¹

Въ коне́цъ, въ пѣ́снехъ, псало́мъ Аса́фу, пѣ́снь ко Ассирі́анину.

²

Вѣ́домъ во Іуде́и Бо́гъ: во Ізра́или ве́ліє и́мя Єго́.

³

И бы́сть въ ми́рѣ мѣ́сто Єго́, и жили́ще Єго́ въ Сіо́нѣ.

⁴

Та́мо сокруши́ крѣ́пости луко́въ, ору́жіє и ме́чь и бра́нь.

⁵

Просвѣща́єши Ты́ ди́вно от го́ръ вѣ́чныхъ.

⁶

Смято́шася вси́ неразу́мніи се́рдцемъ: усну́ша сно́мъ свои́мъ, и ничто́же обрѣто́ша вси́ му́жіє бога́тства въ рука́хъ свои́хъ.

⁷

От запреще́нія Твоєго́, Бо́же Іа́ковль, воздрема́ша всѣ́дшіи на ко́ни.

⁸

Ты́ стра́шенъ єси́, и кто́ противоста́нетъ Тебѣ́? Отто́лѣ гнѣ́въ Тво́й.

⁹

Съ небесе́ слы́шанъ сотвори́лъ єси́ су́дъ: земля́ убоя́ся и умолча́,

¹⁰

внегда́ воста́ти на су́дъ Бо́гу, спасти́ вся́ кро́ткія земли́.

¹¹

Я́ко помышле́ніє человѣ́ческоє исповѣ́стся Тебѣ́, и оста́нокъ помышле́нія пра́зднуєтъ Ти́.

¹²

Помоли́теся и воздади́те Го́сподеви Бо́гу на́шему: вси́, и́же о́крестъ Єго́, принесу́тъ да́ры

¹³

Стра́шному и отъе́млющему ду́хи князе́й, стра́шному па́че царе́й земны́хъ.