¹

И бы́сть я́ко преста́ вопію́щи ко Бо́гу Ізра́илеву и сконча́ вся́ глаго́лы сія́,

¹

И҆ бꙋ́сть ꙗ҆́кѡ преста̀ вопїю́щи ко бг҃ꙋ і҆и҃левꙋ и҆ сконча̀ всѧ̑ глаго́лы сїѧ̑,

²

и воста́ от поверже́нія и призва́ рабы́ню свою́ и сни́де въ до́мъ, въ не́мже пребыва́ше во дни́ суббо́тнія и въ пра́здники своя́,

²

и҆ воста̀ ѿ поверже́нїѧ и҆ призва̀ рабы́ню свою̀ и҆ сни́де въ до́мъ, въ не́мже пребыва́ше во дни̑ сꙋббѡ̑тнїѧ и҆ въ пра́здники своѧ̑,

³

и сложи́ вре́тище, и́мже одѣва́шеся, и совлече́ ри́зы вдовства́ своєго́, и обмы́ тѣ́ло водо́ю и пома́зася ми́ромъ бога́тымъ, и разчеса́ власы́ главы́ своєя́ и возложи́ увя́сло на ню́ и облече́ся въ ри́зы весе́лія своєго́, и́миже одѣва́шеся во дни́ живота́ му́жа своєго́ Манассі́и:

³

и҆ сложѝ вре́тище, и҆́мже ѡ҆дѣва́шесѧ, и҆ совлечѐ ри̑зы вдовства̀ своегѡ̀, и҆ ѡ҆бмы̀ тѣ́ло водо́ю и҆ пома́засѧ мѵ́ромъ бога́тымъ, и҆ разчеса̀ власы̀ главы̀ своеѧ̀ и҆ возложѝ оу҆вѧ́сло на ню̀ и҆ ѡ҆блече́сѧ въ ри̑зы весе́лїѧ своегѡ̀, и҆́миже ѡ҆дѣва́шесѧ во дни̑ живота̀ мꙋ́жа своегѡ̀ манассі́и:

⁴

и взя́ санда́лія на но́ги своя́, и обложи́ мони́ста и цѣ́пки, и пе́рстни и усеря́зи и все́ украше́ніє своє́, и украси́ся зѣло́ на прельще́ніє оче́съ му́жескихъ, єли́цы а́ще уви́дятъ ю́:

⁴

и҆ взѧ̀ санда̑лїѧ на но́ги своѧ̑, и҆ ѡ҆бложѝ мони̑ста и҆ цѣ̑пки, и҆ пє́рстни и҆ оу҆серѧ̑зи и҆ всѐ оу҆краше́нме своѐ, и҆ оу҆краси́сѧ ѕѣлѡ̀ на прельще́нме ѻ҆че́съ мꙋ́жескихъ, є҆ли́цы а҆́ще оу҆ви́дѧтъ ю҆̀:

⁵

и даде́ рабы́ни своє́й оплете́нъ сосу́дъ віна́ и чва́нецъ єле́а, и мѣше́цъ напо́лни муко́ю и плетени́цы смо́квами и хлѣ́бы чи́стыми, и обви́ вся́ сосу́ды своя́, и возложи́ на ню́.

⁵

и҆ дадѐ рабы́ни свое́й ѡ҆плете́нъ сосꙋ́дъ вїна̀ и҆ чва́нецъ є҆ле́а, и҆ мѣше́цъ напо́лни мꙋко́ю и҆ плетени̑цы смо́квами и҆ хлѣ̑бы чи́стыми, и҆ ѡ҆бвѝ всѧ̑ сосꙋ́ды своѧ̑, и҆ возложѝ на ню̀.

⁶

И изыдо́стѣ ко врато́мъ гра́да ветилу́и и обрѣто́стѣ стоя́щихъ при ни́хъ Озі́ю и ста́рцевъ гра́да хаврі́на и Хармі́на.

⁶

И҆ и҆зыдо́стѣ ко вратѡ́мъ гра́да ветѷлꙋ́и и҆ ѡ҆брѣто́стѣ стоѧ́щихъ при ни́хъ ѻ҆зі́ю и҆ ста́рцєвъ гра́да хаврі́на и҆ хармі́на.

