¹

И въ лѣ́то осмоєна́десять, и въ два́десять вторы́й [де́нь] пе́рваго ме́сяца, бы́сть сло́во въ дому́ Навуходоно́сора царя́ Ассирі́йска, отмсти́ти вся́цѣй земли́, я́коже глаго́лаше.

¹

И҆ въ лѣ́то ѻ҆смоена́десѧть, и҆ въ два́десѧть вторы́й (де́нь) пе́рвагѡ мцⷭ҇а, бы́сть сло́во въ домꙋ̀ навꙋходоно́сора царѧ̀ а҆ссѷрі́йска, ѿмсти́ти всѧ́цѣй землѝ, ꙗ҆́коже глаго́лаше.

²

И созва́ вся́ служи́тели своя́ и вся́ вельмо́жы своя́, и сообщи́ съ ни́ми та́йну совѣ́та своєго́, и соверши́ всю́ зло́бу земли́ от устъ свои́хъ:

²

И҆ созва̀ всѧ̑ слꙋжи́тєли своѧ̑ и҆ всѧ̑ вельмо́жы своѧ̑, и҆ соѡбщѝ съ ни́ми та́йнꙋ совѣ́та своегѡ̀, и҆ совершѝ всю̀ ѕло́бꙋ землѝ ѿ ꙗ҆́стъ свои́хъ:

³

и ті́и суди́ша истреби́ти вся́ку пло́ть, и́же не послѣ́доваша словеси́ у́стъ єго́.

³

и҆ ті́и сꙋди́ша и҆стреби́ти всѧ́кꙋ пло́ть, и҆̀же не послѣ́доваша словесѝ оу҆́стъ є҆гѡ̀.

⁴

И бы́сть, єгда́ соверши́ совѣ́тъ сво́й, призва́ Навуходоно́соръ ца́рь Ассирі́йскій Олофе́рна вождонача́лника си́лы своєя́, втора́го су́ща по не́мъ, и рече́ къ нему́:

⁴

И҆ бы́сть, є҆гда̀ совершѝ совѣ́тъ сво́й, призва̀ навꙋходоно́соръ ца́рь а҆ссѷрі́йскїй ѻ҆лофе́рна вождонача́лника си́лы своеѧ̀, втора́го сꙋ́ща по не́мъ, и҆ речѐ къ немꙋ̀:

⁵

сія́ глаго́летъ ца́рь вели́кій, господи́нъ всея́ земли́: се́, ты́ изы́деши от лица́ моєго́ и во́змеши съ собо́ю муже́й упова́ющихъ въ крѣ́пости своє́й, пѣшце́въ до ты́сящей сто́ два́десять, и мно́жество ко́ней со вса́дниками ты́сящей двана́десять,

⁵

сїѧ̑ глаго́летъ ца́рь вели́кїй, господи́нъ всеѧ̀ землѝ: сѐ, ты̀ и҆зы́деши ѿ лица̀ моегѡ̀ и҆ во́змеши съ собо́ю мꙋже́й оу҆пова́ющихъ въ крѣ́пости свое́й, пѣшцє́въ до ты́сѧщей сто̀ два́десѧть, и҆ мно́жество ко́ней со вса́дниками ты́сѧщей двана́десѧть,

⁶

и изы́деши бо срѣ́теніє все́й земли́ на за́пады, я́ко не повину́шася глаго́лу у́стъ мои́хъ:

⁶

и҆ и҆зы́деши бо срѣ́тенїе все́й землѝ на за́пады, ꙗ҆́кѡ не повинꙋ́шасѧ глаго́лꙋ оу҆́стъ мои́хъ:

⁷

и возвѣсти́ши и́мъ уготовля́ти зе́млю и во́ду, я́ко изы́ду въ я́рости моє́й на ни́хъ, и покры́ю все́ лице́ земли́ нога́ми си́лы моєя́, и да́мъ и́хъ въ расхище́ніє и́мъ:

