Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
И бы́сть въ ты́я дни́ не бя́ше царя́ во Ізра́или: и бы́сть му́жъ Леві́тинъ живы́й во странѣ́ горы́ Єфре́мовы, и поя́ себѣ́ жену́ подло́жницу от Виѳлеє́ма Іу́дина:
2
и разгнѣ́вася на́нь подло́жница єго́, и отъи́де от него́ въ до́мъ отца́ своєго́ въ Виѳлеє́мъ Іу́динъ, и бѣ́ та́мо четы́ри ме́сяцы:
3
и воста́ му́жъ єя́ и и́де вслѣ́дъ єя́ глаго́лати въ се́рдце єя́, обрати́ти ю́ къ себѣ́ и привести́ па́ки къ себѣ́: и о́трокъ єго́ съ ни́мъ, и дво́є осля́тъ: она́ же введе́ єго́ въ до́мъ отца́ своєго́:
4
и ви́дѣ єго́ оте́цъ отрокови́цы и изы́де съ весе́ліємъ во срѣ́теніє єго́, и удержа́ єго́ те́сть єго́ оте́цъ отрокови́цы, и пребы́сть съ ни́мъ три́ дни́, и ядо́ша и пи́ша, и спа́ша та́мо.
5
И бы́сть въ де́нь четве́ртый, и обу́трѣша зау́тра, и воста́ поити́. И рече́ оте́цъ отрокови́цы къ зя́тю своєму́: укрѣпи́ се́рдце твоє́ укру́хомъ хлѣ́ба, и по се́мъ по́йдете.
6
И сѣдо́ша, и ядо́ша о́ба вку́пѣ и пи́ша. И рече́ оте́цъ отрокови́цы къ му́жу: иди́ ны́нѣ и преспи́, и возблажа́єтъ се́рдце твоє́.
7
И воста́ му́жъ поити́: и пону́ди єго́ те́сть єго́, и сѣ́де, и пребы́сть та́мо.
8
И воста́ ра́но въ пя́тый де́нь да и́детъ. И рече́ оте́цъ отрокови́цы: укрѣпи́ у́бо се́рдце твоє́ хлѣ́бомъ, и пребу́ди до́ндеже преклони́тся де́нь. И ядо́ша и пи́ша о́ба.
9
И воста́ му́жъ да и́детъ са́мъ и подло́жница єго́ и о́трокъ єго́. И рече́ єму́ те́сть єго́ оте́цъ отрокови́цы: се́, уже́ преклони́ся де́нь къ ве́черу, пребу́ди здѣ́, и возблажа́єтъ се́рдце твоє́, и обу́трѣєте у́тро въ пу́ть ва́шъ, и отъи́деши въ селе́ніє своє́.
10
И не изво́ли му́жъ пребы́ти, и воста́ и отъи́де: и пріи́де да́же пря́мо Ієву́су, се́й є́сть Ієрусали́мъ, и съ ни́мъ дво́є осля́тъ съ бремены́, и подло́жница єго́ съ ни́мъ.
11
И пріидо́ша до Ієву́са, и де́нь преклони́ся къ ве́черу зѣло́: и рече́ о́трокъ ко господи́ну своєму́: гряди́ у́бо, да уклони́мся во гра́дъ се́й Ієву́съ и пребу́демъ въ не́мъ.
12
И рече́ къ нему́ господи́нъ єго́: не уклони́мся во гра́дъ чу́ждь, въ не́мже нѣ́сть от сыно́въ Ізра́илевыхъ, но пре́йдемъ до гавао́на.
13
И рече́ ко о́троку своєму́: гряди́, да присту́пимъ ко єди́ному от мѣ́стъ гавао́нскихъ и пребу́демъ въ гавао́нѣ или́ въ ра́мѣ.
14
И мину́ша, и идо́ша, и за́йде и́мъ со́лнце бли́зъ гавао́на, и́же є́сть Веніамі́нь:
15
и уклони́шася та́мо вни́ти превита́ти въ гавао́нѣ, и внидо́ша и сѣдо́ша на сто́гнахъ гра́да: и не бѣ́ му́жъ вводя́й и́хъ въ до́мъ превита́ти.