⁷

Я́коже уви́дѣша ю́, и бѣ́ измѣне́но лице́ єя́, и ри́зу премѣне́нну єя́, и удиви́шася о красотѣ́ єя́ попремно́гу зѣло́ и рѣ́ша є́й:

⁷

Ꙗ҆́коже оу҆ви́дѣша ю҆̀, и҆ бѣ̀ и҆змѣне́но лицѐ є҆ѧ̀, и҆ ри́зꙋ премѣне́ннꙋ є҆ѧ̀, и҆ оу҆диви́шасѧ ѡ҆ красотѣ̀ є҆ѧ̀ попремно́гꙋ ѕѣлѡ̀ и҆ рѣ́ша є҆́й:

⁸

Бо́гъ, Бо́гъ оте́цъ на́шихъ да да́стъ тя́ въ благода́ть и соверши́тъ начина́нія твоя́ въ вели́чіє сыно́въ Ізра́илевыхъ и возвыше́ніє Ієрусали́ма. И поклони́ся Бо́гу

⁸

бг҃ъ, бг҃ъ ѻ҆тє́цъ на́шихъ да да́стъ тѧ̀ въ благода́ть и҆ соверши́тъ начина̑нїѧ твоѧ̑ въ вели́чїе сынѡ́въ і҆и҃левыхъ и҆ возвыше́нїе і҆ерⷭ҇ли́ма. И҆ поклони́сѧ бг҃ꙋ

⁹

и рече́ къ ни́мъ: повели́те отве́рсти ми́ врата́ гра́да, и изы́ду ко соверше́нію слове́съ, и́хже глаго́ласте со мно́ю. И повелѣ́ша ю́ношамъ отве́рсти єй, я́коже глаго́лаше.

⁹

и҆ речѐ къ ни̑мъ: повели́те ѿве́рсти мѝ врата̀ гра́да, и҆ и҆зы́дꙋ ко соверше́нїю слове́съ, и҆̀хже глаго́ласте со мно́ю. И҆ повелѣ́ша ю҆́ношамъ ѿве́рсти є҆й, ꙗ҆́коже глаго́лаше.

¹⁰

И сотвори́ша та́ко. И изы́де Іуді́ѳъ сама́ и рабы́ня єя́ съ не́ю: назира́ху же ю́ му́жіє гра́да, до́ндеже сни́де съ горы́, до́ндеже пре́йде юдо́ль, и ктому́ не уви́дѣша єя́.

¹⁰

И҆ сотвори́ша та́кѡ. И҆ и҆зы́де і҆ꙋді́ѳъ сама̀ и҆ рабы́нѧ є҆ѧ̀ съ не́ю: назира́хꙋ же ю҆̀ мꙋ́жїе гра́да, до́ндеже сни́де съ горы̀, до́ндеже пре́йде ю҆до́ль, и҆ ктомꙋ̀ не оу҆ви́дѣша є҆ѧ̀.

¹¹

И идя́стѣ юдо́лію пря́мо. И срѣ́те ю́ пе́рвая стра́жа Ассирі́йская,

¹¹

И҆ и҆дѧ́стѣ ю҆до́лїю прѧ́мѡ. И҆ срѣ́те ю҆̀ пе́рваѧ стра́жа а҆ссѷрі́йскаѧ,

¹²

и взя́ша ю́ и вопроси́ша: от ко́ихъ єси́? и отку́ду гряде́ши? и ка́мо и́деши? И рече́: дщи́ є́смь Євре́овъ и убѣга́ю от лица́ и́хъ, я́ко и́мутъ пре́дани бы́ти ва́мъ на поглоще́ніє:

¹²

и҆ взѧ́ша ю҆̀ и҆ вопроси́ша: ѿ ко́ихъ є҆сѝ; и҆ ѿкꙋ́дꙋ грѧде́ши; и҆ ка́мѡ и҆́деши; И҆ речѐ: дщѝ є҆́смь є҆вре́ѡвъ и҆ оу҆бѣга́ю ѿ лица̀ и҆́хъ, ꙗ҆́кѡ и҆́мꙋтъ пре́дани бы́ти ва́мъ на поглоще́нїе:

