Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
И по́йде Авімеле́хъ сы́нъ ієроваа́ловъ въ Сихе́мъ ко бра́тіи ма́тере своєя́ и глаго́ла къ ни́мъ и ко всему́ сро́дству до́му отца́ ма́тере своєя́, глаго́ля:
1
И҆ по́йде а҆вїмеле́хъ сы́нъ і҆ероваа́ловъ въ сѷхе́мъ ко бра́тїи ма́тере своеѧ̀ и҆ глаго́ла къ ни̑мъ и҆ ко всемꙋ̀ сро́дствꙋ до́мꙋ ѻ҆тца̀ ма́тере своеѧ̀, глаго́лѧ:
2
глаго́лите во у́шы всѣ́хъ муже́й Сихе́мскихъ: что́ лу́чше ва́мъ, є́же владѣ́ти ва́ми седми́десяти муже́мъ всѣ́мъ сыно́мъ ієроваа́ловымъ, или́ владѣ́ти ва́ми му́жу єди́ному? и помяни́те, я́ко ко́сть ва́ша и пло́ть ва́ша є́смь а́зъ.
2
глаго́лите во оу҆́шы всѣ́хъ мꙋже́й сѷхе́мскихъ: что̀ лꙋ́чше ва́мъ, є҆́же владѣ́ти ва́ми седми́десѧти мꙋжє́мъ всѣ̑мъ сынѡ́мъ і҆ероваа́лѡвымъ, и҆лѝ владѣ́ти ва́ми мꙋ́жꙋ є҆ди́номꙋ; и҆ помѧни́те, ꙗ҆́кѡ ко́сть ва́ша и҆ пло́ть ва́ша є҆́смь а҆́зъ.
3
И глаго́лаша бра́тія ма́тере єго́ о не́мъ во у́шы всѣ́хъ муже́й Сихе́мскихъ вся́ словеса́ сія́. И уклони́ся се́рдце и́хъ вслѣ́дъ Авімеле́ха, реко́ша бо: бра́тъ на́шъ є́сть.
3
И҆ глаго́лаша бра́тїѧ ма́тере є҆гѡ̀ ѡ҆ не́мъ во оу҆́шы всѣ́хъ мꙋже́й сѷхе́мскихъ всѧ̑ словеса̀ сїѧ̑. И҆ оу҆клони́сѧ се́рдце и҆́хъ в̾слѣ́дъ а҆вїмеле́ха, реко́ша бо: бра́тъ на́шъ є҆́сть.
4
И да́ша єму́ се́дмьдесятъ сре́бреникъ от до́му Ваалвері́ѳа: и ная́ и́ми Авімеле́хъ муже́й пра́здныхъ и скита́ющихся, и поидо́ша вслѣ́дъ єго́.
4
И҆ да́ша є҆мꙋ̀ се́дмьдесѧтъ сре́брєникъ ѿ до́мꙋ ваалвері́ѳа: и҆ наѧ̀ и҆́ми а҆вїмеле́хъ мꙋже́й пра́здныхъ и҆ скита́ющихсѧ, и҆ поидо́ша в̾слѣ́дъ є҆гѡ̀.
5
И вни́де въ до́мъ отца́ своєго́ во Єфра́ѳу, и изби́ бра́тію свою́, сы́ны ієроваа́ловы, се́дмьдесятъ муже́й, на ка́мени єди́нѣмъ, и оста́ся Іоаѳа́мъ сы́нъ ієроваа́ль юнѣ́йшій, зане́ скры́ся.
5
И҆ вни́де въ до́мъ ѻ҆тца̀ своегѡ̀ во є҆фра́ѳꙋ, и҆ и҆збѝ бра́тїю свою̀, сы́ны і҆ероваа́лѡвы, се́дмьдесѧтъ мꙋже́й, на ка́мени є҆ди́нѣмъ, и҆ ѡ҆ста́сѧ і҆ѡаѳа́мъ сы́нъ і҆ероваа́ль ю҆нѣ́йшїй, занѐ скры́сѧ.
6
И собра́шася вси́ му́жіє Сихе́мстіи и ве́сь до́мъ маа́ловъ, и поидо́ша, и поста́виша Авімеле́ха царе́мъ у ду́ба ста́на, и́же въ Сихе́мѣхъ.