⁷

и҆ возвѣсти́ши и҆̀мъ оу҆готовлѧ́ти зе́млю и҆ во́дꙋ, ꙗ҆́кѡ и҆зы́дꙋ въ ꙗ҆́рости мое́й на ни́хъ, и҆ покры́ю всѐ лицѐ землѝ нога́ми си́лы моеѧ̀, и҆ да́мъ и҆̀хъ въ расхище́нїе и҆̀мъ:

⁸

и я́звенніи и́хъ испо́лнятъ де́бри и пото́ки и́хъ, и рѣка́ наводня́ющаяся ме́ртвыми и́хъ напо́лнится:

⁸

и҆ ꙗ҆́звеннїи и҆́хъ и҆спо́лнѧтъ дє́бри и҆ пото́ки и҆́хъ, и҆ рѣка̀ наводнѧ́ющаѧсѧ ме́ртвыми и҆́хъ напо́лнитсѧ:

⁹

и приведу́ плѣ́нъ и́хъ до коне́цъ всея́ земли́:

⁹

и҆ приведꙋ̀ плѣ́нъ и҆́хъ до конє́цъ всеѧ̀ землѝ:

¹⁰

ты́ же изше́дъ приодержи́ши мнѣ́ вся́къ предѣ́лъ и́хъ, и отдаду́тъ тебѣ́ сами́хъ себе́, и соблюде́ши ми́ и́хъ на де́нь обличе́нія и́хъ:

¹⁰

ты́ же и҆зше́дъ приѡдержи́ши мнѣ̀ всѧ́къ предѣ́лъ и҆́хъ, и҆ ѿдадꙋ́тъ тебѣ̀ сами́хъ себѐ, и҆ соблюде́ши мѝ и҆̀хъ на де́нь ѡ҆бличе́нїѧ и҆́хъ:

¹¹

непокаря́ющихся же не пощади́тъ о́ко твоє́, є́же да́ти и́хъ на убіє́ніє и расхище́ніє во все́й земли́ твоє́й:

¹¹

непокарѧ́ющихсѧ же не пощади́тъ ѻ҆́ко твоѐ, є҆́же да́ти и҆̀хъ на оу҆бїе́нїе и҆ расхище́нїе во все́й землѝ твое́й:

¹²

я́ко жи́въ а́зъ, и держа́ва ца́рства моєго́: глаго́лахъ и сотворю́ сія́ руко́ю моє́ю:

¹²

ꙗ҆́кѡ жи́въ а҆́зъ, и҆ держа́ва ца́рства моегѡ̀: глаго́лахъ и҆ сотворю̀ сїѧ̑ рꙋко́ю мое́ю:

¹³

ты́ же да не преступи́ши єди́наго ко́єго от глаго́лъ господи́на твоєго́, но соверша́я да соверши́ши, я́коже заповѣ́дахъ тебѣ́, и да не укосни́ши сотвори́ти сія́.

¹³

ты́ же да не престꙋпи́ши є҆ди́нагѡ ко́егѡ ѿ глагѡ́лъ господи́на твоегѡ̀, но соверша́ѧ да соверши́ши, ꙗ҆́коже заповѣ́дахъ тебѣ̀, и҆ да не оу҆косни́ши сотвори́ти сїѧ̑.

¹⁴

И изы́де Олофе́рнъ от лица́ господи́на своєго́, и созва́ вся́ вельмо́жы и воєво́ды и нача́лники си́лы Ассу́рскія,

¹⁴

И҆ и҆зы́де ѻ҆лофе́рнъ ѿ лица̀ господи́на своегѡ̀, и҆ созва̀ всѧ̑ вельмо́жы и҆ воевѡ́ды и҆ нача́лники си́лы а҆ссꙋ́рскїѧ,

¹⁵

и изчи́сли избра́нныхъ муже́й на ополче́ніє, я́коже заповѣ́да єму́ господи́нъ єго́, до двана́десять те́мъ, и ко́нниковъ стрѣлце́въ двана́десять ты́сящей,

¹⁵

и҆ и҆зчи́сли и҆збра́нныхъ мꙋже́й на ѡ҆полче́нїе, ꙗ҆́коже заповѣ́да є҆мꙋ̀ господи́нъ є҆гѡ̀, до двана́десѧть те́мъ, и҆ ко́нникѡвъ стрѣлцє́въ двана́десѧть ты́сѧщей,