¹³

и а́зъ гряду́ предъ лице́ Олофе́рна вождонача́лника си́лы ва́шея, є́же возвѣсти́ти глаго́лы и́стины, и покажу́ предъ лице́мъ єго́ пу́ть, по нему́же по́йдетъ и возоблада́єтъ все́ю го́рнею, и не поги́бнетъ от муже́й єго́ пло́ть єди́на, ниже́ ду́хъ жи́зни.

¹³

и҆ а҆́зъ грѧдꙋ̀ пред̾ лицѐ ѻ҆лофе́рна вождонача́лника си́лы ва́шеѧ, є҆́же возвѣсти́ти глаго́лы и҆́стины, и҆ покажꙋ̀ пред̾ лице́мъ є҆гѡ̀ пꙋ́ть, по немꙋ́же по́йдетъ и҆ воз̾ѡблада́етъ все́ю го́рнею, и҆ не поги́бнетъ ѿ мꙋже́й є҆гѡ̀ пло́ть є҆ди́на,нижѐ дꙋ́хъ жи́зни.

¹⁴

Я́коже услы́шаша му́жіє глаго́лы єя́ и усмотри́ша лице́ єя́, и бя́ше предъ ни́ми чудна́ красото́ю зѣло́, и рѣ́ша къ не́й:

¹⁴

Ꙗ҆́коже оу҆слы́шаша мꙋ́жїе глаго́лы є҆ѧ̀ и҆ оу҆смотри́ша лицѐ є҆ѧ̀, и҆ бѧ́ше пред̾ ни́ми чꙋдна̀ красото́ю ѕѣлѡ̀, и҆ рѣ́ша къ не́й:

¹⁵

спасла́ єси́ ду́шу твою́, потща́вшися сни́ти предъ лице́ господи́на на́шего: и ны́нѣ приступи́ ко шатру́ єго́, и от на́съ прово́дятъ тя́, до́ндеже предаду́тъ тя́ въ ру́цѣ єго́:

¹⁵

спасла̀ є҆сѝ дꙋ́шꙋ твою̀, потща́вшисѧ сни́ти пред̾ лицѐ господи́на на́шегѡ: и҆ нн҃ѣ пристꙋпѝ ко шатрꙋ̀ є҆гѡ̀, и҆ ѿ на́съ прово́дѧтъ тѧ̀, до́ндеже предадꙋ́тъ тѧ̀ въ рꙋ́цѣ є҆гѡ̀:

¹⁶

а́ще же ста́неши предъ ни́мъ, да не убои́шися се́рдцемъ твои́мъ, но возвѣсти́ по глаго́ломъ твои́мъ, и бла́го тебѣ́ сотвори́тъ.

¹⁶

а҆́ще же ста́неши пред̾ ни́мъ, да не оу҆бои́шисѧ се́рдцемъ твои́мъ, но возвѣстѝ по глаго́лѡмъ твои̑мъ, и҆ бла́го тебѣ̀ сотвори́тъ.

¹⁷

И избра́ша от себе́ муже́й сто́ и присовокупи́ша є́й и рабы́ни єя́, и ведо́ша я́ ко шатру́ Олофе́рнову.

¹⁷

И҆ и҆збра́ша ѿ себє̀ мꙋже́й сто̀ и҆ присовокꙋпи́ша є҆́й и҆ рабы́ни є҆ѧ̀, и҆ ведо́ша ѧ҆̀ ко шатрꙋ̀ ѻ҆лофе́рновꙋ.

¹⁸

И бы́сть стече́ніє во все́мъ ополче́ніи, разгласи́ся бо по шатро́мъ прише́ствіє єя́: и прише́дше окружа́ху ю́, я́ко стоя́ше внѣ́ шатра́ Олофе́рнова, до́ндеже возвѣсти́ша єму́ о ней.