6
И҆ собра́шасѧ всѝ мꙋ́жїе сѷхе́мстїи и҆ ве́сь до́мъ маа́ловъ, и҆ поидо́ша, и҆ поста́виша а҆вїмеле́ха царе́мъ оу҆ дꙋ́ба ста́на, и҆́же въ сѷхе́мѣхъ.
7
И повѣ́даша Іоаѳа́му, и по́йде, и ста́ на версѣ́ горы́ гарізі́нъ: и воздви́же гла́съ сво́й, и воззва́, и рече́ и́мъ: послу́шайте мене́, му́жіє Сихе́мстіи, и да услы́шитъ ва́съ Бо́гъ.
7
И҆ повѣ́даша і҆ѡаѳа́мꙋ, и҆ по́йде, и҆ ста̀ на версѣ̀ горы̀ гарїзі́нъ: и҆ воздви́же гла́съ сво́й, и҆ воззва̀, и҆ речѐ и҆̀мъ: послꙋ́шайте менѐ, мꙋ́жїе сѷхе́мстїи, и҆ да оу҆слы́шитъ ва́съ бг҃ъ.
8
Иду́ще идо́ша древа́ пома́зати себѣ́ царя́ и рѣ́ша ма́сличинѣ: бу́ди на́мъ ца́рь.
8
И҆дꙋ́ще и҆до́ша древа̀ пома́зати себѣ̀ царѧ̀ и҆ рѣ́ша ма́сличинѣ: бꙋ́ди на́мъ ца́рь.
9
И рече́ и́мъ ма́сличина: єда́ оста́вивши ту́чность мою́, ю́же во мнѣ́ просла́ви Бо́гъ и человѣ́цы, пойду́ владѣ́ти древа́ми?
9
И҆ речѐ и҆̀мъ ма́сличина: є҆да̀ ѡ҆ста́вивши тꙋ́чность мою̀, ю҆́же во мнѣ̀ просла́ви бг҃ъ и҆ человѣ́цы, пойдꙋ̀ владѣ́ти древа́ми;
10
И реко́ша древа́ смоко́вницѣ: пріиди́, ца́рствуй надъ на́ми.
10
И҆ реко́ша древа̀ смоко́вницѣ: прїидѝ, ца́рствꙋй над̾ на́ми.
11
И рече́ и́мъ смоко́вница: єда́ оста́вивши мою́ сла́дость и пло́дъ мо́й благі́й, пойду́ владѣ́ти древа́ми?
11
И҆ речѐ и҆̀мъ смоко́вница: є҆да̀ ѡ҆ста́вивши мою̀ сла́дость и҆ пло́дъ мо́й благі́й, пойдꙋ̀ владѣ́ти древа́ми;
12
И реко́ша древа́ къ лозѣ́ віногра́днѣй: пріиди́, бу́ди на́мъ ца́рь.
12
И҆ реко́ша древа̀ къ лозѣ̀ вїногра́днѣй: прїидѝ, бꙋ́ди на́мъ ца́рь.
13
И рече́ и́мъ лоза́ віногра́дная: єда́ оста́вивши віно́ моє́, веселя́щеє Бо́га и человѣ́ки, пойду́ владѣ́ти древа́ми?
13
И҆ речѐ и҆̀мъ лоза̀ вїногра́днаѧ: є҆да̀ ѡ҆ста́вивши вїно̀ моѐ, веселѧ́щее бг҃а и҆ человѣ́ки, пойдꙋ̀ владѣ́ти древа́ми;
14
И реко́ша вся́ древа́ те́рнію: пріиди́, бу́ди на́мъ ца́рь.
14
И҆ реко́ша всѧ̑ древа̀ те́рнїю: прїидѝ, бꙋ́ди на́мъ ца́рь.
15
И рече́ те́рніє ко древа́мъ: а́ще по и́стинѣ помазу́єте себѣ́ царя́ мене́ надъ ва́ми, пріиди́те и вни́дите подъ сѣ́нь мою́: а́ще ли же ни́, да изы́детъ о́гнь изъ те́рнія и поя́стъ ке́дры Ліва́нскія.
15
И҆ речѐ те́рнїе ко древа́мъ: а҆́ще по и҆́стинѣ помазꙋ́ете себѣ̀ царѧ̀ менѐ над̾ ва́ми, прїиди́те и҆ вни́дите под̾ сѣ́нь мою̀: а҆́ще ли же нѝ, да и҆зы́детъ ѻ҆́гнь и҆з̾ те́рнїѧ и҆ поѧ́стъ ке́дры лїва̑нскїѧ.
