Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
І приложи́ша си́нове Ізра́їлеви сотвори́ти зло́є пред Го́сподем; і Ао́д у́мре.
1
И приложи́ша сы́нове Ізра́илевы сотвори́ти зло́є предъ Го́сподемъ: и Ао́дъ у́мре.
2
І отдаде́ їх Госпо́дь в ру́ку Іави́на, царя́ Ханаа́нська, і́же ца́рствова во Асо́рі. І воєво́да си́ли єго́ Сиса́ра, і той жив'я́ше во Арисо́фі язи́ков.
2
И отдаде́ и́хъ Госпо́дь въ ру́ку Іаві́на царя́ Ханаа́нска, и́же ца́рствова во Асо́рѣ. И воєво́да си́лы єго́ Сіса́ра, и то́й живя́ше во Арісо́ѳѣ язы́ковъ.
3
І возопи́ша си́нове Ізра́їлеви ко Го́споду, я́ко де́в'ять сот колесни́ць желі́зних бя́ше єму́; і той озло́би Ізра́їля зіло́ літ два́десять.
3
И возопи́ша сы́нове Ізра́илевы ко Го́споду, я́ко де́вять со́тъ колесни́цъ желѣ́зныхъ бя́ше єму́: и то́й озло́би Ізра́иля зѣло́ лѣ́тъ два́десять.
4
І Девво́ра, жена́ проро́чиця, жена́ Лафидо́фова, сія́ судя́ше Ізра́їлю в то вре́м'я;
4
И Девво́ра, жена́ проро́чица, жена́ лафідо́ѳова, сія́ судя́ше Ізра́илю въ то́ вре́мя:
5
і сія́ жив'я́ше под фі́ніком Девво́ра между́ Ра́мою і между́ Вефи́лем, в горі́ Єфре́млі; і восхожда́ху си́нове Ізра́їлеви к ней та́мо на суд.
5
и сія́ живя́ше подъ фі́нікомъ Девво́ра между́ Ра́мою и между́ Веѳи́лемъ, въ горѣ́ Єфре́мли: и восхожда́ху сы́нове Ізра́илевы къ не́й та́мо на су́дъ.
6
І посла́ Девво́ра, і призва́ Вара́ка си́на Авинеє́мля із Кеде́са Неффали́мова, і рече́ к нему́: не запові́да ли тебі́ Госпо́дь Бог Ізра́їлев? і по́йдеши в го́ру Фаво́р, і по́ймеши с собо́ю де́сять ти́сящ муже́й от сино́в Неффали́млих і от сино́в Завуло́них;
6
И посла́ Девво́ра, и призва́ Вара́ка сы́на Авінеє́мля изъ Кеде́са Нефѳалі́мова, и рече́ къ нему́: не заповѣ́да ли тебѣ́ Госпо́дь Бо́гъ Ізра́илевъ? и по́йдеши въ го́ру Ѳаво́ръ, и по́ймеши съ собо́ю де́сять ты́сящъ муже́й от сыно́въ Нефѳалі́млихъ и от сыно́въ Завуло́нихъ:
7
і приведу́ к тебі́ в водоте́ч Кисо́нь Сиса́ру, воєво́ду си́ли Іави́ни, і колесни́ці єго́, і мно́жество (вой) єго́, і преда́м єго́ в ру́ки твоя́.
7
и приведу́ къ тебѣ́ въ водоте́чь кісо́нь Сіса́ру воєво́ду си́лы Іаві́ни, и колесни́цы єго́, и мно́жество (во́й) єго́, и преда́мъ єго́ въ ру́ки твоя́.
8
І рече́ к ней Вара́к: а́ще по́йдеши со мно́ю, пойду́, і а́ще не по́йдеши со мно́ю, не пойду́; я́ко не вім дне, в о́ньже благоустро́їть Госпо́дь а́нгела со мно́ю.
8
И рече́ къ не́й Вара́къ: а́ще по́йдеши со мно́ю, пойду́, и а́ще не по́йдеши со мно́ю, не пойду́: я́ко не вѣ́мъ дне́, въ о́ньже благоустро́итъ Госпо́дь а́нгела со мно́ю.