¹⁸

И҆ бы́сть стече́нїе во все́мъ ѡ҆полче́нїи, разгласи́сѧ бо по шатрѡ́мъ прише́ствїе є҆ѧ̀: и҆ прише́дше ѡ҆крꙋжа́хꙋ ю҆̀, ꙗ҆́кѡ стоѧ́ше внѣ̀ шатра̀ ѻ҆лофе́рнова, до́ндеже возвѣсти́ша є҆мꙋ̀ ѡ҆ ней.

¹⁹

И чудя́хуся о красотѣ́ єя́ и удивля́хуся сыно́мъ Ізра́илевымъ о не́й, и рѣ́ша кі́йждо ко бли́жнему своєму́: кто́ пре́зритъ люді́й си́хъ, и́же и́мутъ у себе́ же́нъ таковы́хъ? я́ко не добро́ є́сть оста́вити изъ ни́хъ му́жа єди́наго, и́же оста́влени бы́вше возмо́гутъ прехи́трити всю́ зе́млю.

¹⁹

И҆ чꙋдѧ́хꙋсѧ ѡ҆ красотѣ̀ є҆ѧ̀ и҆ оу҆дивлѧ́хꙋсѧ сынѡ́мъ і҆и҃лєвымъ ѡ҆ не́й, и҆ рѣ́ша кі́йждо ко бли́жнемꙋ ссвемꙋ̀: кто̀ пре́зритъ люді́й си́хъ, и҆̀же и҆́мꙋтъ оу҆ себє̀ же́нъ таковы́хъ; ꙗ҆́кѡ не добро̀ є҆́сть ѡ҆ста́вити и҆з̾ ни́хъ мꙋ́жа є҆ди́наго, и҆̀же ѡ҆ста́влени бы́вше возмо́гꙋтъ прехи́трити всю̀ зе́млю.

²⁰

И изыдо́ша спя́щіи при Олофе́рнѣ и вси́ служи́теліє єго́ и введо́ша ю́ въ шате́ръ.

²⁰

И҆ и҆зыдо́ша спѧ́щїи при ѻ҆лофе́рнѣ и҆ всѝ слꙋжи́телїе є҆гѡ̀ и҆ введо́ша ю҆̀ въ шате́ръ.

²¹

И бѣ́ Олофе́рнъ опочива́я на одрѣ́ своє́мъ подъ завѣ́сою, я́же бѣ́ от порфи́ры и зла́та и смара́гда и ка́меній многоцѣ́нныхъ втка́нныхъ.

²¹

И҆ бѣ̀ ѻ҆лофе́рнъ ѡ҆почива́ѧ на ѻ҆дрѣ̀ свое́мъ под̾ завѣ́сою, ꙗ҆́же бѣ̀ ѿ порфѵ́ры и҆ зла́та и҆ смара́гда и҆ ка́менїй многоцѣ́нныхъ втка́нныхъ.

²²

И возвѣсти́ша єму́ о не́й, и изы́де въ предсѣ́ніє, и лампа́ды сре́бряныя предъидя́ху єму́.

²²

И҆ возвѣсти́ша є҆мꙋ̀ ѡ҆ не́й, и҆ и҆зы́де въ предсѣ́нїе, и҆ лампа̑ды срє́брѧныѧ пред̾идѧ́хꙋ є҆мꙋ̀.

²³

Єгда́ же пріи́де предъ лице́ єго́ Іуді́ѳъ и слу́гъ єго́, диви́шася вси́ о красотѣ́ лица́ єя́. И па́дши на лице́ поклони́ся єму́: и воздвиго́ша ю́ раби́ єго́.

²³

Є҆гда́ же прїи́де пред̾ лицѐ є҆гѡ̀ і҆ꙋді́ѳъ и҆ слꙋ́гъ є҆гѡ̀, диви́шасѧ всѝ ѡ҆ красотѣ̀ лица̀ є҆ѧ̀. И҆ па́дши на лицѐ поклони́сѧ є҆мꙋ̀: и҆ воздвиго́ша ю҆̀ рабѝ є҆гѡ̀.