16
И ны́нѣ а́ще по и́стинѣ и по соверше́нству сотвори́сте, и поста́висте Авімеле́ха царе́мъ, и а́ще бла́го сотвори́сте со ієроваа́ломъ и съ до́момъ єго́, и а́ще по воздая́нію руки́ єго́ сотвори́сте єму́,
16
И҆ нн҃ѣ а҆́ще по и҆́стинѣ и҆ по соверше́нствꙋ сотвори́сте, и҆ поста́висте а҆вїмеле́ха царе́мъ, и҆ а҆́ще бла́го сотвори́сте со і҆ероваа́ломъ и҆ съ до́момъ є҆гѡ̀, и҆ а҆́ще по воздаѧ́нїю рꙋкѝ є҆гѡ̀ сотвори́сте є҆мꙋ̀,
17
я́коже воєва́ оте́цъ мо́й по ва́съ, и пове́рже ду́шу свою́ въ страну́, и изба́ви ва́съ от руки́ Мадіа́мли:
17
ꙗ҆́коже воева̀ ѻ҆те́цъ мо́й по ва́съ, и҆ пове́рже дꙋ́шꙋ свою̀ въ странꙋ̀, и҆ и҆зба́ви ва́съ ѿ рꙋкѝ мадїа́мли:
18
и вы́ воста́сте на до́мъ отца́ моєго́ дне́сь и изби́сте сы́ны єго́, се́дмьдесятъ муже́й, на єди́нѣмъ ка́мени, и поста́висте царе́мъ Авімеле́ха сы́на рабы́ни єго́ надъ му́жи Сікі́мскими, я́ко бра́тъ ва́шъ є́сть:
18
и҆ вы̀ воста́сте на до́мъ ѻ҆тца̀ моегѡ̀ дне́сь и҆ и҆зби́сте сы́ны є҆гѡ̀, се́дмьдесѧтъ мꙋже́й, на є҆ди́нѣмъ ка́мени, и҆ поста́висте царе́мъ а҆вїмеле́ха сы́на рабы́ни є҆гѡ̀ над̾ мꙋ̑жи сїкі́мскими, ꙗ҆́кѡ бра́тъ ва́шъ є҆́сть:
19
и а́ще по и́стинѣ и по соверше́нству сотвори́сте со ієроваа́ломъ и до́момъ єго́ дне́сь, благослове́ни вы́ бу́дите, и возвесели́теся о Авімеле́сѣ, и то́й о ва́съ да возвесели́тся:
19
и҆ а҆́ще по и҆́стинѣ и҆ по соверше́нствꙋ сотвори́сте со і҆ероваа́ломъ и҆ до́момъ є҆гѡ̀ дне́сь, благослове́ни вы̀ бꙋ́дите, и҆ возвесели́тесѧ ѡ҆ а҆вїмеле́сѣ, и҆ то́й ѡ҆ ва́съ да возвесели́тсѧ:
20
а́ще же ни́, да изы́детъ о́гнь от Авімеле́ха и поя́стъ му́жы Сікі́мски и до́мъ маалло́нь: и да изы́детъ о́гнь от муже́й Сікі́мскихъ и от до́му маалло́ня и да поя́стъ Авімеле́ха.
20
а҆́ще же нѝ, да и҆зы́детъ ѻ҆́гнь ѿ а҆вїмеле́ха и҆ поѧ́стъ мꙋ́жы сїкі̑мски и҆ до́мъ мааллѡ́нь: и҆ да и҆зы́детъ ѻ҆́гнь ѿ мꙋже́й сїкі́мскихъ и҆ ѿ до́мꙋ мааллѡ́нѧ и҆ да поѧ́стъ а҆вїмеле́ха.
21
И избѣже́ Іоаѳа́мъ, и побѣже́, и по́йде въ ви́ру, и всели́ся та́мо от лица́ Авімеле́ха бра́та своєго́.
21
И҆ и҆збѣжѐ і҆ѡаѳа́мъ, и҆ побѣжѐ, и҆ по́йде въ ви́рꙋ, и҆ всели́сѧ та́мѡ ѿ лица̀ а҆вїмеле́ха бра́та своегѡ̀.
