¹

Моли́тва ни́щаго, єгда́ уни́єть і пред Го́сподем проліє́ть моле́ніє своє́, 101.

²

Го́споди, усли́ши моли́тву мою́, і вопль мой к Тебі́ да при́йдеть.

³

Не отврати́ лиця́ Твоєго́ от мене́; в о́ньже а́ще день скорблю́, приклони́ ко мні у́хо Твоє́; в о́ньже а́ще день призову́ Тя, ско́ро усли́ши м'я.

⁴

Я́ко ізчезо́ша, я́ко дим, дні́є мої́, і ко́сті моя́, я́ко суши́ло, сосхо́шася.

⁵

Уя́звлен бих, я́ко трава́, і і́зсше се́рдце моє́, я́ко заби́х сні́сти хліб мой.

⁶

От гла́са воздиха́нія моєго́ прильпе́ кость моя́ пло́ті моє́й.

⁷

Уподо́бихся нея́сити пусти́нній, бих, я́ко нощни́й вран на ни́рищі [на разва́лині].

⁸

Бдіх і бих, я́ко пти́ця осо́б'ящаяся на зді [на кро́ві].

⁹

Весь день поноша́ху мі вразі́ мої́, і хва́лящії м'я мно́ю [на м'я] кленя́хуся.

¹⁰

Зане́ пе́пел, я́ко хліб, ядя́х і питіє́ моє́ с пла́чем растворя́х,

¹¹

от лиця́ гні́ва Твоєго́ і я́рости Твоєя́ — я́ко возне́с низве́ргл м'я єси́.

¹²

Дні́є мої́ я́ко сінь уклони́шася, і аз я́ко сі́но ізсхо́х.

¹³

Ти же, Го́споди, во вік пребива́єши, і па́м'ять Твоя́ в род і род.

¹⁴

Ти воскре́с уще́дриши Сіо́на; я́ко вре́м'я уще́дрити єго́, я́ко при́йде вре́м'я.

¹⁵

Я́ко благоволи́ша раби́ Твої́ ка́меніє [о ка́менії] єго́, і персть єго́ уще́дрять.

¹⁶

І убоя́ться язи́ци і́мене Госпо́дня, і всі ца́ріє зе́мстії сла́ви Твоєя́;

¹⁷

я́ко сози́ждеть Госпо́дь Сіо́на і яви́ться во сла́ві Своє́й.

¹⁸

Призрі́ на моли́тву смире́нних і не унічижи́ моле́нія їх.

¹⁹

Да напи́шеться сіє́ в род ін, і лю́діє зи́ждемії восхва́лять Го́спода;

²⁰

я́ко прини́че с висоти́ святи́я Своєя́, Госпо́дь с небесе́ на зе́млю призрі́,

²¹

усли́шати воздиха́ніє окова́нних, разріши́ти си́ни умерщвле́нних;

²²

возвісти́ти в Сіо́ні і́м'я Госпо́днє і хвалу́ Єго́ во Ієрусали́мі,

²³

внегда́ собра́тися лю́дем вку́пі і царе́м, є́же рабо́тати Го́сподеві.

²⁴

Отвіща́ Єму́ на путі́ крі́пости Єго́; умале́ніє дній мої́х возвісти́ мі;

²⁵

не возведи́ мене́ во преполове́ніє дній мої́х; в ро́ді родо́в лі́та Твоя́.

²⁶

В нача́ліх Ти, Го́споди, зе́млю основа́л єси́, і діла́ руку́ Твоє́ю суть небеса́.

²⁷

Та поги́бнуть, Ти же пребива́єши; і вся, я́ко ри́за, обетша́ють, і, я́ко оде́жду, свіє́ши я, і ізміня́ться.

²⁸

Ти же То́йжде єси́, і лі́та Твоя́ не оскуді́ють.

²⁹

Си́нове раб Твої́х вселя́ться, і сі́м'я їх во вік іспра́виться.