¹

И бы́сть му́жъ от горы́ Єфре́мли, и и́мя єму́ мі́ха:

¹

И҆ бы́сть мꙋ́жъ ѿ горы̀ є҆фре́мли, и҆ и҆́мѧ є҆мꙋ̀ мі́ха:

²

и рече́ ма́тери своє́й: ты́сяща и сто́ сре́брениковъ и́же укра́дены у тебе́, и заклина́ла мя́ єси́ и глаго́лала єси́ во у́шы мои́: се́, сребро́ у мене́, а́зъ взя́хъ є́. И рече́ ма́ти єго́: благослове́нъ сы́нъ мо́й Го́сподеви.

²

и҆ речѐ ма́тери свое́й: ты́сѧща и҆ сто̀ сре́бреникѡвъ и҆̀же оу҆кра́дєны оу҆ тебє̀, и҆ заклина́ла мѧ̀ є҆сѝ и҆ глаго́лала є҆сѝ во оу҆́шы моѝ: сѐ, сребро̀ оу҆ менє̀, а҆́зъ взѧ́хъ є҆̀. И҆ речѐ ма́ти є҆гѡ̀: благослове́нъ сы́нъ мо́й гдⷭ҇еви.

³

И отдаде́ ты́сящу и сто́ сре́брениковъ ма́тери своє́й. И рече́ ма́ти єго́: освяща́ющи освяти́хъ сребро́ Го́сподеви от руки́ моєя́, тебѣ́ сы́нови моєму́ сотвори́ти [кумі́ръ] изва́янъ и слія́нъ, и ны́нѣ отда́мъ є́ тебѣ́.

³

И҆ ѿдадѐ ты́сѧщꙋ и҆ сто̀ сре́бреникѡвъ ма́тери свое́й. И҆ речѐ ма́ти є҆гѡ̀: ѡ҆свѧща́ющи ѡ҆свѧти́хъ сребро̀ гдⷭ҇еви ѿ рꙋкѝ моеѧ̀, тебѣ̀ сы́нови моемꙋ̀ сотвори́ти (кꙋмі́ръ) и҆зва́ѧнъ и҆ слїѧ́нъ, и҆ нн҃ѣ ѿда́мъ є҆̀ тебѣ̀.

⁴

И отдаде́ сребро́ ма́тери своє́й. И взя́ ма́ти єго́ двѣ́сти сре́брениковъ и даде́ и́хъ сребродѣ́лю, и сотвори́ то́є [кумі́ръ] изва́янъ и слія́нъ: и бы́сть въ дому́ мі́хи.

⁴

И҆ ѿдадѐ сребро̀ ма́тери свое́й. И҆ взѧ̀ ма́ти є҆гѡ̀ двѣ́сти сре́бреникѡвъ и҆ дадѐ и҆̀хъ сребродѣ́лю, и҆ сотворѝ то́е (кꙋмі́ръ) и҆зва́ѧнъ и҆ слїѧ́нъ: и҆ бы́сть въ домꙋ̀ мі́хи.

⁵

И до́мъ мі́хинъ єму́ до́мъ Бо́жій. И сотвори́ Єфу́дъ {Гре́ч.: єпомі́съ, славе́н.: нара́мникъ.} и ѳерафі́нъ {і́доли}: и напо́лни ру́ку єди́ному от сыно́въ свои́хъ, и бы́сть єму́ жре́цъ.

⁵

И҆ до́мъ мі́хинъ є҆мꙋ̀ до́мъ бж҃їй. И҆ сотворѝ є҆фꙋ́дъ [Гре́ч.: є҆пѡмі́съ, славе́н.: нара́мникъ.] и҆ ѳерафі́нъ [і҆́дѡли]: и҆ напо́лни рꙋ́кꙋ є҆ди́номꙋ ѿ сынѡ́въ свои́хъ, и҆ бы́сть є҆мꙋ̀ жре́цъ.

⁶

Въ ты́я же дни́ не бя́ше царя́ во Ізра́или: кі́йждо му́жъ, є́же пра́во ви́дяшеся предъ очи́ма єго́, творя́ше.

⁶

Въ ты̑ѧ же дни̑ не бѧ́ше царѧ̀ во і҆и҃ли: кі́йждо мꙋ́жъ, є҆́же пра́во ви́дѧшесѧ пред̾ ѻ҆чи́ма є҆гѡ̀, творѧ́ше.