22
И облада́ Авімеле́хъ во Ізра́или три́ лѣ́та.
22
И҆ ѡ҆блада̀ а҆вїмеле́хъ во і҆и҃ли трѝ лѣ̑та.
23
И посла́ Бо́гъ ду́хъ зо́лъ между́ Авімеле́хомъ и между́ му́жи Сікі́мскими: и возгнуша́шася му́жіє Сікі́мстіи до́момъ Авімеле́ховымъ,
23
И҆ посла̀ бг҃ъ дꙋ́хъ ѕо́лъ междꙋ̀ а҆вїмеле́хомъ и҆ междꙋ̀ мꙋ̑жи сїкі́мскими: и҆ возгнꙋша́шасѧ мꙋ́жїе сїкі́мстїи до́момъ а҆вїмеле́ховымъ,
24
є́же навести́ непра́вду седми́десяти сыно́въ ієроваа́лихъ и кро́ви и́хъ возложи́ти на Авімеле́ха бра́та и́хъ, и́же уби́ и́хъ, и на му́жы Сікі́мски, я́ко укрѣпи́ша ру́цѣ єго́ изби́ти бра́тію свою́:
24
є҆́же навестѝ непра́вдꙋ седми́десѧти сынѡ́въ і҆ероваа́лихъ и҆ крѡ́ви и҆́хъ возложи́ти на а҆вїмеле́ха бра́та и҆́хъ, и҆́же оу҆бѝ и҆̀хъ, и҆ на мꙋ́жы сїкі̑мски, ꙗ҆́кѡ оу҆крѣпи́ша рꙋ́цѣ є҆гѡ̀ и҆зби́ти бра́тїю свою̀:
25
и поста́виша на́нь му́жіє Сікі́мстіи подса́ды на версѣ́хъ го́ръ, и разграбля́ху всѣ́хъ иду́щихъ къ ни́мъ на пути́. И возвѣсти́ся сіє́ Авімеле́ху.
25
и҆ поста́виша на́нь мꙋ́жїе сїкі́мстїи подса̑ды на версѣ́хъ го́ръ, и҆ разграблѧ́хꙋ всѣ́хъ и҆дꙋ́щихъ къ ни̑мъ на пꙋтѝ. И҆ возвѣсти́сѧ сїѐ а҆вїмеле́хꙋ.
26
И пріи́де гаа́лъ сы́нъ Аве́довъ и бра́тія єго́, и преидо́ша въ Сікі́му, и упова́ша на него́ му́жіє Сікі́мстіи:
26
И҆ прїи́де гаа́лъ сы́нъ а҆ве́довъ и҆ бра́тїѧ є҆гѡ̀, и҆ преидо́ша въ сїкі́мꙋ, и҆ оу҆пова́ша на него̀ мꙋ́жїе сїкі́мстїи:
27
и изыдо́ша на село́, и обра́ша віногра́ды своя́, и изгнето́ша, и сотвори́ша ли́ки: и ходи́ша во хра́мъ бого́въ свои́хъ, и ядо́ша и пи́ша, клену́ще Авімеле́ха.
27
и҆ и҆зыдо́ша на село̀, и҆ ѡ҆бра́ша вїногра́ды своѧ̑, и҆ и҆згнето́ша, и҆ сотвори́ша ли́ки: и҆ ходи́ша во хра́мъ богѡ́въ свои́хъ, и҆ ꙗ҆до́ша и҆ пи́ша, кленꙋ́ще а҆вїмеле́ха.
28
И рече́ гаа́лъ сы́нъ Аве́довъ: кто́ є́сть Авімеле́хъ, и кто́ є́сть сы́нъ Сихе́мль, я́ко да порабо́таємъ єму́? не сы́нъ ли ієроваа́ль, и зеву́лъ стра́жъ єго́ ра́бъ єго́ съ му́жи Єммо́ра отца́ Сихе́мля? и почто́ и́мамы рабо́тати єму́?