16
И се́, му́жъ ста́ръ идя́ше съ дѣ́ла своєго́ изъ по́ля въ ве́черъ, и се́й му́жъ от горы́ Єфре́мли, и то́й обита́ше въ гавао́нѣ: и му́жіє мѣ́ста сы́нове Веніамі́ни.
17
И возве́дъ о́чи свои́, ви́дѣ му́жа пу́тника на сто́гнахъ гра́дныхъ, и рече́ му́жъ ста́рецъ: ка́мо и́деши и отку́ду гряде́ши?
18
И рече́ къ нему́: гряде́мъ мы́ от Виѳлеє́ма Іу́дина да́же до стра́нъ горы́ Єфре́мли, отону́дуже а́зъ є́смь: и ходи́хъ до Виѳлеє́ма Іу́дина, и иду́ а́зъ въ до́мъ мо́й: и нѣ́сть му́жа вводя́щаго мя́ въ до́мъ:
19
а пле́вы и пи́ща осля́томъ на́шымъ є́сть, и мнѣ́ хлѣ́бъ и віно́ є́сть, и отрокови́цѣ и о́троку: рабо́мъ твои́мъ нѣ́сть ску́дно ни коєя́ ве́щи.
20
И рече́ му́жъ ста́ръ: ми́ръ тебѣ́: и ве́сь недоста́токъ тво́й на мнѣ́, оба́че на сто́гнахъ не ля́зи.
21
И введе́ єго́ въ до́мъ сво́й, и даде́ мѣ́сто осля́томъ єго́: и омы́ша но́ги своя́, и ядо́ша и пи́ша.
22
Єгда́ же возвесели́ся се́рдце и́хъ, и се́, му́жіє гра́дстіи сы́нове беззако́нниковъ обыдо́ша до́мъ бію́ще въ две́ри, и рѣ́ша му́жу господи́ну до́му ста́рцу, глаго́люще: изведи́ му́жа и́же вни́де въ до́мъ тво́й, да позна́ємъ єго́.
23
И изы́де къ ни́мъ му́жъ господи́нъ до́му и рече́: ни́, бра́тія, не сотвори́те зла́ му́жу сему́ повнегда́ вни́ти єму́ въ до́мъ мо́й, и не сотвори́те безу́мія сего́:
24
се́, дще́рь моя́ дѣ́ва, и подло́жница єго́: изведу́ и́хъ, и смири́те и́хъ, и сотвори́те и́мъ є́же бла́го предъ очи́ма ва́шима: а му́жу сему́ не сотвори́те словесе́ безу́мія сего́.
25
И не изво́лиша му́жіє послу́шати єго́. И взя́ му́жъ подло́жницу єго́ и изведе́ ю́ къ ни́мъ во́нъ: и позна́ша ю́ и руга́шася надъ не́ю всю́ но́щь да́же до у́тра, и отпусти́ша ю́, єгда́ взы́де денни́ца.
26
И пріи́де жена́ къ зау́трію, и паде́ у две́рій до́му, идѣ́же бя́ше му́жъ єя́, до разсвѣта́нія.
27
И воста́ му́жъ єя́ зау́тра, и отве́рзе две́ри до́му и изы́де поити́ въ пу́ть сво́й: и се́, жена́ єго́ подло́жница лежа́ше при две́рехъ до́му, и ру́цѣ єя́ на преддве́ріи.
28
И рече́ къ не́й: воста́ни, да и́демъ. И не отвѣща́ єму́, бя́ше бо мертва́. И возложи́ ю́ на осля́, и воста́ му́жъ и по́йде на мѣ́сто своє́.
29
И пріи́де въ до́мъ сво́й, и взя́ но́жъ, и взя́ подло́жницу свою́, и раздроби́ ю́ по удесе́мъ єя́ на двана́десять часте́й, и посла́ я́ во вся́ племена́ Ізра́илева.
30
И бы́сть вся́къ ви́дящій глаго́лаше: не бы́сть, ни ви́дѣно бѣ́ си́це от дне́ изше́ствія сыно́въ Ізра́илевыхъ от земли́ Єги́петскія да́же до дне́ сего́. И заповѣ́да муже́мъ, и́хже посла́, глаго́ля: си́це глаго́лите ко всему́ Ізра́илю: а́ще бы́сть по словеси́ сему́? уста́вите са́ми себѣ́ о не́й совѣ́тъ и глаго́лите.