¹⁶

и устро́и и́хъ, и́мже о́бразомъ бра́ни мно́жество устроєва́єтся:

¹⁶

и҆ оу҆стро́и и҆̀хъ, и҆́мже ѡ҆́бразомъ бра́ни мно́жество оу҆строева́етсѧ:

¹⁷

и взя́ велблю́ды и ослы́ и мски́ припа́совъ ра́ди свои́хъ мно́жество мно́го зѣло́, и о́вцы и волы́ и козлы́ на угото́ваніє и́хъ, и́мже не бѣ́ числа́,

¹⁷

и҆ взѧ̀ велблю́ды и҆ ѻ҆слы̀ и҆ мскѝ припа́сѡвъ ра́ди свои́хъ мно́жество мно́го ѕѣлѡ̀, и҆ ѻ҆́вцы и҆ волы̀ и҆ козлы̀ на оу҆гото́ванїе и҆́хъ, и҆̀мже не бѣ̀ числа̀,

¹⁸

и пи́щи вся́кому му́жу во мно́жествѣ, и зла́та и сребра́ изъ до́му царе́ва мно́го зѣло́:

¹⁸

и҆ пи́щи всѧ́комꙋ мꙋ́жꙋ во мно́жествѣ, и҆ зла́та и҆ сребра̀ и҆з̾ до́мꙋ царе́ва мно́гѡ ѕѣлѡ̀:

¹⁹

и изы́де са́мъ и вся́ си́ла єго́ въ пу́ть, є́же предъити́ царю́ Навуходоно́сору и покры́ти все́ лице́ земли́ къ за́падомъ колесни́цами и ко́нницами и пѣшца́ми избра́нными свои́ми:

¹⁹

и҆ и҆зы́де са́мъ и҆ всѧ̀ си́ла є҆гѡ̀ въ пꙋ́ть, є҆́же пред̾итѝ царю̀ навꙋходоно́сорꙋ и҆ покры́ти всѐ лицѐ землѝ къ за́падѡмъ колесни́цами и҆ ко́нницами и҆ пѣшца́ми и҆збра́нными свои́ми:

²⁰

и мно́гоє примѣше́ніє я́ко пру́зи изыдо́ша съ ни́ми и я́ко песо́къ земли́, не бо́ бѣ́ числа́ от мно́жества и́хъ.

²⁰

и҆ мно́гое примѣше́нїе ꙗ҆́кѡ прꙋ́зи и҆зыдо́ша съ ни́ми и҆ ꙗ҆́кѡ песо́къ землѝ, не бо̀ бѣ̀ числа̀ ѿ мно́жества и҆́хъ.

²¹

И изыдо́ша изъ Ніневі́і путе́мъ тріє́хъ дні́й на лице́ по́ля вектіле́ѳъ, и ополчи́шися от вектіле́ѳа бли́зъ горы́ су́щія ошу́юю вы́шнія кілікі́и.

²¹

И҆ и҆зыдо́ша и҆з̾ нїнеѵі́и пꙋте́мъ трїе́хъ дні́й на лицѐ по́лѧ вектїле́ѳъ, и҆ ѡ҆полчи́шисѧ ѿ вектїле́ѳа бли́з̾ горы̀ сꙋ́щїѧ ѡ҆шꙋ́юю вы́шнїѧ кїлїкі́и.

²²

И поя́ всю́ си́лу свою́, пѣшцы́ и ко́нники и колесни́цы своя́, и отъи́де отту́ду въ го́рнюю,

²²

И҆ поѧ̀ всю̀ си́лꙋ свою̀, пѣшцы̀ и҆ ко́нники и҆ колєсни́цы своѧ̑, и҆ ѿи́де ѿтꙋ́дꙋ въ го́рнюю,

²³

и изсѣче́ Фу́да и Лу́да, и поплѣни́ всѣ́хъ сыно́въ рассі́са и сыно́въ Ісма́илевыхъ су́щихъ по лицу́ пусты́ни хеллео́нскія къ ю́гу.