28
И҆ речѐ гаа́лъ сы́нъ а҆ве́довъ: кто̀ є҆́сть а҆вїмеле́хъ, и҆ кто̀ є҆́сть сы́нъ сѷхе́мль, ꙗ҆́кѡ да порабо́таемъ є҆мꙋ̀; не сы́нъ ли і҆ероваа́ль, и҆ зевꙋ́лъ стра́жъ є҆гѡ̀ ра́бъ є҆гѡ̀ съ мꙋ̑жи є҆ммѡ́ра ѻ҆тца̀ сѷхе́млѧ; и҆ почто̀ и҆́мамы рабо́тати є҆мꙋ̀;
29
и кто́ да́стъ лю́ди сія́ въ ру́ку мою́? и преста́влю Авімеле́ха, и реку́ ко Авімеле́ху: умно́жи си́лу твою́, и изы́ди.
29
и҆ кто̀ да́стъ лю́ди сїѧ̑ въ рꙋ́кꙋ мою̀; и҆ преста́влю а҆вїмеле́ха, и҆ рекꙋ̀ ко а҆вїмеле́хꙋ: оу҆мно́жи си́лꙋ твою̀, и҆ и҆зы́ди.
30
И услы́ша зеву́лъ кня́зь гра́да словеса́ гаа́ла сы́на Аве́дова, и разгнѣ́вася я́ростію:
30
И҆ оу҆слы́ша зевꙋ́лъ кнѧ́зь гра́да словеса̀ гаа́ла сы́на а҆ве́дова, и҆ разгнѣ́васѧ ꙗ҆́ростїю:
31
и посла́ послы́ ко Авімеле́ху о́тай, глаго́ля: се́, гаа́лъ сы́нъ Аве́довъ и бра́тія єго́ пріидо́ша въ Сихе́му, и се́, сі́и обсѣдя́тъ на тя́ гра́дъ:
31
и҆ посла̀ послы̀ ко а҆вїмеле́хꙋ ѡ҆́тай, глаго́лѧ: сѐ, гаа́лъ сы́нъ а҆ве́довъ и҆ бра́тїѧ є҆гѡ̀ прїидо́ша въ сѷхе́мꙋ, и҆ сѐ, сі́и ѡ҆бсѣдѧ́тъ на тѧ̀ гра́дъ:
32
и ны́нѣ воста́ни но́щію ты́ и лю́діє и́же съ тобо́ю, и зася́ди до зау́трія на селѣ́:
32
и҆ нн҃ѣ воста́ни но́щїю ты̀ и҆ лю́дїе и҆̀же съ тобо́ю, и҆ засѧ́ди до заꙋ́трїѧ на селѣ̀:
33
и бу́детъ ра́но, єгда́ взы́детъ со́лнце, обу́трѣєши и протя́гнешися ко гра́ду: и се́, то́й и лю́діє и́же съ ни́мъ изы́дутъ къ тебѣ́, и сотвори́ши єму́, єли́ко возмо́жетъ рука́ твоя́.
33
и҆ бꙋ́детъ ра́нѡ, є҆гда̀ взы́детъ со́лнце, ѡ҆бꙋ́трѣеши и҆ протѧ́гнешисѧ ко гра́дꙋ: и҆ сѐ, то́й и҆ лю́дїе и҆̀же съ ни́мъ и҆зы́дꙋтъ къ тебѣ̀, и҆ сотвори́ши є҆мꙋ̀, є҆ли́кѡ возмо́жетъ рꙋка̀ твоѧ̀.
34
И воста́ Авімеле́хъ и вси́ лю́діє, и́же съ ни́мъ, но́щію, и засѣдо́ша на Сихе́мъ на четы́ри ча́сти.
34
И҆ воста̀ а҆вїмеле́хъ и҆ всѝ лю́дїе, и҆̀же съ ни́мъ, но́щїю, и҆ засѣдо́ша на сѷхе́мъ на четы́ри ча̑сти.
35
И бы́сть зау́тра, и изы́де гаа́лъ сы́нъ Аве́довъ и ста́ предъ две́рію вра́тъ гра́дскихъ. И воста́ Авімеле́хъ и лю́діє, и́же съ ни́мъ, от заса́ды.
35
И҆ бы́сть заꙋ́тра, и҆ и҆зы́де гаа́лъ сы́нъ а҆ве́довъ и҆ ста̀ пред̾ две́рїю вра́тъ гра́дскихъ. И҆ воста̀ а҆вїмеле́хъ и҆ лю́дїе, и҆̀же съ ни́мъ, ѿ заса́ды.
