0

Аллилу́іа.

¹

Во исхо́дѣ Ізра́илевѣ от Єги́пта, до́му Іа́ковля изъ люді́й ва́рваръ,

²

бы́сть Іуде́а святы́ня Єго́, Ізра́иль о́бласть Єго́.

³

Мо́ре ви́дѣ и побѣже́, Іорда́нъ возврати́ся вспя́ть:

⁴

го́ры взыгра́шася я́ко овни́, и хо́лми я́ко а́гнцы о́вчіи.

⁵

Что́ ти є́сть, мо́ре, я́ко побѣ́гло єси́, и тебѣ́, Іорда́не, я́ко возврати́лся єси́ вспя́ть:

⁶

го́ры, я́ко взыгра́стеся я́ко овни́, и хо́лми я́ко а́гнцы о́вчіи.

⁷

От лица́ Госпо́дня подви́жеся земля́, от лица́ Бо́га Іа́ковля:

⁸

обра́щшаго ка́мень во єзе́ра водна́я и несѣко́мый во исто́чники водны́я.

⁹

Не на́мъ, Го́споди, не на́мъ, но и́мени Твоєму́ да́ждь сла́ву о ми́лости Твоє́й и и́стинѣ Твоє́й:

¹⁰

да не когда́ реку́тъ язы́цы: гдѣ́ є́сть Бо́гъ и́хъ?

¹¹

Бо́гъ же на́шъ на небеси́ и на земли́, вся́ єли́ка восхотѣ́, сотвори́.

¹²

І́доли язы́къ сребро́ и зла́то, дѣла́ ру́къ человѣ́ческихъ:

¹³

уста́ и́мутъ, и не возглаго́лютъ: о́чи и́мутъ, и не у́зрятъ:

¹⁴

у́шы и́мутъ, и не услы́шатъ: но́здри и́мутъ, и не обоня́ютъ:

¹⁵

ру́цѣ и́мутъ, и не ося́жутъ: но́зѣ и́мутъ, и не по́йдутъ: не возглася́тъ горта́немъ свои́мъ.

¹⁶

Подо́бни и́мъ да бу́дутъ творя́щіи я́ и вси́ надѣ́ющіися на ня́.

¹⁷

До́мъ Ізра́илевъ упова́ на Го́спода: помо́щникъ и защи́титель и́мъ є́сть.

¹⁸

До́мъ Ааро́нь упова́ на Го́спода: помо́щникъ и защи́титель и́мъ є́сть.

¹⁹

Боя́щіися Го́спода упова́ша на Го́спода: помо́щникъ и защи́титель и́мъ є́сть.

²⁰

Госпо́дь помяну́въ ны́ благослови́лъ є́сть на́съ: благослови́лъ є́сть до́мъ Ізра́илевъ, благослови́лъ є́сть до́мъ Ааро́нь,

²¹

благослови́лъ є́сть боя́щыяся Го́спода, ма́лыя съ вели́кими.

²²

Да приложи́тъ Госпо́дь на вы́, на вы́ и на сы́ны ва́шя:

²³

благослове́ни вы́ Го́сподеви, сотво́ршему небо и зе́млю.

²⁴

Не́бо небесе́ Го́сподеви, зе́млю же даде́ сыново́мъ человѣ́ческимъ.

²⁵

Не ме́ртвіи восхва́лятъ Тя́, Го́споди, ниже́ вси́ низходя́щіи во а́дъ:

²⁶

но мы́ живі́и благослови́мъ Го́спода отны́нѣ и до вѣ́ка.