9
І рече́ Девво́ра к нему́: іду́щи пойду́ с тобо́ю; оба́че віждь, я́ко не бу́деть тебі́ сла́ва на путі́, в о́ньже ти і́деши; поне́же в ру́ку же́нську преда́сть Госпо́дь Сиса́ру. І воста́ Девво́ра і по́йде с Вара́ком до Ка́диса.
9
И рече́ Девво́ра къ нему́: иду́щи пойду́ съ тобо́ю: оба́че вѣ́ждь, я́ко не бу́детъ тебѣ́ сла́ва на пути́, въ о́ньже ты́ и́деши: поне́же въ ру́ку же́нску преда́стъ Госпо́дь Сіса́ру. И воста́ Девво́ра и по́йде съ Вара́комъ до Ка́диса.
10
І воззва́ Вара́к Завуло́на і Неффали́ма до Ка́диса, і пойдо́ша вслід єго́ де́сять ти́сящ муже́й, і і́де с ним Девво́ра.
10
И воззва́ Вара́къ Завуло́на и Нефѳалі́ма до Ка́диса, и поидо́ша вслѣ́дъ єго́ де́сять ты́сящъ муже́й, и и́де съ ни́мъ Девво́ра.
11
І Хаве́р Кине́й отлучи́ся от Ке́ни і от сино́в Іова́ва, у́жика Моїсе́йова; і потче́ ку́щу свою́ под ду́бом почива́ющих, і́же єсть при Кеде́сі.
11
И хаве́ръ кіне́й отлучи́ся от ке́ны и от сыно́въ Іова́ва, у́жика Моисе́ова: и потче́ ку́щу свою́ подъ ду́бомъ почива́ющихъ, и́же є́сть при Кеде́сѣ.
12
І возвісти́ша Сиса́рі, я́ко взи́де Вара́к, син Авинеє́мль, на го́ру Фаво́р.
12
И возвѣсти́ша Сіса́рѣ, я́ко взы́де Вара́къ сы́нъ Авінеє́мль на го́ру Ѳаво́ръ.
13
І созва́ Сиса́ра вся колесни́ці своя́, де́в'ять сот колесни́ць желі́зних, і вся лю́ди, і́же с ним, от Арисо́фа язи́ков в водоте́ч Кисо́нь.
13
И созва́ Сіса́ра вся́ колесни́цы своя́, де́вять со́тъ колесни́цъ желѣ́зныхъ, и вся́ лю́ди и́же съ ни́мъ, от Арісо́ѳа язы́ковъ въ водоте́чь кісо́нь.
14
І рече́ Девво́ра к Вара́ку: воста́ни, я́ко сей день, в о́ньже предаде́ Госпо́дь Сиса́ру в ру́ку твою́, зане́ Госпо́дь ізи́деть пред тобо́ю. І сни́де Вара́к с гори́ Фаво́р, і де́сять ти́сящ муже́й вслід єго́.
14
И рече́ Девво́ра къ Вара́ку: воста́ни, я́ко се́й де́нь, въ о́ньже предаде́ Госпо́дь Сіса́ру въ ру́ку твою́, зане́ Госпо́дь изы́детъ предъ тобо́ю. И сни́де Вара́къ съ горы́ Ѳаво́ръ, и де́сять ты́сящъ муже́й вслѣ́дъ єго́.
15
І сотре́ Госпо́дь Сиса́ру і вся колесни́ці єго́ і весь полк єго́ о́стрієм меча́ пред Вара́ком. І сни́де Сиса́ра с колесни́ці своєя́ і побіже́ нога́ми свої́ми.
15
И сотре́ Госпо́дь Сіса́ру и вся́ колесни́цы єго́ и ве́сь по́лкъ єго́ о́стріємъ меча́ предъ Вара́комъ. И сни́де Сіса́ра съ колесни́цы своєя́ и побѣже́ нога́ми свои́ми.
16
І Вара́к гоня́й вслід колесни́ць єго́ і вслід полка́, да́же до дубра́ви язи́ков. І паде́ весь полк Сиса́рин о́стрієм меча́, не оста́ся ні єди́н.
16
И Вара́къ гоня́й вслѣ́дъ колесни́цъ єго́ и вслѣ́дъ полка́, да́же до дубра́вы язы́ковъ. И паде́ ве́сь по́лкъ Сіса́ринъ о́стріємъ меча́: не оста́ся ни єди́нъ.
