0

Аллилу́іа.

¹

Хвали́те и́мя Госпо́дне, хвали́те, раби́ Го́спода,

²

стоя́щіи во хра́мѣ Госпо́дни, во дво́рѣхъ до́му Бо́га на́шего.

³

Хвали́те Го́спода, я́ко бла́гъ Госпо́дь: по́йте и́мени Єго́, я́ко добро́:

⁴

я́ко Іа́кова избра́ Себѣ́ Госпо́дь, Ізра́иля въ достоя́ніє Себѣ́:

⁵

я́ко а́зъ позна́хъ, я́ко ве́лій Госпо́дь, и Госпо́дь на́шъ надъ всѣ́ми бо́ги:

⁶

вся́, єли́ка восхотѣ́ Госпо́дь, сотвори́ на небеси́ и на земли́, въ моря́хъ и во всѣ́хъ бе́зднахъ.

⁷

Возводя́ о́блаки от послѣ́днихъ земли́, мо́лніи въ до́ждь сотвори́, изводя́й вѣ́тры от сокро́вищъ Свои́хъ.

⁸

И́же порази́ пе́рвенцы Єги́петскія от человѣ́ка до скота́:

⁹

посла́ зна́менія и чудеса́ посредѣ́ тебе́, Єги́пте, на фарао́на и на вся́ рабы́ єго́.

¹⁰

И́же порази́ язы́ки мно́ги и изби́ цари́ крѣ́пки:

¹¹

Сио́на царя́ Аморре́йска и О́га царя́ Васа́нска, и вся́ ца́рствія Ханаа́нска:

¹²

и даде́ зе́млю и́хъ достоя́ніє, достоя́ніє Ізра́илю лю́демъ Свои́мъ.

¹³

Го́споди, и́мя Твоє́ въ вѣ́къ, и па́мять Твоя́ въ ро́дъ и ро́дъ:

¹⁴

я́ко суди́ти и́мать Госпо́дь лю́демъ Свои́мъ, и о рабѣ́хъ Свои́хъ умо́лится.

¹⁵

І́доли язы́къ сребро́ и зла́то, дѣла́ ру́къ человѣ́ческихъ:

¹⁶

уста́ и́мутъ, и не возглаго́лютъ: о́чи и́мутъ, и не у́зрятъ:

¹⁷

у́ши и́мутъ, и не услы́шатъ: ниже́ бо є́сть ду́хъ во устѣ́хъ и́хъ.

¹⁸

Подо́бни и́мъ да бу́дутъ творя́щіи я́ и вси́ надѣ́ющіися на ня́.

¹⁹

До́ме Ізра́илевъ, благослови́те Го́спода: до́ме Ааро́нь, благослови́те Го́спода: до́ме Леві́инъ, благослови́те Го́спода:

²⁰

боя́щіися Го́спода, благослови́те Го́спода.

²¹

Благослове́нъ Госпо́дь от Сіо́на, живы́й во Ієрусали́мѣ.