¹

Псало́мъ пѣ́сни сыно́въ Коре́овыхъ, вторы́я суббо́ты.

²

Ве́лій Госпо́дь и хва́ленъ зѣло́ во гра́дѣ Бо́га на́шего, въ горѣ́ святѣ́й Єго́,

³

благокоре́ннымъ ра́дованіємъ всея́ земли́: го́ры Сіо́нскія, ре́бра сѣ́верова, гра́дъ Царя́ вели́каго.

⁴

Бо́гъ въ тя́жестѣхъ {во хра́мѣхъ} єго́ зна́ємь є́сть, єгда́ заступа́єтъ и́.

⁵

Я́ко се́, ца́ріє зе́мстіи собра́шася, снидо́шася вку́пѣ:

⁶

ті́и ви́дѣвше та́ко, удиви́шася, смято́шася, подвиго́шася:

⁷

тре́петъ прія́тъ я́ та́мо, болѣ́зни я́ко ражда́ющія.

⁸

Ду́хомъ бу́рнымъ сокруши́ши корабли́ Ѳарсі́йскія.

⁹

Я́коже слы́шахомъ, та́ко и ви́дѣхомъ во гра́дѣ Го́спода си́лъ, во гра́дѣ Бо́га на́шего: Бо́гъ основа́ и въ вѣ́къ.

¹⁰

Прія́хомъ, Бо́же, ми́лость Твою́ посредѣ́ люді́й Твои́хъ.

¹¹

По и́мени Твоєму́, Бо́же, та́ко и хвала́ Твоя́ на конца́хъ земли́: пра́вды испо́лнь десни́ца Твоя́.

¹²

Да возвесели́тся гора́ Сіо́нская, и да возра́дуются дще́ри Іуде́йскія, суде́бъ ра́ди Твои́хъ, Го́споди.

¹³

Обыди́те Сіо́нъ и обыми́те єго́, повѣ́дите въ столпѣ́хъ єго́:

¹⁴

положи́те сердца́ ва́ша въ си́лу єго́, и раздѣли́те до́мы єго́, я́ко да повѣ́сте въ ро́дѣ инѣ́мъ.

¹⁵

Я́ко То́й є́сть Бо́гъ на́шъ во вѣ́къ и въ вѣ́къ вѣ́ка: То́й упасе́тъ на́съ во вѣ́ки.