⁶

и҆ возврати́сѧ съ ни́ми въ нїнеѵі́ю са́мъ и҆ всѐ присовокꙋпле́нїе є҆гѡ̀, мно́жество мꙋже́й ра́тныхъ мно́гое ѕѣлѡ̀, и҆ бѣ̀ та́мѡ почива́ѧ и҆ пи́ршествꙋѧ са́мъ и҆ си́ла є҆гѡ̀ дні́й сто̀ два́десѧть.