¹

Сія́ глаго́летъ му́жъ вѣ́рующымъ богови, и почива́ю:

²

безу́мнѣє бо є́смь от всѣ́хъ человѣ́къ, и ра́зума человѣ́ческаго нѣ́сть во мнѣ́:

³

Бо́гъ же научи́ мя прему́дрости, и ра́зумъ святы́хъ уразумѣ́хъ.

⁴

Кто́ взы́де на не́бо и сни́де? кто́ собра́ вѣ́тры въ нѣ́дра? кто́ возврати́ во́ду въ ри́зу? кто́ обдержа́ вся́ концы́ земли́? ко́є и́мя єго́? или́ ко́є и́мя сы́ну єго́, да разумѣ́єши?

⁵

Вся́ бо словеса́ Бо́жія раздеже́на: защища́єтъ же са́мъ благоговѣ́ющихъ єму́.

⁶

Не приложи́ ко словесе́мъ єго́, да не обличи́тъ тя́, и ло́жь бу́деши.

⁷

Дво́є прошу́ у тебе́: не отими́ от мене́ благода́ти пре́жде уме́ртвія моєго́:

⁸

су́єтно сло́во и ло́жно дале́че от мене́ сотвори́, бога́тства же и нищеты́ не да́ждь ми́: устро́й же ми́ потре́бная и самодово́лная,

⁹

да не насы́щься ло́жь бу́ду и реку́: кто́ мя ви́дитъ? или́ обнища́въ укра́ду и клену́ся и́менемъ Бо́жіимъ.

¹⁰

Не преда́ждь раба́ въ ру́цѣ господи́на, да не когда́ проклене́тъ тя́, и исче́знеши.

¹¹

Ча́до зло́ клене́тъ отца́ и ма́терь не благослови́тъ.

¹²

Ча́до зло́ пра́ведна себе́ су́дитъ, исхо́да же своєго́ не измы́.

¹³

Ча́до зло́ высо́ки о́чи и́мать, вѣ́ждома же свои́ма возно́сится.

¹⁴

Ча́до зло́ ме́чь зу́бы [своя́] и́мать, и члено́вныя я́ко сѣ́чиво, є́же губи́ти и пояда́ти смире́нныя от земли́ и убо́гія и́хъ от человѣ́къ.

¹⁵

Пія́вица имѣ́ три́ дще́ри, любо́вію возлю́блены, и три́ сія́ не насы́тишася єя́, и четве́ртая не удовли́ся рещи́: дово́лно [ми́ є́сть].

¹⁶

А́дъ и по́хоть жены́, и земля́ ненапоє́ная водо́ю и вода́ и о́гнь не реку́тъ: довлѣ́єтъ.

¹⁷

О́ко руга́ющеєся отцу́ и досажда́ющеє ста́рости ма́терни, да исто́ргнутъ є́ вра́нове от де́брія и да снѣдя́тъ є́ птенцы́ о́рли.

¹⁸

Тріє́ ми су́ть невозмо́жная уразумѣ́ти, и четве́ртаго не вѣ́мъ:

¹⁹

слѣда́ орла́ паря́ща [по возду́ху] и пути́ змі́а [ползу́ща] по ка́мени, и стези́ корабля́ плову́ща по мо́рю и путі́й му́жа въ ю́ности [єго́].

²⁰

Тако́въ пу́ть жены́ блудни́цы: я́же єгда́ сотвори́тъ, и измы́вшися, ничто́же, рече́, содѣ́яхъ нелѣ́по.

²¹

Тре́ми трясе́тся земля́, четве́ртаго же не мо́жетъ понести́:

²²

а́ще ра́бъ воцари́тся, и безу́мный испо́лнится пи́щею, и раба́ а́ще изжене́тъ свою́ госпожу́,

²³

и ме́рзкая жена́ а́ще ключи́тся добру́ му́жу.

²⁴

Четы́ри же су́ть малѣ́йшая на земли́, сія́ же су́ть мудрѣ́йша му́дрыхъ:

²⁵

мра́віє, и́мже нѣ́сть крѣ́пости и уготовля́ютъ въ жа́тву пи́щу:

²⁶

и хірогри́лли, язы́къ не крѣ́покъ, и́же сотвори́ша въ ка́меніихъ до́мы своя́:

²⁷

безца́рни су́ть пру́зіє, и вою́ютъ от єди́наго повелѣ́нія благочи́нно:

²⁸

я́щерица [Євр.: пау́къ.], рука́ми опира́ющися и удо́бь уловля́єма су́щи, живе́тъ во тве́рдехъ царе́выхъ.

²⁹

Тріє́ су́ть, я́же благопоспѣ́шно хо́дятъ, четве́ртоє же, є́же до́брѣ прохо́дитъ:

³⁰

ски́менъ льво́въ крѣпча́є звѣре́й, и́же не отвраща́єтся, ни устраша́єтся скота́,

³¹

и пѣ́тель ходя́ въ ко́кошѣхъ благоду́шенъ, и козе́лъ предводи́тель ста́ду, и ца́рь глаго́ляй къ наро́ду во язы́цѣ.

³²

А́ще вда́си себе́ въ весе́ліє и простре́ши ру́ку твою́ со сва́ромъ, пору́ганъ бу́деши.

³³

Мельзи́ млеко́, и бу́детъ ма́сло. А́ще ли но́здри че́шеши, изы́детъ кро́вь: а́ще же извлече́ши словеса́, изы́дутъ су́дове и тя́жбы.