¹

Пѣ́снь псалма́ Аса́фу.

²

Бо́же, кто́ уподо́бится Тебѣ́? Не премолчи́, ниже́ укроти́ {ниже́ укроти́ся}, Бо́же:

³

я́ко се́, врази́ Твои́ возшумѣ́ша, и ненави́дящіи Тя́ воздвиго́ша главу́.

⁴

На лю́ди Твоя́ лука́вноваша во́лею, и совѣща́ша на святы́я Твоя́.

⁵

Рѣ́ша: пріиди́те и потреби́мъ я́ от язы́къ, и не помяне́тся и́мя Ізра́илево ктому́.

⁶

Я́ко совѣща́ша єдиномышле́ніємъ вку́пѣ, на Тя́ завѣ́тъ завѣща́ша:

⁷

селе́нія Ідуме́йска и Ісма́иліте, Моа́въ и Ага́ряне,

⁸

Гева́лъ и Аммо́нъ и Амали́къ, иноплеме́нницы съ живу́щими въ Ти́рѣ:

⁹

и́бо и Ассу́ръ пріи́де съ ни́ми, бы́ша въ заступле́ніє сыново́мъ Ло́товымъ:

¹⁰

сотвори́ и́мъ я́ко Мадіа́му и Сіса́рѣ, я́ко Іаві́му въ пото́цѣ Кі́ссовѣ:

¹¹

потреби́шася во Аєндо́рѣ, бы́ша я́ко гно́й земны́й.

¹²

Положи́ кня́зи и́хъ я́ко Ори́ва и Зи́ва, и Зеве́а и Салма́на, вся́ кня́зи и́хъ,

¹³

и́же рѣ́ша: да наслѣ́димъ себѣ́ святи́лище Бо́жіє.

¹⁴

Бо́же мо́й, положи́ я́ я́ко ко́ло, я́ко тро́сть предъ лице́мъ вѣ́тра.

¹⁵

Я́ко о́гнь попаля́яй дубра́вы, я́ко пла́мень пожига́яй го́ры:

¹⁶

та́ко пожене́ши я́ бу́рею Твоє́ю, и гнѣ́вомъ Твои́мъ смяте́ши я́.

¹⁷

Испо́лни ли́ца и́хъ безче́стія, и взы́щутъ и́мене Твоєго́, Го́споди.

¹⁸

Да постыдя́тся и смяту́тся въ вѣ́къ вѣ́ка, и посра́мятся и поги́бнутъ.

¹⁹

И да позна́ютъ, я́ко и́мя Тебѣ́ Госпо́дь, Ты́ єди́нъ Вы́шній по все́й земли́.