Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
И сни́де сампсо́нъ во Ѳамна́ѳу и ви́дѣ жену́ во Ѳамна́ѳѣ от дще́рей Филісті́мскихъ, и уго́дна бы́сть предъ ни́мъ.
2
И взы́де и повѣ́да отцу́ своєму́ и ма́тери своє́й, и рече́: жену́ ви́дѣхъ во Ѳамна́ѳѣ от дще́рей Филісті́мскихъ, и ны́нѣ поими́те ю́ мнѣ́ въ жену́.
3
И рече́ єму́ оте́цъ єго́ и ма́ти єго́: єда́ нѣ́сть дще́рей от бра́тіи твоєя́ и от всѣ́хъ люді́й мои́хъ жены́, я́ко ты́ и́деши поя́ти жену́ от дще́рей иноплеме́нниковъ необрѣ́занныхъ? И рече́ сампсо́нъ ко отцу́ своєму́: сію́ поими́ мнѣ́, я́ко та́ уго́дна є́сть предъ очи́ма мои́ма.
4
Оте́цъ же єго́ и ма́ти єго́ не разумѣ́ша, я́ко сіє́ от Го́спода є́сть, я́ко отмще́нія о́нъ и́щетъ от Филісті́млянъ: въ то́ бо вре́мя владя́ху Филісті́мляне сы́ны Ізра́илевыми.
5
И сни́де сампсо́нъ и оте́цъ єго́ и ма́ти єго́ во Ѳамна́ѳу, и пріидо́ша до віногра́да Ѳамна́ѳа: и се́, льви́чищь рыка́ющь во срѣ́теніє єму́.
6
И сни́де на него́ Ду́хъ Госпо́день, и растерза́ єго́ я́ко ко́злища от ко́зъ, и ничто́же бя́ше въ руку́ єго́: и не повѣ́да отцу́ своєму́ и ма́тери своє́й, є́же сотвори́.
7
И поидо́ша и реко́ша женѣ́, и уго́дна бы́сть предъ очи́ма сампсо́на.
8
И возврати́ся по дне́хъ поя́ти ю́, и обрати́ся ви́дѣти тру́пъ льво́въ, и се́, ро́й пче́лъ во устѣ́хъ льво́выхъ и ме́дъ:
9
и изъя́ єго́ от у́стъ єго́ въ ру́цѣ свои́, и идя́ше иды́й и яды́й: и по́йде ко отцу́ своєму́ и ма́тери своє́й, и даде́ и́мъ, и ядо́ша: и не повѣ́да и́мъ, я́ко от у́стъ льво́выхъ изъя́ се́й ме́дъ.
10
И сни́де оте́цъ єго́ къ женѣ́, и сотвори́ сампсо́нъ та́мо пи́ръ се́дмь дні́й, я́ко та́ко творя́тъ ю́ношы:
11
и бы́сть внегда́ боя́тися и́мъ єго́, приста́виша къ нему́ три́десять друго́въ, и бы́ша съ ни́мъ:
12
и рече́ и́мъ сампсо́нъ: предлага́ю ны́нѣ ва́мъ гада́ніє, и а́ще отгада́юще повѣ́дите мнѣ́ сіє́ въ се́дмь дні́й пи́ра и обря́щете, да́мъ ва́мъ три́десять поня́въ и три́десять ри́зъ оде́ждъ:
13
а́ще же не возмо́жете сіє́ повѣ́дати мнѣ́, дади́те вы́ мнѣ́ три́десять поня́въ и три́десять ри́зъ измѣ́нныхъ. И реко́ша єму́: предложи́ гада́ніє твоє́, и услы́шимъ є́.
14
И глаго́ла и́мъ: от яду́щаго ядо́моє изы́де, и от крѣ́пкаго изы́де сла́дкоє. И не мого́ша повѣ́дати гада́нія до тре́хъ дні́й.
15
И бы́сть въ де́нь четве́ртый, и реко́ша женѣ́ сампсо́новѣ: прельсти́ му́жа своєго́, и да повѣ́сть тебѣ́ гада́ніє, да не сожже́мъ тя́ и до́мъ отца́ твоєго́ огне́мъ: или́ оубо́жити призва́сте ны́?
16
И пла́кася жена́ сампсо́нова предъ ни́мъ и рече́: ра́звѣ возненави́дѣлъ єси́ мене́ и не возлюби́лъ єси́ мене́, я́ко гада́нія, є́же єси́ предложи́лъ сыно́мъ люді́й мои́хъ, не повѣ́далъ єси́ єго́ мнѣ́. И рече́ є́й сампсо́нъ: се́, отцу́ моєму́ и ма́тери моє́й не повѣ́дахъ сего́, и тебѣ́ ли повѣ́мъ?
17
И пла́кася предъ ни́мъ се́дмь дні́й, въ ня́же бѣ́ и́мъ пи́ръ. И бы́сть въ де́нь седмы́й, и повѣ́да є́й, я́ко стужи́ єму́: и та́ повѣ́да сыно́мъ люді́й свои́хъ.
18
И реко́ша єму́ му́жіє гра́дстіи въ де́нь седмы́й пре́жде заше́ствія со́лнца: что́ сла́ждше ме́да? и что́ крѣ́плѣє льва́? И рече́ и́мъ сампсо́нъ: а́ще не бы́сте ора́ли ю́ницею моє́ю, не бы́сте увѣ́дали гада́нія моєго́.
19
И нападе́ на него́ Ду́хъ Госпо́день, и сни́де во Аскало́нъ, и изби́ та́мо три́десять муже́й, и взя́ ри́зы и́хъ, и даде́ ри́зы повѣ́давшымъ гада́ніє. И разгнѣ́вася я́ростію сампсо́нъ, и взы́де въ до́мъ отца́ своєго́.
20
Жена́ же сампсо́нова и́де за ина́го му́жа, и́же бы́сть єди́нъ от друго́въ єго́.