36
И ви́дѣ гаа́лъ сы́нъ Аве́довъ лю́ди и рече́ къ зеву́лу: се́, наро́дъ люді́й исхо́дитъ съ верхо́въ го́ръ. И рече́ къ нему́ зеву́лъ: стѣ́нь го́ръ ты́ ви́диши я́ко му́жы.
36
И҆ ви́дѣ гаа́лъ сы́нъ а҆ве́довъ лю́ди и҆ речѐ къ зевꙋ́лꙋ: сѐ, наро́дъ люді́й и҆схо́дитъ съ верхѡ́въ го́ръ. И҆ речѐ къ немꙋ̀ зевꙋ́лъ: стѣ́нь го́ръ ты̀ ви́диши ꙗ҆́кѡ мꙋ́жы.
37
И приложи́ єще́ гаа́лъ глаго́лати и рече́: се́, лю́діє исхо́дятъ при мо́ри от высоты́ земли́, и по́лкъ єди́нъ и́детъ путе́мъ дубра́вы маонені́мъ.
37
И҆ приложѝ є҆щѐ гаа́лъ глаго́лати и҆ речѐ: сѐ, лю́дїе и҆схо́дѧтъ при мо́ри ѿ высоты̀ землѝ, и҆ по́лкъ є҆ди́нъ и҆́детъ пꙋте́мъ дꙋбра́вы маѡнені́мъ.
38
И рече́ къ нему́ зеву́лъ: и гдѣ́ су́ть ны́нѣ уста́ твоя́ глаго́лющая: кто́ є́сть Авімеле́хъ, я́ко порабо́таємъ єму́? не сі́и ли су́ть лю́діє, я́же ты́ уничто́жилъ єси́? изы́ди у́бо ны́нѣ, и ополчи́ся проти́ву и́хъ.
38
И҆ речѐ къ немꙋ̀ зевꙋ́лъ: и҆ гдѣ̀ сꙋ́ть нн҃ѣ оу҆ста̀ твоѧ̑ глагѡ́лющаѧ: кто̀ є҆́сть а҆вїмеле́хъ, ꙗ҆́кѡ порабо́таемъ є҆мꙋ̀; не сі́и ли сꙋ́ть лю́дїе, ꙗ҆̀же ты̀ оу҆ничто́жилъ є҆сѝ; и҆зы́ди оу҆̀бо нн҃ѣ, и҆ ѡ҆полчи́сѧ проти́вꙋ и҆́хъ.
39
И изы́де гаа́лъ предъ му́жы сихе́мски, и ополчи́ся проти́ву Авімеле́ху:
39
И҆ и҆зы́де гаа́лъ пред̾ мꙋ́жы сѷхє́мски, и҆ ѡ҆полчи́сѧ проти́вꙋ а҆вїмеле́хꙋ:
40
и погна́ єго́ Авімеле́хъ, и побѣже́ от лица́ єго́: и падо́ша я́звенніи мно́зи да́же до вра́тъ гра́дскихъ.
40
и҆ погна̀ є҆го̀ а҆вїмеле́хъ, и҆ побѣжѐ ѿ лица̀ є҆гѡ̀: и҆ падо́ша ꙗ҆́звеннїи мно́зи да́же до вра́тъ гра́дскихъ.
41
И вни́де Авімеле́хъ во Арі́му: и зеву́лъ изгна́ гаа́ла и бра́тію єго́, да не живу́тъ въ Сихе́мѣ.
41
И҆ вни́де а҆вїмеле́хъ во а҆рі́мꙋ: и҆ зевꙋ́лъ и҆згна̀ гаа́ла и҆ бра́тїю є҆гѡ̀, да не живꙋ́тъ въ сѷхе́мѣ.
42
И бы́сть нау́тріє, и изыдо́ша лю́діє на по́ле, и повѣ́даша Авімеле́ху:
42
И҆ бы́сть наꙋ́трїе, и҆ и҆зыдо́ша лю́дїе на по́ле, и҆ повѣ́даша а҆вїмеле́хꙋ:
43
и взя́ люді́й, и раздѣли́ и́хъ на три́ ча́сти, и зася́де на селѣ́: и ви́дѣ, и се́, лю́діє изыдо́ша изъ гра́да, и воста́ на ня́, и изби́ и́хъ.