17
І Сиса́ра убіже́ нога́ми свої́ми в ку́щу Іаї́лі, жени́ Хаве́ра Кине́єва; я́ко мир бя́ше между́ Іави́ном, царе́м Асо́рським і между́ до́мом Хаве́ра Кине́єва.
17
И Сіса́ра убѣже́ нога́ми свои́ми въ ку́щу Іаи́ли, жены́ хаве́ра кіне́єва: я́ко ми́ръ бя́ше между́ Іаві́номъ царе́мъ Асо́рскимъ и между́ до́момъ хаве́ра кіне́єва.
18
І ізи́де Іаї́ль во срі́теніє Сиса́рі і рече́ к нему́: уклони́ся, господи́не мой, уклони́ся ко мні, не бо́йся. І уклони́ся к ней в ку́щу, і покри́ єго́ оде́ждею своє́ю.
18
И изы́де Іаи́ль во срѣ́теніє Сіса́рѣ и рече́ къ нему́: уклони́ся, господи́не мо́й, уклони́ся ко мнѣ́, не бо́йся. И уклони́ся къ не́й въ ку́щу: и покры́ єго́ оде́ждею своє́ю.
19
І рече́ Сиса́ра к ней: напо́й м'я ма́ло води́, я́ко возжажда́х. І отріши́ міх мле́чний, і напої́ єго́, і покри́ єго́.
19
И рече́ Сіса́ра къ не́й: напо́й мя́ ма́ло воды́, я́ко возжажда́хъ. И отрѣши́ мѣ́хъ мле́чный, и напои́ єго́, и покры́ єго́.
20
І рече́ к ней Сиса́ра: ста́ни во две́рех ку́щи, і бу́деть а́ще кто при́йдеть к тебі́, і вопро́сить тя, і рече́ть: єсть ли зді муж? І рече́ши: ність.
20
И рече́ къ не́й Сіса́ра: ста́ни во две́рехъ ку́щи, и бу́детъ а́ще кто́ пріи́детъ къ тебѣ́, и вопро́ситъ тя́, и рече́тъ: є́сть ли здѣ́ му́жъ? и рече́ши: нѣ́сть.
21
І взя Іаї́ль, жена́ Хаве́рова, кол ку́щний, і взя млат в ру́ку свою́, і вни́де к нему́ ти́хо, і водрузи́ кол во скра́нії єго́, і пронзе́ до землі́; і сей утру́ждся спа́ше, і і́здше.
21
И взя́ Іаи́ль, жена́ хаве́рова, ко́лъ ку́щный, и взя́ мла́тъ въ ру́ку свою́, и вни́де къ нему́ ти́хо, и водрузи́ ко́лъ во скра́ніи єго́, и пронзе́ до земли́: и се́й утру́ждся спа́ше, и и́здше.
22
І се, Вара́к гоня́й Сиса́ру. І ізи́де Іаї́ль во срі́теніє єму́ і рече́ єму́: прийди́, і покажу́ тебі́ му́жа, єго́же ти і́щеши. І вни́де к ней, і се, Сиса́ра лежа́ше мертв, і кол во скра́нії єго́.
22
И се́, Вара́къ гоня́й Сіса́ру. И изы́де Іаи́ль во срѣ́теніє єму́ и рече́ єму́: пріиди́, и покажу́ тебѣ́ му́жа, єго́же ты́ и́щеши. И вни́де къ не́й, и се́, Сіса́ра лежа́ше ме́ртвъ, и ко́лъ во скра́ніи єго́.
23
І покори́ Госпо́дь Бог в той день Іави́на, царя́ Ханаа́ня пред си́ни Ізра́їлевими;
23
И покори́ Госпо́дь Бо́гъ въ то́й де́нь Іаві́на царя́ Ханаа́ня предъ сы́ны Ізра́илевыми:
24
і хожда́ше рука́ сино́в Ізра́їлевих ходя́щи, і ожесточи́ся на Іави́на, царя́ Ханаа́нська, до́ндеже істреби́ша єго́.
24
и хожда́ше рука́ сыно́въ Ізра́илевыхъ ходя́щи, и ожесточи́ся на Іаві́на царя́ Ханаа́нска, до́ндеже истреби́ша єго́.