¹

И посла́ша къ нему́ посла́нниковъ словесы́ ми́рными, глаго́люще:

²

се́, мы́ о́троцы Навуходоно́сора царя́ вели́каго поверга́ємся предъ тобо́ю, употреби́ на́съ, я́коже уго́дно є́сть лицу́ твоєму́:

³

се́, се́ла на́ша, и вся́коє мѣ́сто на́ше, и все́ по́ле пшени́цъ, и о́вчія и воло́выя стада́, и вся́ огра́ды селе́ній на́шихъ, су́ть предъ лице́мъ твои́мъ, употреби́, я́коже уго́дно тебѣ́:

⁴

се́, и гра́ди на́ши, и живу́щіи въ ни́хъ раби́ твои́ су́ть: ше́дъ срѣ́ти и́хъ, я́коже є́сть бла́го предъ очи́ма твои́ма.

⁵

И пріидо́ша му́жіє ко Олофе́рну и возвѣсти́ша єму́ по словесе́мъ си́мъ.

⁶

И сни́де на помо́ріє са́мъ и си́ла єго́, и утверди́ стра́жею гра́ды высо́кія и взя́ изъ ни́хъ на споборе́ніє муже́й избра́нныхъ.

⁷

И прія́ша єго́ ті́и и вся́ окре́стная и́хъ съ вѣнца́ми и ли́ки и тимпа́ны.

⁸

И разори́ вся́ предѣ́лы и́хъ, и дубра́вы и́хъ изсѣче́. И бѣ́ заповѣ́дано єму́ истреби́ти всѣ́хъ бого́въ земли́, я́ко да самому́ єди́ному Навуходоно́сору послу́жатъ вси́ ро́ди и вси́ язы́цы, и вся́ племена́ и́хъ да призыва́ютъ єго́ въ бо́га.

⁹

И пріи́де на лице́ єсдрило́на бли́зъ доте́и, я́же є́сть проти́ву вели́кія пилы́ Іуде́и,

¹⁰

и ополчи́ся между́ гава́ємъ и ски́ѳскимъ гра́домъ, и бѣ́ та́мо ме́сяцъ дні́й, ко є́же собра́ти вся́кій припа́съ си́лы своєя́.