43
и҆ взѧ̀ люді́й, и҆ раздѣлѝ и҆̀хъ на трѝ ча̑сти, и҆ засѧ́де на селѣ̀: и҆ ви́дѣ, и҆ сѐ, лю́дїе и҆зыдо́ша и҆з̾ гра́да, и҆ воста̀ на нѧ̀, и҆ и҆збѝ и҆̀хъ.
44
И Авімеле́хъ и нача́лницы, и́же съ ни́мъ, протяго́шася и ста́ша у две́рій вра́тъ гра́дскихъ: и двѣ́ ча́сти пролія́шася на вся́, я́же на селѣ́, и изби́ша я́.
44
И҆ а҆вїмеле́хъ и҆ нача̑лницы, и҆̀же съ ни́мъ, протѧго́шасѧ и҆ ста́ша оу҆ две́рїй вра́тъ гра́дскихъ: и҆ двѣ̀ ча̑сти пролїѧ́шасѧ на всѧ̑, ꙗ҆̀же на селѣ̀, и҆ и҆зби́ша ѧ҆̀.
45
Авімеле́хъ же добыва́ше гра́да ве́сь де́нь то́й, и взя́ гра́дъ, и лю́ди и́же въ не́мъ изби́, и разори́ гра́дъ, и посѣ́я въ не́мъ со́ль.
45
А҆вїмеле́хъ же добыва́ше гра́да ве́сь де́нь то́й, и҆ взѧ̀ гра́дъ, и҆ лю́ди и҆̀же въ не́мъ и҆збѝ, и҆ разорѝ гра́дъ, и҆ посѣ́ѧ въ не́мъ со́ль.
46
И услы́шаша сіє́ вси́ му́жіє столпа́ Сихе́мля и внидо́ша въ тве́рдь до́му [бо́га] веѳилвері́ѳъ.
46
И҆ оу҆слы́шаша сїѐ всѝ мꙋ́жїе столпа̀ сѷхе́млѧ и҆ внидо́ша въ тве́рдь до́мꙋ (бо́га) веѳилвері́ѳъ.
47
И возвѣсти́ся Авімеле́ху, я́ко собра́шася вси́ му́жіє столпа́ Сихе́мска.
47
И҆ возвѣсти́сѧ а҆вїмеле́хꙋ, ꙗ҆́кѡ собра́шасѧ всѝ мꙋ́жїе столпа̀ сѷхе́мска.
48
И взы́де Авімеле́хъ на го́ру селмо́нъ са́мъ и вси́ лю́діє, и́же съ ни́мъ: и взя́ Авімеле́хъ сѣки́ру въ ру́ку свою́, и усѣче́ вѣ́твь от дре́ва, и воздви́же ю́, и возложи́ на ра́му свою́: и рече́ лю́демъ и́же съ ни́мъ: є́же ви́дѣсте мя́ творя́ща, сотвори́те ско́ро я́коже и а́зъ.
48
И҆ взы́де а҆вїмеле́хъ на го́рꙋ селмѡ́нъ са́мъ и҆ всѝ лю́дїе, и҆̀же съ ни́мъ: и҆ взѧ̀ а҆вїмеле́хъ сѣки́рꙋ въ рꙋ́кꙋ свою̀, и҆ оу҆сѣчѐ вѣ́твь ѿ дре́ва, и҆ воздви́же ю҆̀, и҆ возложѝ на ра́мꙋ свою̀: и҆ речѐ лю́демъ и҆̀же съ ни́мъ: є҆́же ви́дѣсте мѧ̀ творѧ́ща, сотвори́те ско́рѡ ꙗ҆́коже и҆ а҆́зъ.
49
И усѣко́ша вси́ лю́діє вѣ́твія и взя́ша, и поидо́ша вслѣ́дъ Авімеле́ха, и возложи́ша на тверды́ню, и запали́ша на ни́хъ тверды́ню огне́мъ: и изомро́ша вси́ лю́діє столпа́ Сихе́мска до ты́сящи муже́й и же́нъ.
49
И҆ оу҆сѣко́ша всѝ лю́дїе вѣ̑твїѧ и҆ взѧ́ша, и҆ поидо́ша в̾слѣ́дъ а҆вїмеле́ха, и҆ возложи́ша на тверды́ню, и҆ запали́ша на ни́хъ тверды́ню ѻ҆гне́мъ: и҆ и҆зомро́ша всѝ лю́дїе столпа̀ сѷхе́мска до ты́сѧщи мꙋже́й и҆ же́нъ.
