¹

Псало́мъ пѣ́сни, въ де́нь суббо́тный.

¹

Псало́м пі́сні, в день субо́тний, 91.

²

Благо є́сть исповѣ́датися Го́сподеви и пѣ́ти и́мени Твоєму́, Вы́шній:

²

Бла́го єсть іспові́датися Го́сподеві і пі́ти і́мені Твоєму́, Ви́шній;

³

возвѣща́ти зау́тра ми́лость Твою́ и и́стину Твою́ на вся́ку но́щь,

³

возвіща́ти зау́тра ми́лость Твою́ і і́стину Твою́ на вся́ку нощ,

⁴

въ десятостру́ннѣмъ псалти́ри съ пѣ́снію въ гу́слехъ.

⁴

в десятостру́ннім псалти́рі с пі́снію в гу́слех.

⁵

Я́ко возвесели́лъ мя́ єси́, Го́споди, въ творе́ніи Твоє́мъ, и въ дѣ́лѣхъ руку́ Твоє́ю возра́дуюся.

⁵

Я́ко возвесели́л м'я єси́, Го́споди, в творе́нії Твоє́м, і в ді́ліх руку́ Твоє́ю возра́дуюся.

⁶

Я́ко возвели́чишася дѣла́ Твоя́, Го́споди: зѣло́ углуби́шася помышле́нія Твоя́.

⁶

Я́ко возвели́чишася діла́ Твоя́, Го́споди; зіло́ углуби́шася помишле́нія Твоя́.

⁷

Му́жъ безу́менъ не позна́єтъ, и неразуми́въ не разумѣ́єтъ си́хъ.

⁷

Муж безу́мен не позна́єть, і неразуми́в не разумі́єть сих.

⁸

Внегда́ прозябо́ша грѣ́шницы я́ко трава́, и пронико́ша вси́ дѣ́лающіи беззако́ніє, я́ко да потребя́тся въ вѣ́къ вѣ́ка:

⁸

Внегда́ прозябо́ша грі́шници я́ко трава́, і пронико́ша всі ді́лающії беззако́ніє, я́ко да потреб'я́ться в вік ві́ка;

⁹

Ты́ же вы́шній во вѣ́къ, Го́споди.

⁹

Ти же Ви́шній во вік, Го́споди.

¹⁰

Я́ко се́, врази́ Твои́, Го́споди, я́ко се́, врази́ Твои́ поги́бнутъ, и разы́дутся вси́ дѣ́лающіи беззако́ніє.

¹⁰

Я́ко се вразі́ Твої́, Го́споди, я́ко се вразі́ Твої́ поги́бнуть і рази́дуться всі ді́лающії беззако́ніє.

¹¹

И вознесе́тся я́ко єдиноро́га ро́гъ мо́й, и ста́рость моя́ въ єле́и масти́тѣ:

¹¹

І вознесе́ться я́ко єдиноро́га рог мой, і ста́рость моя́ в єле́ї масти́ті;

¹²

и воззрѣ́ о́ко моє́ на враги́ моя́, и востаю́щыя на мя́ лука́внующыя услы́шитъ у́хо моє́.

¹²

і воззрі́ о́ко моє́ на враги́ моя́, і востаю́щия на м'я лука́внующия усли́шить у́хо моє́.

¹³

Пра́ведникъ я́ко фі́ніксъ процвѣте́тъ: я́ко ке́дръ, и́же въ Ліва́нѣ, умно́жится.

¹³

Пра́ведник, я́ко фі́нікс процвіте́ть, я́ко кедр, і́же в Лива́ні, умно́житься.

¹⁴

Насажде́ни въ дому́ Госпо́дни во дво́рѣхъ Бо́га на́шего процвѣту́тъ:

¹⁴

Насажде́ні в дому́ Госпо́дні во дво́ріх Бо́га на́шего процвіту́ть;

¹⁵

єще́ умно́жатся въ ста́рости масти́тѣ, и благопріє́млюще бу́дутъ.

¹⁵

єще́ умно́жаться в ста́рості масти́ті, і благоприє́млюще бу́дуть.

¹⁶

Да возвѣстя́тъ, я́ко пра́въ Госпо́дь Бо́гъ на́шъ, и нѣ́сть непра́вды въ Не́мъ.

¹⁶

Да возвістя́ть, я́ко прав Госпо́дь Бог наш, і ність непра́вди в Нем.