⁷

И бы́сть ю́ноша от Виѳлеє́ма Іу́дина и от ро́да пле́мене Іу́дина, и се́й Леві́тинъ, и обита́ше та́мо:

⁷

И҆ бы́сть ю҆́ноша ѿ виѳлее́ма і҆ꙋ́дина и҆ ѿ ро́да пле́мене і҆ꙋ́дина, и҆ се́й леѵі́тинъ, и҆ ѡ҆бита́ше та́мѡ:

⁸

и по́йде се́й му́жъ от гра́да Виѳлеє́ма Іу́дина обита́ти, идѣ́же обря́щетъ мѣ́сто: и пріи́де до горы́ Єфре́мли и да́же до до́му мі́хина, є́же сотвори́ти пу́ть сво́й.

⁸

и҆ по́йде се́й мꙋ́жъ ѿ гра́да виѳлее́ма і҆ꙋ́дина ѡ҆бита́ти, и҆дѣ́же ѡ҆брѧ́щетъ мѣ́сто: и҆ прїи́де до горы̀ є҆фре́мли и҆ да́же до до́мꙋ мі́хина, є҆́же сотвори́ти пꙋ́ть сво́й.

⁹

И рече́ єму́ мі́ха: отку́ду и́деши? И рече́ єму́ Леві́тинъ: а́зъ є́смь от Виѳлеє́ма Іу́дина, и иду́ обита́ти, идѣ́же обря́щу мѣ́сто.

⁹

И҆ речѐ є҆мꙋ̀ мі́ха: ѿкꙋ́дꙋ и҆́деши; И҆ речѐ є҆мꙋ̀ леѵі́тинъ: а҆́зъ є҆́смь ѿ виѳлее́ма і҆ꙋ́дина, и҆ и҆дꙋ̀ ѡ҆бита́ти, и҆дѣ́же ѡ҆брѧ́щꙋ мѣ́сто.

¹⁰

И рече́ єму́ мі́ха: сѣди́ со мно́ю и бу́ди ми́ оте́цъ и жре́цъ, и а́зъ да́мъ тебѣ́ сре́брениковъ де́сять въ го́дъ и дво́и ри́зы, и я́же на житіє́ тебѣ́.

¹⁰

И҆ речѐ є҆мꙋ̀ мі́ха: сѣдѝ со мно́ю и҆ бꙋ́ди мѝ ѻ҆те́цъ и҆ жре́цъ, и҆ а҆́зъ да́мъ тебѣ̀ сре́бреникѡвъ де́сѧть въ го́дъ и҆ дво́и ри̑зы, и҆ ꙗ҆̀же на житїѐ тебѣ̀.

¹¹

И по́йде леві́тъ, и нача́ обита́ти у му́жа. И бы́сть ю́ноша єму́ я́ко єди́нъ от сыно́въ єго́.

¹¹

И҆ по́йде леѵі́тъ, и҆ нача̀ ѡ҆бита́ти оу҆ мꙋ́жа. И҆ бы́сть ю҆́ноша є҆мꙋ̀ ꙗ҆́кѡ є҆ди́нъ ѿ сынѡ́въ є҆гѡ̀.

¹²

И напо́лни мі́ха ру́ку Леві́тину, и бы́сть єму́ ю́ноша жре́цъ, и бя́ше въ дому́ мі́хи.

¹²

И҆ напо́лни мі́ха рꙋ́кꙋ леѵі́тинꙋ, и҆ бы́сть є҆мꙋ̀ ю҆́ноша жре́цъ, и҆ бѧ́ше въ домꙋ̀ мі́хи.

¹³

И рече́ мі́ха: ны́нѣ увѣ́дѣхъ, я́ко благосотвори́тъ мнѣ́ Госпо́дь, я́ко бы́сть мнѣ́ Леві́тинъ жре́цъ.

¹³

И҆ речѐ мі́ха: нн҃ѣ оу҆вѣ́дѣхъ, ꙗ҆́кѡ бл҃госотвори́тъ мнѣ̀ гдⷭ҇ь, ꙗ҆́кѡ бы́сть мнѣ̀ леѵі́тинъ жре́цъ.