²³

и҆ и҆зсѣчѐ фꙋ́да и҆ лꙋ́да, и҆ поплѣнѝ всѣ́хъ сынѡ́въ рассі́са и҆ сынѡ́въ і҆сма́илевыхъ сꙋ́щихъ по лицꙋ̀ пꙋсты́ни хеллеѡ́нскїѧ къ ю҆́гꙋ.

²⁴

И пре́йде Євфра́тъ, и про́йде Месопота́мію, и раскопа́ вся́ гра́ды высо́кія су́щыя при пото́цѣ Авро́нѣ, до́ндеже пріити́ къ мо́рю:

²⁴

И҆ пре́йде є҆ѵфра́тъ, и҆ про́йде месопота́мїю, и҆ раскопа̀ всѧ̑ гра́ды высѡ́кїѧ сꙋ́щыѧ при пото́цѣ а҆врѡ́нѣ, до́ндеже прїитѝ къ мо́рю:

²⁵

и объя́тъ предѣ́лы кілікі́йскія, и посѣче́ всѣ́хъ противостоя́щихъ себѣ́: и пріи́де да́же до предѣ́лъ Іа́феѳовыхъ, су́щихъ къ ю́гу на лицы́ Араві́и,

²⁵

и҆ ѡ҆б̾ѧ́тъ предѣ́лы кїлїкі̑йскїѧ, и҆ посѣчѐ всѣ́хъ противостоѧ́щихъ себѣ̀: и҆ прїи́де да́же до предѣ̑лъ і҆а́феѳовыхъ, сꙋ́щихъ къ ю҆́гꙋ на лицы̀ а҆раві́и,

²⁶

и обы́де всѣ́хъ сыно́въ Мадіа́млихъ, и пожже́ селе́нія и́хъ и плѣни́ стада́ и́хъ:

²⁶

и҆ ѡ҆бы́де всѣ́хъ сынѡ́въ мадїа́млихъ, и҆ пожжѐ селє́нїѧ и҆́хъ и҆ плѣнѝ стада̀ и҆́хъ:

²⁷

и сни́де на по́ле Дама́сково во дне́хъ жа́твы пшени́цъ, и пожже́ вся́ ни́вы и́хъ, а о́вчія и воло́выя стада́ даде́ въ погубле́ніє, и гра́ды и́хъ поплѣни́, и поля́ и́хъ опустоши́, и порази́ вся́ ю́ношы и́хъ о́стріємъ меча́.

²⁷

и҆ сни́де на по́ле дама́сково во дне́хъ жа́твы пшени́цъ, и҆ пожжѐ всѧ̑ ни̑вы и҆́хъ, а҆ ѡ҆́вчїѧ и҆ волѡ́выѧ стада̀ дадѐ въ погꙋбле́нїе, и҆ гра́ды и҆́хъ поплѣнѝ, и҆ полѧ̀ и҆́хъ ѡ҆пꙋстошѝ, и҆ поразѝ всѧ̑ ю҆́ношы и҆́хъ ѻ҆́стрїемъ меча̀.

²⁸

И нападе́ стра́хъ и тре́петъ єго́ на всѣ́хъ живу́щихъ въ примо́ріи, су́щихъ въ Сідо́нѣ и ти́рѣ и обита́ющихъ въ Су́рѣ и окі́нѣ и на всѣ́хъ живу́щихъ во Іємнаа́нѣ. И живу́щіи во азо́тѣ и Аскало́нѣ убоя́шася єго́ зѣло́.

²⁸

И҆ нападѐ стра́хъ и҆ тре́петъ є҆гѡ̀ на всѣ́хъ живꙋ́щихъ въ примо́рїи, сꙋ́щихъ въ сїдѡ́нѣ и҆ тѵ́рѣ и҆ ѡ҆бита́ющихъ въ сꙋ́рѣ и҆ ѻ҆кі́нѣ и҆ на всѣ́хъ живꙋ́щихъ во і҆емнаа́нѣ. И҆ живꙋ́щїи во а҆зѡ́тѣ и҆ а҆скалѡ́нѣ оу҆боѧ́шасѧ є҆гѡ̀ ѕѣлѡ̀.