50
И и́де Авімеле́хъ въ Ѳиви́съ и обся́де єго́, и взя́ єго́:
50
И҆ и҆́де а҆вїмеле́хъ въ ѳиви́съ и҆ ѡ҆бсѧ́де є҆го̀, и҆ взѧ̀ є҆го̀:
51
и сто́лпъ бѣ́ тве́рдъ средѣ́ гра́да, и вбѣго́ша ту́ вси́ му́жіє и жены́ и вси́ старѣ́йшины гра́да, и заключи́шася, и взыдо́ша на кро́въ столпа́:
51
и҆ сто́лпъ бѣ̀ тве́рдъ средѣ̀ гра́да, и҆ вбѣго́ша тꙋ̀ всѝ мꙋ́жїе и҆ жєны̀ и҆ всѝ старѣ̑йшины гра́да, и҆ заключи́шасѧ, и҆ взыдо́ша на кро́въ столпа̀:
52
и пріи́де Авімеле́хъ до столпа́, и супроти́вишася єму́: и приступи́ Авімеле́хъ ко врато́мъ столпа́, є́же запали́ти єго́ огне́мъ:
52
и҆ прїи́де а҆вїмеле́хъ до столпа̀, и҆ сꙋпроти́вишасѧ є҆мꙋ̀: и҆ пристꙋпѝ а҆вїмеле́хъ ко вратѡ́мъ столпа̀, є҆́же запали́ти є҆го̀ ѻ҆гне́мъ:
53
и све́рже жена́ єди́на уло́мокъ жерно́вный на главу́ Авімеле́ха, и сокруши́ єму́ те́мя:
53
и҆ све́рже жена̀ є҆ди́на оу҆ло́мокъ жерно́вный на главꙋ̀ а҆вїмеле́ха, и҆ сокрꙋшѝ є҆мꙋ̀ те́мѧ:
54
и возопи́ ско́ро Авімеле́хъ ко о́троку нося́щему сосу́ды єго́ и рече́ єму́: извлецы́ ме́чь тво́й и убі́й мя́, да не реку́тъ, я́ко жена́ уби́ єго́. И прободе́ єго́ о́трокъ єго́, и у́мре.
54
и҆ возопѝ ско́рѡ а҆вїмеле́хъ ко ѻ҆́трокꙋ носѧ́щемꙋ сосꙋ́ды є҆гѡ̀ и҆ речѐ є҆мꙋ̀: и҆звлецы̀ ме́чь тво́й и҆ оу҆бі́й мѧ̀, да не рекꙋ́тъ, ꙗ҆́кѡ жена̀ оу҆бѝ є҆го̀. И҆ прободѐ є҆го̀ ѻ҆́трокъ є҆гѡ̀, и҆ оу҆́мре.
55
И ви́дѣша му́жіє Ізра́илстіи, я́ко у́мре Авімеле́хъ: и отидо́ша кі́йждо на своє́ мѣ́сто.
55
И҆ ви́дѣша мꙋ́жїе і҆и҃лстїи, ꙗ҆́кѡ оу҆́мре а҆вїмеле́хъ: и҆ ѿидо́ша кі́йждо на своѐ мѣ́сто.
56
И воздаде́ Бо́гъ зло́ Авімеле́ху, є́же сотвори́ отцу́ своєму́, уби́въ се́дмьдесятъ бра́тій свои́хъ:
56
И҆ воздадѐ бг҃ъ ѕло̀ а҆вїмеле́хꙋ, є҆́же сотворѝ ѻ҆тцꙋ̀ своемꙋ̀, оу҆би́въ се́дмьдесѧтъ бра́тїй свои́хъ:
57
и вся́ку зло́бу муже́й Сихе́млихъ обрати́ Бо́гъ на главы́ и́хъ: и взы́де на ня́ кля́тва Іоаѳа́ма сы́на ієроваа́ля.
57
и҆ всѧ́кꙋ ѕло́бꙋ мꙋже́й сѷхе́млихъ ѡ҆братѝ бг҃ъ на главы̑ и҆́хъ: и҆ взы́де на нѧ̀ клѧ́тва і҆ѡаѳа́ма сы́на і҆ероваа́лѧ.