0

Псало́мъ Дави́ду, єгда́ земля́ єго́ устроя́шеся, не надпи́санъ у євре́й

¹

Госпо́дь воцари́ся, да ра́дуєтся земля́, да веселя́тся о́строви мно́зи.

²

О́блакъ и мра́къ о́крестъ Єго́: пра́вда и судьба́ исправле́ніє престо́ла Єго́.

³

О́гнь предъ Ни́мъ предъи́детъ и попали́тъ о́крестъ враги́ Єго́.

⁴

Освѣти́ша мо́лнія Єго́ вселе́нную: ви́дѣ и подви́жеся земля́.

⁵

Го́ры я́ко во́скъ раста́яша от лица́ Госпо́дня, от лица́ Го́спода всея́ земли́.

⁶

Возвѣсти́ша небеса́ пра́вду Єго́, и ви́дѣша вси́ лю́діє сла́ву Єго́.

⁷

Да постыдя́тся вси́ кла́няющіися истука́ннымъ, хва́лящіися о і́долѣхъ свои́хъ: поклони́теся Єму́, вси́ а́нгели Єго́.

⁸

Слы́ша и возвесели́ся Сіо́нъ, и возра́довашася дще́ри Іуде́йскія, суде́бъ ра́ди Твои́хъ, Го́споди:

⁹

я́ко Ты́ Госпо́дь вы́шній надъ все́ю земле́ю, зѣло́ превозне́слся єси́ надъ всѣ́ми бо́ги.

¹⁰

Лю́бящіи Го́спода, ненави́дите зла́я: храни́тъ Госпо́дь ду́шы преподо́бныхъ Свои́хъ, изъ руки́ грѣ́шничи изба́витъ я́.

¹¹

Свѣ́тъ возсія́ пра́веднику, и пра́вымъ се́рдцемъ весе́ліє.

¹²

Весели́теся, пра́ведніи, о Го́сподѣ, и исповѣ́дайте па́мять святы́ни Єго́.